ئێك ژ بوونه‌وه‌رێن هه‌ره دڕنده ل گه‌ل بوونه‌وه‌رێن دیتر كو ل سه‌ر زه‌ڤیێ دژین، دبیت مرۆڤ بن، ده‌مێ زانایێن زانستى كو ژ پێشكه‌فتى و هشیارترین ته‌خێن جڤاكانه ل سه‌ر ده‌رمانه‌كێ تێسته‌كێ دكه‌ن، ل ده‌سپێكێ گیانداران دكه‌نه ئارمانج، هه‌ر ل سه‌ر ڤێ ڕێره‌وێ ده‌مێ ب
گشتى كه‌سایه‌تى یێن ژیر و سیاسى ژى تێستێن سیاسى و سه‌ربازى و ئابوورى دكه‌ن بزاڤێ دكه‌ن خه‌لكێن نه‌فام و بێ ئاگه‌ه ل پێشیا خوه بهاژوون و تێستان ل سه‌ر بكه‌ن و ل قوربانیدانێ خوه بده‌نه لایه‌كێ و ل ده‌ستكه‌فتان ژى سینگێ خوه ب ئیننه پێش. “شاسوار عه‌بدولواحید” ئێك ژ كه‌سایه‌تى یێن نه‌فام بوو د سیاسه‌تێدا كو كه‌فته داڤێن بزاڤا گۆڕان و كۆمه‌ڵا ئیسلامى، ئه‌ڤ حزبێن سیاسى یێن كوردستانێ خوه‌دى سیاسه‌ته‌كا شێلى و ناڕوونن ب مه‌به‌ستا خاپاندنا خه‌لكێن جڤاكى، د هه‌مى واره‌كی دا نیڤه‌كا دارى دگرن و چاڤه‌رێى باڵانسێ دكه‌ن و بۆ هه‌ر لایه‌كێ هێز چوو خوه دده‌نه وى لایی، ل هه‌مى ده‌ستكه‌فتێن حوكمه‌تێ خوه ب خوه‌دى دزانن و ل هه‌مى كێماسییان پارتى پێ به‌رپرس دكه‌ن!، هه‌م پشكدارێن رێڤه‌برنێ و به‌رپرسیاریه‌تێدا ل حوكمه‌تێ و هه‌م ئوپوزسیۆنه‌كا دژوارن تا ڕاده‌یه‌كێ كو به‌رده‌وام بزاڤا هه‌لوه‌شاندنا حوكمه‌تێ و به‌رنامه‌یێن وێ دكه‌ن!، ئه‌ڤ جۆره ئیزدواجییه‌ته د سیاسه‌تێ دا به‌لگه‌یێن نیازخرابیێن ڤان حزبانه. پشتى كو سه‌رۆك بارزانى ل گه‌ل لایه‌ن و حزبێن سیاسى ل 7ێ حوزه‌یرانێ كۆم بووى و 25ێ ئیلۆنێ دیاركرى بۆ ئه‌نجامدانا ریفراندۆمێ بۆ سه‌ربه‌خوه‌بوونا كوردستانێ، ئێدى ئه‌و كارتا بزاڤا گۆڕان و كومه‌ڵ یا ئیسلامى سۆتاند كو دگۆت بارزانى موزایه‌ده‌یان دكه‌ت و بابه‌تێ ڕیفراندۆم چ بنگه‌هه‌ك ژ بۆ نینن ل جه‌م بارزانى، ئه‌ڤجا ڤان هه‌ردو حزبان ده‌ست ب چێكرنا كارتێن دیتر یێن خاپینۆك كرنه‌ڤه، ل ده‌سپێكێ دگۆت ده‌وڵه‌تا بارزانى به‌حس دكه‌ت بۆ توركیایه!، پشتى كو توركیا دژایه‌تیا خوه بۆ ریفراندۆمێ ڕاگه‌هاندى ئه‌و كارت ژى سۆت، پاشان گۆڕان و كۆمه‌لا ئیسلامى تا وى ڕاده‌ى كو دشیانێن واندا بن بزاڤ كرن ڤێ پڕۆسێسێ تێكبده‌ن و سه‌رنه‌گریت، ده‌مێ وان دیتى كو یه‌كێتى نیشتیمانى كوردستان ب گشتى و ئێكگرتوویا ئیسلامى ژى پشتگیریه‌كا ڕژد ژ ریفراندۆمێ دكه‌ن، ئێدى وان نیڤا دارى گرت و دگۆت ئه‌م سه‌ربخوه بوونێ مینا مافه‌كێ ڕه‌وایێ گه‌لێ كورد دبینین لێ ده‌م نه‌هاتیه، بیێ كو دیار بكه‌ن چ ده‌مه‌كێ باشه؟!، چ زه‌مانه‌ته‌كێ باشتر ل واقعێ نوكه ئه‌م تێدا دێ هه‌بیت؟