پشتى خيانه‌ت لێ هاتيه كرن، وێ ژى خيانه‌ت ل هه‌ڤژينێ خوه كر
ئه‌ڤرۆ نيوز:
پارێزەرەکا دادگەھا دھۆکێ راگەھاند کو، ژنەکێ گەلەک گۆمان ژ ھەڤژینێ خوە دبرن، رۆژەکێ زووتر ژ کاری زڤری مال، دیت ژنەکا ل مالا وان و ھەڤژینێ وێ خیانەتێ لێ دکەت، پشتی ئەڤ ژنە قەستا مالا بابێ خوە دکەت ھەر ئێکسەر ب رێیا دادگەھێ دادخوازیا بەردانێ ژێ دکەت، پشتی عەشیرەتێ گەلەک مایێ خوە تێدا کری، ژن ل ھەڤژینێ خوە بوری و زڤری مال، بەلێ وی تۆلێن خوە ژێ ڤەکرن.
پارێزەر تانیا زکری ل دادگەھا دھۆکێ بۆ ئەڤرۆ دیار کر کو ژنەکێ گەلەک گومان ژ ھەڤژینێ خوە دبرن کو یێ خیانەتێ لێ دکەت، ژبەرکو پەیوەندیێن وی یێن تەلەفونی د مشە بوون و ھەکە ھاتبا مال ژی نیڤا شەڤێ دھات، پشتی دو سالا خودێ زارۆیەک دایێ سەرەدەریا وی ل گەل ھەڤژینا وی ھاتە گۆھورین و ھەردەم دانوستاندن ل سەر پووتە نەدانا وێ دکرن، ھەر دەمێ دھاتە مال ژی ب فێسبووکێ و ئەنترنێتێ ڤە یێ مژوول بوو.
پارێزەرێ گۆتژی: ھەتا رۆژەکێ ژن زووتر ژ کاری زڤریە مال دیت ژنەکا ل مالا وێ و ھەڤژینێ وێ خیانەتێ لێ دکەت، ئێکسەر قەستا مالا بابێ خوە دکەت و ب رێیا دادگەھێ دادخوازیا بەردانێ ژ زەلامێ خوە دکەت بێ کو دادخوازیا خیانەتێ ل سەر ڤەکەت، زەلام ل دەسپێکێ رازی نەبوو، چۆنکو ھەکە خیانەتا ھەڤژینی ل سەر وی کەتبا دا ھەموو تشت ژ وی چن مینا مەھرا پێشەکی و پاشەکی و کەل و پەلێن مالێ و کا چو تشتێ باش ھەیە دا بۆ ژنێ کەڤیت.
تانیایێ زێدەتر گۆت: نیڤا دادخوازیێ ب رێڤە چوو، بەلێ لایەنێ عەشیرەتێ گەلەک مایێ خوە تێدا کر کو زەلامی خەلەتیا کری لێ ببورن و دوبارە نابیت، پشتی دو ھەیڤ ل سەر ڤێ کێشێ را بورین پێک ھاتن ئانکو ژن زڤراندەڤە مالا ھەڤژینێ وێ، بەلێ زڤراندنا وێ پلانەک بۆ ژ لایێ زەلامی ڤە ھاتیە دانان، پشتی ھەیڤەکێ ژ نوو دەست ھاڤێتە پلانا خوە دا ژن جارەکا دی دادخوازیێ لێ نەکەت، چۆنکو پشتی سێ ھەیڤ ل سەر دادخوازیا خیانەتا ھەڤژینی را دبورن ژنێ ماف نامینیت دادخوازیێ بکەت.
پارێزەرێ ئاشکرا کر ژی کو زەلامی ژمارا تەلەفونا ھەڤژینا خوە و فێسبووکێ وێ دابۆنە ھەڤالەکێ خوە، وی ژی تەلەفونا وێ دکر و دگۆتێ ھەڤژینا من ژی وەکو ھەڤژینێ تە خیانەت لمن کر بوو، و ل دووماھیێ بوونە ھەڤالێن ئێک، رۆژەکێ ھەڤژینێ وێ دچیتە تورکی، ئەوان رۆژا ژڤانەکی ددانن کو ئێکودو ل مالا ژنکێ ببینن، بێگومان ھەڤژینێ وێ ئەڤ پلانە دانایە دزڤریتە مال و تەلەفونا پولیسا دکەت، ئەو دھێن وی کوری ل مالا وان دگرن و دئێشینن.
تانیا زکری دیار کر کو وی کوری دناڤا دادگەھێ دا دانپێدان کر کو ئەڤ پلانە ھەڤژینێ وێ دانایە، ل ڤێرە جارەکا دی عەشیرەت دھێتە دناڤ دا زەلام داگێرانێ ژ دادخوازیا خوە دکەت و مادا 377 یا خیانەتا ھەڤژینیێ دکەڤیتە سەر ژنکێ، پشتی ھاتیە دەستەسەرکرن و بۆ دادگەھێ دیار بوویی کو ھەڤژینێ وێ ئەڤ پلانە بۆ دانایە کو وی دڤیا وی کوری ل مالا خوەڤە بینیت داکو بۆ دادگەھێ دیار بکەت کو ھەڤژینا وی یا خیانەتێ لێ دکەت، مادا 377 یا خیانەتا ھەڤژینیێ ل سەر ڤێ کێشێ ب رێڤە نەچوو، ژنێ داگێران ب ھەموو مافێن خوە کرن ئێکسەر دادخوازیا بەردانێ (مخالعە) ب رێڤە چوو و ھاتە بەردان.