ئيحسان ئـامێدی

سەربۆڕا سیاسی و جڤاكی و ئابۆری یا پارتی دیموكراتی كوردستان ژ رێبازا شێخێ شەهید شێخ عەبدولسلامێ بارزانی هاتیە وەرگرتن، كو ژ پێكهاتیە مللەتپەروەریێ و باوەرداریێ و خۆدێ نیاسیێ و مرۆڤ دۆستیێ و پێكڤەژیانێ و ژینگەپارێزیێ و دادپەروەریێ و چاكسازیا جڤاكی و ریگرتنێ ل ستەم و زوڕیێ و رێزگرتنی ل مرۆڤی و ئافرەتێ، ئەڤ رێبازە ل دەڤەرا بارزان سەرهلدا و كار پێ دهاتەكرن و یا سەركەفتی بوو، لەوان خەلكێ دەردوران ژی تاگیریا خۆ بۆ دیاردكر و لسەر چوون و هەڤگونجاندن و ئاسایشا جڤاكی دابینكر.
و دەمێ پارتی دیموكراتی كوردستان ل سەر دەستێ بارزانیێ نەمر هاتیە دامەزراندن بنەمایێن رێبازا بارزانی جهێ خۆ د پرۆگرامێ پارتی دا كر و دەولەمەندكر. هەر هینگی بارزانیێ نەمر شیرەت ل هەڤالێن پارتی كرن كو ژ مللەتی فێر ببن و مللەتی فێركەن.
هەلبەت مللەتێ كوردستانێ كەلەپورەكێ دەولەمەند وگەلەك رەوشت و تیتالێن باشێن هەین، وەكو رێزگرتنێ و دلۆڤانیێ و هاریكاریا لێ قەومیا و پێكڤەژیانێ، كو پێدڤیێ ژ مللەتی فێربین و ل گەل كولتوورێ هزریێ بارزانی نیشا مللەتی بدەین و خەلكی پێ فێركەین، دا هشیاری و ژێیاتیا نەتەوەیی باش ببیت و بهێز بكەڤیت و ئاسایش و ئارامی جیگیربیت.
هەلبەت ئێك ژ فەرمودێن گرنگێن بارزانیێ نەمر ئەڤەیە، (ژ مللەتی فێرببن و مللەتی فێركەن) و ل سەر ڤی بنگەهی پارتی وەكو رێكخسیتنەكا جەماوەریا مللی سوود ژ كولتوورێ مللەتی دیت و ل سەر رێبازا بارزانی و ل دویڤ كەلەپۆری هزری و خەباتگێریێ بارزانیێ نەمر كاروانێ خەباتێ هاژۆت و گەهاندە كنارێن ئارام. پارتی خۆ ب چ ئیدولۆژیێن بیانی ڤە نەگرێدا، بەلێ گرێدای كولتوورێ مللەتی و رێبازا بارزانی بوو، پێناڤی ماف و ئارمانجێن مللەتی خەبات دكر.
سەرۆك بارزانی ل د دیدارا خۆ دا د گەل پشكەكێ ژ خەلكێ هەولێرێ ل رۆژا ٢١ یێ چریا ئیكێ ٢٠٢٥ گەلەك جوان فەرمۆیە: (ئەم ل هەولێرێ و ژ هەولێریان فێری رەوەشت و مرۆڤ دۆستی و مەردایەتی دبین، هەروەسا د فەرموود، هەولێر باژێرێ پێكڤەژیانە، فەرهەنگا پێكڤەژیانێ فەرهەنگەكا دەولەمەندە و ئەم پێ د سەربلندین و ب هێزترین چەك بوو د دەستێن مەدا ل دەرڤە و ل ناڤەندێن نێڤدەولەتی و شانازیێ پێ دبەین و دڤێت ڤێ فەرهەنگی بو نەوێن داهاتوو قولتر و بهێزتر بكەین، مانەڤەیا كوردستان پەیوەندە ب وی كلتوری جوان، هەروەسا ل بیردئینیت كو هەولێریان دەمێ جینۆسایدكرنا بارزانیان و ئەنفالكرنا كوردستانێ رەوشتەكێ بلند نیشادا و خۆ ل لێ قەومیان كرە خۆدان و هاركاریێن مەزن بۆ كرن.، و ژ لایەكێ دی یێ گۆتارا خۆ گرنگیا ژینگەپارێزیێ بەرچاڤكرەڤە).
ئەڤ گرێدانا پارتی و بارزانی ب كولتوور و كەلەپۆری كوردستانێ ڤە، ژیان و بەردەوامی دایە ڤێ رێبازێ، ژ بەر هندێ گەلەك پێدڤییە كوردستانی ڤی كولتوورێ مرۆڤایەتی بپارێزیت و گەشەیێ پێ بكەت.
هەلبەت پارتی ژ مللەتی بوویە و ژبۆ مللەتی خەباتێ دكەت و وەكو ئامرازەكی یە بۆ گەهشتن ب ماف و ئارمانجێن مللەتی و بنگەهێن وێ یێن هزری ژ كولتوورێ مللەتی و رێبازا بارزانی یە و ژ بەركو پارتی ب خۆ خۆدان بەرنامە و پەیامە، ل سەر ئەندامێن وی یە باش خۆ د پارتی بگەهینن و كارلێكیەكا باشتر د جڤاكێ دا بكەن، دڤێت پێشەنگ بن و ل ئاستێ مللەتی دا سەرەدەریێ دگەلدا بكەن و لێ فێری تشتێ باش ببن وەكو رەوەشت بەرزیێ و مەردینیێ و مێرانیێ و وێرەكیێ و رێزگرتنێ و لێبۆرینێ و پێكڤەژیانێ و هاركاریێ و خزمەتكرنێ و قوربانیدانێ و ژینگەپارێزیێ، ئەڤجا ئەوا ژێ فێربووی دگەل ئەوا د بەرنامەیێ پارتی دا فێربووی بگەهینیتە خەلكێ دیتر دا كارتێكرنێ لێ بكەت و ل بانگا وی بهێن.
دەمێ مرۆڤ گوهداریا خەلكی بكەت و سوودی ژ گۆتن و رەوەشت و رەفتارێن وی یێن باش دبینیت و پێشچاڤ كەت ل وی دەمی ئەو دێ هەست ب كەساتیا خۆ كەت و دێ پتر گوهداریا پەیامێ مرۆڤی كەت و كارلێكیەكا ئەرێنی ل هەڤ كەن و دێ بهێزكەڤیت.
چ ریكخستبێن سیاسی وەكو پارتی رێزی ل مللەتی ناگرن و لێ فێرنەبووینە، و ئەو نیشانێن سەرۆك بارزانی د گۆتارا خۆدا ل هەولێرێ بەرچاڤكرین بەلگەیێن پێگیریا رێبوارین رێبازانینە ب ڤێ فەرمۆدێ، لەو هەردەم د سەرفراز و سەركەفتی نە، هۆسا پارتی و مللەت ژێك ناهێنە جوداكرن، پێكڤە ب سەركێشیا پارتی و سەرۆك بارزانی كورد و كوردستانێ بۆ پێشڤە دبەن و دگەهینە كەنارێن ئارام.
شانازی یە بۆ هەر كوردستانیەكی دگەل پارتیا مللەتی بیت.
ئەڤجا ژبۆ كوردستانەكا ب هێز و پێشكەفتیتر، دەنگی بدەن لیستا 275 یا پارتی دیمۆكراتی كوردستان.

ئيحسان ئـامێدی

هەر سیاسەتمەدارەك و رەوشەنبیرەك ونڤیسەرەكێ گوهداریا گۆتار و پەیامێن بانگەشەیا هەلبژارتنان یێن بەرێز سەرۆك بارزانی و بەرێز نێچیرڤان بارزانی و بەرێز مەسرۆر بارزانی كربیت؛ دێ ئێكسەر باوەری بۆ چێبیت كو هەر پەیڤەك و گۆتنەك و پەیامەكا مرۆڤی هزر لێ كری كو بهێتە گۆتن و حەز و پێدڤی و ئارمانجا مرۆڤی و هەر كوردستانیەكی بیت، ژ لایێ بەرێزان ڤە ب رۆهنی و زەلالی هاتینە راگەهاندن، ئێدی مرۆڤ نەشێت چ ل سەر بنڤیست، لەوان یا گرنگە و پێدڤییە هەر كوردستانیەك ل گۆتار و پەیامێن وان بەرێزان ڤەگەریت و گوهداری بكەت و بخوینیت و خۆ پێ رەوشەنبیر و هشیار بكەت و خەلكێ پێ هشیار بكەت داكو پێ داخبار ببن و باوەریێ پێ بینن و كارلێكیێ دگەل دا بكەن.
هەلبەت ئەڤ گۆتار و پەیامە دەربرین بوون ژبیر و باوەری و پشتراستیا رێزداران ژ خۆ و ژ و مللەتی و دۆزا نەتەوەیا كوردستانێ، لەوان ب هویری و بەرپسیارانە پێشكێشكرن و راگەهاندن، هەمی ژی كوردستانی و نەتەوەیی و نیشتیمانی و مرۆڤی و دیموكراسی بوون، هەر تاكەكێ كوردستانێ ژ چ رەگەز و ئەتن و ئایین، خۆ تێدا ددیت و ماف و ئارمانجێن وی تێدا دەستەبەركر بوون. هەر ئەڤە ژ سەرۆك و رێبەرێن كوردستانێ دهاتە چاڤەرێكرن كو ل ڤی ئاستی پەیام و گۆتارێن خۆ پێشكێش كەن، ژ بەر هندی ب پێدڤی دبینم ئاماژێ ب هندەك برگەیێن گۆتارێن بەرێزان بدەم.