، بۆ هندێ كو مینا دو حزبێن سیاسى ب فه‌رمى ل دژى سه‌ربخوه‌بوونێ نه‌ڕاوه‌ستن و نه‌بێژن ئه‌م ل گه‌ل ده‌نگێ (نه‌خێر)ین، ئه‌وان شاسوار عه‌بدولواحید خودانێ ده‌زگه‌هێNRT دا پێشیا خوه‌و به‌ره‌یێ (نه‌خێر) چێكر ناڕِاسته‌وخوه، داكو هه‌م بزاڤا ژناڤبرنا پڕۆسیسا ریفراندۆمێ بكه‌ن و هه‌م ژى بێژن ئه‌م ل گه‌ل ده‌نگێ (نه‌خێر)دا نینین. پشتى كو وان دیتى ئێدى نه‌شێن شكه‌ستێ ب بارزانى ب ئینن و پڕۆسسا ریفراندۆمێ دێ هه‌ر بڕێڤه‌چیت، ئه‌وان دڤیا دووباره بهێنه سه‌ر سفرا به‌رهه‌ڤكرى و خوه ژى بكه‌نه خوه‌دى ئه‌ڤ ده‌ستكه‌فتا ب شه‌ره‌ف، لێ كۆمبوونا 14 ڤێ مه‌هێ ل سه‌حێلان كو د ناڤبه‌را “برێت مه‌كگۆرك” و نوونه‌رێ UN و نوونه‌رێ به‌ریتانیا ل گه‌ل سه‌رۆك بارزانى هاتیه‌كرن و د ئه‌نجام دا سه‌رۆكاتیا هه‌رێمى ڕاگه‌هاند كو ل سه‌ر ئه‌لته‌رناتیڤێ هه‌ڤپه‌یمانان دێ جڤیێن و ئه‌نجامێ وێ به‌رسڤ ده‌نه‌ڤه، دیسا گۆڕان و كۆمه‌ڵ په‌شێمان بوونه‌ڤه و ڤه‌گه‌ڕییانه‌ڤ پاش!، د هزرا گۆڕان و كومه‌ڵێ دا ئێدى دێ بارزانى په‌شێمان بیته‌ڤه و ریفراندۆم ناهێته‌كرن و ئه‌و ژى دێ خوه كه‌نه قه‌هره‌مان و بێژنه خه‌لكێ كوردستانێ مه زۆر زوى هوون ئاگه‌هدار كرن كو بارزانى ریفراندۆمێ ناكه‌ت و ئه‌ڤه‌ژى به‌رهه‌م، ئه‌ڤه بوو بزاڤا گۆڕان و كومه‌ڵا ئیسلامى هه‌رپشتى وێ ڕاگه‌هاندنا سه‌رۆكایه‌تیا هه‌رێمى پاشگه‌زیا خوه بۆ پشكدارى كرنێ د په‌رله‌مانى كوردستانێدا ڕاگه‌هاند!، پشتى وێ چه‌ندێ ژى سه‌رۆك بارزانى ل كۆمبوونا جه‌ماوه‌ری یا ئامێدیێ دیار كر كو ب چ ئاوایه‌كێ ئه‌لته‌رناتیڤێ پێدڤی نه‌گه‌هشتینه ده‌ستێ وان و هیچ كه‌سه‌ك و وه‌ڵات و لایه‌نه‌ك نه‌شێت رێگیریێ ل ڤێ خواستا ڕه‌وایا گه‌لێ كورد بكه‌ت. ل ڤێره بوو كو بزاڤا گۆڕان و كومه‌ڵ یا ئیسلامێ مینا دیڤه‌لانكا سه‌رنه‌كه‌فتن كو مینا هه‌ر جار ل ده‌ستكه‌فتان بهێنه سه‌ر سفره‌یا به‌رهه‌ڤكرى!.
نووترين نووچه
- نێچیرڤان بارزانی: پشتەڤانیێ ل سەرەدانا سۆدانی بۆ ئەمریكا دكەین
- هەبوون و پاراستنا قەوارەیێ سیاسییێ هەرێما كوردستانێ یێ گرێدایە ب سیاسەتا دەرڤە یا ئەمریكا ڤە
- مە داخواز ژ كۆنگرێسێ كریە فشارێ ل بەغدا بكەت بۆ دەستپێكرنا هنارتنا پەترۆلا هەرێمێ
- هەكە پارێزگار كورد نەبیت مەترسی ل سەر كەركووكێ یا هەی
- ئەردۆغان یێ نەچارە هندەک گوهۆڕینێن مەزن بکەت
- سەرۆك بارزانی: هێشتا دەنگ و رەنگێ شۆڤینی بۆ دژایەتیكرنا كوردان د ناڤ دەولەتا ئیراقێدا دهێتە دیتن
- نێچیرڤان بارزانی: دخوازین حوكمەتا ئیراقێ ئەركێ خوە بەرامبەر قوربانیێن ئەنفالێ بجهبینیت
- مەسرور بارزانی: ئەنفال تاوانەكا كێم وێنەیە و ناهێتە ژبیركرن
- بسپۆرەكێ قانوونا نێڤدەولەتی: ئیراقێ ب بەرنامەیەكێ دارێشتی هەوا ئەنفالێ بجهئینا
- پەیڤدارێ سەرۆكاتییا هەرێمێ: پرسا مووچەی پێنگاڤەكا گرنگ چوویە پێش
كامی كمال
ئه‌رێ ده‌نگێ “نه‌خێر” نه‌پاكیه؟
هه‌ر چاوا هه‌ر كه‌سه‌ك وێ ڕاستیێ دزانیت كو ڕیفراندۆم پرۆسه‌كا دیمۆكراسیه، ب وى ئاوایی پێدڤیه هه‌ر كه‌سه‌ك بزانیت كو مه‌به‌ست ژ ئه‌نجامدانا ڕیفراندۆمێ چیه، گه‌لۆ سه‌ركردایه‌تیا كوردستانێ گومان ل وێ چه‌ندێ هه‌بوون كو سه‌ربه‌خوه‌بوون یا باشه بۆ گه‌لێ كوردستانێ له‌وما داخواز دكه‌ن ل خه‌لكى بپرسن؟!، بۆچى دوژمن ل دژى ڕیفراندۆمێ گه‌فان دكه‌ن؟!، ئه‌ڤه ئه‌و پرسیارێن ساده‌نه كو پێدڤیه مرۆڤ هزر تێدا بكه‌ت به‌رى كو ل سه‌ر ڕیفراندۆمێ بپه‌یڤیت.
