NO IORG
نووترين نووچه
Authors Posts by كامی كمال

كامی كمال

كامی كمال
66 POSTS 0 COMMENTS

96

جیهان مینا كه‌له‌شێ گیانه‌وه‌ره‌كێ یێ لێ هاتى كو هه‌ر وه‌لاته‌ك ل دووڤ هێز و شیانێن خوه‌ بزاڤێ بكه‌ت ژ گۆشتێ وى كه‌له‌شى ژێڤه‌ بكه‌ت و بخۆت، هه‌ر وه‌لاته‌كێ ل ڤێ جیهانێ پشتى كو سه‌ربخوه‌بوونا خوه‌ وه‌رگرتى، ده‌ست ب ده‌ستڤه‌ئینانا ده‌ستكه‌فتێن دیكه‌ یێن سیاسى و سه‌ربازى و ئابوورى… هتد كرن، ب مخابنڤیه‌ ل دووڤ هه‌مى سه‌رچاڤه‌یێن دیرۆكى پڕانیا كوردان د دیروكێك دا هه‌رده‌م مژوولى چاره‌سه‌ركرنا پرسگرێك و نه‌خوه‌شیێن خه‌لكێن دیكه‌ بوونه‌، جار بۆ عوسمانیان و جار بۆ ساسانی و جار ژى بۆ عه‌ره‌بان و ئایین و كه‌لتۆرێن وان لاوێن خوه‌ دكرنه‌ قوربانى، بێ كو هزر د پاشه‌ڕۆژا نه‌ته‌وه‌یا خوه‌دا بكه‌ن، هه‌رده‌م د خه‌یال و خه‌ونێن سه‌ركه‌فتنا داگیركه‌رێن خوه‌ دا دژیان، دژایه‌تیكرنا هنده‌ك كوردان نها ژى ل به‌رامبه‌ر بڕیارا ترامپ كو ئۆرشه‌لیم مینا پایته‌ختێ ئیسرائیلێ دایه‌ نیاسین هه‌مان مه‌ ژى و تێگه‌هشتنا كه‌ڤن ساخ دكه‌ته‌ڤه‌.
د نها دا جیهان دابه‌شبوویه‌ ل سه‌ر چه‌ندین جه‌مسه‌ر و هه‌ڤپه‌یمانان، هه‌مى ئه‌ندامێن هه‌ڤپه‌یمانان پێكڤه‌ بزاڤێ دكه‌ن به‌رژه‌وه‌ندى یێن خوه‌ بپارێزن و كار بۆ ب ده‌ستڤه‌ئینانا پترین ده‌ستكه‌فتان دكه‌ن. هه‌روه‌كى مه‌ دیتى پشتى نێزیكى بیست ساڵان سۆزێن سه‌رۆكێن به‌رێ یێن ئه‌مریكا كو “ئورشه‌لیم”ێ مینا پایته‌ختێ ئیسرائیل بده‌نه‌ نیاسین ل داویێ پشتى ده‌هان گوهارتنێن مه‌زنێن جیهانێ د ئه‌ڤ ساڵه‌ دا “دۆناڵد ترامپ” ئه‌ڤ كاره‌ ئه‌نجام دا، هزره‌كا زۆر یا شاشه‌ ئه‌م وه‌سا هزر بكه‌ین كو به‌رنامه‌ و ستراتیژیه‌تا مه‌زنترین وه‌لاتێ جیهانێ (ئه‌مریكا) كو ده‌مێ ده‌هان سالانه‌ دكاریت د هه‌مى جیهانێ دا مایتێكرنێ بكه‌ت و بالانسێن هێزێ بگوهۆریت ل سه‌ر بناغه‌یێ مه‌زاج و ڤیانا كه‌سه‌كێ بڕێڤه‌ دچیت، ڕاستیه‌ك یا هه‌ى پێدڤیه‌ ژبیرنه‌كه‌ین، ئه‌مریكا و ئه‌ورۆپا و گه‌له‌ك وه‌لاتێن دیكه‌ یێن جیهانێ هه‌ڤپه‌یمانێن هه‌ڤن، ئه‌گه‌ر ل سه‌ر شاشه‌یێن تله‌فزیۆنان و ده‌زگه‌هێن ڕاگه‌هاندنێ ب جۆره‌كێ نیشابده‌ن ئه‌م ل دژى هنده‌ك بڕیارێن هه‌ڤدووینه‌، ب تنێ مه‌به‌ستا وان پێكاندنا ئارمانج و پلانێن وان یێن سیاسینه‌، ئه‌مریكا سه‌ركێشێ سیاسه‌ت و به‌رنامه‌یێن ده‌رڤه‌ یێن وڵاتێن ئه‌وروپییه‌ ب گشتى دچارچووڤه‌كى دا كو به‌رژه‌وه‌ندیێن وان ژى بهێنه‌پاراستن، بڕیارا دۆناڵد ترامپ ل سه‌ر نیاسینا (ئۆرشه‌لیم)ێ مینا پاریته‌ختێ وه‌لاتێ ئیسرائیلێ نه‌ڕازیبوونا وه‌لاتێن ئه‌ورۆپى، لێ كه‌فته‌ڤه‌ لێ گه‌لۆ د جه‌وهه‌ر دا وه‌لاتێن ئه‌ورۆپى نه‌ دڕازینه‌؟!، نه‌خێر، هه‌م ئازراندنا ڤێ هه‌ڤكێشێ د نها دا یا بێ ئه‌گه‌ر و ئارمانج نینه‌ و هه‌م ژى ئێك ده‌نگ نه‌بوونا وان وه‌لاتان ل گه‌ل دۆناڵد ترامپ یا بێ ئارمانج و پلان نینه‌، بۆ مه‌ مینا كورد گرنگه‌ ئه‌م مژوولى چاره‌سه‌ركرنا پرسگرێك و ده‌ردێن وه‌لاتێ خوه‌ بین، سه‌دان هزار كورد ئاواره‌ بووینه‌، هێشتا هه‌رچار پارچه‌یێن كوردستانێ یێ ل بن سه‌روه‌رى و حوكمێ وه‌لاتێن دیكه‌ڤه‌، هێزێن داگیركه‌ر ب شێوه‌یه‌كێ دڕندانه‌ یێن كه‌فتینه‌ د كۆلانێن باژێر و باژێركێن مه‌ دا مینا كه‌ركووكێ و شنگال و سوننه‌ و مهاباد و ئامه‌دێ و وانێ و قامشلۆ …هتد، ل كیڤه‌ ده‌ردێ دایكا كچه‌كا كورد كو حه‌شدا شه‌عبى ده‌ستدرێژیا سكسى كریه‌ سه‌ر كچا وێ دێ ب وێ چه‌ندێ ده‌رمان بیت كو قودسا عه‌ره‌بان بیت یان ئۆرشه‌لیم یا ئیسرائیلیان؟!.
حوكمه‌تا هه‌رێما كوردستانێ ب گشتى سیاسه‌ته‌كا ده‌رڤه‌ یا نایاب و سه‌ركه‌فتینا پراكتیزه‌ دكه‌ن، ب جوانى بزاڤێ دكه‌ن بالانسێن هێزێن مه‌زنێن جیهانێ ژ بۆ خوه‌ ڕابكێشن، حوكمه‌تا هه‌رێمێ بێده‌نگیا خوه‌ پاراست، لێ ب مخابنی ڤه‌ هنده‌ك حزبێن كوردستانى نه‌شیان، ژ به‌ر به‌رژه‌وه‌ندیێن حزبى و ڕاكێشانا سه‌رنجا خه‌لكێن بوسلمانێن گرتى ل كوردستانێ به‌رژه‌وه‌ندیێن گشتى بپارێزن و خوه‌ ل ڤێ هه‌ڤكێشا ئالۆزا جیهانێ بپارێزن، ئه‌ڤ بڕیارا د نها دا ترامپ ده‌رئێخستى كو داخواز كریه‌ باڵیۆزخانه‌یا ئه‌مریكا بۆ ئۆرشه‌لیمێ بهێته‌ ڤه‌گۆهاستن مینا دانپێدا ئینانا ئۆرشه‌لیمێ مینا پایته‌ختێ ئیسرائیلێ، مه‌به‌ست لێ چێكرنا ئیفلجكرن و ئالۆزیانه‌ ژ بۆ لێدانا دربێن سه‌ربازى ل هنده‌ك وه‌لاتێن ده‌ڤه‌رێ، ئه‌مریكا ژبۆ ساڵا 2018 جودا ژ سالێن به‌رێ بۆدجه‌یه‌كێ پتر ژ بۆ په‌نتاگۆنێ مه‌زاختیه‌، ماوه‌یه‌كه‌ هێزێن خوه‌ یێن سه‌ربازى د ئێخیته‌ د ئاماده‌ باشیێ دا، پێدڤیه‌ ئه‌م كورد خوه‌ به‌رهه‌ڤ بكه‌ین كو ل گه‌ل گوهارتنێن ئاینده‌ دا مافێن خوه‌ ده‌سته‌به‌ر بكه‌ین، نه‌ك مینا دیرۆكێ كو د پڕانیا قووناغان دا كورد ب تنێ مینا شه‌ڕكه‌رێن داگیركه‌ران دهاتنه‌ بكارئینان و ده‌مێ شه‌ڕ خلاس دبوو مینا وى كه‌له‌شێ مه‌ ل ده‌سپێكێ به‌حس لێ كرى دهاتنه‌ خوارن.

