چاڤدێرەک: یا دوور نینە ھەرێم جارەکا دی ببیتە دو ئیدارەی
ئەڤرۆ نیوز:
چاڤدێرەکێ سیاسی بەحسێ چێبوونا بەرێن سیاسی دکەت ل کوردستانێ بۆ رۆژناما ئەڤرۆ گۆت: چێبوونا بەرێن سیاسی بۆ رێککەفتنا گوران و ئێکەتیێ ڤە دگەریت و ئێکەتی شیا ب رۆلەکی رابیت بۆ نێزیبوونا پارتی و گوران لێ ئەو رۆل نە گێرا، دیسا ل دووڤ دا خویانیێن سەرکردێن گوران چو چارە نەدیتن ژبلی ڤێ رێککەفتنێ ل گەل ئێکەتیێ بکەن، بزاڤا گۆڕان ھزر کر بچنە گەل ئێکەتیێ ئەو خودان جەماوەرە و ئێکەتیێ دەست ھەلات و ھێز و چەک ھەیە دێ بھێز کەڤن و دیار بوو ئەڤ بەرە بەرامبەر پارتی دیموکراتی کوردستان ھاتە دروستکرن، داخویانی ب ئاشکرایی دان کو دێ ھەڤسەنگی یا سیاسی ھێتە گوھۆڕین و تایبەت بەغدا کورسیکێن ھەر دو قەوارێن سیاسی ژ پارتی پتر لێ ھاتن.
دیندار نەجمان دۆسکی بۆ رۆژناما ئەڤرۆ ئاشکراکر کو ئەڤە بۆ دەرگەە بۆ چێبوونا چەندین بەریێن دی وەک بەرەکێ ئیسلامی ژ ئێکگرتوو و بزاڤا ئیسلامی و کومەلا ئیسلامی، دیسا چێبوونا بەرەکی ژ سوشیالست و شوعی و زحمەتکێشان، چێبوونا ئەڤان بەران دو ئەگەر ھەنە، ئێک رەوشا سیاسی یا نوکە کوردستانێ ئێک ژ ئەگەرانە، دیسا ترسا ھەلبژارتنان ھەیە، چونکە ھەلبژارتن ل کوردستانێ بھێنەکرن دبیت ئەڤە ژ ئەنجامان نە رازی بن و دەنگێن ب دەست ڤە بینن.
چاڤدێرێ سیاسی دیندار نەجمان، ل دۆر بەرەیێ ئیسلامی دیارکر کو ئەڤە دەست پێشخەریا ێلاحەدین بھائەدین بوویە، رەخنە ل سەرکرداتیا ئێکگرتوو ھاتنەکرن و تایبەت ئەمیندارێ گشتیی، گەلەک ژ ئەندامێن سەرکرداتی یا ئێکگرتوو یا نوکە دژی وێ سیاسەتێ بوون، لێ پشتی دەرکەفتین چو ژ سیاسەتا ئێکگرتوو نەھاتە گوھۆڕین و ھەمان سیاسەتا بەرێ ھاتە پەیروکرن، دیسا ئەو پرۆژێ ئەمیندارێ گشتیی بۆ نێزکیبوونا پارتی و بزاڤا گوران پرۆژەی سەر نەگرت و بەرسف بوو نەبوو ژ ھەر دو ئالیان ڤە، ھەرسێ پارتێن ئیسلامی ترسا ھەلبژارتنان ھەیە و تایبەت ئێکگرتوو گەلەک ژ دەنگێن خوە ترسیت و ئەگەر دەنگ کێم بن شکەستنە بۆ خودێ ئەمیندارێ گشتیێ ئێکگرتوو یێ نوکە، نەرازیبوونەک ل ھەمبەر گوتار و ھەلویستێ ئێکگرتوو ھەیە و دیسا گوران ژی ژ ھەلبژارتنان ترسیت و گوتارا ئێکگرتوو نەیا زەلال بوویە، بەرامبەر گوتارا کومەلا ئیسلامی یا زەلال بوویە و پتر نێزیکی گوتارا ئێکەتی و گوران بوویە.
چاڤدێرێ سیاسی دیندار نەجمان چێبوونا بەرێ ئیسلامی کو ژ ھەرسێ پارتێن ئیسلامی پێک دھێت ل کوردستانێ ب قورس ل قەلەم دا، گۆت: ب زحمەت بھێتە چێکرن، ھەرسێ پارتان پەیوەندیێن خوە تایبەت ل دەرڤە و نافخو ھەنە و راستە مرجعیا وان ئیسلامی یە، لێ پەیڕەو ھندەک جاران دووری ئێکن، ئەگەر ئێکگرتوو و کومەل ببنە ئێک حزب، دبینم دڤێت ناڤەکێ دی ب خوە بینن چونکە ھەر دو پارت کەس ناچیتە ناف کەسێ، دیسا ئێکگرتوو و کومەلا ئیسلامی ئەزموون ھەبوویە و پەرلەمانێ کوردستانێ ئێک فراکسیوون بوون و ئەزموونەکا نە سەرکەفتی بوویە، ئەڤە نە وەک گوران و ئێکەتیێ نە ئەو پێشتر ئێک بووینە، دیسا ئەمیندارێ گشتیێ ئێکگرتوو ێەلاحەدین بھائەدین دیارکر بوو کو چێبوونا بەرەکێ ئیسلامی خوە نادەتە ل گەل چو بەرەیان نە ل گەل پارتی و نە ل گەل ئێکەتیێ و گوران.