گه‌لێ كوردستان ب هه‌مى پێكهاته‌و لایه‌ن و نه‌ته‌وه‌و ئایین په‌رست و حزبێن خوه‌ڤه، ب ئه‌و كوردێن شوڕش كرى، ئه‌و كوردێن ل ده‌رڤه‌یی شۆره‌شێ مایه‌ڤه و قوربانیێن خوینێ نه‌داى، ب ئه‌و كوردێن بۆیه هه‌ڤچه‌په‌رێن دوژمن و داگیركه‌ران ژى، هه‌میان پێكڤه قوربانى یێن داین ل ژێر سیبه‌رو ده‌سه‌ڵاتا به‌غدایێ دا، لێ هه‌ر ئێكێ ب ئاوایه‌كى، د عیراقێ دا نه‌ك ب تنێ خه‌لكێ هه‌رێما كوردستانێ، به‌لكى هه‌مى عه‌ره‌بێن عیراقێ ژى قوربانی یێن ده‌وڵه‌ته‌كێنه كو كه‌لتۆر و نه‌ته‌وه‌و بیروباوه‌رێن وان یێن ئایینى و سیاسى لێكجودانه، هه‌تا كو ژیان مابیت عه‌ره‌بێن سوننه قوربانى یێن حوكمه‌ته‌كێنه ل به‌غدا كو عه‌ره‌بێن شیعه ب ڕێڤه‌دبه‌ن و به‌روڤاژى، لێ یا گرنگ ئه‌وه ئه‌م مینا كورد خوه ب باشى بنیاسین و چاره‌نڤیسێ خوه دیار بكه‌ین، ب تایبه‌ت د نها دا كو ده‌لیڤه‌یه‌كا دیرۆكى بۆ گه‌لێ كوردستانێ یا هاتیه پێش.
د ناڤ ده‌زگه‌هێن راگه‌هاندنێ دا گه‌له‌ك جاران هنده‌ك به‌رپرسێن لایه‌نێن سیاسى یێن كوردستانێ بزاڤێ دكه‌ن خه‌لكه‌كێ هان بده‌ن داكو ده‌نگێ خوه بده‌نه “نه‌خێر”، بۆ ڤێ چه‌ندێ وێنه‌یه‌كێ دیمۆكراسیه‌ته‌كا خاپینۆك ژ ڕوومه‌تێ خوه‌ڕا دیار دكه‌ن و دبێژن، ده‌نگێ “نه‌خێر” ئاساییه و دشێن هه‌لبژێرن، لایه‌نێن سیاسى دشێن بێ ده‌نگیێ هه‌لبژێرن داكو شاشى یێن یاسایی نه‌كه‌ن، لێ نابیت خه‌لكى هان بده‌ن كو ده‌نگى بده‌نه “نه‌خێر”.
ئه‌و كه‌سێن ساده‌و تێنه‌گه‌هشتى كو ده‌نگێ خوه دده‌نه (نه‌خێر) ب ناپاك (خائین) پێناسه ناكه‌م، لێ ب پشتڕاستى دبێژم ئه‌و لایه‌نێن سیاسى یێن كوردستانێ كو ل سه‌ر ئاخا كوردستانێ دژین و خوه‌دى سه‌رمایه و حزبێن نیشتیمانینه ل كوردستانێ، بزاڤێ دكه‌ن خه‌لكه‌كێ هان بده‌ن داكو خه‌لك ده‌نگى ب “نه‌خێر” بده‌ن، ده‌سپێكێ مه‌زنترین ناپاكن دگه‌ل خه‌لكێ خوه، پاشان دیرۆك و نهاو پاشه‌ڕۆژا ڤى وه‌ڵاتى و خوینا هزاران شه‌هید و قوربانی یێن كوردستانێ، حزب و سه‌ركرده یێن هه‌ین هزاران لاوێن ڤى وه‌لاتى ل ژێر درووشمێن سه‌ربخوه بوون بۆ كوردستانێ یێن كرینه قوربانى، ئه‌ڤرۆ خه‌لكى هان دده‌ن كو ل سه‌ر سندۆقا ده‌نگدانێ ده‌نگى ل دژى سه‌ربخوه‌بوونێ بده‌ن!!.