بـەرێـز سـەرۆك بـارزانـی
د فـەرمـۆت:

سەرەرای هەموو وێ ستەم و زۆردارییا ل خەلكێ كوردستانێ هاتیە كرن، بەلێ مەردانە و سەربلندانە ل مەیدانێ راوەستان و خۆ نەچەماند و بەرگرییەكا مەردانە ل ماف و بزاڤێن خۆ كرن، د هەر دەلیڤەیەكا كو بۆ ئاشتیێ هاتبیتە پێش ژدەست نەدایە، ل سالێن 1953، 1964، 1966، 1970، 1990، ل هەموو ڤان دیرۆكان دانوستاندن هاتیە كرن بۆ ئاشتیێ، بەلێ د ئەنجامدا مخابن دوبارە شەڕ دەستپێدكر، چونكو باوەری ب ماف و پێكڤەژیانێ و دیموكراتیێ نەبوو، درووشمێ شۆڕشا ئیلۆنێ (دیموكراتی بۆ ئیراقێ، ئۆتۆنۆمی بۆ كوردستان) بوو وی دەمی، وی سەدەمی خواندنا پارتی گەلەك یا راست و دروست بوویە، هەكە دیموكراتی ل ئیراقێ نەبیت، نە كورد و نە ئەرەب و نە توركمان و نە هیچ دین و مەزهەبەك نەشێت ب مافێ خۆ شاد بیت.
دڤێت دیموكراسییەكا راستەقینە هەبیت، وی دەمی ماف ژی دێ مسۆگەر بن، سەرەرای وان هەموو تاوانێن دژی خەلكێ كوردستانێ هاتینە كرن، بەلێ دەمێ دەلیڤە بۆ خەلكێ كوردستانێ هاتە پێش، مەردانە و مرۆڤدۆستانە رەفتار كر. ل سالا 1991 كو دو فەیلەقێن ئیراقێ رادەست بوون، ئەو دو فەیلەقە بوون كو ئەنفال و وێرانكرنا گوندان ل سەر دەستێ وان بوو، بەلێ ئێك كەس ژی ژ وان نەهاتە ئێشاندن، هەموو هاتنە ئازادكرن، ب كەیفا خۆ هەر ئێك ژ وان بڕیارا خۆ دا بۆ كیڤە بچیت، ڤێ چەندێ وەكر ئەز ب خۆ ل گەلەك جاران شانازیێ ب وێ چەندێ بكەن كو ئێك ژ نەتەوەیی و ڤی مللەتی مە.
دەلیڤەیا زێرێن ل سالا 2003 بوو، سالا 2003 رژێما بەعس ژناڤچوو و دەلیڤەیەكا زێرین بۆ هەموو خەلكێ ئیراقێ هاتە پێش، ئەم ب ئیرادەیەكا پاقژ و ئیرادەیەكا گەلەك ب هێز چووینە بەغدا بۆ وێ چەندێ هەموو پێكڤە ل سەر بنەمایێ (هەڤپشكی، هەڤسەنگی و لهەڤكرن). ئیراقەكا نوو دابمەزرینین. ب هەموو شیانێن خۆ مە بزاڤكر ئەڤ ئیراقە بهێتە دروستكرن تا گەهشتە دەستووری ل سالا 2005، كەس هندی مە ب ڤی دەستووریڤە نەوەستیایە، وی دەمی ژی كو زڤریم كوردستانێ، من گوت: سوپاس بۆ خودای دەستوور ب دووماهی هات، راستە نە دەستوورەك بوو كو هەموو خواستێن مە بجهئینابیت یان ژی ب دلێ مە هەموویان بیت، بەلێ هەكە لێنێرینەكا لۆژیكانە بكەین، دەستوورەكێ گەلەك باشە، هەتا ئاسەكێ مەزن مافێن مە مسوگەر دكەت، یێ بێ كێماسی نیە، بەلێ ئەرێنیێن وی گەلەك زێدەترن ژ نەرێنیێن وی. هەكە ئەڤ دەستوورە هاتبا بجهئینان، ئیراق تووشی گەلەك ژ وان كێشەیان نەدبوو، كەلەك ژ گرفتێن د ناڤبەرا هەرێما كوردستانێ و بەغدایێ دا ژی روو نەدان، مخابن پێگیری پێ نەهاتە كرن.
هەر وەسا لایەنەكێ دی پەیڤا بەرێز سەرۆكی كو ئاراستەی كاندیدان دكەت هاتیە. هوون خۆ ب نوونەرێن هەموو خەلكێ ئیراقێ بزانن، ل وێرێ ل گەل ئالیێن دی، ل گەل پەرلەمانتارێن دی، هەڤبەندییەكا رێكوپێك ودۆستانە دروست بكەن، پێكڤە بەرگریێ ژ كوردان بكەن، ژ ئەرەبان بكەن ژ توركمانان بكەن، ژ ئێزدییان بكەن، ژ هەموو كەسەكی بكەن، كی یێ ستەملێكرییە بەرگریێ ژێ بكەن، نەچن ل وێرێ خوە دوور بكەن، یان موزایەدە، ئەوا نەباش موزایەدەنە، ژ موزایەداتان نەترسن، ژ كەسێ نەترسن چونكو چیایێن كوردستانێ یێن ل پشتا هەوە، پارتی یا ل پشتا هەوە.

بـه‌رێز نێچیرڤـان بـارزانـی
د گـۆتـارا خـۆدا د فـه‌رمـۆت:

چاڤەرێی وێینە دەنگێ پارتی ڤێجارێ ژ هەشت سەد هزاران بگەهیتە ملیۆن دەنگان، ئەم ل خواندنگەهەك و ل سەرۆك بارزانی فێریووینە كو پارتی ئامرازە و كوردستان ئارمانجا مە هەمیانە و ل پێناڤی سەربلندی و ب دەستڤەئینانا ئارمانجێن گەلێ كوردستانێ، دڤێت پارتی ب هەمی هێز و سەنگڤە بهنێرینە بەغدا. هەروەسا د فەرمۆت.. ل هەر جهەكی باسێ كوردان و دۆزا كوردی بهێتەكرن، هەردەم پارتی خۆ ب خۆدان مال و خۆدان دۆزا وێ دزانیت و ل هەر جهێ پارتی هەبیت ئاڤەدانی هەیە و گەلێ كوردستانێ باوەرنامەیا ئاڤەدانیێ ئارامیێ ب پارتی بەخشی یە، ناسنامەیا پارتی كوردستانی یە و كارێ وێ ئاڤەدانی یە، پارتی سەنتەرێ پرسا كوردە ل هەر جهەكی بیت، ئەگەر پارتی ل بەغدا ب هێز بیت واتە كودستان یا ب هێزە.

بـه‌رێز مــه‌سـرور بـارزانـی
د فـەرمـۆت:

هەموو هەلبژارتن د گرنگن بەلێ ڤێجارێ د ڤان هەلبژارتنان دا مە بۆ وێ چەندێ یە ئەم نوونەرێن راستەقینەیێن خەلكێ كوردستانێ بهنێرینە بەغدا تاكو ل وێرێ داكۆكیێ ژ مافێن دەستووری یێن خەلكێ كوردستانێ بكەن و ئەڤ خووشك و برایێن هاتینە بەربژاركرن كوڕ و كچێن هەوەنە و خووشك و برایێن هەوەنە و ئەز یێ د وێ باوەریێ دا دێ باشترین شێوە پارێزگاریێ و بەرگریێ ژ مافێن خەلكێ كوردستانێ كەن و هیڤیدارم د سەركەفتی بن.
د هەلبژارتنان دا هەموو جاران ئەم هەوە دوەستینین، بەلێ نەچارین چونكو خەلكەكێ دی ژی بزاڤێ دكەت ل شوونا پارتی دیموكراتی كوردستان ئەو بچن و ڤان پۆستێن گرنگ یێن حوكمەتێ یان جڤاتا نوونەرێن ئیراقێ وەك نوونەرێن خەلكی خوە بدەنە نیاسین و مە دیت چەندین جاران هەكە پارتی دیموكراتی كوردستان ل جهەكی پشكدارییەكا كاڕا و ب هێز نەبیت، خەلكەكێ دی نوونەراتییا خەلكێ كوردستانێ كربیت هەموو دەمان مافێن خەلكێ كوردستانێ یێن هاتینە بنپێكرن، ژ بەر وێ چەندێ گەلەك یا گرنگە نوونەرێن راستەقینەیێن خەلكێ كوردستانێ كو نوونەرێن پارتی دیموكراتی كوردستانن ئەو سەركەڤن و ئەو نوونەراتییا هەوە بكەن، لەوما گەلەك یا گرنگە هوون هەموو پشكدارییەكا كاڕا د ڤان هەلبژارتنان دا بكەن. هەروەسا د فەرمۆت سەرەرای هەموو پیلان و قەیرانان نەراوەستیاین و بەر ب پێشڤە چووین و وەكهەڤی و دادپەروەری پشكەكا گرنگن ژ كولتۆرێ پارتیا مە و هەر پارتی یە پارێزەرا راستەقینەیا خەلكێ كوردستانێ.
ئەڤجا ژ بۆ كوردستانەكا بهێز و ئارام و ئاڤەدان خەلكێ كوردستانێ یێ خواستیە دەنگی بدەتە لیستا ٢٧٥ لیستا پارتیا خۆدانا كوردستانێ.

