سیروان بارزانی بۆ (CNN): ھێزێن عیراقێ بێی پێشمەرگەى نەشێن مووسل رزگار بکەن
ئەڤرۆ نيوز:
لیوا سیروان بارزانی بەرپرسێ میحوەرێ گوێر یێ ھێزێن پێشمەرگێ ھەرێما کوردستانێ، ھێزێن عیراقێ بێی پشکداریا ھێزێن پێشمەرگەی نەشێن رزگارکرنا باژێرێ مووسلێ بکەن، ئاماژەدا ھندێ، نابیت باژێرێ مووسلێ ب ئارمانجەکا ب سناھی ژ ئالیێ لەشکرێ عیراقێ ڤە بھێتە دانان.
سیروان بارزانی بۆ کەنالێ (CNN) گۆت: باوەرناکەم ھێزێن عیراقێ بشێن وێ ئارمانجێ بتنێ بجە بینن بیێ ھێزێن پێشمەرگەی و چەکدارێن شیعی، مووسل بۆ وانا ئارمانجەکا بەسناھی نینە.
سەبارەت بەرسڤا پرسا دەمێ ھاتیە دانان بۆ رزگارکرنا مووسلێ، لیوا سیروان بارزانی گۆت: سەبارەت ھێزا پێشمەرگەی ژ ئالیێ باکوور ئەم ب دووراتیا 14 کیلومەتران ژ باژێرێ مووسلێ دوورین، و ژئالیێ رۆژھەلاتێ ڤە ب دووراتیا 30 کیلومەتران، ژ ئالیێ باژێرکێ حەمدانیێ ڤە کێمتر ژ 10 کیلومەتران ئەم نێزیکی مووسلێ ینە.
دبەرسڤا پرسیارەکێ دا سەبارەت کا دێ ئەو پرۆسە چەند ڤەگێشیت؟، فەرماندە سیروان بارزانی گۆت: وەک پێشمەرگە پرۆسا رزگارکرنێ ددەستێن مەدا نینە، ئەو کار ب بەغدایێ ڤە ێی گرێدایە، سیاسەتمدار ل بەغدا گەلەک دھەستیارن سەبارەت مووسلێ یا جودایە چونکە پڕانیا خەلکێ وێ سونی نە، ئەم نزانین کا دێ چەکدارێن شیعی پشکداری شەرێ مووسلێ بن یان نە، ھەروەسا رۆلێ پێشمەرگەی نەیێ ئاشکرایە، و ئەز باوەرناکەم ئەم دناڤا باژێرێ مووسلێ دا پشکداریا د شەری دا بکەین.
ھەروەسا ل دۆر رۆلێ نوکە یێ پێشمەرگەی کا ئەو رێخوشکرنەکە بۆ لەشرێ عیراقێ و ھێرشکرنا ل سەر مووسلێ؟ سیروان بارزانی گۆت: ھەلبەت راستە و پاراستنا سنۆرێ کوردستانێ و پاشەڤەبرنا چەکدارێن داعشێ یە، چونکی ھێشتا ئەم پارچەک ژ عیراقێ ینە،و پێدڤیە ئەم ھاریکاریا لەشکرێ عیراقێ بکەین، چونکی مانا تیرورستان ئانکو بەردەوامیا ھێرشان ل سەر مە و رەوشا ئێمناھیێ دێ یا ئالۆز بیت، دیسا چونکی ئەم پارچەکین ژ عیراقێ پێدڤیە ئەم سنۆران بگرین و ھاریکاریا لەشکرێ عیراقێ بکەین.