به‌لێ گومان تێدا نینه پرۆسا ڕیفراندۆمێ پرۆسه‌كا دیمۆكراسیه و ده‌نگدان ب “نه‌خێر” بۆ عیراقچیه‌تیێ، باشترین دیمۆكراسیه‌ته، نه‌ك بتنێ ناپاكى نینه!، به‌لكى وه‌فا و دلسۆزیه ژى، لێ بۆ گه‌لێ كورد كه‌س نه‌شێت بێژیت دژایه‌تیكرنا ده‌وڵه‌تا كوردستانێ پاكیه!، ئه‌ڤجا ب تڤه‌نگێ بیت ئان ده‌نگێ نه‌خێر چ جوداهى نینه!، ئه‌و فیشه‌كا هنده‌ك كوردان پێشمه‌رگه پێ شه‌هید دكرن، بۆ هندێ بوویه كو بزاڤا ڕزگاریخوازا كوردان بهێته ڤه‌مراندن و نه‌مینیت داكو كورد دپاشه‌ڕوژێدا نه‌گه‌هنه قووناغه‌كێ كو داخوازا سه‌ربخوه‌یبوونێ بكه‌ن، هه‌مى دژایه‌تى و پلانێن دوژمنان ژناڤچوون و شكه‌ستن، كورد گه‌هشتنه قووناغا داویێ كو ڕاگه‌هاندنا ده‌وڵه‌تا كوردستانێ یه، ئه‌ڤجا خه‌لكه‌ك ل كوردستانێ ده‌نگى بده‌نه (نه‌خێر) بۆ ده‌وڵه‌تا كوردستانى چ پێناسه‌یه‌ك ژ هه‌ژى وى كوردی هه‌یه؟!.
سه‌ركردایه‌تیا كوردستانێ گومان ل كوردستانیان نینه كو ژ هه‌ژى ده‌وڵه‌ته‌كا سه‌ربخوه‌نه، لێ ریفرامدۆم ژ پێخه‌مه‌ت پتر شه‌رعیه‌ت دانه ب بڕیارا سه‌رخوه‌یی بوونێ، هه‌ر چاوا هه‌مى جیهانێ دزانى كو “سه‌دام حوسێن” كه‌سه‌كێ تاوانبار بوو و ژهه‌ژى مه‌زنترین سزا بوو، لێ داكو بڕیارا سزادانا وى شه‌رعى ببیت، دادگه‌هكرن گه‌ره‌گ بوو، ب ڤى ئاوایی داخوازا كوردان ژبۆ وه‌لاتێن جیهانێ یا ڕۆن نینه كو ب ڕاستى كوردان سه‌ربخوه‌یی دڤێت ئان نه!، هه‌تا نهاژى گه‌له‌ك دوژمنێن كوردان ل وه‌ڵاتێن جیهانێ دبێژن (كوردان سه‌ربخوه بوون نه‌ڤێت بتنێ “مه‌سعود بارزانى”یه ڤان پرسگرێكان بۆ عیراقێ چێدكه‌ت، خه‌لكێ كوردستانێ هه‌مى هه‌ڤسۆز و دڵسوزێن عیراقێ و حوكمه‌تا به‌غدانه!)، ئه‌ڤرۆ سه‌ركردایه‌تیا كوردان دخوازن ده‌ڤێ دوژمنى بگرن و گه‌ل بڕیارا خوه بده‌ت، هه‌كه ڕیفراندۆما كوردستانێ یا خراب بایه‌و دژى دوزا كوردان بایه، چ لایه‌نه‌كێ مینا مالكى و وه‌لاتێن داگیركه‌ر پشتگیریا ریفراندۆمێ نه‌دكر داكو ئه‌و خرابى جهێ خوه بگریت.
توركیا دێ سنۆران گریت؟!
ئێك ژ ئه‌و خالێن كو د نوكه دا یا بۆیه جهێ ته‌نگه‌زارى و ترسیانا خه‌لكێ كوردستانێ ل سه‌ر ئه‌نجامدانا ڕیفراندۆمێ و نزیكبوونا ڕاگه‌هاندنا سه‌ربخوه‌بوونێ، گرتنا ده‌روازه‌یێن سنۆرییه ژلایێ وه‌لاتێن هه‌ڤسنۆرڤه ب تایبه‌تى ل گه‌ل توركیایێ كو د نوكه دا نه‌فتا كوردستانێ د رێیا به‌نده‌را جه‌یهاندا دهێته فرۆتن.
