رۆهنكرنه‌ك ژ جڤاتا ئاسايشا هه‌رێما كوردستانێ
ئه‌ڤرۆ نيوز:
جڤاتا ئاسايشا هه‌رێما كوردستانێ د به‌ياننامه‌كێ دا كو دانه‌ك ب ده‌ست ئه‌ڤرۆ نيوز كه‌فتيه راگه‌هانديه كو ئه‌ڤ روودانێن ژ ڤى ره‌نگى ژ دوژمنێن شكه‌ستى خوارى د چاڤه‌رێ كرينه و تيرۆرستان مفا ژ ئاسانكاريێن هه‌رێمێ به‌رامبه‌ر وه‌لاتيێن ده‌ڤه‌رێن دى يێن هه‌رێمێ دهێن وه‌رگرتينه.
ئه‌ڤه ژى ناڤه‌رۆكا وێ يه:
جه‌ماوه‌رێ خۆشتڤيێ كوردستانێ
خۆجهيێن خۆراگرێن پايته‌ختێ هه‌رێمێ
مخابن ئه‌ڤرۆ نيڤرۆ جاره‌كا دى، ده‌ستێ ره‌شێ تيرۆرێ گه‌هشته هه‌ولێرا پايته‌ختێ هه‌رێمێ و ژ ئه‌نجامێ ته‌قينا ترۆمبێله‌كا مينرێژكرى ل به‌رده‌رگه‌هێ ئاڤاهيێ هه‌ولێر هژماره‌كا برايێن پۆليس و وه‌لاتيايێن مه شه‌هيد و بريندار بوون.
كرداره‌كا نه‌شيرينا ژڤى ره‌نگى ژ دوژمنێ شكه‌ستخوارى يا چاڤه‌رێكريه. برا و پێشمه‌رگێن مه ل به‌ره‌يێن شه‌رى رۆژانه گۆرزێن دژوار ل تيرۆرستان د وه‌شتينن و خه‌ونا وان يا گه‌هشتن ب كوردستانێ بن ئاخ دكه‌ن، ژ به‌ر هندێ بێ هيڤى دبن و په‌نايێ بۆ كرياريێن ژ ڤى ده‌نگى دبه‌ن.
مخابن وه‌كو بۆ مه رۆهن بووى، تيرۆرستان مفا ژ وێ ئاسانكاريێ وه‌رگرتيه يا كو ل گه‌ل خۆجهيێن ده‌ڤه‌رێن دى يێن عيراقێ ل هه‌رێمێ دهێته كرن، ئه‌ڤ رێكار و ئاسانكاريه ل سه‌ر مه ب گرانى د راوه‌ستيت و يا مه‌ترسيداره ل سه‌ر ئاسايشا هه‌رێمێ. ئه‌م ل جڤاتا ئاسايشا هه‌رێمێ ب پێدڤى دزانين كو هه‌ر مافێ حوكمه‌تا هه‌رێمێ يه و هه‌ر ژى پێدڤيه وه‌لاتيێن هه‌رێمێ يێن خۆشتڤى كاودانێن نوكه به‌رچاڤ وه‌رگرن، رێگريێ ل وان كاران نه‌كه‌ن يێن ژ به‌ر مه‌ره‌مێن ئه‌منى دهێنه كرن.
د ڤى ده‌مى دا زێده‌تر ژ هه‌ر ده‌مه‌كى پێدڤى هاريكاريێن وه‌لاتيێن خوه يێن خۆشتڤى نه دا كو داموده‌زگه‌هێن په‌يوه‌نديدار هه‌ر لڤينه‌كا گۆمانلێكرى ئاگه‌هدار بكه‌ن، برايێن هه‌وه ل ئاسايش و زێره‌ڤانى و پۆليسان د سه‌ر ئه‌ركێ ناڤخۆ دا، د پتريا به‌ره‌يێن شه‌رى دا مل ب ملێ پێشمه‌رگه‌ى د خزمه‌تێ دانه، ژ به‌ر هندێ ژى چاڤه‌رێكرنا مه ژ هه‌موو ته‌خ و چينێن هه‌رێمێ زێده‌تر ب ئه‌ركێ نشتيمانى يێ هه‌وه‌يه كو پێ رابن و پتر د چاڤ ڤه‌كرى بن و ئاگه‌هدارى هه‌ر كۆژيه‌كێ باژێر و باژێركێن مه بن.
ڤه‌كۆلين د روودانا ئه‌ڤرۆ دا يا ده‌ستپێكرى و بێگۆمان وه‌كو هه‌رده‌م ئه‌نجامده‌رێن ڤێ تاوانێ ژى دێ روو ب روويێ دادگه‌هێ بن و گه‌هنه سزايێ خوه يێ عاديلانه.
جڤاتا ئاسايشا هه‌رێما كوردستانێ 19\11\2014
