كێشه كه‌فته دناڤبه‌را عه‌بادى وحه‌شدا شه‌عبى دا
ئه‌ڤرۆنيۆز:
ژبه‌ر پێكئينانا بزاڤه‌كا سياسى ژلايێ سه‌رۆكێ ده‌سته‌يا حه‌شدا شه‌عبى ڤه بۆ پشكداريێ دهه‌لبژارتنين داهاتى دا، كێشه دكه‌ڤيته دناڤبه‌را حه‌يده‌ر عه‌بادى و حه‌شدا شه‌عبى دا.
سايتێ سكاى پرێس،ئه‌ڤرۆ ئێكشه‌مبى 26 چريا دويێ، ژزارده‌ڤێ ژێده‌ره‌كى ئاشكراكر كو حه‌يده‌ر عه‌بادى سه‌رۆك وه‌زيرێن عيراقێ گه‌هشتيه باوه‌ريه‌كا تمام كو پشكداريا گرۆپێن چه‌كدارى دهه‌لبژارتنێن داهاتى دا يا بوويه راستيه‌ك. ئه‌ڤه ژى پشتى وێ چه‌ندێ دهێت ك فالح فه‌ياز سه‌رۆكێ ده‌سته‌يا حه‌شدا شه‌عبى بزاڤه‌كا سياسى ب ناڤێ (عه‌تاء) پێكئيناى ب مه‌ره‌ما پشكداريێ دهه‌لبژارتنێن داهاتى دا.
وى ژيده‌رى ئاماژه ب وێ چه‌ندێ ژى كر كو پێكئينانا وێ بزاڤا سياسى بوويه ئه‌گه‌رێ دروستبوونا ئالۆزيێ دناڤبه‌را حه‌يده‌ر عه‌بادى سه‌رۆك وه‌زيرێن عيراقێ وحه‌شدا شه‌عبى كو عه‌بادى يێ رژده ل سه‌ر وێ كو نابيت حه‌شدا شه‌عبى پشكداريێ دهه‌لبژارتنان دا بكه‌ت.
وى ژيده‌رێ كو سكاى پرێس ئاشكرانه‌كرى، گۆت ژى، دده‌مێ بۆرى دا عه‌بادى ل گه‌ل چه‌ند سه‌ركردێن حه‌شدێ رێكه‌فتيه وپێشتر ژى ل گه‌ل قاسم سلێمانى كۆمبوويه بۆ گه‌هشتن ب بريارا دووماهيێ سه‌باره‌ت پشكداريا حه‌شدا شه‌عبى دهه‌لبژارتنان دا يان نه.
ئاشكرا كر، گرۆپێن حه‌شدا شه‌عبى ناخوازن روو ب روويێ قانوونێ ببن، له‌وما دخوازن ليسته‌كا هه‌لبژارتنان دروست بكه‌ن وب شێوه‌كێ نه‌فه‌رمى پشته‌ڤانيێ لێ بكه‌ن.
فالح فه‌ياز، شيره‌تكارێ جڤاتا ئاسايشا نيشتمانى يا عيراقى وسه‌رۆكێ ده‌سته‌يا حه‌شدا شه‌عبى يه، ئه‌ندامێ ره‌وتێ چاكسازى بوو ب سه‌رۆكاتيا وه‌زيرێ ده‌رڤه ئيبراهيم جه‌عفه‌رى، دوهى ب شێوه‌كێ فه‌رمى جودابوونا خوه ژ جه‌عفه‌رى راگه‌هاند وبزاڤا (عه‌تاء) دامه‌زراند.