گۆره‌پانا سیاسى هه‌مى ده‌مه‌كێ مینا ته‌ختێ یارییا شه‌تره‌نجێیه، ده‌مێ دو یاریزان ل گه‌ل هه‌ڤدو یارییا شه‌تره‌نجێ دكه‌ن، ئه‌گه‌ر چه‌ند ژى هه‌ڤال و نێزیكێ هه‌ڤدو بن، د له‌یزینا یاریێ دا ئه‌و په‌یوه‌ندیا كاریگه‌ریێ ل سه‌ر بزاڤێن سه‌ركه‌فتنێ ناكه‌ن، واته یاریكه‌ر هه‌رده‌مێ شیا دێ كشوماتێ ده‌ته به‌رامبه‌ر خوه، ب ڤى ئاوایی د گۆره‌پانا سیاسی دا ژى تشته‌ك ب ناڤێ سۆز و هه‌ڤالینى و دووژمنكاریا بێ بناغه نینه، واته به‌رژه‌وه‌ندى ل به‌رامبه‌ر به‌رژه‌وه‌ندینه، هه‌ر وڵاته‌ك ل گۆڕ به‌رژه‌وه‌ندیێن خوه د گۆره‌پانا سیاسی دا دله‌یزیت و ئه‌گه‌ر شه‌ڕ د به‌رژه‌وه‌ندیێن وڵاته‌كێدا بیت درێغیێ لێ ناكه‌ت و به‌روڤاژى. ئه‌و وڵاتێن كو سه‌رۆك و رێبه‌رێن وان د تێگه‌ه و چه‌مكێ سیاسیدا دلاواز و نه‌زان بن زووتر ڕاستى زیانێ و دوڕاندنێ دبن هه‌روه‌كى مینا “سه‌دام حوسێن” كو ل نه‌زانینێ كه‌فته داڤێن وڵاتێن زلهێز و ب داگیركرنا وڵاتێ كوێتێ خوه ڕاستى دوڕاندنه‌كا مه‌زن كر. ل ڤێره ئه‌م به‌حسێ واقعێ نهایێ كوردستانێ و وڵاتێ توركیایێ بكه‌ین، گه‌لۆ توركیا ولاته‌كه كو هه‌رزه‌كارێن سیاسى و نه‌زان ب ڕێڤه دبه‌ن؟!، بێگۆمان نه‌خێر، ئه‌گه‌ر ئه‌م وه‌سا تێبگه‌هین كو توركیا مینا سۆزدارى و مرۆڤایه‌تى دژایه‌تییا باشۆر ناكه‌ت!، ئه‌ڤه ئه‌م د گۆپیتكا تێنه‌گه‌هشتنا سیاسى داینه، هه‌رچاوا به‌رى زێده‌تر ژ حه‌فت سه‌ده‌یان ئیمپراتۆریه‌تا عوسمان د لاوازیێ دا ب هه‌ڤكاری و پاڵپشتییا ده‌وڵه‌تا سه‌لجۆقى هێدى هێدى ب هێز كه‌فت و هه‌تا گه‌هشته ڕاده‌یه‌كێ نێزیكى شه‌ش سه‌د ساڵان به‌رده‌وام بوون ل داگیركرنا وڵات و نیشتیمانێن نه‌ته‌وه و خه‌لكێن دیكه، ب وى ئاوایی نهاژى توركیا بشێت، نه‌ك بتنێ وڵاتێن ئه‌ورۆپى و رۆژهه‌ڵاتا ناڤین به‌لكى هه‌مى جیهانێ دێ داگیركه‌ن، نه‌ك ب تنێ توركیا ئه‌ڤ حه‌سوودییه یا هه‌ى ژبۆ داگیركارییا ئاخ و وڵاتێن دیكه، به‌لكى هه‌مى وه‌ڵاتێن جیهانێ ل دووڤ ب ده‌ستڤه‌ئینانا هێزێ دگه‌ڕن و درێغیێ ل چ پێنگاڤه‌كێ ناكه‌ن ئه‌گه‌ر ده‌لیڤه‌یێن باش ل به‌راهیا خوه دیتن.
د شه‌ڕێ ئازادیا عیراقێ دا ل ساڵا 2003یێ، توركیا ل دژى كوردێن باشۆر سیاسه‌تا چاڤسۆركرنێ و ترساندنێ و گه‌فان بكاردئینا داكو ڤێ هه‌رێمێ ل هه‌مى پێشكه‌فتنێن وێ ڕابگریت و ده‌ستكه‌فتێن وێ ژناڤببه‌ت، ئه‌ڤ سیاسه‌تا توركیا بۆ ده‌مێ چه‌ند ساڵه‌كا یا به‌رده‌وام بوو، لێ كوردێن باشۆر د ڤان ده‌هه‌یێن داویێ دا شانسه‌كێ باشێ هه‌بووى كو رێزدار “مه‌سعود بارزانى” سه‌رۆكایه‌تیا ڤێ هه‌رێمێ دكه‌ت، بارزانى دوێ ڕاستیێ دگه‌هشت كو ئه‌گه‌ر توركیا هێرشێ بكه‌ته سه‌ر كوردستانێ و شه‌ڕ د ناڤبه‌را كوردێن باشۆر و توركیا دا ڕوو بده‌ت، دێ هه‌مى به‌رنامه و ستراتیژیه‌تا ئه‌مریكا و ئه‌ورۆپا كه‌ڤنه د مه‌ترسیێ دا و ژناڤچن و توركیا ژى دێ ڕاستى دربێن مه‌زن بیت، بارزانى سیاسه‌تا (ماده‌م دخوازى من ژناڤ ببه‌ى، ئه‌زژى وه‌ناكه‌م تو ئارام ببى) بكارئینا، پشتى كو توركیا تێگه‌هشتى هه‌رێما كوردستانێ ژلایێ وڵاتێن زلهێزڤه یا گرنگه و ده‌ست درێژكرن ژبۆ هه‌رێمێ موجازه‌فه‌یه‌كا مه‌زنه كو ب ئێك پارچه‌یی و ئه‌وله‌هیا خوه دكه‌ت، ناچار بوو مینا دیفاكتۆ هه‌رێما كوردستانێ بپه‌رژینیت. ب ئاوایه‌كێ ڕیشه‌یی توركیا گوهارتنێن سیاسى كرن و رۆژ ب رۆژ په‌یوه‌ندیێن توركیا و هه‌رێمێ باشتر لێ هاتن، تا گه‌هشته وێ چه‌ندێ ب مه‌به‌ستا ڤه‌كرنا فرۆكه‌خانه‌یا نیڤده‌وڵه‌تى یا هه‌ولێرێ ل 29/3/2011ێ “ره‌جه‌ب ته‌یب ئه‌ردۆگان” هاته بن ئالایێ كوردستانێ، ئه‌ڤ چه‌نده وه‌چه‌رخانه‌كا دیرۆكى بوو هیمایه‌كێ باشبوو، حوكمه‌تا هه‌رێما كوردستانێ ژى ب تایبه‌تی ب شاره‌زایی و بسپۆریا “نێچێرڤان بارزانى” ب سیاسه‌ته‌كا مه‌نتقى و لۆژیكى گومانێن نیگه‌تیڤ یێن توركیایێ ژناڤبرن، تا گه‌هشته ڕاده‌یه‌كێ توركیا بوو هه‌ڤكاره‌كێ سه‌ره‌كى یێ حوكمه‌تا هه‌رێما كوردستانێ كو ژێرخانه‌كا ئابوورى بۆ ده‌وڵه‌تا ئاینده‌یا كوردستانێ چێ بكه‌ن، توركیا وه‌ڵاته‌كێ هندێ بچووك نینه كو نه‌زانیت گرێبه‌ستێن زه‌به‌لاحێن ئابوورى یێن پێنجى ساڵى ل گه‌ل هه‌رێما كوردستانێ دێ بناغه‌یا ده‌وڵه‌ته‌كا نوو یا كوردى ئاڤا كه‌ت، توركیایێ هه‌ر ل وى سه‌رده‌مى هه‌م ل ژێر فشارێن نیڤده‌وڵه‌تى و خوه گونجاندن ل گه‌ل گوهارتنێن ده‌ڤه‌رێ، هه‌م تێگه‌هشتن ل وێ ڕاستیێ كو ده‌وڵه‌ته‌كا كوردستانى یا دیمۆكراسى و ئاشتیخواز هه‌ڤسنۆرێ وێ بیت باشتره ژ ده‌وڵه‌ته‌كا عیراقى یا شیعى یا دیكتاتۆرخواز.