75

هه‌كه‌ بكارین ل دووڤ ئه‌و ئه‌زمۆن و كاودانێن به‌رێ یێن سیاسى یێن وه‌ڵاتێن زلهێز ب ڕه‌نگه‌كێ لۆژیك شرۆڤه‌كا سیاسى بكه‌ین دێ گه‌هینه‌ باوه‌ریه‌كێ كو ب داكێشان و هه‌لكێشانه‌كێ نابیت بێ هێڤى ببین و وه‌سا هزر بكه‌ین كو ئێدى چ هیڤیه‌ك نه‌ماینه‌ و دۆزا كوردى تووشى كاره‌ساته‌كا مه‌زن بوو!.
گوهارتنێن رۆژهه‌لاتا ناڤین گه‌له‌ك ب له‌ز و ل نشكه‌كێڤه‌ دهێنه‌كرن، ته‌ڵهێن سیاسى نه‌ دئاشكرانه‌، دۆست و دوژمنێن سیاسى ب ساناهى ناهێنه‌ ژێكجودا كرن بۆ ڕایا گشتى، كه‌ واته‌ هه‌ڵسه‌نگاندنێن مه‌ یێن سیاسى پێدڤیه‌ ل سه‌ر بنیاته‌كێ لۆژیكا سیاسى بیت، ئه‌گه‌ر ب زوومه‌كا دیكه‌ ل باردۆخ و كاودانێن سیاسى بنێرین، د نوكه‌ دا پێنگاڤێن سیاسى هه‌مى موخابراتى و كۆدێن نهێنى و ڕێڕه‌وێن نه‌دیارن.
به‌رى پڕۆسسا ڕیفراندۆمێ سه‌رۆك بارزانى چه‌ندین جاران ته‌كه‌ز ل سه‌ر وێ چه‌ندێ كر كو ئه‌گه‌ر ڕێكه‌كێ نه‌بینم ئه‌ز موجازه‌فێ ب پاشه‌ڕۆژا ڤى ملله‌تى ناكه‌م، سه‌رۆك بارزانى چه‌ندین جاران پشتڕاستى دایه‌ كو دۆزا كوردان ل وێ قووناغێ ده‌رباز بوویه‌ ڤه‌گه‌ریته‌ سه‌رده‌مێ به‌رێ. سه‌رۆك بارزانى ل سه‌ر بنیاته‌كێ 100% پشتڕاست كرى نه‌بیت ڤان سۆزان ناده‌ته‌ ملله‌تێ خوه‌ و نها ژى سه‌رۆك بارزانى پشتڕاستیێ دده‌ت كو ئه‌ڤ بارۆخێ نها چێبووى ده‌مكی یه‌ و دێ ده‌رباز بیت، پێدڤیه‌ ئه‌م ڕاستیه‌كێ بزانین د نها دا سیاسه‌ت هه‌مى ته‌كتیك و هونه‌ره‌، كێشه‌یێن رۆژهه‌ڵاتا ناڤه‌ڕاست ژى ب تنێ هه‌بوون ئان نه‌بوونا ده‌وڵه‌ته‌كا كوردستانى نینه‌، به‌لكى كۆمه‌كا مه‌زن یا به‌رژوه‌ندیێن مه‌زن یێن وه‌ڵاتێن زلهێزن كو پێكڤه‌ هاتینه‌ گرێدان، له‌وما زۆر نۆرماله‌ كو پرۆسسا ده‌وڵه‌تا كوردستانى ب ده‌مه‌كێ بهێته‌ ڕاگرتن هه‌تاكو هنده‌ك هه‌ڤكێشه‌ یێن دیكه‌ژى ئێكلا دبنه‌ڤه‌.
پشتى ساڵا 2003یێ حوكمه‌تا هه‌رێما كوردستانێ ژ هه‌مى لایه‌نه‌كێڤه‌ ژ حوكمه‌تا عیراقێ ب هێزتر بوو (ژبلى ئه‌و بریارێن سه‌روه‌رى كو ده‌وڵه‌تا عیراقێ هه‌بوون)، هه‌رێما كوردستانێ شیان گه‌له‌ك هه‌ڤكێشه‌یان د به‌رژوه‌ندیا خوه‌دا ئێكلا بكه‌نه‌ڤه‌ د ده‌مه‌كێدا هه‌مى لایه‌نێن عیراقى ل دژى وان ده‌ستكه‌فتێن كوردان بوون، ۆ نموونه‌ سیسته‌مێ فیدرالى، مادده‌یێ 140 د دستورێ عیراقێ دا، هه‌بوونا پێشمه‌رگه‌ مینا پشكه‌ك ژ سیسته‌مى به‌رگیریێ د دستوورێ عیراقێ دا…هتد، هه‌رێما كوردستانێ شیابوو “ئیبراهیم جه‌عفه‌رى” و “نوورى مالكى” ل سه‌رۆكاتیا ئه‌نجۆمه‌نێ وه‌زیران لابده‌ن، بێ گۆمان هه‌رێما كوردستانێ گه‌ر پشتگیریه‌كا باش یا نیڤه‌ده‌وڵه‌تى نه‌بایه‌ نه‌دكارین ب ڤى ئاوایی خورت ل به‌رامبه‌ر ڤان هه‌مى دوژمنێن نه‌ته‌وه‌ییدا بدۆمینن، بێگومان ئه‌ڤ پشتگیریه‌ ژى هه‌مى ژ به‌رهه‌مێ سیاسه‌ته‌كا سه‌ركه‌فتى بوویه‌ كو نێزیكى ئێك چه‌رخێیه‌ ماڵباتا بارزانى سه‌ركردایه‌تیا وێ دكه‌ت.
پشتى كو كوردان ڕیفراندۆم ئه‌نجامداى و كلیلا سه‌ربخوه‌بوونێ كریه‌ د به‌ریكا خوه‌دا، ئێدى پێدڤیه‌ كورد چاڤه‌ڕێ بكه‌ن داكو وه‌ڵاتێن دیكه‌ یێن زلهێز ژى دگه‌هنه‌ وێ قووناغێ كو ژینگه‌ه بۆ ڕاگه‌هاندنا سه‌رخوه‌یا كوردستانێ گۆنجاو ببیت (هه‌لبه‌ت كورد ناچارن چاڤه‌ڕێ بكه‌ن). ل شه‌مبیا ده‌رباز بوویدا كو سه‌رۆك وه‌زیران سه‌ردانا فڕه‌نسا كرى ئه‌و هیما دیار بوونه‌ڤه‌ كو چ ڕاسته‌خوه‌ بیت یان ناڕاسته‌خوه‌ وڵاتێن زلهێز پشتگیرێن هه‌رێما كوردستانێ نه‌، دبیت بۆ ده‌مه‌كێ و ته‌كتیكه‌كێ وه‌سا دیار دبوو كو كه‌س دۆستێ كوردان نینه‌، لێ د جه‌وهه‌ر دا وه‌سا نینه‌، هه‌روه‌كى د ڤێ سه‌ردانا نێچیرڤان دا ب باشى دوژمنێن نه‌ته‌وه‌ییا كورد ژى ب باشى هه‌ست ب ڤێ ڕاستیێ كر.
ئێمانوێل ماكرۆن د كۆنگره‌یا رۆژنامه‌ڤانی دا دگه‌ل نێچیرڤان بارزانى ب ئاشكه‌رایی و ڕاست و ڕاست په‌یام دا “حه‌یده‌ر عه‌بادى” پێدڤیه‌ خه‌لكێ كوردستانێ بگه‌هنه‌ كه‌نارێ ئارامیێ و وه‌ ماف نینه‌ زۆرداریێ ل گه‌لێ كوردستانێ بكه‌ن، ئه‌ڤجا چ ده‌وڵه‌تا كوردستانى دابمه‌زریت ئان نه‌!، ماكرۆن د په‌یاما خوه‌دا هه‌مى داخوازیێن كوردان ب ڕه‌وا ل قه‌له‌مدان و داخواز كر عیراق هه‌مى ئه‌و ده‌ستكه‌فتێن خوه‌ ژناڤبه‌ت كو ژبۆ خوه‌سه‌پاندنێ و دیكتاتۆریه‌تێ ب ڕێیێن نایاساییێ ب ده‌ستڤه‌ئیناى، ژ وانا ژى هه‌لوه‌شاندنا هه‌مى میلشیاتان ژ وانا (حه‌شدا شه‌عبى)، هه‌روه‌سا داخواز كر كو پێدڤیه‌ مادده‌یێ 140 بهێته‌ جێبه‌جێ كرن…هتد، ماكرۆن دزانیت عه‌بادى نه‌شێت ڤان پێنگاڤان بهاڤێژیت و دێ ڕاستى پرسگرێكێن مه‌زن بیت، ژ هه‌ژى گۆتنێ یه‌ فڕه‌نسا ناڕاسته‌خوه‌ ل شوونا هه‌مى وه‌ڵات و هه‌ڤپه‌یمانێن ئه‌مریكا ئه‌و په‌یام یا دایه‌ عیراقێ ژبه‌ركو سیاسه‌تا وان وه‌ڵاتان بێ هه‌ماهه‌نگى دگه‌ل هه‌ڤدودا نینه‌، واته‌ ب پشت ڕاستى د ئاینده‌یه‌كا نێزیكدا دێ هه‌ڤسه‌نگى د به‌رژوه‌ندیا كورداندا هێنه‌ گۆهارتن هه‌روه‌كى یا چاڤه‌ڕێكرى بوو.