ھێشتا گۆت: نابینم ھەرسێ پارتێن ئیسلامی ببنە ئێک و نە مەنھەج و نەر ھەر چ پەیوەندی ل گەل داعش و نێزیکبوونەک ھەبیت، ژ دامەزرێنەرێن ئێکگرتوو بوویمە شێم پێش ئێکگرتوو ڤە بێژم نە ل سەر ڤی مەنھەجی بوویە و نە گەل ڤی مەنھەکی بوویە و نەلگە توند و تیژی بوویە، لێ ھاتنا داعش کارتێکرن ل سەر ھەموو پارتێن ئیسلامی کریە ل ھەموو جیھانێ چونکە بن ناڤێ ئیسلامی ھاتیە، دبیت پشک ژ چێبوونا داعش بۆ رێگریکرنا پرۆژێن ئیسلامی یە ل دەڤەرێ و داعش شیاشە کارتێکرنەکا نەرێنی ل سەر پرۆژێن ئیسلامی بکەت ل دەڤەرێ.
ناڤبری ئەو ژی گۆت: گھورینا ئەمیندارێ گشتیێ ئێکگرتوو نابینم چ گوھرین پەیدابن و راستە ێەلاحەدین بھائەدین دامەزرینەر بوویە و پەیوەندیێن باش ھەنە لێ گوھورین روونادەن، دبینم ئەو روودانێن ل سەر دەمێ سەرکرداتیا کەڤن و محەمەد فەرج رووداین کو ئێکگرتوو بەر ب دو حزبیێ چوو و ئەگەر نوکە ژی ئەو روودان پەیدابن وەک یاسا سەرۆکاتیێ ھەمان روودان دێ پەیدابن.
چاڤدێرێ سیاسی دیندار نەجمان گۆت: دو ئیداری ھەر ھەبوویە و نەشێن بێژین ب دووماھی ھاتیە، ھەکە چارەک بۆ رەوشا نوکە یا سیاسی نەھێتە دیتن، نە دوورە ب گەھینە قوناغا دو ئیدارەیی و فیدرالیەتێ و دو ھەرێم و بەحسێ کەرکووکێ بیتە ھەرێمەکا جودا و ئەڤ ھەموو مەترسی ھەیە.
دیندار نەجمانی ئەو ژی گۆت: ئەو پێشنیارێن سەرۆکێ ھەرێمێ مەسعود بارزانی پَشکێشی ئالیێن سیاسی کرین ھەتا نوکە بەرسفێن گەلەک دلخوشکەر نەبووینە، ل دووڤ پێشنیارێن ھاتینە راگەھاند دەستەیا سەرۆکاتیا پەرلەمانی بھێتە گوھۆڕین و سەرۆکێ پەرلەمانی بۆ ئێکەتیێ بیت و جێگر سەرۆکێ حوکمەتێ بۆ گوران بھێتە دورستکرن و جێگرێ سەرۆکێ پەرەلەمانی بۆ ئێکرتوو و سکرتێر بۆ پارتی یان بەرۆڤاژی و ھەتا نوکە بەرسف نەبووینە، لێ چوون و ھاتنا فوئاد حسێن و پێشنیارێن سەرۆکی رەوش پیچەکێ ئارام ترکریە و دانوستاندن ھەنە و مە ھیڤی ھەنە بەر ب باشیێ بچن.
ھەمان چاڤدێرێ سیاسی گۆت: ب شێوەکێ فەرمی ئێکەتیێ و گوران دیارنەکرینە کو ل گەل سەربەخۆیا کوردستانێ نین، کومبوونێن مالکی ل گەل ھەر دو پارتان ئاماژە ب وێ چەندێ ھاتیەکرن کو ل گەل سەربەخۆیێ و ریفراندوومێ نین، لێ ب شێوەکێ فەرمی ھەلویستێن خوە دیارنەکرینە و ھەلویستێ ھەر دو ئالیان نەیێ زەلالە، ئەڤان نەڤێت ل سەر دەستێ سەرۆکێ ھەرێمێ کو سەرۆکێ پارتی یە بھێتە بدەست ڤە ئینان کو بیتە دەسکەفتەک بۆ پارتی و ئەو دبێژن بلا بابەتی بەینە پەرلەمانی و ئەڤە جووانە، سەرۆکێ ھەرێمێ نە بتنێ سەرۆکێ پارتی یە، بەلکو 70% خەلکێ کوردستانێ دەنگ دایێ، لێ دبینم ئەڤ جودابوونا سیاسی دناڤبەرا بەرێ پارتی لایەکی و گوران و ئێکەتیێ لایەکی ل سەر ڤی بابەتی و ببنە رێگر بەرامبەر داخازێن مللەتێ کورد یێن سەربەخویا کوردستانێ کو ئەڤە مێژوویی ینە و دبیت ئەف دەرفەتە ژ دەست بچیت.
دیندار نەجمان دۆسکی، ئەو ژی ئاشکراکر کو پشتی ژناڤچوونا داعش پێشبینی بەر ب وێ چەندێ دچن کو جوگرافی یا دەڤەرێ بھێتە گوھۆرین و تایبەت سوریا و عیراق وەک بەرێ نامینن، ھەموو دەولەتێن جیھانێ و ھەتا ئەمریکا و ھتا رادەکی رۆسیا ھەموو یێ ل سەر وێ چەندێ کو ئەڤ ھەر دو وەلاتە نازڤرن وەک بەرێ، داعش بۆ گەلەک مەبەستا ھاتیە چێکرن و گەلەک خەلکی دەست ل گەل ھەیە و دبیت ئەڤێن دەست ل گەل چێکرنا وێ ھەی ببنە بھانەک بۆ چێبوونا رەوشەکا دی ل دەڤەرێ .