ئيحسان ئامێدی

پشتی رێبازا بارزانی ل كوردستانێ بەلاڤبووی ئێدی پێكڤەژیانا ئاشتیانە و رێزگرتن ل جوداهیێن ئەتنی و ئایینی و كولتووری جهێ خۆ گرت، بۆ رەفتارەكا پارتیان و مللەتی و هەڤگونجاندنا جڤاكی چێبوو و سەقامگیری جێگیر بوو.
پێكڤەژیانا ئاشتیانە شەنگستێ ئاڤاكرنا جڤاكین سەقامگیر و گەشەكریە، چونكی ئەو پیكڤەژیان پەیوەندیێن جڤاكی بهێزدئێخیت و ناكۆكیا د ناڤبەرا پیكهاتاندا كیم دكەت و رێزگرتن ل جوداهیان دگریت و هەڤقەبوولكرنێ دكەن و هەڤگونجاندن چێدكەن و رێ خۆش دكەت كو هەمی ب سەرفرازی و د ئاسایشێ دا بژین، هەروەكو سەقامگیری و پیكڤەژیانا ئاشتیانە ژینگەهەكا گونجای بۆ گەشەدانا ئابۆری و پێشڤەچوونا وێ یا بەردەوام چێدكەت، بەروڤاژیا ململانێ و شەڕی ئەوێن دبنە هۆیێن رەڤینا سەرمایەی و مەزاختنا داهاتی و چێكرنا ئاستەنگان ل هەمبەر وەبەرهینانێ و گەشەدانێ.
هەروەسا پێكڤەژیانا ئاشتیانە سەقامگیریا سیاسی ژی چێدكەت و دامەزراوێن دەولەتێ بهێز دئێخیت، چونكی جڤاكێن هەڤگونجای هەڤكاریەكا باش دگەل دامەزراوێن دەولەتێ دكەن و دشێن سیستەمەكێ حوكمرانیا دادپەروەر بجهبینن و ب ئەركێن نیشتیمانی رادبن و ریبری قەپخازیان دبن،
كو پێكڤە ژیانا ئاشتیانە و هەڤگونجاندنا جڤاكی و رێزگرتن و هەڤقەبیلكرن هەبیت، رەنگاورەنگیا ئەتنی و ئاینی و روشەنبیری جڤاكی زەنگین دكەت و ئاسویێن گەش بۆ داهێنانێ و پێشڤەچوونێ ڤەدكەت و لێكتێگەهشتنێ و باوەریێ دناڤبەرا پیكهاتێن جڤاكی دا چێدكەت.
ژبەر ڤێ مە پێكڤەژیانا ئاشتیانە ل ئاستێ ئیراقێ دگەل هەمی پێكهاتێن جڤاكیێن ئیراقێ دڤێت، دا ئاسایشا جڤاكی و گەشەدانا ئابوری و سەقامگیریا سیاسی ل ئاستێ دەولەتا ئیراقێ ژی چێبیت و شەڕ و پێكدادان و ململانێ چێنەبیت.
هەلبەت رێبازا پارتی و بارزانی رێبازا پێكڤەژیانێ و هەڤقەبیلكرنێ و رێزگرتنێ یە، ل سەر ڤێ رێبازێ مافێن هەر تاكەكی و پێكهاتەكێ د دابینكرینە، ئەڤجا ژ بوونا ئاشتیا جڤاكی و پێكڤە ژیانێ و ئارامیێ ل ژێر ئالا پارتی و سەرۆك بارزانی كۆم ببن و دەنگێ بدەنە لیستا ٢٧٥ یا پارتی.

ئيحسان ئـامێدی

بەلێ ئەم كوردین و كوردستانینە و دۆزا مە دۆزا نەتەوەیا كوردستانێ یە، و بزاڤ و خەباتا مە ژبۆ رزگاری و ئازادیی و دادیێ و بەختەوەریێ یە.
پارتیا دیموكراتیا كوردستانێ هەر ژ دامەزراندنا خۆ ل سەر دەستی بارزانیێ نەمر پەیاما كورد و كوردستانێ راگەهاندی یە و دۆزا وێ یا رەوا كریە ئارمانجا خۆ و بلندكریە و خۆ لێ كریە خودان و گەلەك گوری و قوربانی بۆ داینە.
دۆزا كوردستانێ ب خەبات و قوربانیدانا پارتی و بارزانی بوویە هەرێما كوردستانێ یا فیدرالی و دەستووری و دانپێدای و هەمی كورستانێ پێ دسەرفرازن.
لەوا هەر كوردستانیەك بەرپرسە كوردستانێ بهێزبێخیت و پشتەڤانیا هەلگرێ پەیاما كورد و كوردستانێ بكەت. هەروەكو هەر كوردپەروەرەك ژی یێ خواستییە پشتەڤانیا ڤێ رێبازێ بكەت كو رێبازا پارتی و بارزانی یە، دا پارتی بهێز بكەڤیت و كوردستانێ بهێز بێخیت. پارتی ل كیڤە بیت نوونەرا گەلێ كوردستانێ یە، پارتی یا ب هێزبیت كوردستان یا ب هێزە، ئەڤجا هەمی كوردستانی دخواستینە پارتی ب هێزبێخن داكو كوردستان ب هێز بكەڤیت و كەساتیا تاكی كوردستانێ خورت بیت و گەل ب مافێن خۆ شاد ببیت.
مێژوویێ و سەربۆرێ خۆیا كریە كو پارتی هەردەم د سەنگەری دابوویە و ب سەربلندی بەرسینگا هەمی دوژمن و نەیاران گرتیە و داكۆكی ل مافێن مللەتی كریە و دابینكرینە، ل رۆژێن رزگاریێ پارتی د هێرش و بەرەڤانیێ دا بوویە، ل تەناهیێ دا ئاسایش و ئارامی دابینكریە، د بیاڤێ ئاڤەدانیێ دا ئێكەما بێ ركابەرە، ب بەرنامە كاركریە و پێدڤیێن بنەكی دابینكرینە، كێشەیێن خوارنێ و ئاڤێ و كارەبێ و خواندنێ و هاتن و چوونێ بنبركرینە و گەشەبوونەكا هەمی لایەنی پەیداكریە و د ناڤ جڤاكێ دا پێكڤەژیانا ئاشتیانە و دادی و وەكهەڤی جێگیركریە، لەوان پێدڤیە ل هەمبەری ڤێ خەبات و قوربانیدان و هەلوەستان، رێز لی بهێتەكرتن و ل رۆژێن هەلبژارتنان دا خۆ ل خۆدانێن ڤێ رێبازێ بكەنە خۆدان و پشتەڤانیێ لێ كەن و سەرفرازكەن كو سەرفرازیا هەمی كوردستانێ یە.
ئەركەكی نەتەوەیی و جڤاكی و ئەخلاقییە ئەڤێ ل بەرچاڤ بگرن، ل پارتی كۆمببن و پشتەڤانیی لێ بكەن و دەنگی ب لیستا وێ بدەین دا كوردستانێ بپارێزیت ماف و داخوازێن مللەتی بجهبیبیت، ئەڤجا ژبۆ كوردستانەكا ب هێز و ئارام و پێشكەفتی، دەنگی بدەن لیستا 275 یا پارتی دیمۆكراتی كوردستان.