په‌رله‌مانى بكه‌نه گۆڕستانا شه‌هیدان
هه‌ر چاوا پێدڤیێن سه‌ره‌كى یێن ژیانێ، هه‌لكێشانا ئۆكسجینێ و پاشى خوارن و ڤه‌خوارنن و ل دووڤدا مرۆڤ بزاڤێ دكه‌ن لایه‌نێ ئه‌وله‌هى گه‌ره‌نتى بكه‌ن…هتد، وه‌سا یا پێدڤیه كو خه‌لكێ كوردستانێ ل پێشیا هه‌ر بابه‌ته‌كێ مژارا سه‌ربخوه‌بوونێ ب گرنگ وه‌ربگرن و ئه‌و ڕێیا ب خوینا سه‌دان هزار شه‌هید و ئه‌نفالان هاتیه دیاركرن ژ پێخه‌مه‌ت ئازادیا گه‌لێ كوردستانێ بگه‌هیننه ئارمانج، تاوانه ملله‌تێ كورد ب شاشیه‌كێ سه‌رێ وێ رێیێ وندا بكه‌ت، گه‌لێ كوردستانێ ژ بۆ ب ده‌ستڤه‌ئینانا ژیانه‌كا ئازاد و ب ڕوومه‌ت، چ جۆره قوربانیه‌ك نه‌مانه كو نه‌دابن، هه‌تاكو سه‌رهه‌دانا ساڵا 1991 خه‌لكێ كوردستانێ پارێزگارى ژ ناسنامه و هه‌بوونا خوه دكر و ب هیمه‌ت و قوربانیدانا شۆڕشگێر و خوینا شه‌هیدێن كوردستانێ و خوه‌ڕاگریا گه‌لێ كورد سه‌ركه‌فتن ئینا، پشتى سه‌رهه‌لدانێ گه‌لێ كوردستانێ كه‌فته د قووناغه‌كا نوو دا، ئه‌و ژى قووناغا سه‌لماندنێ بوو، قووناغه‌كا كێم قوربانی دانتر، لێ هه‌ستیارتر ژ قووناغا شۆڕشێ. د ڤێ قووناغا پشتى سه‌رهه‌لدانێ دا، دبیت هه‌ر تاكه‌كێ ب گشتى ل گۆڕ به‌رژه‌وه‌ندى و پێدڤى و ژیانا خوه‌یا تایبه‌ت شێوازێ حوكمڕانیا كوردستانێ هه‌لسه‌نگان دبیت، لێ د ڕاستی دا ئه‌ڤ قووناغه هه‌ستیارترین و پڕ به‌رپرسیارترین قووناغا كوردستانێ بوو، دبیت هه‌بوونا گه‌نده‌لیێ و نه‌دادپه‌روه‌ریێ گه‌له‌ك جاران سنۆرێن خوه ده‌ربازكربن، لێ ب گشتى هه‌كه ده‌سهه‌ڵاتێ شه‌ڕه‌كێ دژوار ل گه‌ل گه‌نده‌لیێ كربا، دا دۆخێ كوردستانێ ل ژێر كاریگه‌ریا گه‌له‌ك كه‌سایه‌تى و مرۆڤێن هۆزى و خوه‌دى خه‌لك كه‌ڤیته د مه‌ترسیێ دا، ئه‌ڤ ڕاستیه هه‌كه چ یا ته‌عله لێ پتریا شۆڕشێن كوردان ژ به‌ر نه‌پاكیا هنده‌ك ده‌ره‌به‌گ و خه‌لكێن خوه‌دى جه‌ماوه‌ر شكه‌ستن دئینا و بێ ئه‌نجام ڤه‌دمریان، جوداهیا شۆڕشا بارزان ل گه‌ل شۆڕه‌شێن به‌رتر ئه‌ڤه‌یه، د شۆڕه‌شێن به‌رێ دا دوژمنێن كوردان هنده‌ك سه‌رۆك هۆز دكڕین و خه‌لكه‌ك ژى (كو دڤه‌مایى بوون و به‌رژه‌وه‌ندیا وه‌لاتى نه‌دزانین)، مینا پاداشت ل گه‌ل سه‌رۆكى هۆزى دبوونه ڕه‌شه‌كێن دوژمن و داگیركه‌ران!، لێ شۆڕه‌شا بارزانى نه‌هێلا ئه‌و خال ببیته ئه‌گه‌رێ ل ده‌ستدانا به‌رهه‌مێ شۆڕشێ و هه‌ر زوى ل شوونا كو دوژمن هنده‌ك سه‌رۆك هۆزان بكڕن، وان بخوه سه‌رۆك هۆز كڕین!