خیانه‌تا هه‌ڤژینیێ بو ئێك ژ ئه‌ڤان 10 خالێن سه‌ره‌كى دزڤریت
ئه‌ڤرۆ نیوز ، نه‌وزاد هلۆرى:
دژیانا هه‌ڤژینیێ دا زور جاران دهێته بهیستن كو خیانه‌ت دناڤبه‌را هه‌ڤژینان دا دهێته‌كرن ، ئه‌ڤجا چو كور بكه‌ت یان ژى كچ ، و ڤه‌كوله‌ره‌كێ جڤاكى دیاركر كو دخیانه‌تا هه‌ڤژینیێ دا هه‌ردوو هه‌ڤژین به‌رپرسیارن ، و ئه‌و خیانه‌تا هه‌ڤژینیێ ژى بو 10 خالێن سه‌ره‌كى دزڤرینیت.
محه‌مه‌د سالح پێندرویى ڤه‌كوله‌رێ جڤاكى دیاركر كو دخیانه‌تا هه‌ڤژینیێ دا هه‌ردوو ره‌گه‌ز به‌رپرسیارن و بو ئه‌ڤرۆ نیوز گۆت: ( خیانه‌تا هه‌ڤژینیێ ئێكه ژ بابه‌تێن مه‌ترسى دناڤبه‌را هه‌ڤژینان و ب ده‌ربازبوونا ده‌مى ئه‌گه‌ر نه‌هێته چاره‌سه‌ركرن ، ره‌نگه دوڤدا كارڤه‌دان و كارتێكرنێن نه‌رێنى هه‌بن ، و خیانه‌تا هه‌ڤژینیێ وه‌كو ماله‌كێ یه كو ئاگر به‌ربیتێ و كه‌س ژى نه‌چیت ئه‌وى ئاگرى ب ڤه‌مرینیت ئه‌ڤجا ژ به‌ر مایتێكرنێ بیت یان ژى پشتگوه هاڤێتنێ بیت)
زێده‌تر گۆت: ( ره‌نگه زور ره‌نگ و شێوه‌یێن خیانه‌تا هه‌ڤژینیێ هه‌بن ، به‌لێ ب ره‌نگه‌ك گشتى بو 10 خالێن سه‌ره‌كى دزڤریت كو ئه‌و ژى ، دویر كه‌فتن ژ ره‌وشت و بنه‌مایێن ئاینى ، نه‌بوونا ئه‌شق و ڤیانێ دناڤبه‌را هه‌ڤژینان ، هه‌ژاریا ئێك ژ وان هه‌ردوو هه‌ڤژینان ب تایبه‌تى یا كورى ، خراب بكارئینانا ئامیرێن په‌یوه‌ندیێ و ته‌كنولوژیایێ ب تایبه‌تى موبایل و تورێن جڤاكى ، تولڤه‌كرنا ل هه‌ڤدوو ، چاڤلێكه‌رى ب تایبه‌تى بو دراما و فلمێن نه دهه‌ژى ، كارانه‌بوونا قانونێ د جڤاكى دا و نه‌بوونا سزایێن گران ژ بوو خه‌یانه‌تا هه‌ڤژینیێ ، كاركرنا ئێك ژ هه‌ڤژینان ب تنێ ل گه‌ل كومه‌كا دن یا ره‌گه‌زێ به‌رامبه‌ر ، پالده‌رێن سێكسى ب تایبه‌تى هه‌بوونا ژینگه‌هه‌كا سێكسى وه‌كو فلم و پیته‌نه‌دانا هه‌ڤژینیێ ژلایێ سێكسى ڤه و خوه ڤه‌دزرین بو تێركرنا حه‌زێن سێكسى ، گرنگینه‌دانا ئێك ژ هه‌ڤژینان بو هه‌ڤدوو و د به‌رامبه‌ر دا پیته‌دانا خوه بو ده‌رڤه و سه‌ره‌دان و گه‌شتێن تایبه‌ت)
ل بارا چاره‌سه‌ركرنا بابه‌تى ژى گۆت: (پێدڤى یه هه‌وه‌كا هوشیاركرنا جڤاكى ب گشتى و هه‌ڤژینان ب تایبه‌تى بهێته‌كرن لسه‌ر كه‌نالێن راگه‌هاندن و مینبه‌ر و رێكخراوێن جڤاكى و ده‌روونى ، و ئه‌نجامدانا كور و سمینار و ورگ شووپان بو كه‌سانێن شاره‌زا و تایبه‌تمه‌ند ، خه‌لاتكرنا هه‌ڤژینێن نموونه‌یى د جڤاكى دا داكو ببنه چاڤلێكه‌ر بوو هه‌ڤژینێن دن یێن ، پێكئینانا هه‌ڤژینیێ لسه‌ر بنه‌مایه‌كێ درۆست و د ده‌م و جهه‌كێ گونجاى دا نه‌ك هه‌ڤژینیه‌كا ب زورى و لسه‌ر بنه‌مایێن حه‌ز و سێكسى بهێته درۆستكرن ، درۆستكرنا ژینگه‌هه‌كا گونجایى ژ روویێ ئه‌شق و ڤیان و ئابوورى و جڤاكى و ئاستێ خواندنێ دناڤبه‌را هه‌ردوو هه‌ڤژینان ، دانا بریاره‌كا ته‌مام و ئازاد بو كچ و كوران بو ئه‌نجامدانا هه‌ڤژینیێ ، زڤرین بو بنه‌مایێن ره‌وشتى و ئاینى و قانوونى و داب و نه‌ریتێن ئه‌رێنى یێن جڤاكى ل ده‌ما هه‌ڤژینیێ دا و دایك و باب ژى به‌رده‌وام پشتى هه‌ڤژینیێ گرنگیێ ب كچ و كورێن خوه‌یێن شوكرى و ژنئیایى بده‌ن و پشتگوهڤه نه‌هاڤێژن و به‌رده‌وام وه‌كو دادوه‌ر دناڤبه‌را وان دا بن و نه‌هێلن ئاریشه‌یێن وان مه‌زن ببن و بگه‌هن ئاسته‌كێ كو هزرێ د خیانه‌تێ دا بكه‌ن)