62

د هه‌یامێ ڤێ داویێ دا هه‌ر ل داگیركرنا كه‌ركووكێ هه‌تا كو دگه‌هیته‌ ده‌ست ژ كارڤه‌كێشانا سه‌رۆك وه‌زێرانێ لوبنانێ و گڤاشتن و تاوانباركرنا ئیرانێ ب تێكدانا باردۆخێ ده‌ڤه‌رێ، هێدى هێدى ب باشى دیار دبیت كو ل ده‌ڤه‌رێن رۆژهه‌ڵاتا ناڤین یاریه‌كێ دهێته‌كرن و ئه‌ڤ داكێشان و هه‌لكێشانا هه‌ژموونێ ئه‌مریكا و هه‌ڤپه‌یمانێن وێ ل ده‌ڤه‌رێ گرێدایی ب تنێ ب هه‌رێما كوردستانێ ڤه‌ نینن، به‌لكى ئه‌ڤه‌ پتر ب یاریه‌كا شه‌تره‌نجى دچیت كو دێ دهه‌یامه‌كا زوودا گوهارتنێن مه‌زن هێنه‌ دیتن.
سه‌ركردایه‌تیا هه‌رێما كوردستانێ ب سه‌ركردایه‌تیا پارتى دیمۆكراتى كوردستان د 16ێ ئوكتۆبه‌رێ دا ب جوانى و ژیریه‌كا ب هێز وه‌لات دته‌له‌یه‌كا مه‌زن و مه‌ترسیدار دا ڕزگار كر، د وێ شه‌ڤێ دا كو هێز و میلیشیایێن عیراقێ ب سه‌ركردایه‌تیا ئیرانێ هێڕش كریه‌ سه‌ر كه‌ركووكێ و ده‌ڤه‌رێن دیتر یێن سنۆرێ كوردستانێ، چه‌ندین ته‌ڵه‌یێن دیتر ژى دانابوون كو ب هاریكاریا هنده‌ك ناپاكێن كوردان دربه‌كا مه‌زن ل كوردستانێ بده‌ن، د وێ شه‌ڤێ دا هێزێن ئیرانێ و میلیشیاتێن عیراقێ هه‌ر ل سنۆرێن حاجى ئۆمه‌ران هه‌تا كو دگه‌هیته‌ شنگالێ و پێشخابیرى پلان دانابوون كو ب هاریكاریا چه‌كداریا هنده‌ك كوردێن ناپاك هه‌م شه‌ره‌كێ ناڤخوه‌ بئافرینن و هه‌م ژى پترین درب ل هه‌رێما كوردستانێ بده‌ن و نیازێن وان هه‌تا گرتنا پایته‌ختێ هه‌رێما كوردستانێ ژى بوویه‌ واته‌ ژناڤبرنا ئێكجاره‌كیا هه‌رێما كوردستانێ، لێ هه‌ر زوو سه‌رۆك بارزانى هه‌ست ب وێ پلانا ژه‌هراوى و ناپاكیا هنده‌ك كوردان كر و بڕیاردا ل جهێ ڕوو ب ڕووبوونا شه‌ڕێ چه‌كدارى هه‌دارێ بكێشین و شه‌ڕه‌كێ سیاسى و لۆژیكى ده‌ست پێ بكه‌ین دوژمنى بێخینه‌ وێ ته‌له‌یێ یا كو وان بۆ مه‌ دانایی، له‌وما سه‌رۆك بارزانى بڕیاره‌كا ژیرانه‌داو نه‌هێلا كوردستان زیانه‌كا مه‌زن بده‌ت، هه‌لبه‌ت ئه‌گه‌ر سه‌رۆك بارزانى د وى ده‌می دا بڕیارا ڤه‌كێشانێ نه‌دابا ل سه‌ر هه‌مى وان قوربانیێن كو دا هێنه‌ دان ژ لایێ پێشمه‌رگه‌یڤه‌، دا شه‌ڕه‌كێ نافخوه‌ژى چێبیت ب سپۆنسه‌ریا هنده‌ك ناپاكێن سه‌ركرده‌ ل كوردستانێ!، له‌وما باشترین بژارده‌ ئه‌و بوو ئێكه‌م جار ئه‌و ته‌لى ژناڤبچیت یا كو ئیرانێ و دووڤه‌لانكێن وێ بۆ كوردان دانای.
پشتى كو كوردان د وێ شه‌ڤێ دا پتریا ئاخا خوه‌و پترین سه‌رچاوه‌یێن خوه‌ یێن ئابوورى ژ ده‌ستداى، ئه‌ڤجا ده‌ست ب شه‌ڕه‌كێ لۆژیكى و سیاسى كر ب جۆره‌كێ سه‌رنجا پترین خه‌لكێن جیهانێ ڕاكێشا كو ب ڕاستى نه‌ك ب تنێ ئیران ئانكو حه‌یده‌ر عه‌بادى و میلشیاتێن وێ ناپاكیێ به‌رامبه‌ر كوردان دكه‌ن، به‌لكى هه‌مى جیهانا دیمۆكراسى ژى كو ب مافێن مرۆڤان و گه‌لان دپه‌یڤن و گه‌له‌ك جاران خوه‌ پێ قه‌له‌و دكه‌ن ئێخستنه‌ دژێر پرسیارێ و (ئێحراجێ) دا، سه‌رۆك بارزانى د چاڤپێكه‌فتێن خوه‌ یێن ڤێ داویێ دا ل سه‌ر وێ ناپاكى و نیازێن خراب و گه‌فێن عیراقێ دیسا داخوازا دانوستاندنێ دكه‌ت. سه‌رۆك د چاڤپێكه‌فتێن خوه‌دا دبێژیت ئه‌و هێزێن ئه‌مریكا ب تیرۆرست دنیاسیت ب چه‌كێ ئه‌مریكى هێرش كره‌ سه‌ر هه‌رێما كوردستانێ، فاكته‌رێ سه‌ره‌كى یێ سه‌ركه‌فتنا وه‌ڵاتان سیاسه‌ته‌كا سه‌ركه‌فتیه‌، كوردان جیهانا دیمۆكراسیخواز ڕاستى شه‌رمزاریێ كر، و گۆته‌ جیهانێ هوون ناپاكیێ ل گه‌ل درووشم و هه‌لویستێن خوه‌ یێن ئیزدواجى دكه‌ن ب ڤى ئاوایی ده‌لیڤه‌ ناهێته‌دان به‌رده‌وام ناپاكى ل كوردان بهێته‌ كرن. درێژكرنا ده‌ستێ ئاشتیێ ژ بۆ هێزێن شه‌ڕكه‌ر هه‌ر مینا سیاسه‌تا “گاندى”یێ “هندى” ده‌مێ دگۆته‌ گه‌لێ خوه‌ ئه‌م دێ ڕێپیڤانان ئه‌نجامده‌ین دێ ل ده‌سپێكێ سه‌ربازێن به‌ریتانیا یارییا (استهزائێ) ب مه‌كه‌ن و پاشى دێ خوه‌ توڕه‌ كه‌ن و پاشان دێ ده‌ست ب تۆندوتیژیێ كه‌ن، لێ نابیت ئه‌م ده‌ستێ خوه‌ بلند بكه‌ین و پێدڤیه‌ هه‌دارێ بگرین، هه‌ر ب وێ سیاسه‌تێ گاندى شیا وه‌ڵاتێ خوه‌ ل ژێر داگیركاریا به‌ریتانیایا مه‌زن ڕزگار بكه‌ت.
سه‌رنجێ بده‌ن “نێچیرڤان بارزانى” ل سه‌ر وێ چه‌ندێ دا كو حوكمه‌تا عیراقێ یا به‌رده‌وامه‌ ب سیاسه‌تا خوه‌ یا نالۆژیكى و سنێله‌یی، لێ بارزانى د كۆنگره‌یێن خوه‌ یێن رۆژنامه‌ڤانی دا به‌رده‌وام ته‌كه‌زێ ل سه‌ر ئاشتیخوازیێ و دۆستایه‌تیێ دكه‌ت و ب نه‌رمى و ل سه‌ر خوه‌ حوكمه‌تا عیراقێ ل به‌رامبه‌ر جیهانێ ئێخستیه‌ د ناڤ پرسیاران دا، د نها دا به‌رده‌وام پشته‌ڤانیا كوردان به‌ر ب زێده‌ بوونه‌ و نیازێن حوكمه‌تا عیراقێ ژى ل دژى كوردان دیار بوون كو عیراقێ ب وه‌ڵاتێ كوردان نزانن!. ب دیتنا من ئێدێ هێدى هێدى قووناغ و له‌یزینێن سیاسى دێ هینه‌ گوهارتن دبه‌رژه‌وه‌ندیێن كوردستانێ دا ئه‌گه‌ر چ هێشتا قوربانیدان یێن مایین.

84

ل ده‌سپێكێ پێدڤیه‌ د ڕاستیه‌كێ بگه‌هین كو ئه‌و شه‌ڕ و ئالۆزیێن نها د ته‌ڤایا ڕۆژهه‌لاتا ناڤین دا ب گشتى و ب تایبه‌ت ل عیراقێ و كوردستانێ دا دهێنه‌ دیتن، شه‌ڕێن وه‌رگرتنا ئاخێ و ئازادكرن یان داگیركرنا وه‌لاتان ب تنێ نینن، به‌لكى پڕانیا پێنگاڤ و ئالۆزى و ئه‌و شه‌ڕێن دهێنه‌ كرن مینا ته‌كتیكن و بۆ مه‌به‌ستێن دیكه‌ یێن مینا به‌رفره‌هكرنا هه‌ژموونا وه‌لاتان، به‌رژه‌وه‌ندیێن ئابوورى، بابه‌تێن موخابراتى و ئه‌منى…هتد. دهێنه‌ بكارئینان، بێگومان پڕانیا ڤان یاریێن ئاگرین د ناڤبه‌را ئه‌مریكا و هه‌ڤپه‌یمانێن وێ ل گه‌ل ئیرانێدانه‌، پترین باج و به‌دبه‌ختى ژى خه‌لكێن ڤان وه‌لاتان دده‌ن یێن كو خوه‌ ڕاده‌ستى ئیرانێ كرى.
وه‌كى دیار حوكمه‌تا عیراقێ ب سه‌رۆكایه‌تیا “حه‌یده‌ر عه‌بادى” زۆر شاش و مه‌غرۆر یێ دهه‌ڤكێشه‌یێن سیاسى گه‌هشتى و وه‌سا هزر دكه‌ت سه‌رده‌مێ ئیپراتۆریه‌تایه‌ و شه‌ڕ ب تنێ شه‌ڕێ داگیركرنێ و تاڵانێ و كوشتنێ یه‌!، له‌وما لێدوان و لڤین و گۆتارێن عه‌بادى گۆپیتكا بێ به‌رپرسیاریی و نامه‌نتقى یا تێدا و مینا سنێله‌كێ نه‌شاره‌زا سیاسه‌تێ دكه‌ت.
حه‌یده‌ر عه‌بادى پێدڤیه‌ وێ ڕاستیێ ژ بیر نه‌كه‌ت د 16 ئۆكتۆبه‌رێ دا ب تنێ كه‌ركووك و پارچه‌یه‌كا كوردستانا باشۆر داگیر نه‌كریه‌، به‌لكى د به‌رژه‌وه‌ندیا دۆژمنێ چه‌ندین وه‌ڵاتێن جیهانێ و ده‌ڤه‌رێ ب تایبه‌ت ئیسرائیل و سعودیێ و ئه‌مریكا دا پێنگاڤه‌كا ب هێز یا چوویه‌ پێش و گه‌فێن ئێخستیه‌ سه‌ر به‌رژه‌وه‌ندى یێن وان ولاتان، دبیت د نها دا گه‌له‌ك وه‌لاتێن جیهانێ ده‌ستێ خوه‌ ل پشتا حه‌یده‌ر عه‌بادى دده‌ن و پاڵ دده‌ن كو زێده‌تر و كاراتر به‌رده‌وام بیت ل سه‌ر ئه‌و ڕێڕه‌وا مه‌ترسیدار و پڕ ئاگر كو گرتیه‌به‌ر، لێ حوكمه‌تا عیراقێ ب جۆره‌كێ سه‌یر یێ مه‌ست بووى!، حوكمه‌تا عه‌بادى ب ده‌هان ملیارد دۆلاران یا قه‌رداره‌، زێده‌تر ژ دو ملیۆن كه‌سێن خه‌لكێ عیراقێ د ڤان سالاندا ژبه‌ر ترس و شه‌ڕ و برسێ یێن ئاواره‌یێ وڵاتان بۆى كو پڕانیا وان ژ لایێ حوكمه‌تا هه‌رێما كوردستانێ ڤه‌ هاتینه‌ حه‌واندن، چه‌ندین باژێر و باژێركێن وێ دوێرانن، سه‌دان گوندێن وێ كاڤل بوون، ئاستێ هه‌ژاریێ یا دگۆپیتكێ دا، ژێرخانا وێ یا ئابوورى و ئاڤه‌دانى یا د ئاسته‌كێ كه‌فتی دا، هێشتا هنده‌ك ده‌ڤه‌رێن وێ ژ لایێ داعشڤه‌ دهێنه‌ ب رێڤه‌ برن…هتد، ئه‌ڤجا حه‌یده‌ر عه‌بادى مینا هه‌رزه‌كاره‌كێ دهێته‌ سه‌ڕ شاشه‌ى و گه‌فێن نه‌زۆك و بێ واتا ل داروبه‌رێن كوردستانێ دكه‌ت!.
هێدى هێدى هیمایێن وێ چه‌ندى یێ دیار دبن كو ئه‌وا ل 16ێ ئه‌كتۆبه‌رێ ڕووداى ده‌سپێكا شه‌ڕه‌كێ ب كریاره‌ د ناڤبه‌را ئه‌مریكا و ئیرانێ دا، رۆژانه‌ بۆیه‌رێن ئالۆز و مه‌ترسیدارتر دهێنه‌ ڕوى دده‌ن، ئیسرائیل به‌رده‌وامێ كار دكه‌ت كو هه‌ڤپه‌یمانیا خوه‌ ژ بۆ لێدانا ئیرانێ ب هێز بكه‌ت، دۆناڵد ترامپ سه‌رۆكى ئه‌مریكا به‌رده‌وام گه‌فێن ژناڤبرنا “ویلایه‌تا فه‌قى” دكه‌ت و ب سه‌رچاوه‌یێ تیرۆرێ و ئالۆزیان ل جیهانێ ل قه‌له‌م دده‌ت، پشتى كو حوسیێن یه‌مه‌نێ مۆشه‌كه‌ك ئاراسته‌ى ریاز كرى و ل ئه‌سمانى هاتیه‌ په‌قاندن، ته‌شه‌نۆجاتێن د ناڤبه‌را ئیرانێ و سعودیێ به‌ره‌ف ئالۆزتر دچن، ئه‌مریكا سۆپایێ پاسدارێن ئیرانێ و ئه‌و گرۆپێن سه‌ر ب وێڤه‌ كرنه‌ د لیستا تیرۆرێدا كو “حه‌شدا شه‌عبى” ژ وان میلیشاتێن سه‌ر ب ئیرانێ ڤه‌یه‌، “ئه‌بۆ مه‌هدى ئه‌لموهه‌ندس” كو بهێزترین سه‌ركردێ مه‌یدانى یێ حه‌شدا شه‌عبیه‌ ژ لایێ وه‌زاره‌تا ده‌رڤه‌یا ئه‌مریكاڤه‌ ب تیرۆرست هاته‌ پێناسه‌ كرن، ئه‌ڤه‌ هه‌مى هیمایه‌یێن وێ چه‌ندێنه‌ كو وڵاتێن رۆژئاڤا ب سه‌ركردایه‌تییا ئه‌مریكا باوه‌رى ب وێ چه‌ندێ نه‌مایه‌ كو ب رێكا دانوستاندنێ ئان گوفتگۆیێ بشێن سنۆره‌كێ بۆ ده‌ستدرێژیێن ئیرانێ دانن و به‌رده‌وام به‌هانه‌یان چێ دكه‌ن كو بشێن د پاشه‌رۆژێ دا ب دربا سه‌ربازى به‌رسڤا سیاسه‌ت و ده‌ستدرێژى یێن ئیرانێ بده‌ن، بێ گۆمان وى ده‌مى وێرانترین و خراپترین باردۆخ دێ باردۆخێ هه‌ڤپه‌یمانێن ئیرانێ بیت بتایبه‌ت دیڤه‌لانێك وێ ل كوردستانێ كو دێ ژیێ وان ب ڕه‌زیل بوون ب داوى هێت، ڕاسته‌ ئیرانێ گه‌فان دكه‌ت، ماسۆلكێن وێ دگه‌ل جیران و ده‌وروبه‌رێن وێ تا ڕاده‌یه‌كێ بهێزترن، لێ ئیرانێ وڵاته‌ك نینه‌ لایه‌نێ وێ یێ سه‌ربازى بشێت ل به‌رامبه‌ر ئه‌مریكا و هه‌ڤپه‌یمانێن وێ ڕاوه‌ستیت. ب باشى یا دیاره‌ژى كو سه‌ركردایه‌تیا كوردستانێ چاڤه‌رێى وان گۆهارتێن مه‌زنێن چاڤه‌رێ كرینه‌ كو دێ دپاشه‌رۆژه‌كا نێزیك دا هێنه‌ كرن، ئه‌و گوهارتن دێ د به‌رژه‌وه‌ندیا كوردان دابن، ئه‌گه‌ر ئه‌ڤ ئه‌گه‌ره‌ نه‌بان كوردان ب ڤى ئاوایێ نه‌رم به‌رسڤا دفن بلندى و غرۆرا به‌غدا نه‌ددا!.

