وەزارەتا چاندنێ ئینان و برنا چەند کەلوپەلان ل گەل بەغدا ڕاگرت
ئەڤرۆ نیوز:
وەزارەتا چاندن و ژێدەرێن ئاڤێ یا حوکمەتا ھەرێما کوردستانێ بڕیار دا، فرێکرنا کەرەستێن دەستپێکی یێن بەرھەمئینانا ئالیکا گیانەوەران و ڤاکسینا دژی نەخۆشیێن بالندان بۆ ناڤەراست و باشورێ عیراقێ ڕاگریت و رێگریێ ژی ل ئینانا ماسی و کەسکاتیێ وان دەڤەران بکەت.
ئەڤ بڕیارا جڤاتا وەزارەتا چاندن و ژێدەرێن ئاڤێ یا حوکمەتا ھەرێما کوردستانێ پشتی 56 رۆژان دھێت ژ ڕاگرتنا فرێکرنا مریشکێن ھەرێما کوردستانێ بۆ ناڤەراست و باشورێ عیراقێ کو ب بڕیارەکا وەزارەتا چاندنا عیراقێ ھاتینە ڕاگرتن.
عەباس عەلی، رێڤەبەرێ سامانێ گیانەوەری ل وەزارەتا چاندن و ژێدەرێن ئاڤێ یا حوکمەتا ھەرێما کوردستانێ ئاشکرا کر، بڕیارا وەزارەتا چاندنا عیراقێ ئەوا ل دۆر ڕاگرتنا فرێکرنا مریشکێن ھەرێما کوردستانێ بۆ ناڤەراست و باشورێ عیراقێ دا، زیانێن مەزن گەھشتینە پرۆژێن خودانکرنا مریشکان ل ھەرێما کوردستانێ، چونکو بەرھەمئینانا کیلۆیەکا مریشکێ دو ھزار و 200 دینار لێ دھێنە مەزاختن و بۆ رووداو گۆت :”ژ ئەگەرێ ڤێ بڕیارا بەغدا ب ھزار و 600 دیناران دھێتە فرۆتن”.
بەری دەمەکی وەزارەتا چاندنا عیراقێ فرێکرنا مریشک و ھێکێن ھەرێما کوردستانێ، ب ھێجەتا ھەبوونا نەخۆشیا ئەنفلەوەنزا بالندان ل پرۆژێن دھۆکێ ڕاگرت، بۆ ڤێ مەرەمێ ژی سێ شاندێن بەغدا سەرەدانا ھەرێما کوردستانێ کرن و گۆت: “بڕیارە ئەڤرۆ 7/3/2016 شاندەکێ دی یێ وەزارەتا چاندنا عیراقێ سەرەدانا ھەولێر بکەت”.
رێڤەبەرێ سامانێ گیانەوەری ل وەزارەتا چاندنا ھەرێما کوردستانێ خویا کر، شەش نۆشدارێن ڤێتێرنەری یێن بەغدا ھاتینە ھەرێما کوردستانێ، پشتی ڤەکۆلینان ب رێیا ڕاپۆرتان ئەم پشتراستکرینە کو نەخۆشیا ئەنفلەوەنزا بالندان نەمایە و ھاتیە کۆنترولکرن، لێ وەزارەتا چاندنا عیراقێ یا بەردەوامە ل سەر رێگریکرنێ ل فرێکرنا مریشکێن ھەرێما کوردستانێ بۆ دەڤەرێن ناڤەراست و باشورێ عیراقێ.
ل دووڤ بڕیار جڤاتا وەزارەتا چاندنێ یا حوکمەتا ھەرێما کوردستانآ، ژ نوکە وێڤە رێ ناھێتە دان ماسی و کەسکاتی ژ ناڤەراست و باشورێ عیراقێ بھێنە ھەرێما کوردستانێ، دیسا ژ ھەرێمێ ژی رێ ناھێتە دان کەرەستێن دەستپێکی یێن بەرھەمئینانا ئالیکا گیانەوەران و ڤاکسینا دژی نەخۆشیێن بالندان بۆ ناڤەراست و باشوورێ عیراقێ بھێنە فرێکرن.
سالا 2015 بەرھەمێ پرۆژێن خودانکرنا مریشکان ل ھەرێما کوردستانێ 89 ھزار تەن گوشتێ مریشکان و 425 ملیۆن ھێک ھاتبوونە بەرھەمئینان، ژ وی بەرھەمی ژی 80% بۆ دەڤەرێن ناڤەراست و باشورێ عیراقێ دھاتە فرێکرن، لێ نوکە ب بڕیارەکا وەزارەتا چاندنا عیراقێ ھاتیە ڕاگرتن.
وەزارەتا چاندنێ یا حوکمەتا ھەرێما کوردستانێ، بۆ دیتنا بازارەکێ نوو، رێ دایە بەرھەمێ مریشکان و ھێک ل پارێزگەھا دھۆکێ بۆ سووریێ بھێنە فرێکرن.
