نووترين پێزانين ل سه‌ر ڤه‌كرنا زانكۆيا ئاكرێ
ئه‌ڤرۆ نيوز:
قایمقامێ قەزا ئاکرێ یا سەر ب پارێزگەھا دھۆکێ ڤە دیار کر کو بەری نوکە چەندین کۆمبوون ل دۆر ڤەکرنا زانکۆیا ئاکرێ ل گەل ڕاگرێن و کولیژێن ئاکرێ ھاتینە ئەنجامدان و گۆت: “ب پشتەڤانیا سەرۆکاتیا زانکۆیا دھۆک و پەرلەمانتارێن کوردستانێ ل دەڤەرا ئاکرێ پروپۆزەلەک ھاتە دروستکرن رەوانەکرن بۆ جڤاتا وەزیرێن حوکمەتا ھەرێما کوردستانێ ب مەرەماما نیشاندانا رازیبوونێ ل سەر ڤەکرنا زانکویێ”.
مازن محەمەد سەعید، قایمقامێ قەزا ئاکرێ بۆ رۆژناما ئەڤرۆ دیار کر کو راپورتا ڤەکرنا زانکویێ ل قەزا ئاکرێ گەھشتیە جڤاتا وەزیران و نوکە کار ل سەر دھێتەکرن کو ب زووترین دەم بھێتە ڤەکرن و گۆت: ” مە ب فەرمی بۆ ڤەکرنا زانکۆیا ئاکرێ داخواز ژ نێچیرڤان بارزانی، سەرۆکێ حوکمەتا ھەرێما کوردستانێ کریە و ناڤھاتی پشتەڤانیا خوە نیشاندایە ھەمبەر ڤەکرنا زانکویێ ل ئاکرێ”.
ناڤھاتی ئاماژە دا وێ چەندێ کو وەزارەتا خواندنا بلند یا حوکمەتا ھەرێما کوردستانێ ل گەل جڤاتا وەزیران نوکە دووڤچوونا ڤەکرنا زانکۆیا ئاکرێ دکەن ژ بەر کو پرانیا مەرجان ل ئاکرێ بۆ ڤەکرنا زانکۆیێ ھەنە، لەورا ب تنێ بریارا بجھئینانێ مایە و گۆت: “ئەم چاڤەرێ حوکمەتا ھەرێما کوردستانێ دکەین کو بڕیارا ڤەکرنا زانکویێ پەسەند بکەت و ب نڤیسارەکا فەرمی بریارا ڤەکرنا وێ بدەت”.
ل دووماھیێ قایمقامێ قەزا ئاکرێ یا سەر ب پارێزگەھا دھۆکێ ڤە خویا کر کو نوکە ھژمارەکا کۆلیژ و پەیمانگەھا ل ئاکرێ ھەنە، بەلێ دڤێ قووناغێ دا ئاکرێ پێدڤی ب ڤەکرنا زانکۆیێ یە، چونکی رێژەکا مەزن یا قوتابیان ل ئاکرێ ھە و ڤەکرنا زانکۆیێ ل ڤێ دەڤەرێ دێ بیتە ئاسانکاری بۆ قوتابیێن ئاکرێ و دەوروبەران.