60

ئێك ژ ده‌ره‌نجامێن خرابێن ڕك گرتنێ و شۆڤێنییه‌تێ سه‌ر ل خوه‌خوارنه‌، زێده‌تر ژنیڤ چه‌رخییه‌ هنده‌ك ژ سه‌ركرده‌و به‌رپرسێن ده‌ڤه‌را سلێمانیێ ب هه‌مى شیانێن خوه‌ و ب هاریكارى و ئاراسته‌كرنا دۆژمنان بزاڤێ دكه‌ن فه‌رهه‌نگێ ناوچه‌گه‌ریێ و شۆڤێنیه‌تێ د ناڤ خه‌لكێ كوردستانێ دا بچینن، ب مخابنیڤه‌ ئه‌ڤرۆ ده‌ره‌نجامێن چاندنا وێ شۆڤێنیێ ب باشى ئاشكه‌را دبن و ب پلا ئێكێ خه‌لكێ كوردستانێ زیانێ دكه‌ت.
به‌رى زێده‌تر ژ سه‌د و بیست سالان كورد دگۆپیتكا بێ كه‌سیێ و به‌دبه‌ختیێ دا بوون، ڕاستیه‌كا بێ گۆمانه‌ و لاپه‌ره‌یێن دیرۆكێ یێن تۆماركرین كو ژ مالباتا “مه‌سعود بارزانى” ب شێوه‌یه‌كێ خوه‌ گوریكه‌ر ده‌ست ب به‌رخوه‌دانێ و شۆره‌ِشێ هاته‌ كرن و گرتنا “شێخ عه‌بدولسلام بارزانى” ژ لایێ عوسمانیانڤه‌ ل رۆژهه‌لاتێ كوردستانێ ب خیانه‌تا سه‌رۆك هۆزه‌كێ كوردان كو پاشێ ل مووسلێ ل سالا 1914 هاته‌ سێداره‌دان ئه‌و ڕاستیه‌ كو نه‌ڤیێن برایم ئه‌حمه‌د ب چ ئاوایه‌كێ نه‌شێن حاشایێ لێ بكه‌ن، واته‌ ده‌مێ ماڵباتا بارزانى بۆ ڤى ملله‌تى شۆڕه‌ش دكر هێشتا ئه‌جدادێن باڤل ئان ئاراس و لاهۆر شێخ جه‌نگیه‌كێ ژ دایك نه‌ببوون، ب راستى نه‌ڤیێن برایم ئه‌حمه‌د گونه‌هبارێن سه‌ره‌كى نینن!.
پشتى سه‌دان سالان كو كوردستان بن ده‌ست ماى و ل سه‌رهه‌لدانا 1991 خه‌لكێ كوردستانێ شیان سێ ژ پارێزگه‌هێن كوردستانا باشۆر ب نیمچه‌ سه‌رخوه‌بوویی بڕێڤه‌ببه‌ن، لێ ژبه‌ر كو كه‌ركووك باژێره‌كێ ستراتیژى و ده‌وله‌مه‌نده‌ دوژمنان هه‌مى هێزا خوه‌ مه‌زاخت كو كه‌ركووك ژلایێ كوردانڤه‌ نه‌هێته‌ كۆنترۆلكرن، ژبۆ ڤێ مه‌ره‌مێ هه‌مى میكانزمێن نێگه‌تیڤ ژى خستنه‌ كارى و ده‌ست ب سیاسه‌تا عه‌ره‌بكرنێ و ده‌رخستنا خه‌لكێ كورد ل باژێرێ كه‌ركووكێ كر، ب جۆره‌كێ دڕندانه‌ هه‌ر هزر و بیره‌كا نه‌ته‌وه‌یی كو ل باژێرێ كه‌ركووكێ ئه‌كتیڤ ببا دهاته‌ ژناڤبرن و سه‌دان لاو و كوردپه‌روه‌رێن كه‌ركووكێ سه‌رێ خوه‌ ل سه‌ر دانا ب تنێ داكو سیاسه‌تا عه‌ره‌بكرنێ و نه‌هێلانا ئاسه‌وارێن كوردان ل كه‌ركووكێ سه‌رنه‌گریت و دوژمن شكه‌ستێ بئینیت. یا خۆیا بوو پشتى كو ڕژێما سه‌دام ژناڤچووى و ل سالا 2003 یێ ل ژێر سه‌رپه‌رشتیا هه‌ڤپه‌یمانێن نێڤده‌وله‌تى ژهه‌مى لایه‌نه‌كێڤه‌ بزاڤ هاتنه‌كرن سه‌ر ل نوو ده‌وله‌ته‌كا دیمۆكراسى كو مافێن هه‌مى نه‌ته‌وه‌ و ئولان د ناڤ دا ئێكسان بن بهێته‌ دامه‌زراند، كوردان ژى ژبۆ ده‌رێخستنا نیازپاكییا خوه‌ پشكدارى د ئاڤه‌دانكرن و رێڤه‌برنا ڤێ ده‌وڵه‌تێدا كر، لێ ژ به‌ر ئه‌و ئه‌زمۆنێ ته‌عل و خرابێ كو هه‌مى ڕژێمێن به‌رتر ب سه‌رێ كوردان ئینابوون، كوردان ب سه‌ركردایه‌تیا سه‌رۆك بارزانى د دستوورێ عیراقێ دا پشتى گه‌نگه‌شه‌ و ته‌حه‌دایه‌كا زۆر شیان سیسته‌مێ فیدرالیێ بچه‌سپینن و مادده‌یه‌كێ دستوورى دانن بۆ ئێكلاكرنا ئه‌و ده‌ڤه‌رێن كو هێشتا نه‌هاتبوونه‌ به‌ر باوه‌شا كوردستانێدا ب تایبه‌ت باژێرێ كه‌ركووكێ، حوكمه‌تا عیراقێ گه‌له‌ك بزاڤ كرن كو ئه‌ڤ مادده‌ د دستوورێ عیراقێ دا نه‌هێته‌ دانان، لێ سه‌رۆك بارزانى ب هه‌مى ئاوایه‌كێ ب شاهدیا هه‌مى سه‌ركرده‌یێن كورد ل به‌غدا و نه‌وشیروان مسته‌فا بخوه‌ ژى ته‌حه‌دا كر و شیا ب رێیا دستوورێ عیراقێ مافێن كوردان بهێنه‌ چه‌سپاند، لێ هه‌مى لایه‌كێ دیت حوكمه‌تا عیراقێ ده‌ست ژفه‌رهه‌نگێ شۆڤێنیێ و وه‌حشیگه‌رایا به‌رتر ژخوه‌ به‌رنه‌دا و دیسا ب هه‌ر جۆره‌كێ كو د شیانێن وان دا بن بزاڤ كرن كو ئه‌نفال و كوشتن ب سه‌رگه‌لێ كوردان دا بهێته‌ڤه‌ هه‌تاكو گه‌هشته‌ وى ڕاده‌ى كو ئێدى نانێ خه‌لكێ كوردستانێ ببڕن!، پشتى كو سه‌رۆك بارزانى ب هه‌مى ئاوایه‌كێ ل عیراقێ بێ هیڤى بووى و زانى ئه‌ڤ هزرا شۆڤێنى و نیازا ژناڤبرنا كوردان د مه‌ژى و فه‌رهه‌نگێ حوكمه‌تا عیراقێ ده‌رناهێت، ئێدى ده‌ست ب دانا ژێرخانێ كر بۆ سه‌رخوه‌بوونا كوردستانێ، سه‌رۆك بارزانى ب هاریكاریا سه‌ركره‌یێن دیكه‌ یێن دلسۆز و هیمه‌تا پێشمه‌رگه‌یێن جانفیدا و هه‌دارو خوه‌ڕاگریا خه‌لكێ كوردستانێ، ده‌هان ته‌حه‌دا بڕین هه‌تاكو گه‌هشته‌ ئه‌نجامدانا ڕیفراندۆمێ، ب ڤى ئاوایى كورد گه‌هشتنه‌ گوپیتكا سه‌ركه‌فتنێ كو ب ئاوایه‌كێ چ وڵاته‌كێ بوێرى نه‌بوو ب كردار دژایه‌تیا كوردان بكه‌ت، لێ ماڵباتا تاڵه‌بانى و نه‌ڤیێن برایم ئه‌حمه‌د ل شه‌ڤه‌كێ و خیانه‌ته‌كێ دوباره‌ ده‌هان ساڵان كورد به‌ر ب پاش برنه‌ڤه‌!، ئه‌ڤه‌ نه‌گونه‌ها نه‌ڤى یێن برایم ئه‌حمه‌ده‌ ئه‌ڤه‌ گونه‌ها وى ملله‌تى یه‌ یێ چه‌ندین جاران خیانه‌تا ڤێ ماڵباتێ دیتى لێ دیسا هه‌لدبژێرنه‌ڤه‌!!، پشكاكا ملله‌تى (ئه‌له‌ساس) ژ كه‌ربێن بارزانیدا وڵاتفرۆش هه‌لبژاردان، وڵاتفرۆشان ژى ل كه‌ربێن بارزانی دا كه‌رامه‌ت و ئاخا وان فرۆت!!.