ئحسان ئامێدی

كو مرۆڤ هەیە پەیام هەیە، ل گەل پێشڤەچوونا مرۆڤی و چێبوونا جڤاكێن مرۆڤی و چێكرنا گرۆپێن هزری و سیاسی و ئابۆری و یێن بەرژەوەندیا پەیام هەرما و پێدڤی ب رێ و شێوازێن گونجای بوون بۆ گەهاندنا پەیامێ و دگوتنێ راگەهاندن.
راگەهاندن (مەدیا) گەهاندنا پەیامێ یە، پەیام چ بیت و ژ چ بیت و ژ كێ بیت و بۆ كێ بیت و بۆ چ مەبەست بیت, ئارمانج ژێ پەیام ژ هنارتی بۆ وەرگری.
پەیام گەهاندن بۆ گەهاندنا زانیاریان و دەنگوباسان و چێكرنا رایێ یە، ئەڤە ئێك ژ شێوازێن هەرێن كاریگەر ل سەر خەلكی، چونكی بالكێشە و پڕ گوهدار و بینەرە و باندۆرا خۆ راستەوخۆ دكەتە سەر وەرگری. و ل ڤی سەردەمێ پێشكەفتنا زانستی و تەكنولۆژی و ژیرێ چێكری باندۆرا خۆ ل سەر هەمی بیاڤێن ژیانێ دا سەپاندی، راستەوخۆ كاتێكرنا خۆ ل هەمی ئالاڤێن میدیایێ ژی كریە و وەرار و گوهۆڕین تێدا كریە و رەوشەكا دی دایێ، ب تایبەتی ل بیاڤێ سۆسیال میدیا كو ئالاڤەكێ ڤەكریە و رێپێدایە بۆ هەركەسەكی یا خۆ بێژیت.
مەدیا سەردەم و بتایبەتی سۆسیال مەدیا رۆلەكێ باش د چێكرنا رایا تەڤایی و گۆتارا جڤاكی و سیاسی دا دبینن، هەروەكو رۆلەكێ دیار هەی د ئازراندنا كێشەیان و كرێتكرنا بابەتان و ئالۆزكرنا گرفتان.
زانست و تەكنولوژیا وەكو رێبارەكێ خورت رۆژ بۆ رۆژێ بۆشتر لێ دهێت و كارتێكرن و كارڤەدانێن خۆ هەنە، و یێ زیرەك ئەوە مەلەڤانەكێ باش بیت و بشێت باشتر لێبزانیت و خۆ دگەلدا بگونجینیت و بۆ خۆ بكاربینیت، ئەگەر دێ ڤەدەت و ل پاش خۆ هێلیت.
مەدیا سەردەم ئەو ئامراز و ئالاڤێن نوی نە یێن كارێ مەدیایی پێ دهێتەكرن كو پشتبەستە ب تۆڕا ئەنترنێتێ و ئامیرەیێن وێ كو د گوهۆرینەكا بەردەوام دانە د گەل پێشڤەچوونێن زانستتی و تەكنولۆژی و بسپۆریا بكارئینانێ، كو جه و سایتێن ئەنترنێتێ و ڤیدیۆیایان و دەنگان و مەسجێن ئەلكترۆنی و پلاتفۆڕمێن سۆسیال مەدیایی، ئەوا دبێژنێ مەدیایا كارلێكی یان یا راستەوخۆ، و ژ تایبەتمەندیێن ڤێ مەدیایێ ئێدی نەمایە د دەستیێن هندەكان دا بەلكو كەفتە بەردەستێ هەمیان.
خۆیایە ل گەل پێشكەفتنا زانستی و تكنۆلۆژی و بەرفرەهبوونا بلاتفۆرمێن بەلاڤكرنێ، ئالاڤێن كارێ مەدیایی هاتنە گوهۆڕین و بلەزتر و كاریگەرتركەفتن.
ژ پێدڤیێن مەدیایا سەردەم، مرۆڤێن سەردەمن كو هزرێن سەردەم هەبن و بسپۆر و لێزان بن، بزانن قۆناغ چ دخوازیت و چ پێدڤیە بهێتەكرن و ب چ شێواز سەرەدەری د گەل دا بهێتەكرن، ئەڤجا شیانێن دەراڤی و زانستی و تەكنولۆژی و پلان و بەرنامە.
ژێرخانەیا تەكنولۆژی، ئامرازێن پێشكەفتی وەكو كومپیۆتەرێن نوی و ئنترنێتا بلەز و ئامیرەیێن وێنەگرتنێ و بەخشی یێن نوی و پلاتفۆڕمێن دیجیتالی یێن كارلێكەر ب بەرنامەكێ گونجای و دارێژتی ڤە.
مرۆڤ بۆ هەر تشتەكی سەرپشكە و بۆ پرۆسەكا میدیایی كادرێن ب شیان و داهینەر پێدڤینە. هەروەسا مەدیاكارێن سەردەم پێدڤی ب بسپۆرییێن جۆراوجۆرە وەكو نڤیسینێ و ڤەكۆلینا زانیاران و لێزانینێ بكارئینانا ئامیرەیێن جۆراوجۆرێن مەدیایی و ژیرێ دەستكرد و داتایێن هوورد و بەرهەمئیینانا ئامرازێن زانست و هونەرێ هەمەرەنگ د بیاڤێن جیهانا نوییا مەدیایێ دا.
و یا زانایایە میدیایێ یاسایێن خۆ هەنە و د وی چارچووڤەی دا، رۆلێ خۆ یێ چاڤدێریێ و هشیاریێ دبینن و مافێ گەهشتنێ بۆ زانیاریا ب زەلالی ژ ژێدەرێن وانێن فەرمی دابیندكەن، د هەمان دەم دا مەدیا ژ كونترۆلێ دەركەفتیە و باندۆرا وێ یا خراب ژی ل سەر ئەخلاقی و رەفتاران هەیە نەمازە پشتی پەیدابوونا ئالاڤێن نوی یێن سۆسیال مەدیایێ‌.
و داكو مەدیا رۆلێ خۆ ب باشی بگێریت و د گەشەدانا بەردەوام دا بیت پێدڤی بسپۆریێ و شارەزایێ و ئامرازێن نوی هەیە.
رۆڤێن هزرمەند، كادرێن بسپۆر، زانین، ئامراز، پەیام، تكنولۆژیا سەردەم، گەشەدانا بەردەوام، راهێنانێن بەردەوام، دارایا مسۆگەر، وەرگرتنا ئەرینی. پیرۆزیا پیشەیا مەدیایی.
ل سەر ڤێ هەمیێ ڕا مەدیا یا بێ ئاستەنگ و كێشە نینە، ل تێگەهشتنا پەیامێ و ئالاڤێن گەهاندنێ و چاوانیا بكارئینانا وان، زانین و هشیاری د بیاڤێن ئازادیا دەربرینێ و ئەركێن مەدیایێ و یاسایێن مەدیایێ و راستیا زانیاریان و گرنگیا بەلاڤكرنێ ب ئامرازێن گونجای و ل جهـ و دەم و ژینگەها گونجای.
یا زانایە گڤاشتن و رێگریێن جڤاكی و ئابۆری، یاسایی و ئایینی ل هەنبەری چالاكیێن مەدیایی هەنە، لێ د هەمی كاودانان دا دڤێت مەدیا یا راستگۆبیت و خۆ ژ شاشییان و بەلاڤكرنا نەوەییان دوور بكەت و بشێت باوەریا مللەتی ب دەستڤەبینیت و سەرنجا خەلكی بۆ خۆ راكێشیت، و هەردەمێ میدیا كەفتە د خانەیا ڤەشارتنا راستیان دا و تاگیریا شاشیان كر دێ راستگۆیا خۆ ژ دەستدەت و پێدڤیا هەبوونا وێ نامینیت.
هەلبەت قۆناغا ژیری دەستكرد و پشتی وێ و كارڤەدانێن وێ، گەلەك دەرفەت و بەرهنگاریان چێدكەت، دخوازیتە بەرهەڤیێن باش و هزركرنەكا باش و بزانی كا دێ چاوا پەیداكەی و سەرەدەریێ د گەل دا كەی. چونكی مەرج نینە هەر تشتەك باش و دلخواز بیت ل بەردەست بیت و ب ئەرێنی بهێتە بكارئینان.
ئەم یێن ل جەرخەكی دا زانست و تەكنولۆژیا بلەز وەرارێ دكەن و پێشڤەدچن، دڤێت لێ بزانین و خۆ دگەل دا بگونجینین، لەوا ب خۆشحالی ڤە، دێ ناڤەندا خانی یا رەوشەنبیری و راگەهاندنێ سێیەمین فێستیڤالا خۆ یا رەوشەنبیری ل ژێر ناڤێ ؛كوردستان و مەدیا سەردەم) ل رۆژێن ٥ و ٦ چریا ئیكێ ٢٠٢٥ ێ گێریت و دێ چەندین بسپۆر و شارەزا پشكداریی تێدا كەن و چەندین بابەتێن پەیوەندیدار هێنە پێشكێشكرن و گەنگەشەكرن، هیڤیدارین پڕ مفا بن.

ئيحسان ئامێدی

ل ٢٥ ئیلۆنا ٢٠١٧ د راپرسینەكا تەڤایی دا مللەتی یا خۆ گۆت؛ بەلێ بۆ سەرخۆبوونا كوردستانێ و ئەڤە ئارمانجا مللەتی یە، د سەقایەكێ ئارام دا ب ئازادی دەربرین ژ ئارمانجا خۆ كر و بۆ دۆست و دوژمنان دیاركر كا مللەتی چ دڤێت.
ل باشوورێ كوردستانێ سێ جاران ب رەنگەكێ تەڤایی مللەتی دەڕبرین ژ ئارمانجا خۆ یا نەتەوەیی كریە و تەڤایا مللەتی تێدا پشكداربوویە، جارا ئێكێ سەرهەلدانا شۆرشا ئیلۆنا نیشتیمانی ب سەرۆكاتیا بارزانیێ نەمر ل سالا ١٩٦١ دەمێ تەڤایا خەلكێ كوردستانێ دەستدایە چەكی و هێرش كریە سەر بنگەه و سەنگەرێن دوژمنی و ستاندین و ژ زاخۆ هەتا خانقینێ د ماوەیەكێ كێم دا رزگاركری و یا د وێ سەرهلدنا ئادارا سالا ١٩٩١ دەمی هەمی مللەتی پێكڤە سەرهلدان كری و باشۆرێ كوردستانێ ب كەركووكا دلێ كوردستانێ ڤە رزگاركری و یا سیێ ریفراندۆم بوو و پتر ژ ٩٣٪ گۆتی (بەلێ بو سەرخۆبوونا كوردستانێ)، ئەڤ هەرسێ دەربڕینە د چارچووڤەیێ بەرنامەیەكێ دارێژتی ڤە، ژلایێ سەركردایەتیا كوردستانێ ڤە هاتنە رێكخستن و برێڤەبرن، لێ ئەوا ریفراندۆمێ ژ هەردوێن دی جودا دكەن، هەردویێن بەراهیێ سەرهلدانێن مللەتی یێن چەكداری و شۆرشگێری بوون، لێ ریفراندۆم د چارچووڤەیێ قانوونەكێ دا و د سەقایەكێ ئارام و ئازاد دا ب رێكەكا مەدەنی و ئاشتیانە و ل ژێر چاڤدێریا رێكخراوێن جیهانی و ناڤخۆیێن پەیوەندیدار هاتە رێكخستن و برێڤەبرن. و دەنگڤەدانەكا جیهانی هەبوو.
مخابن چاوا پشتەڤانی ل شۆرشا مللەتی و سەرهەلدانا مللەتی نەهاتەكرن، وەسا و خراپتر سەرەدەری ل گەل ریفراندۆما كوردستانێ ژی هاتەكرن، دەولەتێن داگیركەر و یێن جیهانی هەمی دژ راوەستان و نەهێلان ئارمانجا خۆ بجهبینیت.
بەلێ یا گرنگ، ریفراندۆم شیا رایا مللەتی بزانیت و ب جیهانێ ڕا بگەهینیت كو بەلێ خەلكی كوردستانێ سەخۆبوون دڤێت و ئەڤە سەركەفتنەكا مەزنە و بۆ هەردەمەكی دیكۆمینتەكا زێندیە د دەمێن گونجای دا بهێتە بكارئینان.
بۆ كوردان رۆژا ریفراندۆمێ رۆژا سەركەفتنا ئیرادەیا مللەتی یە، جەژنەكا نەتەوەیە، هەر كوردەك شانازیێ پێ دبەت و دێ ئەڤ رۆژە ژی وەكو نەورۆزێ و ١٦تەباخێ و یازدەی ئیلۆنێ و یازدەی ئادارێ و ٢٦ گولانێ و سەرهلدانێ هەر یاگەش و زیندی بیت.
هەلبەت كوردستانێ بنەمایێن دەولەتینیێ هەنە و ئەڤا ئارمانجەكا نەتەوەیی یە و خواستەكا تەڤایی بۆ هەیە و خەباتەكا دوور و درێژ بۆ هاتیەكرن و گەلەك قوربانی بۆ هاتینەدان، لێ نەگەهشتیە وێ ئارمانجێ!. لێ ئیرادەیا بجهئینانا ڤێ ئارمانجێ یا ب هێزە ل دەف رێڤینكێن رێبازا پارتی و بارزانی.
سەرۆك بارزانی د كتێبا خۆ دا بۆ مێژوو دبێژیت:كوردستانێ بنەمایێن دەولەتینیێ هەنە و مافێ وێ یە دەربرینی ژ ڤیانا خۆ بكەت.
سەربۆڕا كوردستانێ د هەڤپشكیێ دا ل گەل داگیركەران شكەستی بوویە، و د ئیراقا نوی دا ژی لایەنێن دەستهەلاتدار ل ئیراقێ خۆیاكر كو نەشێن پیگریێ ب دەستووری بكەن و هەڤپشكیێ و هەڤسەنگیێ و ل هەڤكرنێ بجهبینن، ئانكو ئیراقا نوی ژی یا شكەستی بوویە، ژبەر هندێ چارە د ژیكڤەبوونێ دا هاتە دیتن، لەوا ل سەر پشنیار و دەستپێشخەریا سەرۆك بارزانی ل رۆژا ٧ خزیرانا ٢٠١٧ كۆمبوونەك ل سەرۆكاتیا هەرێما كوردستانێ ل گەل لایەنێن سیاسیێن كوردستانێ گرێ دا و گرنگیا ڤێ دەستپێشخەریا خۆ یا چارەنڤیسساز نیشا دا و هەمی لایەن هەڤڕابوون دگەلدا و بریار هاتەدان كو ریفراندۆم ل ٢٥ ئیلۆنا ٢٠١٧ بهێتەكرن.
ریفراندۆم د دەمێ دیاركری دا ب كەیفخۆشی و ب كەرنەڤالێن جەماوەری ل هەرێما كوردستانێ ل دەڤەرێن رزگاركری ڤە هاتەكرن و ئەنجامێ هەرێ باش بدەستڤەئینا.
ڕاپرسینا ٢٠١٧/ئیلۆنا/٢٥ ب ڕاپرسینەك تەڤایی و فەرمی و یاسایی و سیاسی دهێتە نیاسین. نەمازە كو بیرۆكە و پرۆژە و بەرنامەیێ وێ ژ لایێ سەرۆكێ هەرێما كوردستانێ رێزدار مسعود بارزانی ڤە هاتبوو ئامادەكرن و پێشكێشكرن و یاسایەك بۆ هاتە دانان و كۆمسیۆنا سەربەخۆیا هەلبژارتنان كو دامەزراوەك یاسایا فەرمی یە پێ رابوو و مللەتی یا خۆ گۆت، بەلێ بۆ سەربخۆیا كورستانێ، ڤێ ریفراندۆمێ شرعیەتا خۆ یا یاسایی و سیاسی وەرگرت. ئێدی چاڤەرێی كاودانەك گونجایینە بۆ بجهئینانێ.
بەلێ سەرخۆبوون ئارمانجا مللەتی یە، ب هەمی شێواز و رێبازان كار بۆ دهێتەكرن و راپرسینا تەڤایی ئیك ژ رێبازێن وی یێن مەدەنی بوو.
مللەتێ كورد هەمی رێباز بۆ ئارمانجا خۆ پەیرەو كرینە، ژ بزاڤێن هزری و رەوشەنبیری و میدیایی و سیاسی و خەباتا چەكداری و شۆرش و سەرهلدانێن جەماوەری و ریفراندۆم ژی.
مللەتەك كو هندە رژد و داكۆك بیت ل سەر ئارمانجا خۆ هەر دی گەهیتێ و ب هیڤینیە دەمەك زوی بگەهیتێ‌.

