دڤێت وەکو کورد پێداچوونێ د پەیوەندیێن خوە ل گەل ئەمریکا دا بکەین
ب، سهرجان مەحمود:
هەڤسەرۆکا پەیوەندیێن دەرڤە یا رێڤەبەریا خوەسەر دیار دکەت وان نەڤێت چو شەڕێن نوو د ناڤبەرا هەسەدێ و شامێ دا روو بدەن و وەکو کورد وان دڤێت پێداچوونێ د پەیوەندیێن خوە ل گەل ئەمریکا دا بکەن و ئەو یەک گەلەک گرنگە.
ئیلهام ئەحمەد هەڤسەرۆکا ئۆفیسا پەیوەندیێن دەرڤە یا رێڤەبەریا خوەسەر دیار کر، پشتی روودانێن ل سووریێ و رۆژئاڤایی کوردستانێ نها رەوشەکا نوو هاتیە پێش، بێگومان گەلەک بەحسێ هەلوەستێ ئەمریکا ل دۆر کوردان دهێتە کرن و وەکو کوردێن رۆژئاڤایێ کوردستانێ وان دڤێت پێداچوونێ د پەیوەندیێن خوە ل گەل ئەمریکا دا بکەن و گۆت: (ئەمریکا ژ بۆ بەرژەوەندیێن خوە هاتبوو سووریێ و مە وی دەمی ژی ئەو یەک دزانی، مە بەرژەوەندیێن هەڤپشک ل گەل ئەمریکا هەنە، لێ ژ بۆ پاشەرۆژا مە وەکو کورد گرنگە ئەم پێداچوونێ د پەیوەندیێن خوە یێن ل گەل ئەمریکا دا بکەین، دڤێت ئەم پەیمانێن نوو ل گەل ئەمریکا ئیمزا بکەین).
ئیلهام ئەحمەد ئەو یەک ژی دیار کر، بەری نها هژمارەک زێدە ژ ئەندامێن کۆنگرێسی و دۆستێن کوردان ل ئەمریکا نەرازیبوونا خوە ل هەمبەر سیاسەتا ئەمریکا ل دۆر کوردان دیار کربوون و داخواز ژ ترامپی هاتبوو کرن کو رێ نەدەت تۆم باراک دژبەریا کوردان بکەت و ئەمریکا ژی نها دڤێت هەلوەستێ خوە بگوهۆڕینیت و پشتەڤانیێ ل مافێن رەوا یێن گەلێ کورد ل سووریێ بکەت.
سەبارەت ب پەیوەندیێن وان ل گەل شامێ ژی ناڤهاتیی دیار کر، وەکو کوردێن سووریێ مە دڤێت پەیوەندیێن خوە ل گەل شامێ باش بکەین، نها دانوستاندن هەنە، لێ بێگومان هندەک تشت هەنە دڤێت شام وان بجه بینیت، دڤێت شام وەکو شریکێ سووریێ سەرەدەریێ ل گەل کوردان بکەت، نابیت وەکو سەردەمێ رژێما بەعسی کورد وەکو وەلاتیێن پلە دو بهێنە دیتن، ئەو یەک ب چو رەنگەکێ ناهێتە قەبوول کرن، دڤێت کورد د هەموو سازیێن سیاسی و سەربازی و خزمەتگوزاری دا پشکدار بن و گۆت: (مە دڤێت کورد ل سووریێ وەکو عەرەبان خوەدانێ هەمان مافی بن، دڤێت دەستهەلاتدارێن شامێ ژی هەلوەستێ وان وەسا بیت، ئێدی کەس نەشێت ل ژێر ناڤێن جودا جودا بزاڤا ڤێ یەکێ بکەت کوردان ژ مافێن وان یێن سەرەکی بێبار بکەت، ئەو یەک خزمەتا سووریا نوو ژی ناکەت).
هەڤسەرۆکا ئۆفیسا پەیوەندیێن دەرڤە یا رێڤەبەریا خوەسەر د دووماهیا ئاخڤتنا خوە دا ئەو یەک ژی دیار کر، راستە ئەوا کوردان ل سووریێ دڤێت هێشتا بدەستڤە نەئیناینە، لێ خەباتێن وان بەردەوامن و هەموو سازیێن رێڤەبەریا خوەسەر دێ وەکو خوە مینن و تایبەتمەندیا رۆژئاڤایێ کوردستانێ دێ هێتە پاراستن.
