پرانیا میدیا کوردی د خزمەتا دوژمنان دا دایە!
ژ مێژەیە دھێتە گۆتن و مە دزانی ژی کو ئەڤ ژمارا زۆرا دەزگەھێن راگەھاندنێ ب ڤی رەنگی وبێ سانسۆر مەرەما من سانسۆر ژ بۆ (پاراستنا بەرژوەندیا گشتی و نھێنیێن ئاسایشا نەتەوەیی) زەرەر و زیانێن وان زێدەترن ژ مفایێ وان، باوەرناکەم د چ وەلاتان دا راگەھاندن ھۆسا یا ئازاد بیت وەکی ل ھەرێما کوردستانێ یا ئازاد، یا ئازاد نە ب واتەیا بدەستڤەئینانا پێزانینان بەلکو ئازادە ژ بۆ ھندێ ھەر تشتێ بڤێت بێژن و بنڤیسن وبەلاڤکەن، کا چاوا وان پێ خۆشە یان ژی چاوا دێ د بەرژوەندیا وان ودەزگەھێ وان دا بیت! نە کا چاوا د بەرژەندیا گشتی دایە، ھەر وەک ئەم دزانین نھا وەلاتێ مە د قووناغەکا کەلەک ھەستیار دا دبۆریت و ئەم و وەلاتێ مە نھا قووناغەکا مەترسیدار دا د بۆرین و ئەرکێ مە ھەمیانە ئەم ھەمی ب بەرپرسیارانە سەرەدەریێ د گەل ڤێ قووناغێ دا بگەین و بەرژوەندیا گشتی د سەر بەرژوەندیا تایبەت دا بێخین، ب تایبەتی ژی د وارێ راگەھاندنێ وەکو ئالاڤەکێ گرنک و کارتێکەر، چونکی د دەمێ دروستبوون و پەیدابوونا شەڕی دا ل ھەر وەلاتەکی یان ل ھەر جھەکێ دونیایێ دا بیت ھەر لایەنەکێ شەری دێ ھەول دەت زۆرترین زانیاریان ل سەر لایەنێ بەرامبەر بدەستخوەڤە بینیت کا ئەرێ لایەنێ بەرامبەر یێ لاوازە یان یێ ب ھێزە و یان مەزنترین کێشەیێن وی چ نە ژ لایێ ئابووری و لەشکری و ورەیی ڤە د چ ئاست دایە وھتد. ژبۆ ھندێ باشترین پلان ل سەر وان زانیاریان بدانیت و بشێت ب رێیا وان زانیاریان مەزنترین زیان بگەھینیتە لایەنێ بەرامبەر، زۆر جاران بۆ بدەستڤەئینانا ئێک زانیاری دبیت ب ملیۆنان دۆلار بھێنە مەزاختن، چونکی دبیت ئێک زانیاری ببیتە ئەگەرێ مەزنترین سەرکەفتن یان مەزنترین شگەستن بۆ لایەنەکی، لێ مخابن راگەھاندنا مە یا کوردی ب تایبەتی ژی راگەھاندنا باشوورێ کوردستانێ دوور ژ ھەمی بنەمایێن بەرژوەندیا گشتی و یا نەتەوەیی کاردکەت وگرنکترین زانیاری ددەنە دوژمنی ئانکو ددەنە تیرورستێن داعش ئەوژی ب رێکا گرتەیێن ڤیدیۆیی و وێنە ونڤیسینێن پر زانیاری بۆ نموونە، زانیاری ل سەر ھێرشێن پێشمەرگەی ب دەم وجە ڤە، زانیاری ل سەر چوونا پێشمەرگەی بۆ چوونا کۆبانێ ب وەخت و جۆرێ چەکی و ئەرکێ وان کا چی یە وکا ژمارا وان چەندە دێ ل کیژ رێیێ راچن و ھەتا دووماھیێ، ھندەک دەزگەھێن راگەھاندنێ ھند گرنکیێ ب کوشتنا داعشان نادەن ھندی گرنکیێ ب شەھیدان ددەن ودیمەنێن جەرکبر نیشا ددەن کو ئەڤ چەندە مۆرالا دوژمنی بلند دکەت، ھەروەسا د گەلەک کەنالێن کوردی دا دبینین کو ھندەک دیمەنێن مەشق و راھێنان و رەفتارێن ھندەک پێشمەرکان وجۆرێن چەکێن وان نیشا ددەن کو ب راستی ژی بۆ دوژمنان خزمەتەکا مەزنە! ئانکو ب گشتی بێژین پاراستنا نھێنیێن لەشکری ل دەڤ دەزگەھێن مە یێن راگەھاندنێ نینە و ئەڤ چەندە تەمام د زەرەرا مە دایە و د خزمەتا دوژمنێ مەدایە، ھەروەسا مالپەرێن جڤاکی ژی ل وەلاتێ مە، ئەڤرۆ کەتینە د خزمەتا داعشێ دا، چونکی زۆر جاران ھێشتا تەرمێ شەھیدی نە گەھشتی یە دھۆکێ یان ھەر جھەکێ دی یێ کوردستانێ دێ بینین وێنێ وی و پلەیا وی یا لەشکری ھاتە بەلاڤکرن! مخابن خۆزی مە زانی با کا ئەڤ چەندە چەند خزمەتا دوژمنی دکەت!، لەوما گرنکە پێداچوونەکا راست و دروست د قانوون و رێنمایێن تایبەتێن دەزگەھێن راگەھاندنێ دا بھێتەکرن، ئەو ژی ژ بۆ ھندێ ل جھێ خزمەتا دوژمنی بھێتەکرن خزمەتا وەلاتێ مە بھێتەکرن.