84

كۆمه‌كا خوێنده‌ڤانێن سیاسه‌تێ ل هۆڵا خواندنێ به‌رهه‌ڤن، مامۆستاى ب ئامیرێ داتاشۆیێ پارچه‌ گرته‌یه‌كا ڤیدیۆیى ل سه‌ر شاشێ دانا، به‌رى كو فیلم ده‌ست پێ بكه‌ت، مامۆستاى گۆته‌ خوانده‌ڤانان د ڤێ پارچه‌ ڤیدیۆیێ دا كۆمه‌كا یاریزانێن ڤالیبۆلێ هه‌نه‌ و ب تۆپه‌كێ دله‌یزن، ل سه‌ر وه‌یه‌ هوون بژمێرن كو ل ده‌سپێكێ هه‌تا داویێ ئه‌و یاریزان چه‌ند جاران تۆپێ بلند دكه‌ن؟، ده‌مێ په‌خشا ڤیدیۆیێ ده‌ستپێكرى هه‌مى خوانده‌ڤانان ب هوورى به‌رێ خوه‌ ددا شاشه‌ و بلندكرنا تۆپێ دهه‌ژمارتن، ده‌مێ پارچه‌ ڤیدیۆ ب داوى هاتى، مامۆستاى ل خوانده‌ڤانان پرسى، چه‌ند جاران تۆپ هاته‌ بلندكرن؟، هه‌مى خوانده‌ڤانان ئه‌نجام گۆتن، مامۆستاى گۆتێ درسته‌، لێ پرسیاره‌كا دیكه‌ ژ وه‌ بكه‌م، وه‌ چ تشته‌كێ سه‌یر د ناڤ پارچه‌ ڤیدیۆیێ دا دیت؟. خوانده‌ڤانان به‌رسڤ دا: مامۆستا چ تشته‌كێ سه‌یر تێدا نه‌بوو، مامۆستاى پارچه‌ ڤیدیۆ دوباره‌ په‌خش كره‌ڤه‌، ل نیڤیا پارچه‌ ڤیدیۆیێ دا په‌خشا وێ ڕاگرت، و سیبه‌ره‌ك نیشا خوانده‌ڤانان دا كو زۆر ب ئاشكه‌رایی د ناڤ یاریزان دا سیبه‌را كه‌سه‌كێ ده‌ردكه‌ڤیت و ده‌ستێ خوه‌ بۆ بینه‌ران بلند دكه‌ت!، مامۆستاى گۆته‌ خوانده‌ڤانان وه‌ ئه‌ڤ سیبه‌ره‌ جارا ئێكى دیت؟، هه‌موویان د به‌رسڤ دا گۆتێ (نه‌خێر)، مامۆستاى گۆتێ جه‌وهه‌رێ سیاسه‌تێ ئه‌ڤه‌یه‌، هه‌رچاوا هوون مژوولى هژمارتنا بلندبوونا تۆپێ بوون و وه‌ سیبه‌ره‌كا ئاشكه‌را نه‌دیت، ب وى ئاوایی ته‌كتیك و سیناریۆیێن سیاسى بۆ وێ چه‌ندێ نه‌ كو د ڕاستیا ئاراسته‌یا سیاسى و پلانێن وێ نه‌گه‌هن. واته‌ خالا هه‌ره‌ گرنگ د هه‌ڵسه‌نگان دا كاودان و ده‌ره‌نجامێن سیاسه‌تێ، هووربینى و فره‌دیتنا پێنگاڤێن سیاسیه‌. د ڕوودانێن ڤێ داویێ دا كو عیراقێ هێڕش كریه‌ سه‌ر كوردستانێ و ئه‌مریكا بێده‌نگى هه‌لبژارتى، به‌رى كو بپرسین ئه‌ڤ چه‌نده‌ ژبۆ مه‌ زیان بوو ئانكو یا مفاداره‌، پێدڤیه‌ بپرسین بۆ ئه‌مریكا چ مفایه‌ك تێدایه‌ كو هێزه‌كا میلیشیایی یا سه‌ر ب ئیرانێ ڤه‌ ئارامترین ده‌ڤه‌ر كو ئه‌مریكا د ناڤدایه‌ كۆنترۆل بكه‌ت؟!، گه‌لۆ ئه‌مریكا مه‌ژیێ خوه‌ ژ ده‌ست دایه‌؟!، هنده‌ك دبێژن ئه‌مریكا ژ به‌ر نه‌فتا به‌سڕا ڤى كارى دكه‌ت و كوردان دفرۆشیت!، لێ د ڕاستی دا ئه‌مریكا وێ ڕاستیێ دزانیت ژ ده‌ستدانا كوردستانێ ژ ده‌ستدانا نه‌فتا به‌سڕا و كوردستانێ یه‌!، ژبه‌ر كو ئێدى ب هه‌مى ئاوایه‌كى عیراق دێ كه‌ڤیته‌ د ژێر كۆنترۆلا ئیرانێ دا.
ژبلى بابه‌تێن بازرگانى، د ڤێ هه‌ڤكێشه‌یا ئالۆزدا ئه‌م ب ڤى ئاوایى هزر بكه‌ین كو ئه‌گه‌ر تشته‌ك ب ناڤێ كوردستان نه‌مینیت، واته‌ كورد د نه‌خشه‌یێ سیاسیێ عیراقێ دا بهێنه‌لادان، ئانكو هه‌رێما كوردستانێ ب ئاوایه‌كێ لاواز ببیت مینا كو نها دهێته‌ دیتن!، ده‌ره‌نجامێن وێ بۆ ئه‌مریكا و هه‌ڤپه‌یمانێن وێ دێ چ بن؟!، بێگۆمان ئیرانێ دێ هه‌مى كۆنترۆلا سه‌ربازى، سیاسى، ئابوورى، موخابراتى، كه‌لتۆرى هه‌ر ل سه‌ر سنۆرێ خوه‌ هه‌تا كو كوردستانا عیراقێ و سووریێ و لوبنانێ ده‌رباز دكه‌ت و دگه‌هیته‌ ته‌نشت ئیسرائیل گریته‌ ده‌ست!، واته‌ ب ساناهێ دێ شێت چه‌ك و ته‌قه‌منیێ گه‌هینیته‌ ده‌ستێن “حه‌سه‌ن نه‌سروللا” كو چه‌ندین ساڵن قوربانیێ بۆ ڤێ چه‌ندێ دده‌ت، گه‌لۆ ئه‌مریكا چ بده‌ستڤه‌ هاتیه‌ كو هنده‌ ئه‌رزان كوردان بفرۆشیت؟!.
د دیتنا مندا ئه‌مریكا، ڕۆسیا، وه‌لاتێن ئه‌ورۆپى، سعوودیا، ئیسرائیل و توركیا ژى!، خوه‌دى پلانه‌كا مه‌زنن ل دژى هه‌ژموون و مه‌ترسی یێن ئیرانێ ل ده‌ڤه‌رێ، ئه‌گه‌ر ئه‌م وه‌سا هزر بكه‌ین كو هه‌ر پلانه‌كا سیاسى دهێته‌ داڕشتن ل دژى وه‌لاته‌كێ دێ ب ساناهى هه‌ست ب وێ پلانێ هێته‌كرن، واته‌ پێدڤیه‌ ده‌وله‌تێن جیهانێ سه‌نته‌رێن ستراتیژى و سیاسى یێن خوه‌ هه‌لگرن و ب تنێ هنده‌ك ده‌زگه‌هێن ڕاگه‌هاندنێ كار بكه‌ن و تشته‌ك ب ناڤێ چه‌مكى سیاسى ل جیهانێ نینه‌!.
د نها دا ب دیتنا من ناگونجیت بچمه‌ د ئه‌و نیشان و هیمایێن سیاسی دا كو ب ئاوایه‌كێ باش هه‌ست دكه‌م هه‌مى ئاراسته‌ دێ د به‌رژه‌وه‌ندیا مه‌دا ب داوى هێن و چ جاران مینا نها نێزیكێ ده‌وڵه‌تا كوردستانێ نه‌بووینه‌، لێ پێدڤیه‌ هنده‌ك ڕاستیان ژبیر نه‌كه‌ین، ل وانا ئاخفتنێن سه‌رۆك بارزانى كو چه‌ندین جاران دوباره‌ كرینه‌ (كورد ناڤه‌گه‌ریت پاش) ئانكو به‌رى ڕیفراندۆمێ دگۆت (ئه‌گه‌ر لایه‌نه‌كێ بڤێت كه‌ركووكێ ب هێز داگیر بكه‌ت، دێ به‌رهه‌مه‌ك هه‌بیت د خه‌یالا كه‌سێ دا نه‌بیت)، پشتڕاستم سه‌رۆك بارزانى چ جاران ل سه‌ر بنیاتێ ڤالا سۆزان ناده‌ت، هه‌روه‌سا پێدڤیه‌ وێ ڕاستیێ بزانین ل چ جهێن جیهانێ سه‌رۆك وه‌لات پلان و به‌رنامه‌یێن سیاسى ب هوورى نائینن زمان، ب تنێ هێمایێ ب ئه‌نجامى دده‌ن، و ئه‌ڤ پرۆسه‌ بێ قوربانى نابیت!.

