گرتنا دەرگەھێ سێ مالکا چو کارتێکرن ل رەوشا بازرگانيا دهۆكێ هه‌يه؟
سەرۆکێ ژوورا بازرگانی و پیشەسازی ل پارێزگەھا دھۆکێ دیار کر، گرتنا دەرگەھێ سێ مالکا ل رۆژئاڤایێ کوردستانێ چو کارتیکرنێ ل رەوشا بازرگانی ناکەت و دبێژیت: ل دووڤ پێزانینان ب شێوەکێ بەروەخت ئەو دەرگەھە دێ دھێتە راوەستاندن.
ئەیاد عەبدولحەلیم، سەرۆکێ ژوورا بازرگانی و پیشەسازی ل پارێزگەھا دھۆکێ بۆ ئەڤرۆ ئاشکرا کر کو چو بزاڤا وەسا مەزن یا بازرگانی ل سەر دەرگەھێ سێ مالکا ل رۆژئاڤایێ کوردستانێ بۆ باشوورێ کوردستانێ نینە، ب تنێ پەز ژ وەلاتێ سووریا ب رێکا دەرگەھێ سێ مالکا دھێتە باشوورێ کوردستانێ و گۆت: “کەرەستێن بازرگانی ژ ھەرێما کوردستانێ ب رێکا دەرگەھی سێ مالکا دچنە رۆژئاڤایێ کوردستانێ، لەو راوەستاندنا وی چو کارتێکرنێ ل ھەرێما کوردستانێ ناکەت و بھایێ چو تشتەکی ژی گران نابیت”.
سەرۆکێ ژوورا بازرگانی و پیشەسازیا دھۆکێ گۆتژی: “رێڤەبەریا دەرگەھی سێ مالکا ل رۆژئاڤایێ کوردستانێ دیار دکەت کو ب شێوەکێ بەروەخت ئەو دەرگەھە دێ ھێتە گرتن، لێ ئەز نابینم چو کارتێکرنەکێ ل بازرگان و بازارێ مە بھێتە کرن، چونکو کارەکێ وەسا مەزن ل سەر وی دەرگەھی نینە”.
ئەیاد عەبدولحەلیم خویا ژی کر، نھا رەوشا بازرگانی ل خالا سنووری یا ئیبراھیم خەلک یا خورتە و رۆژانە بازرگان کاری خوە ئەنجام ددەن و گۆت: “پتریا کەرەستان ب رێکا خالا سنووری یا د ناڤبەرا ھەرێما کوردستانێ و تورکیا دا دھێنە ناڤ پارێزگەھا دھۆکێ”.