ئيحسان ئـامێدی

كو باسێ شۆرەشا ئیلۆنی بكەین دڤێت دو ستوونێن وێ یێن سەرەكی ببینین و بخوینین، دا ب دروستاهی د كار و ئارمانجێن وێ بگەهین، ئەو ژی بارزانیێ نەمر ئەو رابەرێ بزاڤا رزگاریخوازا نیشتیمانیا كوردستانێ، كو هەمی ژیان و تەمەنێ خۆ بۆ رزگاركرنا كوردستانێ تەرخانكری، پارتیا دیمۆكراتیا كوردستانێ یا كو هاتیە دامەزراندن ل سەر دەستێ بارزانیێ نەمر ژبوونا دامەزراندنا دەولەتیا هەڤگرتیا كوردستانێ، هەروەكو د پەیمانا مللی یا پارتی و پرۆگرامێ پارتی یێن كۆنگرەیی ئێكێ ل سالا ١٩٤٦ دا هاتین.
پارتی ب سەرۆكاتیا بارزانیێ نەمر هاتە دامەزراندن دا كوردستانێ د چارچووڤەیێ بەرنامەكێ گشتگیر دا ڕزگاركەت و ئاڤەدانكەت و گەشەیێ پی بكەت و دادیێ بجهبینیت، و شۆڕشا چەكداریا ١١ ئیلۆنێ ئێك ژ ڕێبازێن ڕزگاركرنا كوردستانێ بوویە. هەلبەت پەنابرن بۆ بكارئینا چەكی دوماهی هەلبژاردەبوویە و ب نەچاری بوویە، ل وی دەمی بوویە كو رژێما حكمدار هەمی رێیێن لێك تێگەهشتنێ و دانوستاندنێ گرتین و دەست ب شەڕ و گرتن و كوشتنا كوردان كری.
یا زانایە شۆرشا ١٤ تیرمەهێ ل ئیراقێ رژێما شاهاتی گوهۆڕی بۆ كۆماری، بیاڤەكێ ئازادیێ و فرەپارتایەتیێ ل ئیراقێ چێكر و بارزانیێ نەمر وەكو سەركردەیەكێ سەركەفتی پشتی دوازدە سالان ل دەربەدەریێ و ئاوارەیێ و پەنابەریێ ل یەكێتیا سوڤێیەتی ڤەگەریاڤە وەلاتێ خۆ و پێشوازیەكا مەزن و بەرفرەه لێ هاتەكرن. ئێدی پارتیا دیموكراتیا كوردستانێ دەستویری فەرمی وەرگرت و كۆنگرەیێ خۆ یێ چارێ و پێنجێ ب سەرۆكاتیا بارزانیێ نەمر ب ئاشكەرای ل بەغدا گرێدان، ئێدی پارتی گەشەبوونەكا سیاسی و جەماوەری بخۆڤە دیت و چالاكیێن وێ بەرفرەه بوون، و رۆلەكێ باش د پرۆسەیا سیاسی د ئیراقێ دا دیت، و كەفتە د هەڤڕكیێ دا دگەل هندەك هێزێن سیاسیێن دیموكراتی و ململانێ ل گەل هندەكێن دی یێن عەرەبیێن شۆفینی. د وی دەستوداری دا هەستا نەتەوایەتی ل دەف كوردان بهێزكەفت و هشیاریا نەتەوەیی خۆرت بوو، ئێدی بڕبڕە خەلكێ كوردستانێ و ئەندامێن كورد ل ناڤ رێكخستنێن سیاسی یێن دی هاتنا د ناڤ پارتیا بارزانی دا و پارتی بۆ هێزەك، حوكمەتا ئیراقێ و هێزێن سیاسی ترسەك ژێ كر و كەفتنە د ململانێ دگەلدا و گڤاشتن ل سەر رێكخستن و بارەگایێن وێ دروستكرن، هەروەكو حوكمەتا عەبدولكەرێمی ژی پاشگەز بووی ل وان سۆزان یێن ب كوردان داین و ب ئەقلیەتەكا عەسكەرتاری سەرەدەری ل گەل خواستێن رەوایێن كوردستانێ كر، ئێدی ل ژێر ڤێ گڤاشتنێ و گرتن و راهێلانا سەركردەیین پارتی رەوش بەرەف پەقینێ ڤە چوو.
ل ١١ ی ئیلۆنێ هێزێن لەشكرێ ئیراقێ لەشكەركێشی كر و چەندین دەڤەرێن كوردستانێ بمبارانكرن و شەر دژی كوردستانێ هەلكر، د گەرەوا وێ دا ل ١٩ ئیلۆنا ١٩٦١ ێ مەكتەبا سیاسی یا پارتی بریار دا ریبری زێدەگاڤیێن حوكمەتێ ببیت، هۆسا پارتی و جەماوەرێ كوردستانێ رەدا وێ سیاسەتێ كر و سەرهلدان كر و شۆرشا ئیلۆنا رزگایخوازا نیشتیمانی ب سەرۆكاتیا بارزانیێ نەمر ل ١١ ئیلۆنا سالا ١٩٦١ ل ژێر درووشمێ دیموكراتی بۆ ئیراقێ و ئوتونومی بۆ كوردستانێ هاتە راگەهاندن.
شۆرشا ئیلۆنا ڕزگاریخوازا نیشتیمانی ب سەركردایەتیا پارتیا دیموكراتیا كوردستانێ و سەرۆكاتیا بارزانیێ نەمر هاتەكرن ل سەر بنگەهێ فەرمۆدا بارزانی .. چ شۆرەش بێی پارتیەكا رێكخستی و سەركردایەتیەكا راستەقینە سەرناكەڤیت، هۆسا شۆرشا ئیلۆنێ شۆرشا رزگاریخوازا نیشتیمانیا كوردستانێ دەستپێكر، هەمی پێكهاتین پارتی و پێشمەرگەی و مللەتی هاتنە ریكخستن و ئاراستەكرن و ب هەڤرا هێرش كرنە سەر بنكە و دامەزراوێن لەشكری و حوكمی یین رژێما حوكمدار و پاقژكرن و رزگاركرن و دەڤەرەكا مەزنا كوردستانی ژ زاخۆ تا خانەقین ئازاد كر و دەستهەلاتا پارتی لێ دانا و رێزێن پێشمەرگەی رێكخستن و بەرەیەك بەرانبەر هێزێن دوژمنی ل دەڤەرێن ل ژێر دەستهەلاتا رژێمێ دانا و نە هێلا دوژمن پیشڤەچوونێ بكەت بۆ دەڤەرێن ڕزگاركری، و حوكمەت نەچاركر گفتوگویێ بكەت و بهێتە دانوستاندنا و دانپێدانی ب مافێن ڕەوایین گەلێ كوردستانێ بدەت.
ڕێبازا پارتی و بارزانی ڕێبازا ڕزگاریخوازیا نیشتیمانیا كوردستانی یە، دخوازیت كوردستان ببیتە وەلاتەكێ سەربەخۆ و دۆزا كوردستانێ ب رێكێن ئاشتی چارەسەركەت، باوەری دانوستاندنان و رێبازێن ئاشتیێ هەیە بۆ چارەسەركرنا دۆزا كوردستانێ و هەول ددەت ئەڤ دزە ل دویڤ راستیێن جوگرافی و مێژوویی چارەسەر ببیت و ئارمانج ژێ دیاركرنا جوگرافی و سنوورێن كوردستانێ و قەبوولكرنا دەستهەلاتیا كوردستانی ل دەڤەرێن پتریا كوردان لێ د ئاكنجی، ئانكو دانوستاندن ل سەر عەردێ كوردستانێ بوون، لێ بەروڤاژی دژمن و داگیركەران باوەری ب مافێن كوردستانێ و چارەنڤیسێ گەلان نەبوو، و سیاسەتا فراونخوازیێ و سەركوتكرنێ و پەراوێزكرن و بی بەهركرنا كوردستانێ ژ مافێن وێ یێن رەوا دهاژوت.
شۆفینیەتێ و عەسكەرتاریەتێ، ئیراق بەر ب كودەتا و تاكڕەوی و دكتاتوریەتێ و شەڕی و كوشتنێ و وێرانكرنێ بر، و بارودۆخ ئالۆزتر لێكرن و ل بەرانبەر ژی بزاڤا ڕزگاریخوازیا كوردی گەشەیی ب شۆرشا كوردستانێ كر و بهۆست بهۆست كوردستان رزگاركر.
پشتی چەندین گەڕێن شەڕی و چەندین گەڕێن گفتوگویان، شۆرشا ئیلۆنێ شیا ڕژێما بەغدا نەچاركەت رێكەفتنناما ١١ ی ئادارا سالا ١٩٧٠ مۆهركەت و دانپێدانی ب مافێن نەتەوەیێن گەلێ كوردستانێ بكەت و هێزێن خۆ یێن داگیركەر ژ پتریا دەڤەران ڤەكێشیت. كو دبیتە مەزنترین دەستكەفتیێ نەتەوەیێ بزاڤا ڕزگایخوازا كوردستانی ب درێژاهیا مێژوویا خۆ. ئەڤ پیكهاتنە ل سەر عەردی بوو، وەكو ناكۆكی ژی چێبووین هەر ل سەر عەردی بوو، كو بزاڤا رزگارخواز و سەركردایەتیا شۆرشێ ئامادەنەبوون دەستبەرداری دەڤەرێن كوردستانێ بن.
بەری ٦٤ سالان گەلێ كوردستانێ ب هەڤرا شۆرشەكا مللی یا سەرتاسەری دژی داگیركرنێ و ستەم و زۆریێ كر، و رزگاركرن كر، شۆرشەكا كوردستانی بوو، هەمی باشوڕێ كوردستانێ ڤەگرت و خەلكێ هەمی پارچەیان پشكداری تێدا كر، هشیاریا نەتەوەیی و وێرەكیا شۆرشگێری بۆ خەلكی چێكر، ئێدی ب ساناهی خەلك دبوو پێشمەرگە و چەكێ شۆرشێ د هەلگرت و د چوو بەرۆكێن بەراهیێ و شەڕێ دوژمنی دكر.
شۆرشا ئیلۆنا ڕزگاریخوازا نیشتیمانی مەزنترین شۆرشا هەڤچەرخا كوردستانێ بوو، گەلێ كوردستانێ ژ خێلەكیێ و ناڤچەیێ دەربازكریە مللەتینیێ و وەلاتینیێ، و بزاڤا وێ یا سیاسی كریە شۆرشا ڕزگاریخوازیا نەتەوەیی و پێناڤی ئارمانجێن نەتەوەیی خەبات كری، و دامەزراوێن دەەلەتینیێ پێكئیناین.
ل ١١ ئیلۆنێ شۆرشا رزگاریخوازیا كوردستانێ ل سەر رێبازا بارزانی دەستپێكریە و ڤەگوهاستیە بۆ پارتی و ڕیكخستنێن سیاسی یێن دیتر، و ئەڤ سیاسەتە ب ئەڤرازی و نشیڤی یێن خۆڤە بەردەوامە و دی مینیت تا ئارمانجێن خۆ یێن ڕەوا بجه دئینیت ب پێكئینانا كیانەكێ سیاسی و یاسایێ نەتەوەیێ كوردستانێ.
هەرێما كوردستانێ بەرهەمێ خەبات و قوربانیدانا گەلێ كوردستانی یە ل سەر رێبازا پارتی و بارزانی و هێزێن دی یێن سیاسی، و بنگەهێ وێ ل بەرنامێ پارتی دا و ل ڕێبازا شۆرشا ئیلۆنێ دا دانا بوو.
ئەڤرۆ هەرێما كوردستانێ سەرفرازە ب خوڕاگری و بەرخودانا گەلێ كوردستانێ كو ئەڤ هەرێمە بەرهەمئینای وگەشەیێ پێ كری، و ل ڤی دەمی هەمی لایەنێن سیاسی دخواستی نە ل سەر بنەمایێن رێبازا بارزانی و پرانسیبێن پارتی و شۆرشا ئیلۆنێ هەڤبگرن و خۆ ب هێز بێجن و بەرسینگا هەمی بەرهنگاری و قەپخازیان بگرن،
راستیەك هەیە دڤێت هەر كەسەك بزانیت ئەو كی ببیە ژی ئەڤەیە، رێبازا پارتی و بارزانی رێبازا كوردایەتیا راست و دروستە، و پارتیا بارزانی تاكە هێزا سیاسیە خۆ ب خودانێ كورد و كوردستانێ دزانیت و ب وێ بەرپرسیاریێ رادبیت، لەوان سەرۆك بارزانی فەرموویە، چەندین پارتی بهێز بكەڤیت كوردستان ژی ب هێز دكەڤیت، ژبەر ڤێ چەندێ ژ هەڤالێن پارتی و كوردپەروەران دهێتە خواستن خۆ ل ئاستێ ڤێ بەرپرسیاریێ ببینن و خۆ پی بگەهینن كو بشێن باشتر و چاكتر خزمەتا گەل و وەلاتی بكەن، دا مللەتی پشتڕاست كەن و رازیبوون و باوەریا خەلكی ب دەستڤە بینن و پارتی بهێزبێخن و كوردستان بهێز بكەڤیت.
دا ل بیرەوەریا ٦٤سالیا شۆرشا ئیلۆنا ڕزگاریخوازا نیشتیمانیا كوردستانێ پەند و وانەیان وەرگرین و فەرمودەیێن بارزانی بكەینە یاسا و سیستەم و كاری پێ بكەین پێناڤی كوردستانەكا ئازاد و دادیا جڤاكی و مافێن مروڤی و پێكڤەژیانێ و گەلەكێ بەختەوەر.