45

ل هه‌مى وه‌لاتێن خوه‌دى فه‌رهه‌نگ ل جیهانێ ده‌مێ هێزه‌ك بۆ جاره‌كێ هه‌تا دو جاران موزایه‌ده‌یان ل سه‌ر هێزه‌كا دیكه‌ یا سیاسى دكه‌ت، پاشێ د ناڤ خه‌لكی دا ڕوویێ ڕاستیێ موزایه‌ده‌یان ئاشكه‌را بوو، ئێدى هێز ئانكو حزبا موزایه‌ده‌چى دربه‌كا مه‌زن ژ لایێ جه‌ماوه‌ریڤه‌ دخۆت و د ناڤ خه‌لكی دا باوه‌ریێ ژ ده‌ستدده‌ت، لێ ب مخابنیڤه‌ ژبه‌ركو كوردستان خوه‌دى فه‌رهه‌نگ و ڕوشنبیرییه‌ته‌كا مینا پێتڤى نینه‌، له‌وما هه‌رچاوا وه‌لاتفرۆشه‌ك ب ساناهى دشێت خوه‌ بكه‌ته‌ خوه‌دى شۆڕه‌شێن كوردى!، هه‌رچاوا فێل بازه‌ك دشێت ل ژێر قووناعا ئه‌نتى گه‌نده‌لیێ حزبه‌كێ دابمه‌زریت و بازرگانیێ ل سه‌ر ئاخ و ده‌ستكه‌فتێن كوردستانێ بكه‌ت، ب وى ئاوایی موزایه‌ده‌چى ژى به‌رده‌وام و بێ كو چاڤه‌ڕێ بكه‌ن هه‌ تاكو خه‌لك دره‌وان وان یا به‌رتر ژبیر بكه‌ت، دوباره‌ ده‌ست ب موزایه‌ده‌یه‌كا نوو دكه‌نه‌ڤه‌!.
به‌رى سێ سالان هه‌تا كو چه‌ند رۆژه‌كا به‌رى ئه‌نجامدا پڕۆسسا ڕیفراندۆمێ ل بیست و پێنجێ ئیلۆلا ده‌ربازبوویی، حزب و لایه‌نێن د ژه‌پارتى ب سه‌رۆكایه‌تیا ته‌ڤگه‌را گۆڕان ب هه‌مى شیان و هێزێن خوه‌ڤه‌ بزاڤدكرن سه‌رۆك بارزانى و پارتى ب وێ چه‌ندێ تاوانبار بكه‌ن كو چ ڕاستیه‌ك ژبۆ پڕۆسسا ڕیفراندۆمێ نینه‌ و هه‌مى موزایه‌ده‌یێن سیاسینه‌ دكه‌ن ژ پێخه‌مه‌ت ده‌ستكه‌فت و پاراستنا كورسیك و ئیمتیازێن خوه‌، پشتى كو وان هه‌ست پێ كرى بابه‌تێ ڕیفراندۆمێ هێدى هێدى یا دبیته‌ پراكتیك و كار ل سه‌ر دهێته‌ كرن، ئێدى ده‌ست ب موزایه‌ده‌یه‌كا دیكه‌ كر و دگۆت بارزانى نكاریت ده‌وڵه‌ته‌كا كوردستانى دابمه‌زرینیت و ئه‌ڤ بزاڤێن وى بۆ وێ چه‌ندێنه‌ ڤێ پارچه‌یا كوردستانێ ل ژێر ده‌سهه‌لات و سه‌روه‌ریا به‌غدا ده‌ربینیت و بێخیته‌ ل ژێر ده‌سه‌لات و سه‌روه‌ریا توركیا، هه‌رچه‌نده‌ بزاڤا گۆڕان و كومه‌ڵ یا ئیسلامى ب هه‌مى ئاوایه‌كێ بزاڤ كرن خه‌لكێ كوردستانێ بترسینن و ده‌نگێ (به‌لێ) سه‌ركه‌فتنێ نه‌ئینیت, لێ ریفراندۆم ب سه‌ركه‌فتنه‌كا مه‌زن هاته‌ ئه‌نجامدان و هه‌مى لایه‌كێ دیت كو جاره‌كا دیكه‌ وه‌كى جاران موزایه‌ده‌یێن دژه‌پارتیان ئاشكه‌را بوون و توركیا ب هه‌مى شیانێن خوه‌ڤه‌ بزاڤێ دكه‌ت ئه‌نجامێن ڤێ پرۆسسێ بهێنه‌ هه‌لوه‌شاندن. ئه‌ڤ چه‌نده‌ یا كو مه‌ به‌حس كرى نموونه‌ك بوو ل سه‌ر ئێك مژار كو چه‌ندین ساڵن پارتى دیمۆكراتى كوردستان كار ل سه‌ر دكه‌ت و ل شوونا دوژمن و داگیركه‌رێن كوردستانێ ته‌ڤگه‌را گۆڕان و هه‌ڤ لۆژیك و دۆستێن وێ بزاڤا هه‌لوه‌شاندنێ و تێكدانا وێ دده‌ن، نهاژى كو پڕۆسسا ڕیفراندۆمێ سه‌ركه‌فتن ئینا و كوردان قووناغه‌كا هه‌ستیار و دیرۆكى ده‌ربازكر، دیسا ئه‌ڤ هێزێن سیاسى یێن دژه‌پارتى ب هه‌مى هێز و شیانێن خوه‌ڤه‌ بزاڤێ دكه‌ن ڤان ده‌ستكه‌فتان ژناڤ ببه‌ن، لێ ئه‌ڤجاره‌ ب قیناع و خاپاندن نه‌!، ئه‌ڤجاره‌ ب ئاشكه‌رایی مینا هه‌مى دۆژمنێن كوردستانێ ل دژى كوردستانێ دخه‌بتن، ئه‌گه‌ر هه‌ڤبه‌رییه‌كێ بكه‌ین د ناڤبه‌را ده‌زگه‌هێن ڕاگه‌هاندنێ یێن ته‌ڤگه‌را گۆڕان و كۆمه‌ڵا ئیسلامى دگه‌ل كه‌ناڵێن سه‌ر ب نوورى مالكى و ئیرانى، دێ دیار بیت ب ئێك له‌حن و فۆنه‌تیك ل سه‌ر ئێك ڕێڕه‌و ل دژى كوردستانێ كار دكه‌ن، جوداهى د ناڤبه‌را وان دا ب تنێ ئه‌وه‌ كو ده‌زگه‌هێن گۆڕان و كۆمه‌لێ پتر ده‌مێ خوه‌ ژ بۆ دژایه‌تى كرنا پێنگاڤێن كوردان ته‌رخان دكه‌ن.
گومان دوێ چه‌ندێدا نینه‌ كو پشتى ڕاگه‌هاندنا ده‌وله‌تا كوردستانێ و ئارامبوونا باردۆخێ سیاسى و ئه‌منى و نه‌مانا ده‌ست و پالپشتیا ده‌ره‌كى د ناڤ كوردستانێ دا، ئه‌ڤ پرسگرێك و گرێكێن نه‌ساخێن كوردستانێ دڤێت بهێنه‌ نه‌شته‌ر كرن، ل هه‌مى جیهانێ ئازادى تا وى سنورى یا ڤه‌كرییه‌ كو نه‌بیته‌ مه‌ترسى ل سه‌ر ئاسایش و ئه‌منیه‌تا جڤاكى، ل ڤى وه‌لاتى كو هێشتا ئازادى یا ژیانێ یا د مه‌ترسیێ دا، خه‌لكه‌كێ ب ناڤێ ئازادیا رۆژنامه‌گه‌ریێ و بیروباوه‌ران هه‌مى بزاڤا دكه‌ن كو دیرۆكا ڕه‌ش و خویناویا كوردستانێ دوباره‌ بكه‌نه‌ڤه‌!، ساده‌یی و خۆشباوه‌ری و لاواز لێكدانه‌ڤه‌یێن بۆیه‌ر و ڕوودانێن سیاسى و ئیدارى ڕێكخۆشكه‌رن كو موزایه‌ده‌یێن لۆبى یێن دوژمن و داگیركه‌رێن كوردستانێ ب ساناهیتر كاریگه‌رى یێن نێگه‌تیڤ ل دووڤ خوه‌دا بهێلن، واته‌ ئێك ژ ئه‌ركێن ده‌سه‌لاتێ ل كوردستانێ ئه‌وه‌ كو ده‌ست ب چاكسازییه‌كا فه‌رهه‌نگى و هزرى بكه‌ت كو هه‌ر لایه‌ن و كه‌سایه‌تى و بارزگارنه‌كێ سیاسى نه‌شێت ب ساناهى نفوزا خوه‌ د ناڤ جڤاكیدا بكه‌ت و ب ده‌نگێ خه‌لكێ كوردستانێ ده‌ستكه‌فتێن كوردستانێ بفرۆشیت و بازرگانیێ ب پاشه‌ڕۆژا كوردستانێ بكه‌ت.

76

ئه‌م و كورد برایێن هه‌ڤدووینه‌، ئه‌م ب چاڤه‌كێ ئێكسان ل به‌سرا و هه‌ولێرێ دنێرین، ئه‌م گه‌لێ كوردستانێ سزا ناده‌ین.. ـ به‌رى ریفراندۆمێ ـ كورد ناخوازن جودا ببن، لێ بارزانى بزاڤا پارچه‌كرنا وه‌ڵاتێ مه‌ دده‌ت، ئه‌ڤه‌ چه‌ند ڕسته‌یه‌كێن زۆر بێ ویژدانانه‌ و نا ئه‌خلاقى یێن هنده‌ك سه‌ركرده‌یێن عه‌ره‌بانه‌ كو به‌رده‌وام ل سه‌ر كه‌ناڵێن ڕاگه‌هاندنێ دئیننه‌ زمان، مه‌به‌ستا وان خاپاندنا پشكه‌كا خه‌لكێ كوردستانێ و خاپاندنا دیدگه‌ها جڤاكێن نیڤده‌وڵه‌تی یه‌ ل سه‌ر عیراقێ و دۆزا كوردان.
پێشكێشكاره‌كێ كه‌ناڵێ “ڕووداو” ده‌مێ ل نیۆیۆرك چاڤپێكه‌فتنه‌ك دگه‌ل بیرمه‌ندێ مه‌زنێ فڕه‌نسى و دۆستێ گه‌لێ كورد”بێرنارد هێنرى لێڤى” ئه‌نجامداى، پرسیاره‌كا گرنگ ئازراند و پرسى: (بۆچى هه‌ر سه‌ركرده‌یه‌كێ عه‌ره‌ب و فارس و تورك ئه‌گه‌ر بڤێت جه‌ماوه‌رى كۆم بكه‌ت و ل هه‌لبژارتنان سه‌ربكه‌ڤیت، ل دژى كوردان ڕادوه‌ستیت؟)!!، بێ گومان پرسیاره‌كا گرنگه‌ كو پێدڤیه‌ هه‌م گه‌لێ كورد ل خوه‌ بپرسیت و هه‌م ژى ئه‌ڤ پرسیاره‌ ل سه‌ركرده‌یێن وه‌ڵاتێن داگیركه‌ر بهێته‌ كرن، گه‌لۆ چ هاندان و فاكته‌ر ل پشت ڤێ چه‌ندێ بوونه‌ كو ئه‌ڤ كه‌ربوكینا عه‌ره‌ب و تورك و فارسان ب گشتى ل دژى كوردان بهێنه‌ ئافراندن؟!، چاوا چێ دبیت وان نه‌ته‌وه‌یان كوردستان داگیر كربیت، سه‌روه‌ت و سامان و ژیانا وان تالان كربیت، ل سه‌ر ئاخا وان ئه‌و ئه‌نفال و كیمیاباران و شه‌هید كربن، كه‌لتوور و پێشڤه‌چوونا وان هه‌ڕفاند بیت، و كوردان به‌روڤاژى!، نه‌ چ جاران ئاخ و وه‌ڵاتێن ڤان وه‌لاتان داگیر كرینه‌، ژبلى به‌رگیریكرنێ ژ خوه‌ چ جاران چه‌ك بۆ وان هه‌لنه‌گرتیه‌، هه‌رده‌م ژى داخوازا دۆستى و برایه‌تیێ ل داگیركه‌ران كریه‌ و دكه‌ن، گه‌له‌ك جاران ژى بۆ نیشتیمان و وه‌ڵاتێن داگیركه‌ران چه‌كێ هه‌لگرتى و به‌رگیرى یا كرى، گه‌لۆ بۆچى سه‌خمه‌راتى ڤان هه‌مى سته‌م و زۆرداریێن داگیركه‌ران و د هه‌مبه‌ردا نیازپاكى و برایه‌تى خوازیا كوردان، ئه‌ڤجا ژى هه‌ر د چاڤ و ناخێن داگیركه‌ران دا كورد تاوانبار و زۆردارن؟!، گه‌لۆ د هه‌مى دیرۆكا مرۆڤایه‌تیێ دا كوردان ژبلى مافێ ژیانێ چیا دیكه‌ ل داگیركه‌ران خواستیه‌، دا كو ب ڤى ئاوایی بهێنه‌ تاوانباركرن كو ژ هه‌ژى برسیكرنێ و كوشتنێ و ژناڤبرنێ بن؟!، مه‌ هه‌میان دیت سه‌خمه‌راتى ئه‌و هه‌مى سته‌م و زوردارى یێن دیرۆكى كو حوكمه‌تێن عیراقێ ل نه‌ته‌وه‌یا كورد كرین، لێ دیسا ل ساڵا 2003یێ پشتى كو ڕژێما دڕنده‌یا به‌عس ژ ناڤچووى كوردان داخوازا ژیانه‌كا ئازاد و مافێن خوه‌ د ناڤ وه‌ڵاتێ عیراقێ دا كرن و داخوازا جودابوونێ نه‌كر!، لێ دیسا حوكمه‌تا عیراقێ مینا حوكمه‌تێن به‌رتر خوه‌ خه‌لكێ كوردستانێ برسى كر، گه‌فێن سه‌ربازى دكرن و هێزێن میلیشیا ئینانه‌ سه‌ر باژێرێن كوردان ب نیازا ژناڤبرنا ئه‌و مافێن كوردان كو ب خوین و جانێ سه‌دان هزار لاوێن خوه‌ ل سه‌رده‌مێ حوكمه‌تا به‌عس ب ده‌ستڤه‌ ئیناى، واته‌ حوكمه‌تا عیراقێ دخواست وان كاران ب داوى بینیت كو حوكمه‌تا به‌عس نه‌شیای بكه‌ت و ته‌نازول بۆ كوردان كرى!، ئه‌ڤجاژى كوردان پتر ژ ده‌ه سالان بزاڤ كرن حوكمه‌تا عیراقێ تێبگه‌هینن كو ده‌ست ژ هزرا شوڤێنیه‌تێ به‌رده‌ن و بزاڤێ نه‌كه‌ن ئه‌و ده‌ستكه‌فتێن ب خوین و قوربانیدانا ده‌هان هزار كوردان ب ده‌ستڤه‌هاتى ژناڤببه‌ن. لێ مینا دیار كوشتن و ژناڤبرنا كوردان ل ده‌ف داگیركه‌ران یا بوویه‌ كه‌لتۆر هه‌تا ڕاده‌یه‌كى بۆ پرۆپاگنده‌یێن هه‌لبژاردنان ژى دبێژنه‌ جه‌ماوه‌رێ خوه‌ ئه‌گه‌ر ده‌نگێ خوه‌ بده‌نه‌ مه‌ دێ بۆ و كوردان ژناڤبه‌ین!، ئه‌ڤجا ژى بۆ جڤاكێن نیڤنه‌ته‌وه‌یی په‌یاما فێدكه‌ن و دبێژنێ ئه‌م و كورد براینه‌ و چ جوداهیه‌ك د ناڤبه‌را كورد و عه‌ره‌بان دا نینه‌ و ب تنێ “مه‌سعود بارزانى” بزاڤێ تێكدانا ئه‌وله‌هى و ئێكپارچه‌یا وه‌ڵاتێ عیراقێ دده‌ت!، یا ژ هه‌میێ نائه‌خلاقیتر و چه‌په‌ڵتر هه‌لویستێ جڤاكێن نیڤنه‌ته‌وه‌یی و وه‌ڵاتێن ب ناڤ دیمۆكراسی یه‌ ل سه‌ر ریفراندۆما هه‌رێما كوردستانێ.
ئێدى پێدڤیه‌ جڤاكێن نیڤده‌وڵه‌تى و وه‌ڵاتێن زلهێز و ب ناڤ دیمۆكراسی یێن جیهانێ وێ ڕاستیێ د ناڤ مه‌ژیێ خوه‌دا بچه‌سپینن كو كورد نابنه‌ف خوراكێن وه‌ڵاتێن دیتر، ئێدى كورد ناچار نینن به‌دبه‌ختیێ و بنده‌ستیێ و خوین به‌خشینێ بپه‌رژینن داكو خه‌لكێن نه‌ته‌وه‌ و ده‌وڵه‌تێن دیتر مفاو خۆشبه‌خیتێ پێ ببینن، ئه‌گه‌ر نییه‌ته‌ك هه‌بیت كو دیسان كوردان ببنه‌ خالا سفرێ، پشتڕاستم سه‌قامگیرى و ئاسایشا هه‌مى جیهانێ دێ كه‌ڤیته‌ دمه‌ترسیێ و له‌رزه‌ له‌رزێ دا.

