كرێ ورسومات دپێنج بياڤان دا دێ هێنه كێمكرن
ئه‌ڤرۆنيوز:
وه‌زاره‌تا باژێرڤانى وگه‌شتوگوزار ل هه‌رێما كوردستانێ، رادگه‌هينيت، ل سه‌ر پێشنيازا وه‌زاره‌تێ، جڤاتا وه‌زيران بريارا كێمكرنا كرێ ورسوماتێن خزمه‌تگوزارى يێ باژێرڤانيێ وگه‌شتوگوزارى وچاندنێ وبازرگانى وپيشه‌سازى ده‌ركر.
وه‌زاره‌تا باژێرڤانى وگه‌شتوگوزار راگه‌هاندنه‌ك ل دۆر كێمكرنا كرێ ورسوماتێن خزمه‌تگوزارى يێن باژێرڤانى به‌لاڤكر.
دوێ راگه‌هاندنێ دا كو رۆژا چارشه‌مبى 5/12/2017 هاتيه ده‌ركرن، ئاماژه ب وێ چه‌ندێ هاتيه كرن كو ل كۆمبوونا سێشه‌مبيا بۆرى يا جڤاتا وه‌زيرێن هه‌رێما كوردستانێ، نه‌ورۆز مه‌ولود وه‌زيرا باژێرڤانى وگه‌شتوگوزار، ل دۆر پێداچوونێ ب خشتێ سالانه يێ كريا ده‌ڤه‌رێن پيشه‌سازى وكێمكرنا كرێ ورسوماتێن خزمه‌تگوزاريێن باژێرڤانى وگه‌شتوگوزارى، راپۆرته‌ك به‌رچاڤ كربوو.
هه‌ر دوێ راگه‌هاندنێ دا هاتيه”جڤاتا وه‌زيران ئه‌و راپۆرت په‌سه‌ندكر ل پێناڤى پێشكێشكرنا ئاسانكاريان بۆ ئه‌وێن ئه‌ڤ رسومات وكرێ ژێ دگريت وه‌كو كه‌رتێ باژێرڤانى وپيشه‌سازى وگه‌شتوگوزار وبازركانى وچاندن ب جۆره‌كى ببيته ئه‌كه‌رێ پێشڤه‌چوونا وه‌به‌رئێنانێ دكه‌رتێن باژێرڤانى وگه‌شتوگوزار وكێمكرنا بارگرانيێ ل سه‌ر وه‌لاتيان.