ئيحسان ئـامێدی

ژ مافێن بنەكی یێن مرۆڤی یە ئازاد و ئارام د ژینگەها خۆدا بژیت، هەروەكو ئەڤ هەبوونە د سروشتێ خۆ دا یا ئازاد و ئارام و ژبەركو ژیان ل وی جهی چدبیت یا ژینگەها وێ یا سروشتی یا ئارام بیت و پێدڤیێن بنەكی یێن ژیانێ تێدا هەبن و ئەركی مرۆڤی یە ئاسایشا تاكان و كۆمان دابین بكەت و ئارامیێ جیگیركەت و ئازادیێ رێكبێخیت و پێدڤیێن بنەكی یێن ژیانێ پەیداكەت، داكو ئایشا جڤاكی بجهبهێت.
كوردستان وارەكێ ئارام و ب خێر و بێرە، و پێكڤەژیان و هەڤگونجاندنەكا جڤاكی لێ هەبوویە، لەو كورد لێ ماینە و پاراستی یە، لێ دوژمن و نەیار و داگیركەران بەلا خۆ ژێ ڤەنەكریە و كریە مەیدانا شەڕ و پێكدادانان و نەهیلایە ئارام و سەقامگیر بیت و ئاسایشێ ب خۆڤە ببینیت.
مێژوویا ژیانا كوردستانێ خۆیاكریە كو تێرا خۆیی هەبوویە و كوردستان بەرهەمداربوویە و بەرهەمێ خۆ دهنارت و ل بەرانبەر وێ هندەك پێدڤیێ دی دئینان. د ناڤ خۆ دا ئارسمیەك هەبوو، لێ دوژمنان نە دهێلا ئاسایش و سەقامگیری بەر بكەڤیت، هەردەم كوردستان د شەڕان و وێرانكرنێ دابوویە و هەكە بۆ ماوەیەكی ژی قۆلاچەكا وێ ب ئازادیی و ئارامیێ شاد ببیت هەر د وی دەمی دا گەف و گڤاشتن و مەترسی ل سەر هەبوویە، حنێر بوویە تا نوكە ئەڤ مللەتە د وەلاتێ خۆدا مایی و وەكو كەڤنترین مللەت ل سەر رویێ ئەردی، شیابیت هەبوونا خۆ وەكو پێكهاتەكا مرۆڤی ل كوردستانێ بپارێزیت و نە ببیتە كیانەكێ سیاسی و قانوونی.
كورد مللەتەكێ ئاشتیخوازە و حەزژ ئارامیێ دكەت، لێ ل ناڤخۆ دا ب ساناهی دلرەشیێ و كەربوكینێ رادكەت و ناكۆكیا چێ دكەت و دوبەرەكیێ دروستكەت و خۆ ب ئێكودو نادەن و هەڤگرتنێ پێكنائینن، لەو گۆتیە كورد قەومێ دیكلانە، هەڤڕكیا هەڤ دكەن و دوژمنان ژبیردكەن!.
ڤان پیكدادان و ململانان چ بەرژەوەند تێدا نینە و لێدانا هەڤگونجاندنا جڤاكێ یە و دكەڤیتە د خزمەتا دوژمنان دا!.
یا زانایە هەرێما كوردستانێ یا د رەوشەكا نەدلخواز دا و گەف و مەترسی ل سەر هەنە، پێكهاتێن جڤاكی ژ ئێزدیان و كریستیانان و ئەرمەنان یێن درەڤن، گەنج و لاو هەست ب ئارامیێ ناكەن یێن وەلاتی بجه دهێلن و بەرەف وەلاتێن رۆژئاڤا دچن.
گڤاشتنێن سیاسی، ئابۆری، جڤاكی، گەف و مەترسیێن داگیركەران و تیرۆرستان گەفا ل سەر ئاسایشا جڤاكی دروست دكەن، ترس ل دەف تاكێن وەلاتی دروست بوویە، ژیان یا لێ ئالۆزبووی و ئاسۆیێن گەش نابینیت!.
هەڤگرتن و رێكخستنا نافمالیا هەرێمێ و پێكڤەژیان و هەڤگونجاندنا سیاسی و جڤاكی كو توخمێ هێزا هەرێمێ یە و ستوونا خۆراگریێ و بەرخودانێ یە یا دهژیێت، ژ بەر هندێ ئەركەكێ مرۆڤی، نەتەوەیی، نیشتیمانی، جڤاكی یێ بریار بدەستێن كوردستانێ یە ل سەر ڤێ خالێ راوەستن و كاری بۆ بكەن و نەهێلن چ دەرز بكەڤنە ناڤمالا كوردستانێ دوبەرەكیێ و پترژ دو بەرەیان چێنەبن، داكو ئەڤا هەی ژی نەكەڤیتە د مەترسیێ دا، نەمازە میژوویا ناكۆكیان و ژێكڤەبوونێ ل كوردستانێ كارەسات پاش خۆ هێلاینە.
مە هیڤی و داخواز و شەڕە ل گەل دوژمن و داگیركەران، دا بەلا خۆ ژ مە ڤەكەن و بهێلن ئەم د وەلاتێ خۆ دا ب ئارامی بژین، بەلێ ل كوردستانێ ئەركەكێ مرۆڤی، ئەخلاقی، ئایینی و نەتەوەیی یە، كار بكەن ئارامی جێگیر ببیت و جوداهیین بیرەباوەران نە بنە هۆكارێن ناكۆكیێ و هەڤدژیێ و شەڕ و پێكدادانان تێكدانا ئارامیێ.
بارێ خەلكی كوردستانێ گەلەكێ گرانە، كاودانێن سیاسی و قەیرانێن ئابۆری و دارایی خەلك شەپرزە و بێزار كریە، هیڤینە چ سەرباركێن دی ل سەرا ناكۆكیێن ناڤخۆیی نەدانە سەر.
ل ڤی سەردەمی پتر ژ هەر دەمەكی خەلكێ كوردستانێ یێ پێدڤی ب ئاسایشا جڤاكی یە، پێدڤی ب ئارامیێ و پشتراستیێ یە، یا كو دشێت هەستێن تاك و پێكهاتێن جڤاكی ئارام و دلنیا كەت كو چ مەترسی ل سەر نینن و ژیانا وی یا ئەڤرۆ و سباهی یا مسۆگەرە.
هەرێم پێدڤی ب سەپاندنا پەیرەوی و بجهئینانا یاسایێ یە، دا باوەری ب هێز بكەڤیت ئاسایش جێگیربیت و خەلكی پشتراست بیت و ژێیاتیێ بۆ گەل و وەلاتی و كیانێ سیاسی خورت ببیت.

