ئه‌م و ئه‌و سوباهی دێ دیرۆك هێته‌ تۆماركرن

سوباهی دێ دیرۆك هێته‌ تۆماركرن
ژ مێژه‌ و پشتی سه‌رهلدانا بهارا سالا ١٩٩١ و هه‌تا رۆژا ده‌ستنیشانكرنا رۆژا ٢٥/٩/٢٠١٧ من كوردستان و ملله‌تێ وێ ب ڤێ حه‌ماسه‌تێ و خوینگه‌رمیێ و ئێك ده‌ستیێ نه‌دیتی یه‌، گه‌له‌كا دگۆت ملله‌تێ سست بووی و ئێدی باوه‌ری ب كوردایه‌تیێ نه‌مایه‌!؟ دگۆتن ژ به‌ر گه‌نده‌لیێ و نه‌داد په‌روه‌ریێ په‌ردا راستیێ و باوه‌ریێ یا د ناڤبه‌را حوكمه‌ت و حزب و لایه‌نێن سیاسیێن كوردی نه‌مایه‌ و ژ به‌ر زۆر ئه‌گه‌ران ملله‌تێ كورد بێ هیڤی و ئۆمێد بوویه‌ كو ئه‌ڤ حوكمه‌ته‌ و ئه‌ڤ لایه‌نێن سیاسی بشێن باوه‌ریێ بۆ چێكه‌ن كو ئه‌و كار وخه‌باتێ بۆ مافێن وان دكه‌ن، لێ ریفراندۆمێ و باوه‌ریا ملله‌تی ب سه‌رۆك بارزانی و گۆتن و پێنگاڤ و پرۆژێن وی جاره‌كا دی هیڤی و ئۆمێدێن وان گه‌ش كرن و گه‌هشتنه‌ وێ باوه‌ریێ كو ژبلی سه‌رۆك بارزانی و هه‌ڤالێن وی ل سه‌ركردایه‌تیا كوردی (ژبلی هنده‌كێن خۆفرۆش)كه‌سێ دی ل سه‌رانسه‌ری عیراقێ د خه‌ما وان دا نینه‌ و چ سه‌ركردێن عه‌ره‌ب وان ناگه‌هیننه‌ وان هیڤی و ئۆمێدان، له‌وما ئه‌ڤرۆ جیهان هه‌می یا به‌حسێ ئێكگرتن و ئێك دلی و ئێك هه‌لۆیستیا ملله‌تێ كورد دكه‌ت و ئاهه‌نگێن وان یێن كه‌یفخۆشیێ، چونكی دێ ریفراندۆمێ ئه‌ندام ده‌ن ژبۆ سه‌رخوه‌بوونێ، ژ رۆژا راگه‌هاندنا ٢٥/٩ بۆ ریفراندۆمێ و هه‌تا ئه‌ڤرۆ ملله‌تێ كورد ل كوردستانێ و ده‌رڤه‌ی كوردستانێ دلێ دوژمن و نه‌حه‌زان حه‌لاند، دوژمن یێ خێ دخۆن و ئاڤێ ب سه‌ردا ناكه‌ت ژ قه‌هرێن خوه‌دا، هه‌میان ب تایبه‌ت ل ئیراقێ و حوكمه‌ت و سه‌ركردێن وێ وه‌سا هزر دكر كو دێ شێن مایتكرنێ د كوردستانێ و وێ په‌یوه‌ندیا د ناڤبه‌را گه‌لی وێ ژ لایه‌كی و حوكمه‌ت و لاینێن وێ یێن سیاسی ژ لایه‌كی دی ڤه‌ سست كه‌ن و هه‌تا راده‌یه‌كی خه‌یالا وانا خاڤ ئه‌ڤ هزره‌ د مێشكێ وان دا سه‌پاند پشتی دیتی كو ته‌ڤگه‌را گۆڕان یا ئاماده‌یه‌ كوردستانێ هه‌میێ ب فرۆشیته‌ وان ژ به‌ر كو پرۆژێ ریفراندۆمێ یێ ژ لایێ سه‌رۆك بارزانی ڤه‌ هاتیه‌ پێشنیازكرن بۆ سه‌ركردایه‌تیا كوردی و لایه‌نێن سیاسی و هه‌می ل سه‌ر رازیبوون!! ڤی لایه‌نی و چه‌ند كه‌سێن كو كه‌س نزانیت كه‌نگی و چاوا بوونه‌ خودانێن رادیۆ و ته‌له‌ڤزیۆنان هه‌می هێز و شیانێن خوه‌ بكارئینان كوردستانێ و ملله‌تێ وێ بكه‌نه‌ د ده‌ستێن سیاسه‌تمه‌دارێن عه‌ره‌ب ل به‌غدا، له‌وما زمانێ وان سیاسه‌تمه‌دارا درێژ بوو و جورعه‌ت دا خوه‌ ب ناڤێ خه‌لكێ كوردستانێ بئاخڤن، لێ سوپاس بۆ خودێ ئه‌و كه‌یف بۆ وان نه‌ما و ملله‌تی گۆته‌ خۆفرۆشان و به‌غدا و هه‌می جیهانێ ئه‌م ئێكین و نابینه‌دو، ئه‌م دێ هه‌می ئاریشێن خوه‌ یێن ناڤخۆیی دانینه‌لایه‌كی ئه‌گه‌ر كوردستان و چاره‌نڤیسێ وێ هاته‌ د بابه‌تی دا، له‌وما ئه‌ڤرۆ گوهێن دوژمنان هاتنه‌ سماندن، ژ به‌ر وێ به‌لێ كوردستانیان ئه‌وا جیهان هه‌می هژاندی و دێ سوباهی مه‌زنترین به‌لێ ل هه‌می دیرۆكێ ژی تۆمار كه‌ن ب ناڤێ ملله‌تێ هه‌رێما كوردستانێ.

کۆمێنتا تە