هوز و شێخێن پارێزگه‌ها نه‌ینه‌وا هه‌لويستێ خوه ل دۆر ره‌فتارێن داعش نیشا دده‌ن
ئه‌ڤرۆ نیوز: ره‌وان نهێلى:
ئه‌ڤرۆ شێخ و هوزێن پارێزگه‌ها نه‌ینه‌وا ل دهۆكێ پشتى ل گه‌ل جڤاتا پارێزگه‌ها نه‌ینه‌وا كوم بووین، د به‌یاننامه‌كێ دا بێ گونه‌هییا خوه ژ هه‌ر ره‌فتاره‌كێ نیشادان كو داعش ده‌رحه‌ق ئێزدی و ره‌ڤاندیان دكه‌ت.
خالد ئه‌حمه‌د شێخى هوزا شه‌مه‌ر ب ناڤێ شێخ و هوزێن پارێزگه‌ها نه‌ینه‌وا د به‌یاننامه‌كێ دا ئاماژه ب وێ یه‌كێ كر كو ده‌ستێ وان د چ ره‌فتاره‌ك و كریاره‌كا داعش دا نینه كو دژى ئێزدى و ره‌ڤاندیان دكه‌ن و گۆت” ره‌فتارێن داعش دكه‌ت دژى ئێسلامێ و مروڤایه‌تیێ نه”.
خالد ئه‌حمه‌د هه‌روه‌سا ئاماژه ب وێ یه‌كێ كر كو ئه‌و هه‌ر ده‌ستدرێژیه‌كا سه‌ر نامووسا ئێزدیان، ب ده‌ستدرێژى ل سه‌ر هه‌موو خه‌لكێ نه‌ینه‌وا دزانن ب حوكمێ هاولاتیبوون و جیرانى.
شێخى هوزا شه‌مه‌ر سوپاسیا خه‌لكێ كوردستانێ ب تایبه‌ت هه‌ولویستێ حوكمه‌تا هه‌رێما كوردستانێ كر كو ب ملیونه‌ها ئاواره ڤه‌حه‌واندى.
ژ ئالیێ خوه‌ڤه، بشار كیكی سه‌رۆكێ جڤاتا پارێزگه‌ها نه‌ینه‌وا ئه‌ڤ هه‌لوێستێ هوزێن پارێزگه‌ها نه‌ینه‌وا ب ئه‌رێنى زانى و ئاماژه ب وێ یه‌كێ كر كو ئه‌ڤ هوزه د به‌رهه‌ڤن ب ره‌نگه‌كێ پراكتیكى روو ب روو داعش ببن.
