ھەکە پارتی و ئێکەتی رێکنەڤن ھەلبژارتن ناھێنە ئەنجامدان
ئەڤرۆ نیوز:
سەرۆکێ تۆڕا شەمس بۆ چاڤدێریا ھەلبژارتنان ئاماژە بوێ چەندێ دکەت، ھەکە پارتی و ئێکەتی نەگەھنە چو رێککەفتنان ئەڤسالە ھەلبژارتن ل ھەرێما کوردستانێ ناھێنە ئەنجامدان، ھەروەسا دیارکر، راستە کۆمسیۆنێ سەربخۆیا ھەلبژارتنێن ھەرێما کوردستانێ خوەیا کریە ئەڤسالە دێ ھەلبژارتن ھێنەکرن ، بەلێ بێی کۆمسیۆنا ھەلبژارتنان یا بەغدا کۆمسیۆنا ھەرێمێ شیانێن رێڤەبرنا ھەلبژارتنان نینە.
ھۆگر چەتو، سەرۆکێ تۆڕا شەمس بۆ چاڤدێریا ھەلبژارتنان بۆ رۆژناما ئەڤرۆ گۆت” دولایەنێن سەرەکی ھەنە بۆ برێڤەچوونا ھەلبژارتنان ھەتا کۆمسیۆن بشێت پڕۆسا ھەلبژارتنان برێڤەببەت، یا ئێکێ پڕۆسا تەکنیکی و ئەف رێکارێن پێدڤی و مادی یادویێ ھەبوونا سەقایەکێ گونجایە بۆ برێڤەچوونا ھەلبژارتنان، نوکە ل ھەرێما کوردستانێ بەحسێ رێڤەچوونا ھەلبژارتنان د ئەڤسالەدا دھێتەکرن، بەلێ ھێشتا یا رۆھنیە دێ ھەلبژارتن ھێنەکرن، چونکە بڕیارە ھەلبژارتن بۆ سەرۆکێ ھەرێما کوردستانێ ژی بھێنەکرن و قانوونا سەرۆکایەتیا ھەرێمێ ب ھەلاویستی مایە دناڤبەرا لایەنێن سیاسی پێدڤیە بەری ھەلبژارتنان لایەنێن سیاسی پەرلەمانی کارا بکەن، و دووڤدا بشێن ھەلبژارتنا برێڤەببەن، ئەف ناکۆکیێن نوکە دناڤبەرا لایەنێن سیاسیێن ھەرێما کوردستانێ دڤێت بھێنە چارەسەرکرن، بۆھندێ بشێن ھەلبژارتنێن شەفاف برێڤەبچن، ھەکە ھات و ھەردو پرسێن ناکۆکیێن سیاسی و کارا کرنا پەرلەمانی بھێنە چارەسەرکرن ئەڤە پرسا دارایی بۆ ھەلبژارتنان نابیتە رێگر و دشێن بھەر شێوەیەکێ ھەبیت ھندەک پارەی بۆ رێڤەچوونا ھەلبژارتنان بھێتە مەزاختن،
سەرۆکێ تۆڕا شەمس دیارکر” ژلایێ زانستی ڤە ئەڤا کۆمسیۆنێ دڤێت تنێ د شەش ھەیڤادا دشێت خوە بەرھەڤ بکەت، بەلێ نوکە کۆمسیۆنا ھەلبژارتنا یا ھەرێما کوردستانێ د شیاندا نینە چو ھەلبژارتنان برێڤەببەت، ژبەرکو ھەتا نوکە ئوفیسێن پارێزگەھان نەھاتینە دامەزراندن و ژلایێ لۆجستی ڤە پێدڤی ب کارکرنێ ھەیە، بتنێ ھەکە بشێن مفای ل کۆمسیۆنا سەربخۆیا ھەلبژارتنێن عێراقێ وەربگریت یانژی بۆ دامەزراندنا فەرمانبەرا کۆمسیۆنا ھەرێما کوردستانێ دشێت مفای ل فەرمانبەرێن حوکمەتێ وەربگریت، بۆنموونە ل وەلاتەکێ وەکی تونس کۆمسیۆن ب ھزاران فەرمانبەر دانەمەزراندینە، تنێ فەرمانبەران بکارتینیت بۆ پڕۆسا ھەلبژارتنان، بدیتنامن بلا وەکی ھەلبژارتنێن بۆری تنێ مامۆستا و رێڤەبەرێ قوتابخانا پشکدارنەبن دگەل کۆمسیۆنێ بەلکۆ دشێن ھەموو فەرمانبەر پشکدارببن ئەڤەژی نابیتە جھێ گازندا چو لایەنێن سیاسی ژبەرکو ھەموو لایەنێن سیاسی فەرمانبەر ھەنە.
ھۆگر چەتوی گۆتژی” ھەتا نوکە کۆمسیۆنا ھەلبژارتنان لھەرێما کوردستانێ تنێ داخویانی دایە بۆ رێڤەچوونا ھەلبژارتنان چو پێنگاڤێن کریاری نە ھاڤێتینە، لھەرێما کوردستانێ و عێراقێ ژی خشتەیا ھەلبژارتنان نینە و کەس نوزانیت دێ ھەلبژارتن کەنگی و چاوا ھێنەکرن، بەلێ ل ئەمریکا ھەموو خەلک دزانیت ترەمپ دێ کەنگی دەستبکاربیت و کیش رۆژێ دێ دووماھی ب کارێ وی ھێت، مەرەمامن ئەڤە ھەتا نوکە کۆمسیۆن یا مژولی دامەزراندنا فەرمانبەرانە و کەسێ پشتڕاستنەکریە دێ ھەلبژارتن ئەڤسالە ھێنەکرن، جارێ ھەکە پارتی و یەکێتی نەگەھنە رێکەفتنێ ئەڤە بێگومان ئەڤسالە ھەلبژارتن ھەرناھێنەکرن، بەلێ ئەگەر خشتێ رێڤەچوونا ھەلبژارتنان بھێتە دیارکرن، ئەم دێ چاڤدێرێن خوە بۆ ئەڤان ھەلبژارتنان بەرھەڤکەین.