ئحسان ئامێدی

ب سەدان سالە داگیركەران شەڕ و كوشتن و وێرانكرن و تەپەسەركرنا كوردانە ژبۆ خۆ سەپاندنێ و بجهئینانا بەرژەوەندی خۆ یێن نەرەوا، پشتی نەشیاین ئارمانجێن خۆ بجهبینن و زیانێن مەزن ڤیكەفتین، هشتا نە شیایینە دانپێدانێ ل ئەقلیەت و سیاسەتێن خۆ یێن شاش بكەن و پێداچوونەكا رەخنەگرانە ل سەر بكەن و رییەكا ساخلەم و راست هەلبژێرن و هەر ب مەرەم و خەونێن خۆ یێن خراب، بەلێ ب رەنگەكێ دی كەربوكینێن خۆ نیشا ددەن و دبێژن، دێ هەڕن بەڵا وە ل سەرێ وە و سەرێ خۆ بخۆن!.. كەنگی كورد بەڵانە و چ زێدەگاڤی ل سەر وان كرینە، لێ ئەو بەڵا سەرێ كوردان و خۆنە!..
ئەڤە ژی مە قەبویلە ئەو ب باوەری و ب رێزگرتن دانپێدانێ ب مافێن كوردان نادەن، باشە ب ڤی رەنگی ب كەربوكین دەستێ خۆ ژ كوردان ڤەكێشن و بەڵا كوردان ژ خۆ ڤەكەن!، و هەر ئێك ل وارێ خۆ. و بلا ژبیرا خۆ نەبەن كو ئەڤ كوردستانە یا كوردانە و مافێ وان یێ سروشتی یە و بۆ وایە و چ منەتا لێ ناكەن!..
دوژمن و نەحەز دبێژن كورد ڤێكناكەن و هەر ئێكی بۆ خۆیە و هەر یێن ب ستویێن هەڤ ڤە و نەشێن مللەتی و وەلاتی برێڤە ببەن، ئەو بەڵا سەرێ خۆ نە و تێرا هندێ هەنە رەوشا خۆ تێكدەن،!.
باوەربكەن كورد ئێكین و هەڤگرتی نە ل سەر كورد و كوردستانێ و ئاشتیێ و ئازادیێ، دیموكراتیێ و پێكڤەژیانێ و تێرا خۆ هەنە بۆ رزگاریێ و ئاڤەدانكرنێ، بەس ئەو بەڵا خۆ ژێ ڤەكەن، چ كێشە نامینن!، نێ هەمی ناكۆكی و ململانێن ناڤخۆیێن كوردان دەستێ وانێن پیس و چەپەل تێدانە، بناڤێن ئێكەتی و سەروەریا دەولەتی و ئێك ئایینی و پاراستنا نیشتیمانی و تەواوكەریا ئابۆری، یان هەر بەرژەوەندیەكا بیت!. و ل وان پرسان هەمیان كورد هەڤپشكێن وان نینن و هەكە كورد بخۆ بن د پێكهاتینە و ل هەڤهاتینە و دشین وان پرسێن كوردستانی بجهبینن و سەرگێریەكا باش دكەن.
د جڤاكی دا هندەك جاران ژ كەربوكین و نەڤیانێ و ژ نەچاریێ هەلوەستەكێ بەروڤاژی دهاژۆن و هەڤكێشەیان دگوهۆریت و ئێكلادكەن، هەكو ب تۆرەیی ڤە دبێژن ئەو بۆ وە و بەڵا وە ل سەرێ وە! و د گەرەوا وێ دا ئەو كێشە چارە دبیت و ئارام دبیت. ئەڤە گۆتنەكا راستە ب مەبەستەكا خراب!.
د ناڤ جڤاكێ دا سەربۆڕێن هۆسا هەنە، هەروەكو ئێك دلێ خۆ بەتە ئێكێ و ب دلێ دەیك و بابان نەبیت، لێ ل بن كۆمەكا هۆكاران نەچار دبن ئەوا نەڤێت قەبویلكەن، دێ بیژنێ دێ ئەڤە مە دا تە و ببە و ئێدی هەوە نەبینین، ئێدی دێ چن خێزانەكێ پێكئینن و پاشی و هەر ل ژێر گڤاشتنا كۆمەكا هۆكارێن دێ دگەل پێكهێن!.
و هندەك جاران د سیاسەتێ دا ژی ئەڤە هاتیەكرن و هندەك پاشگەزبوون یان ریكەفتنێن هێزێن نیشتیمانی و هەرێمایەتی و نیڤدەولەتی ل سەر ڤی بنگەهی هاتینە ئەنجامدان و ئارامیەك چێكریە، هەروەكو خۆڤەكێشانا سەدڕیا ژ پێكئینانا حوكمەتێ و خۆڤەكێشانا ئەمریكا ژ كوریایێ و ڤێتنامێ و ئەفغانستانێ و خۆڤەكێشانا رۆسیا ژ دەولەتێن رۆژهەلاتا ئورۆپا، ئەڤان خۆڤەكێشانا ئارامیەك ل پاش خۆ هێلا و هۆسا هندەك پرس ب نەڤیان كەفتینە بەر هەلوەستێن ئەرێنی یێن ب مەبەست و ئەنجام باش بوونە!.
ژ مێژوەرە ل پرۆسەیا سیاسی د ئیراقێ دا هەبوونە ل ئاستێ سەركردەیان سەرێ وان ب دۆزا كوردی ڤە گێژ بوویە، نەمازە پشتی باوەری بۆ چێبووی كو ب شەڕی نەشێن كوردان سەركوت بكەن و تەپەسەركەن و نەچاركەن، ئێدی ژ نەڤیان گۆتیە بەلا خۆ ژ كوردان ڤەكەن بلا بچنە وەلاتێ خۆ، كا دێ چ كەن بلا بكەن، ئەو ب خۆ تێرا خۆ هەنە، دێ بەربنە ئێك و ژ برسا مرن و دێ پێشەمان بن و ل مە زڤڕن!، و هەبوونە ئەقلانە هزركریە و گۆتیە هندی كورد ب مافێن خۆ نەگەهێن دێ سەرگێژی بۆ مە ژێ چێبیت و ئیراق سەقامگیر نابیت!
ل ڤێ دوماهیێ گۆتنەكا خانمەكا ئیراقێ یا كین ژ كوردان هەی د سۆشیال میدیا دا دهێتە نیشادان دەمێ دبێژیت: یا وە بۆ وە یا مە ژی بۆ مە! نەفتا وە بۆ وە و نەفتا مە ژی بۆ مە، هین ل مالا خۆ و ئەم ل مالا خۆ و خەرجیێن خۆ هوون بكەن، ئەم ژی دێ یێن خۆ كەین، ئەگەر بۆ چ مەبەست بیت، گۆتنەكا راست و ئەرێنی گۆتیە و دیاركرنا مافەكی یە كو كێشە ل سەر هەیە، كوردان ژی هەر ئەڤە دڤێت، بەلێ ژدل و ب باوەری بێژن، مافێ كوردانە خۆدانێن وەلاتی و سەروەریێ و سامانێن خۆ بن و ئەو ب خۆ سەرگێریا خۆ بكەن.
د نیاز زەلال و پاقژ نینن و ل سەر بنگەهێ باوەریێ نینە، لێ باشە ب ئەرێنی وەگرن و بەر ب ئەرینی ڤە ببەن و وێ باوەریێ چێكەن و پێڤەكەن كو ئەوا گۆتی یا راست و دروست و گونجایە و بۆ هەرێمێ و ئیراقێ و دەڤەرێ باشە و خۆیا كەن ئەگەر ئەو مایێ خۆ د كوردان نەكەن كورد دشێن ب باشی سەرگێریا خۆ بكەن و وەلاتی پێشڤە ببەن و ببنە هۆكارێ ئاشتیێ و سەقامگیریێ بۆ ئیراقێ و دەڤەرێ ژی.
كا بلا بەلا خۆ ژ كوردان ڤەكەن، بەڵا كوردان ل سەری كوردان، كورد تێرا خۆ هەنە، د زانا و بسپۆر و شارەزانە دزانن دێ چ كەن.جڤاكا مرۆڤی و ل ئاستێ جیهانێ و دەولەتان دخواستینە پێداچوونێ د سیاسەتێن خۆ یێن داگیركرنێ و سەركوتكرنێ و پەراوێزكرنا یێ دن دا بكەن و رەخنەكەن و ب باوەری دانپێدانێ ب مافێن مرۆڤی و ماڤێ چارەنڤیسیا گەلان بدەن، داكو ئاشتی و ئاسایش و سەقامگیری ل هەمی جیهانێ جێگیربیت و مللەت ژی بەختەوەر بن.