80

د نوكه‌ دا باردۆخێ كوردستانێ یێ د قووناغا ڕاڤه‌گوهاستنێ دا و پشتى ڕاگه‌هاندنا ئه‌نجامێن ڕیفراندۆمێ، گوهارتنێن مه‌زن ژ نشكه‌كێڤه‌ دیار بوون، جاده‌یا كوردى و خه‌لكێ كوردستانێ ب گشتى ژبه‌ر گوهۆرینا هه‌لویستێن وه‌ڵاتێن جیران ب تایبه‌تى توركیا یێن ڕاستى نه‌ئارامیه‌كا ده‌روونى هاتى.
به‌رى هه‌رتشته‌كێ پێدڤیه‌ گه‌لێ كوردستانێ وێ ڕاستیێ بزانیت كو چ گوهارتنێن مه‌زن ل جیهانێ بهێنه‌ ڕوودان ژ نشكه‌كێڤه‌ نینن و كار یا ل سه‌ر هاتیه‌كرن و نابیت ل سه‌ر بنیاتێ ڕاگه‌هاندنێ و به‌یاننامه‌یێن وه‌ڵاتان هه‌ڵسه‌نگاندنا سیاسى بكه‌ین.
د ڤان ده‌هه‌یێن ده‌ربازبوویی دا باشترین میكانزمێ وه‌ڵاتێن رۆژئاڤا بۆ لاوازكرن و تێكدانا دوژمنێن وان چێكرنا ڕێكخراو و هێزێن ڕادیكاڵێن ئیسلامى بوویه‌ و هه‌روه‌سا بكارئینانا سه‌ركرده‌یێن نه‌زان و دیكتاتۆر د به‌رژه‌وه‌ندیێن خوه‌دا، هه‌ر چاوا رێكخراوا قاعیده‌ هاته‌ چێكرن بۆ لاوازكرنا سیسته‌مێ كۆمونیستى ب سه‌ركردایه‌تیا ڕۆسیا، سه‌دام كشكره‌ كوێتێ ژبۆ هندێ ب وێ به‌هانه‌یێ پێنگاڤێن وان ب باشى بهێنه‌ د ڕۆژهه‌ڵاتا ناڤین دا، هه‌روه‌سا داعش ژى هه‌ر چه‌نده‌ زیانێن مه‌زن هه‌بوون و تراژیدیا چێكرن، لێ ئه‌و هێز ژى بێ ئه‌گه‌ر نه‌هاتبوو چێكرن و نه‌خشه‌یێ رۆژهه‌لاتا ناڤین ب داعشێ هاته‌ گوهارتن، بۆ نموونه‌ ئه‌گه‌ر داعش نه‌بایه‌ ڤه‌گه‌ڕاندنا كه‌ركووكێ ب ده‌هان هزاران شه‌هیدان ژى یا ب زه‌حمه‌ت بوو، ئه‌وا داعشا ل دژى مه‌ ئه‌نجامداى دا عیراق و میلیشیایێن شیعه‌ خراپتر كه‌ن، واته‌ مه‌ قوربانیه‌كا مه‌زن یا خوینێ دگه‌ل داعشێ به‌خشى لێ ده‌ستكه‌فتێن مه‌ یێن سیاسى و سه‌ربازى بێ وێنه‌ بوون، پێشمه‌رگه‌ ژلایێ داگیركه‌رانڤه‌ ب هێزه‌كا مه‌ترسیدار هاتبوو پێناسه‌ كرن، شه‌ڕێ داعشێ ئه‌و پێناسه‌ گوهارت و جه‌وهه‌رێ ئه‌رك و كارێن پێشمه‌رگه‌ به‌یان كر كو پاراستنا مرۆڤایه‌تیێ و خه‌لكه‌كێ سته‌م لێ كرییه‌، شه‌رێ داعشێ نه‌خشه‌یێ ده‌وڵه‌تا كوردستانێ دیار كر، شه‌رێ داعشێ دۆزا كوردى ل سه‌ر ئاستێ جیهانێ به‌رز كر، ژبه‌ر شه‌رێ داعشێ چه‌كه‌كێ باش و پێشكه‌فتى بۆ پێشمه‌رگه‌ هاته‌ پێش كێش كرن كو نها دكاریت ب وى چه‌كى ل هه‌مبه‌ر وڵاتان ژى ب باشى به‌رگیریێ ل خوه‌ بكه‌ت، ئه‌گه‌ر وه‌سا هزر بكه‌ین چێكرن و فرێكرنا داعش بۆ هه‌رێما كوردستانێ هه‌مى ل نشكه‌كێڤه‌ بوون و وڵاتێن زلهێزێن جیهانێ ب تایبه‌ت ئه‌مریكا نه‌شیا رێكێ ل داعش بگریت كو تراژیدیا چێنه‌بن، ئه‌م دشاشین و تێگه‌هشتنا مه‌ یا سیاسى یا لاوازه‌، هیچ مه‌نتق نه‌بوو كو چه‌ند چه‌كدارێن داعش نزیكى ده‌ه رۆژان چیایێ شنگالێ بگرن و فرۆكه‌یێن ئه‌مریكى ب ڤێ پێشكه‌فتنێن بهێز و بێ وێنه‌ نه‌شیان ده‌روازه‌یه‌كێ بۆ گه‌هاندنا ئالیكاریێن خه‌لكێ لێ قه‌وماوى ل چیا ڤه‌كه‌ن!، لێ دیاره‌ چێبوونا تراژیدیایێ پتر هاریكار بوو كو به‌رنامه‌یێن خوه‌ ل رۆژهه‌لاتا ناڤین جێ بجێ بكه‌ن.
د نوكه‌د ا حه‌تا ڕاده‌یه‌كێ زۆر كێشه‌یێن كوردستانێ چاره‌سه‌ر بوون بۆ دامه‌زراندنا ده‌وڵه‌تا كوردستانێ، هه‌م مادده‌یێ 140 ئوتوماتیكى ب داعش جێ بجێ بوو، هه‌م بوونه‌ خوه‌دى چه‌ك بۆ به‌رگیرى كرنێ ژخوه‌، هه‌م مینا نه‌ته‌وه‌یه‌كێ سته‌م دیدى و خوه‌دى دیروكه‌كا پڕ كاره‌سات و تراژیدییا و هه‌م ئاشتى خواز و دژه‌ تیرور ل جیهانێ هاتنه‌ سه‌لماندن..
هه‌رێما كوردستانێ ب سه‌رۆكایه‌تیا بارزانى شیان به‌رژه‌وه‌ندیێن سیاسى یێن كوردستانێ و وڵاتێن رۆژئاڤا پێكڤه‌ گرێده‌ن، ژ لایه‌نێ ئابوورێ حوكمه‌تا هه‌رێما كوردستانێ ب سه‌رۆكایه‌تییا تێچیرڤان بارزانى مه‌زنترین كۆمپانیایێن جیهانێ كو كاریگه‌ریێ ل ئابوورێ هه‌مى جیهانێ دكه‌ن ئینانه‌ كوردستانێ، واته‌ تێكچوونا كوردستانێ نه‌ك ب تنێ زیانێ دێ ب وه‌ڵاتێن هه‌ڤسنۆر گه‌هینیت، دێ كاریگه‌رییه‌كا نێگه‌تیڤ ل ئابوور و به‌رنامه‌یێن ئیكونوومى یێن وه‌ڵاتێن جیهانێ ژى كه‌ت.
یا گرنگ كو خه‌لكێ كوردستانێ پێدڤیه‌ بزانیت د ڤى سه‌رده‌می دا سیناریۆیێن سیاسى زۆر بهێزن، ب ڕاگه‌هاندنا به‌یاننامه‌ یان ئاخفتنا سه‌رۆكێ وڵاته‌كێ دلگران نه‌بن، ئه‌وا دهێته‌ كرن و دهێته‌ گۆتن گه‌له‌ك ژێك دوورن، بۆ نموونه‌ ئه‌مریكا ل بابه‌تێ ڕاكرنا ئالایێ كوردستانى، فیدرالیه‌تا كوردستانێ، بابه‌تێ پێشمه‌رگه‌، ڕاكێشانا بۆریا نه‌فتا كوردستانێ و فرۆتنا وێ بێ به‌غدا، ل ڤان هه‌میان پشتگیریا به‌غدا دكر و ل دژى مه‌ به‌یاننامه‌ ده‌ردكرن، لێ ل داویێ هه‌مى د به‌رژه‌وه‌ندیا كوردان دا ب داوى هاتن و هیچ ده‌ستكه‌فته‌ك بۆ عیراقێ تێدا نه‌بوون، هیچ ئه‌گه‌رو مه‌نتقه‌ك نینه‌ كو ئه‌مریكا دجه‌وهه‌ردا پشتگیریا دوژمنێن خوه‌ و سیاسه‌تا ئیرانێ ل دژى خوه‌ ل ده‌ڤه‌رێ بكه‌ت، هه‌تا ڤێ چركێ ژى ئه‌مریكا ب كریار پشتگیریا مه‌یا كرى (نه‌ك ب به‌یاننامه‌یان!).