، ئه‌ڤ چه‌نده‌ژى بۆ ڕاگرتن و پاراستنا ده‌ستكه‌فتێن كوردستانێ بوو، هه‌كه نه ئه‌م هه‌مى دزانین هنده‌ك سه‌رۆك هۆز كو بوونه خوه‌دى پله‌و بودجه و پاره ئێكه‌م جار دوژمنێن سه‌رسه‌ختێن بارزانى بوون، پاشى دوژمنێن شۆره‌شێ بوون، ئه‌ڤ چه‌ندا مه به‌حس كرى ئه‌گه‌رێ سه‌ره‌كى یێ هه‌بوونا گه‌نده‌لیێ و نه‌دادپه‌روه‌ریێ بوو. بێ گۆمان نه‌بوونا ده‌وڵه‌تێ فاكته‌ره كو به‌رده‌وام وه‌لاتێن داگیركه‌ر ده‌ست د كارۆبارێن وه‌لاتى وه‌ردده‌ن، و لاوازیا تێگه‌هشتن و ره‌وشه‌نبیرییه‌تا جڤاكى ئه‌گه‌رێن سه‌ره‌كى یێن هه‌بوونا گه‌نده‌لیێ و نادادپه‌روه‌ریێ نه، چ گۆمان تێدا نینه پشتى سه‌ركه‌فتن و ب ئه‌نجام گه‌هشتنا پڕۆسا سه‌ربخوه‌بوونا كوردستانێ، ئه‌ركێ ده‌سه‌لاتێ ژ لایه‌نێ به‌رنگاریا گه‌نده‌ڵیێ ڤه دێ سڤكتر بیت و رێژه‌یا گه‌نده‌لیێ دێ زۆر كێمتر لێ هێت، واته دشێین بێژین نه‌بوونا ده‌وڵه‌تا سه‌ربخوه مه‌زنترین فاكته‌رێ هه‌بوونا گه‌نده‌لیێ و نادادپه‌روه‌ریێ یه، چێبوونا ده‌وڵه‌تێ ژى باشترین فاكته‌رێ نه‌هێلانا گه‌نده‌لیێ و نادادپه‌روه‌ریێ یه، له‌وما گۆمان تێدا نینه كو پتریا ئه‌و كه‌سایه‌تى و لایه‌نێن سیاسى كو ل دژى سه‌ربخوه بوونێ ڕادوه‌ستن، ژ ترسا چاكسازیێ و نه‌هێلانا به‌ره‌لایی و گه‌نده‌لیێ یه.
ب به‌هانه‌كرنا ئه‌كتیڤی یا په‌رله‌مانى و هه‌بوونا گه‌نده‌لیێ و ترساندنا خه‌لكێ كوردستانێ ژ قه‌یران و سنۆرگرتنا وڵاتێن جیران، ژ لایێ بزاڤا گۆڕان و هه‌ڤپه‌یمانێن وێڤه، د جه‌وهه‌ر دا ب تنێ دژایه‌تیكرنا سه‌ربخوه‌بوونا كوردستانێ یه، هه‌كه نه یا دیاره خه‌لكى سه‌دان هزار شه‌هید و ئه‌نفال نه‌دانه بۆ په‌رله‌مانه‌كێ بێ ده‌وله‌ت، هه‌روه‌سا دوژمنى ژى ژترسا ڕوونشتنا “یووسف محه‌مه‌د” ل سه‌ر كورسیا په‌رله‌مانى ئه‌ڤ وه‌لاته وێران نه‌كریه، به‌لكى ژ ترسا ل ده‌ستدانا وێ ئاخا كوردستانێ بوویه كو سه‌دان سالن سامانێ وێ دخۆن و نه‌ته‌وه‌یا كورد مینا كوێله بكاردئینن، واته ده‌وڵه‌ت بۆ ژیانێ ب هه‌مى جۆرێن خوه یێن پوزه‌تیڤ ڤه و په‌رله‌مان ب تنێ میكانزمه‌كه بۆ ده‌رخستنا قانوونان، هه‌كه ژبه‌ر په‌رله‌مانى پرۆسسا ده‌وڵه‌تێ كه‌فته د مه‌ترسیێدا نه‌ك ب تنێ بلا قفل بكه‌ن، به‌لكى گه‌ر پێدڤى بوو ده‌شت ژى بكه‌ن و بكه‌نه گۆڕستانا شه‌هیدان، ئه‌لته‌رناتیڤێ ده‌وڵه‌تێ كوێلایه‌تی یه، لێ په‌رله‌مانى گه‌له‌ك ئه‌لته‌رناتیڤ یێن هه‌ین كو قانوونان ده‌ربێخن، هه‌روه‌سا ئه‌گه‌ر وه‌لاتێن جیران بشێن سنۆران ل سه‌رمه بگرن، نوكه ب ساناهیتر دشێن ڤى كارى ئه‌نجام بده‌ن، لێ ده‌مه‌كه كوردستان یا د وێ قووناغێ دا ده‌رباز بووى.