ئيحسان ئامێدی

هەكو باوەری و ئیرادە و بریار و رژدی و بەرهەڤی هەبیت سەركەفتن مسۆگەرە،، هۆسا كابینا نەهێ یا حوكمەتا هەرێما كوردستانێ ب سەرۆكاتیا رێزدار مەسرۆر بارزانی ل ڕۆژا ١٠ تیرمەها ٢٠١٩، ژ لایێ پەرلەمانێ كوردستانێ ڤە باوەری پێدا و كارنامەیا خۆ یا تەمام و هەمی لاڤەگر راگەهاند و دەست ب كارین خۆ كر.
د كارنامەیێ دا ب پتر پێنجی خالان ل سەر ئاستێن چاكسازیێ، خزمەتگوزاریێ، پەیوەندیان ل گەل حوكمەتا فیدرالی و نێڤدەولەتی، ئازادی و دیموكراتی و پێكڤەژیانێ، ئابۆری و دارایی، و كارگێری. بەرنامەیێ كاركرنا خۆ دەستنیشانكریە و راگەهاندی یە و هاتیە پەسەندكرن.
د كارنامێ دا هاتیە كو دێ چاكسازیێ ل كەرتی فەرمانبەران و دەوامێ دا كەن و رێكئێخن و رۆتینی ناهێلن و لەزاتی د كاركرنێ دا كەن و ریگریێ ل كاربدەستێن گشتی كەن كو بەرپرسیاریا خۆ بۆ بازرگانیێ و دەولەمەندبوونێ بكاربینن، و روی ب رویبوونا هەمی جۆرین گەندەلیا داڕایی و كارگێری و وەبەرهێنانێ ببن و زەلالیێ د وارێن داڕای دا بچەسپینن و چاكسازیێ د كەرتێ ساخلەمی و دەرمانان دا و ل سیستەمێ باجێ دا بكەن و رێگرتنێ ل قورخكاریێ دا بكەن و پشتەڤانیی ل كارێ چاڤدێریا پەرلەمانی كەن و كاری ل سەر ب هێزكرنا سیستەمێ بەرگریێ ژ هەرێمێ كەن، چارەسەركرنا بنەرەتی یا كێشەیا كارەبێ و رێكخستنا بەهایێن وێ كەن و چاككرنا ئاستێ خزمەتێن پەروەردێ و فێركرنێ و خواندنا بلند بكەن، كاربكەن بۆ پتر سووددیتن ژ ئاڤ و رویبارێن كوردستانێ و كاركەن بۆ چێكرن و باشكرنا رێكوبانان و سیستەمێ هاتنوچوونێ و كاركەن بۆ وەبەرهێنانا كشتوكالی و پیشەسازی و گەشتوگوزارێ، خزمەتكرنەكا باشتر یا شەهیدان و قوربانیێن ئەنفالان و جینۆسایدكرنا كوردستانێ و كاركرن بۆ پاراستنا ژینگەها كوردستانێ و ئاڤەدانكرنا گوندان و كاركرن بۆ ئەلكترۆنیكرنا كاروبارێن حوكمەتێ و گرنگیدان ب شوینواران، و كاركرنێ ل گەل حوكمەتا فیدرالی كەن كو هەمی كێشە ب دیالۆگی و لدویڤ دەستووری بهێنە چارەسەركرن، كو هەمی شایستەیێن هەرێما كوردستانێ بهێنە دابینكرن و ئیراق ببیتە دەولەتەكا دیموكراتیا فیدرالیا دەستووریا دروست و جێگیر و روی بریبوونا تیرۆرێ بكەن و كاری ل سەر دادپەروەریێ و پێكڤەژیانێ و ل دژی هەمی جوداهیێن رەگەزی بكەن، و ئازادیا بیروباوەران و دەربڕینێ دابینكەن، كاری ل سەر باشكرنا پەیوەندیان ل گەل جیهانا دەرڤە بكەن و چارەسەریێن ئاشتیانە بۆ گشت كێشەیان ببینن و رێكخستنا سیستەمێ بانكی و ژمارەیێن بانگی بكەن، شایستەیێن داڕایێن وەلاتیان مسۆگەركەن.
ب راستی ئەڤە كارنامەكا مەزن و هەمی لاڤەگرە و د خزمەتا وەلاتیان و هەرێمێ و گشت دەڤەرێ و جیهانێ دایە، ئیرادە و هێز و شیانێن مەزن پێ دڤێن دا بهێتە بجهئینان، سەر هندێ ڕا حوكمەتا هەرێما كوردستانێ شیایە پتریا ڤان خالان بجهبینیت، بتایبەتی یێن ستوونێن سەرەكی یێن ژیانێ، كو كرینە بەراهیا كارێن خۆ، كو نهو خۆ د ئیمناهیێ‌ و ئارامیێ و خوارنێ و ئاڤێ و كارەبێ و رێ و رێباران و خزمەتێن ساخلەمیێ و پەروەردەیێ و فێركرنێ و ساناهیكرنا كارێن وەلاتیان ل گەل دامەزراوەیێن حوكمەتێ دا دبینەڤە.
كابینەیا نەهێ یا حوكمەتا هەرێما كوردستانێ ئەڤ پێدڤییە بەردەستكرن، هەرێما كوردستانێ ژ تیرۆرێ و دەستدرێژیێن نەحەز و نەیارێن ئیراقی و هەرێمایەتی پاراستی یە و ئارام كریە، كەرستێن خوارنێ د مشە و ئەرزانكرینە، ئاڤ گەهاندیە هەمی گوند و باژێر و كەسان، كارەبا بوو ٢٤ دەمژمێر، رێ و رێبار دهێنە ڤەكرن و خۆشكرن، خزمەتین ساخلەمیێ و زانستی و تەكنولۆژی و باژێرڤانی و كارساناهیكرن ب هەمیان ڕا گەهاندینە و ب هەروەنە.
بەلێ دابینكرنا ڤان پێدڤیێن ئاكنجیێن هەرێمێ ژ شاكارێن حوكمەتا هەرێما كوردستانێ نە، و ئەڤە سەركەفتنەكا مەزنە د ڤی دەستوداری دا ل هەنبەری هەمی قەپخوازی و بەرهنگاری و گەف و گڤاشتن و ئاستەنگێن حوكمەتا هەرێمێ روی ب ری دبیت.
خۆیایە ل هەر جهەكێ بیت، وەلاتیان ئیمناهی و پێدڤیێن بنەكی یێن ژیانێ و خزمەتێن باژێرڤانی ژ دەستهەلاتێ دڤێن، ئەڤە ژی ژ كارین بەراهی یێن كابینەیا نەهێ یا حوكمەتا كوردستانێ بووینە و بجهئیناینە و تێدا سەركەفتی یە، یا مایی و دهێتە چاڤەرێكرن مووچە د دەمێن خۆ دا بهێتە دابەشكرن و دەلیڤەیێن كاری پتر ڤەببن كو نهۆ حوكمەتا هەرێمێ ژدل كار ل سەر دكەت و ب هیڤینە دێ چارەكەت.
هەلبەت ئەڤ كارنامەیەكا مەزن روی ب روی كۆمەكا قەپخوازیا و بەرهنگاریێن ناڤخۆ و ئیراقی و هەرێمایەتی بوویە، لێ ئیرادەیا سەركەفتنێ و هێزا كەساتیا رێزدار مەسرۆر بارزانی ب پشتەڤانیا سەرۆك بارزانی و سەرۆكێ هەرێما كوردستانێ وەكر كو د هەمی وان بیاڤێن دەستنیشانكری دا سەركەفتنێ بینیت و گەلەك ژێ بهێتە بجهئینان و دهێتە چاڤەرێكرن یا مایی ژی بهێتە بجهئینان، نەمازە رێزدار مەسرۆر بارزانی دلسۆزەكێ ب شیان و زیرەك، وێرەك و پێگیرە، هەست ب بەرپرسیاریا خۆ دكەت و ب ئەركێن خۆ دزانیت وێ كارنامێ بجهبینیت و سەرفرازیەكا دیتر د خزمەتا گەل و وەلاتی دا تۆمار دكەت.
بەلێ كابینا نەهێ یا سەركەفتی یە و دێ د سەركەفتنێن خۆ دا یا بەردەوام بیت، چونكی ب ئیرادە و باوەری و ب كارنامە دەست ب كارێن خۆ كریە و یا رژدە ل سەر سەركەفتنێ.