چه‌ند وه‌لاتێن دى ژى دێ باليۆزخانێن خوه ڤه‌گۆهيزن قودسێ
ئه‌ڤرۆنيوز:
رۆژنامه‌كا ئيسرائيلى ئاشكراكر، پشتى بريارا ترامپى، چه‌ند وه‌لاتين دى ژى دانپێدانێ دكه‌ن كو قودس پايته‌ختێ ئيسرائيلێ يه.
رۆژناما (ئيسرائيلا ئه‌ڤرۆ) به‌لاڤكر، وه‌زاره‌تا ده‌رڤه يا كۆمارا چيك راگه‌هانديه، ئه‌م دانپێدانێ دكه‌ين كو ل دووڤ سنورێ 1967، باژێرێ قودس پايته‌ختێ ئيسرائيلێ يه، هه‌ڤده‌م چه‌ند وه‌لاتين دى ژى هه‌مان بۆچوونێ ديار دكه‌ن.
رۆژناما ناڤبرى ئاماژه دا، دبه‌ياننامه‌كا وه‌زاره‌تا ده‌رڤه يا چيك دا هاتيه”چيك دبينيت كو قودس دداهاتى دا دێ بيته پايته‌ختێ هه‌ردو وه‌لاتێن ئيسرائيل وفلستينێ”.
به‌لاڤكر ژى” هه‌ڤده‌م فلپين وهنگاريا دووپاتى ل سه‌ر وێ چه‌ندێ كريه كو دێ به‌ياننامه‌كا هه‌ڤشێوێ چيكێ به‌لاڤكه‌ن”.
راديوا ئيسرائيلى رۆژا پێنج شه‌مبى يا بۆرى به‌لاڤكربوو” رۆدريگۆ دوتيرتى سه‌رۆكێ فلپينێ، نامه‌ك بۆ ئيسرائيلێ هنارتيه وتێدا دياردكه‌ت كو دێ باليۆزخانا فلپينێ ژ ته‌ل ئه‌بيب بۆ قودسێ هێته ڤه‌گۆهاستن”.
ل رۆژا چارشه‌مبيا بۆرى 6/12/2017، دونالد ترامپ سه‌رۆكێ ئه‌مريكا، دانپێدان ب قودسێ كر وه‌كو پايته‌ختێ ئيسرائيلێ وفه‌رمان بۆ وه‌زاره‌تا ده‌رڤه‌يا ئه‌مريكى ده‌ركر بۆ ڤه‌گۆهاستنا باليۆزخانا ئه‌مريكى ژ ته‌ل ئه‌بيب بۆ قودسێ.