106

به‌رۆڤاژییا سیاسه‌تا وڵاتێن رۆژهه‌ڵاتا ناڤین، سیاسه‌تا ئه‌مریكا ب چ ئاوایه‌كى ل سه‌ر تۆرێن ڕاگه‌هاندنێ و به‌یاننامه‌یان ناهێته‌ خواندن، ئه‌و سیاسه‌تڤان ئانكو رۆژنامه‌نڤیسێ سیاسى كو بڤێت هه‌ڵسه‌نگاندنێ بۆ سیاسه‌تا ئه‌مریكا ل سه‌ر پیڤه‌رێ لێدوانێن ڕاگه‌هاندنێ بكه‌ت، شاشیه‌كا مه‌زن هه‌مبه‌رى پیشه‌یا خوه‌و خوینه‌رێن خوه‌ ئه‌نجام دده‌ت.
ئه‌گه‌ر چاڤه‌كێ د سیاسه‌تا ئه‌مریكا دا بخشینن ل چل سالێن ده‌رباز بووی دا، دێ تێگه‌هین كردارێن ئه‌مریكا و لێدوانێن وێ گه‌له‌ك جاران ل دژى هه‌ڤ ب دووماهی هاتینه‌، بۆ نموونه‌ د شه‌ڕێ هه‌شت سالیێ ساڵێن هه‌شتێیان دا كو د ناڤبه‌را عیراقێ و ئێرانێ دا چێبووى، ئه‌مریكا ب باشى ئالیكارییا ڕژێما عیراقێ دكر و ل شه‌ڕێ كوێتێ ژى ئه‌مریكا شیا ل داگیركرنا كوێتى عیراقێ هان بده‌ت، ئه‌ڤ چه‌نده‌ ببیته‌ فاكته‌ره‌ك كو ژ ترسێن “سه‌دام حوسێن”دا هه‌مى ئه‌و وڵاتێن عه‌ره‌بى كو نه‌دڤیا چ جاران ئه‌مریكا ل ده‌ڤه‌رێ ببینن، داخواز ژ ئه‌مریكا بكه‌ن د هه‌وارا وان دا بهێت و سه‌ربازى مایتێكرنێ ل دژى عیراقێ ئه‌نجام بده‌ت. د شه‌رێ نه‌فتێ دا ژى كو د ناڤبه‌را هه‌ولێرێ و به‌غدادا دهاته‌ كرن، ئه‌مریكا ب ڕاگه‌هاندن و به‌یاننامه‌ دژایه‌یتیا به‌رژه‌وه‌ندیێن هه‌ولێرێ دكر، هه‌تا ل دژى توركیاژى لێدوان ددان كو نابیت نه‌فتا كوردان بگه‌هیته‌ به‌نده‌را جه‌یهان، لێ د پراكتیك دا ئه‌و پێنگاڤ هاتنه‌ هاڤێتن و حوكمه‌تا هه‌رێمێ سه‌ركه‌فتن ل سه‌ر به‌غدا ئینا و ئه‌مریكا ژى ئه‌ڤ دیفاكتۆیه‌ په‌رژاند.
ئه‌مریكا دو جۆره‌ سیاسه‌تان ل گه‌ل وه‌ڵاتان دا په‌یره‌و دكه‌ت، یا ئێكى ستراتیژیه‌ كو په‌یوه‌ندى یێن درێژخایه‌ن دگه‌ل هه‌ڤپه‌یمانێن خوه‌ گرێ دده‌ت، ئه‌و وه‌ڵاتێ دخوازیت ئه‌ڤ جۆره‌ په‌یوه‌ندیه‌ ل گه‌ل ئه‌مریكا دا هه‌بن، پێدڤیه‌ لایه‌نێ وێ یێ سه‌ربازى تا وى ڕاده‌ی بهێز ببیت كو ل ژێر كۆنترۆلا ئه‌مریكا ده‌رنه‌كه‌ڤیت، دپێنگاڤێن سه‌ره‌كى یێن گرێدانا په‌یوه‌ندى یێن سیاسى و ئابوورى و دببلۆماسى و سه‌ربازیدا ب گشتى ل ژێر چه‌ترا هه‌ژمونێ ئه‌مریكا دا ده‌رنه‌كه‌ڤیت. جۆرێ دوویێ ته‌كتیكیه‌، ئه‌گه‌ر وڵاته‌كێ به‌رۆڤاژى ستراتیژییه‌ت و سیاسه‌تا ئه‌مریكا پێنگاڤ هاڤێتن پێدڤیه‌ هه‌تا ل ده‌ستقوتانا ئه‌مریكا ژى بترسیت، ژ به‌ر كو ئێدى دێ ل هه‌ڤپه‌یمانه‌كێ ستراتیژى بیته‌ هه‌ڤپه‌یمانه‌كێ ته‌كتیكى و مینا كه‌ره‌سته‌یه‌كێ بۆ به‌رژه‌وه‌ندى یێن ئه‌مریكا بكارهێت، هه‌روه‌كى “موعه‌مه‌ر قه‌زافى” كو هه‌ڤپه‌یمانێ ئه‌مریكا بوو و خوه‌ سه‌ربازى نێزیكى ڕۆسیا دكر، مینا “سه‌دام حوسێن” كو نێزیكێ ئه‌مریكا بوو و ل دژى وه‌لاتێ “ئیسرائیل”ێ بوو، و وه‌ڵاته‌كێ دیكتاتۆرخواز و سه‌ربازى بوو، هه‌روه‌كى رژێما شاهێ ئیرانێ به‌رى ساڵا 1979 كو گرنگیه‌كا مه‌زن ب كه‌رتێ سه‌ربازى ددا و هه‌ڤڕكى ل گه‌ل رۆژئاڤا و ئه‌مریكا دكر، ئه‌مریكا شیا هه‌ر زوى ب دانانا رژێمه‌كا ئیسلاما سیاسى، ئیرانێ ژ پێشكه‌فتنان ئیفلیج بكه‌ت.
توركیا ئێك ژ وان هه‌ڤپه‌یمانێن ئه‌مریكایه‌ كو پێگیرێ سیاسه‌تا وێیه‌ و نكاریت بێ ڕه‌زامه‌ندیا ئه‌مریكا پێنگاڤێن ستراتیژى بچیته‌ پێش، هه‌روه‌سا حوكمه‌ت و سیاسه‌تا هه‌رێما كوردستانێ ب ڕێڤه‌به‌رى و سه‌ركردایه‌تیا پارتى دیمۆكراتى كوردستان، یێن شیاین ئه‌مریكا بگه‌هیننه‌ وێ باوه‌ریێ كو كوردستان دێ پێگه‌هه‌كێ گرنگ بیت د سیاسه‌ت و به‌رژه‌وه‌ندیێن رۆژئاڤا دا ئه‌گه‌ر پاڵپشتى لێ بهێته‌ كرن دێ باڵانسێن سیاسى ل ده‌ڤه‌رێ بۆ به‌رژه‌وه‌ندى یێن وڵاتێن دیمۆكراسیخواز هێنه‌ گوهارتن و دێ بنه‌ فاكته‌رێ ئارامیێ و سه‌رچاوه‌یه‌كێ ب هێزێ ئابوورى بۆ ئه‌ورۆپا و ئه‌مریكا و هه‌ڤپه‌یمانێن وان، هه‌ر ئه‌ڤ چه‌نده‌ ژى نه‌ك نها به‌لكى پتر ژ بیست ساڵانه‌ هاتیه‌ زانین و ئه‌مریكا گرنگیه‌كا مه‌زن یا ب هه‌رێما كوردستانێ داى ب سه‌ركردایه‌تیا “ماڵباتا بارزانى” ژبه‌ر كو ژبلى هه‌مى هزره‌كا حزبى و عاتفى، ماڵباتا بارزانى یێن شیاین بۆ وان بسه‌لمینن كو ب تنێ كه‌سایه‌تییه‌كن ژ هه‌مى لایه‌نه‌كێڤه‌ هه‌م كوردستانێ كۆم بكه‌ن و بپارێزن، هه‌م ژى د سیاسه‌تا سه‌رده‌م و گرنگیا ئاسایش و سه‌قامگیریا جیهانێ بگه‌هن، له‌وما ئه‌مریكا د ڤان ده‌ه ساڵێن ده‌رباز بۆیدا هه‌ڤپه‌یمانێن خوه‌ ل رۆژهه‌ڵاتا ناڤین ب تایبه‌ت توركیا و سعوودیا یێن تێگه‌هاندى كو كوردستانا باشۆر بنیاتێ ستراتیژیا وێ یا نوویه‌ و پێدڤیه‌ ب هه‌ر جۆره‌كێ بیت خوه‌ بگونجینن و بپه‌رژینن، هه‌لبه‌ت ده‌وڵه‌تا كوردستانا باشۆر دێ فاكته‌ره‌كێ گرنگ بیت بۆ په‌ره‌پێدانا دیمۆكراسیێ ل ده‌ڤه‌رێ و دێ سه‌رچاوه‌یه‌كێ ب هێزێ ئابوورى بیت، ژبه‌ر بن ده‌ستیا پارچه‌یێن دیكه‌ یێن كوردستانێ ل ژێر حوكمێ وڵاتێن مه‌ترسیدار و پۆلیسى دێ میكانزمێ رزگاربوونا وان پارچه‌یان بیت، كو د به‌رژه‌وه‌ندیا وڵاتێن رۆژئاڤا و رۆسیا دایه‌ ژى، له‌وما لێدوان و پێنگاڤێن ئه‌مریكا و هه‌ڤپه‌یمانێن وێ ل دژى كوردستانێ ته‌كتیكى و ده‌مكینه‌ و جهێ ترسێ نینن.

website security
WP Facebook Auto Publish Powered By : XYZScripts.com