به‌ختێ پارتى!
ئێك ژ خه‌سله‌تێن نێگه‌تیڤ یێن جڤاكێن ڤه‌مایی ئه‌وه كو بۆ هه‌ر كاودانه‌كێ، بۆ هه‌ر كه‌سه‌كێ، بۆ هه‌ر حزب و لایه‌نه‌كێ، بۆ هه‌ر كریاره‌كێ، هه‌لسه‌نگاندنه‌كا ساخله‌م ناهێته‌كرن، دۆست و دوژمن ب دروستى و هووربنیى ژێك ناهێنه ڤاڤارتن، مه‌به‌ستێن كریارێ ب درستی ناگه‌هیته ناڤ بیردانكا مێشكێ تاكیدا ب گشتى، ئه‌ڤه ژى زیانه‌كا مه‌زن دگه‌هینیته خزمه‌تكارێ ڕاسته‌قینه، واته كه‌سه‌كێ ب كریار و قوربانیدان ده‌هان ساڵان خزمه‌ت كربیت، دبیته قوربانێ كه‌سه‌كێ كو بێ خزمه‌ت و قوربانیدان، ب هه‌لگرتنا هنده‌ك درووشم و ئاخفتنێن ب ته‌یسووك ڤه و خاپینۆك دهێته سه‌ر سفره‌یا به‌رهه‌ڤ.
ژبلى ئه‌و كه‌سێن هاتینه خاپاندن و خوه‌دى دیتنه‌كا كورت و به‌رته‌نگ، چ كه‌سه‌ك نه‌شێت خه‌بات و شۆڕش و قوربانیدانێن پارتى دیمۆكراتى كوردستان بۆ دۆزا كوردى ب كێم ببینیت، پڕانیا سه‌ركرده‌یێن حزبێن دیتر ژى د ناڤ قوتابخانه‌یا بارزانیێ نه‌مردا ده‌ست ب خه‌باتێ بۆ كوردایه‌تیێ كرییه، ئه‌ڤ ڕاستیه ناهێنه ئینكاركرن كو ده‌ستپێشخه‌رێ شۆڕشێن گه‌لان خوه‌دى مه‌زنترین ئیمتیازێن دیرۆكێ نه، ئه‌ڤجا ب تایبه‌ت د واقعه‌كی دژوارێ مینا ئه‌و سه‌رده‌مێ ماڵباتا بارزانى تێ دا ده‌ستپێشخه‌ریا شۆڕشێ و خه‌باتێ كرى، لێ پشتى ئه‌نجامێن شۆڕه‌شێ ب نیڤ ئازادبوونه‌كا باشۆرێ كوردستانێ ب داوى هاتى، هنده‌ك حزبێن دیتر یێن كوردستانێ دزانى مینا دیرۆك و شیان نه‌كارن مل ب ملێ پارتى هه‌ڤڕكیێ بۆ ده‌سه‌ڵاتێ بكه‌ن، ژبه‌ر كو مینا پارتى نه خوه‌دى دیرۆكه‌كا بهێزن، نه‌خوه‌دى په‌یوه‌ندیێن سیاسى یێن نیڤده‌وڵه‌تی یێن بهێزن، نه ئابووره‌كێ بهێزتر ژ پارتى دده‌ستێن واندایه، له‌وما ده‌ست ب هه‌ڤڕكییه‌كا نه‌رێنى كر، واته هه‌ڤڕكى نه‌ك ب ئه‌نجامدانا كارێن باشتر ژ كارێن پارتى!، به‌لكى هه‌ڤڕكى ب شێواندن و تێكدانا هزر و دیتنا خه‌لكى ل سه‌ر پارتى، ژ به‌ركو خواندنا جڤاكا مه ب گشتى خواندنه‌كا ساخله‌م و دووربین نینه، هه‌ڤڕكێن پارتى شیان كاریگه‌ریه‌كا مه‌زن بكه‌ن، ب تایبه‌ت ل ئه‌و ده‌ڤه‌رێن كونترۆل ل ژێر ده‌ستێن واندا، پارتى دیمۆكراتى كوردستان ب ڕه‌نگه‌كێ باش و چالاك سۆد ل میكانزمێ ڕاگه‌هاندنێ نه‌دیت، ڕێخستی و كادرێن وێ مینا پێدڤى كاریگه‌رى نه‌بوون كو به‌رهنگاریێ دگه‌ل نه‌یارێن خوه بكه‌ت، ئه‌و دیرۆك و خه‌بات و قوربانیدانا پارتى هه‌ى و كارێن پارتى دكه‌ت، ئه‌گه‌ر حزبه‌كا دیتر هه‌بان و خوه‌دى بایه، چ حزبه‌كا كوردستانێ ب دوورڤه ژى شیانێن هه‌ڤڕكیێ دگه‌ل دا نه‌دبوون، پارتى شۆڕشه‌كا مه‌زن یاهه‌ی، د چاڤێن خه‌لكه‌كی دا، ئه‌وێن ل دژى شۆڕشێ ژى ڕاوه‌ستیای هه‌ر مینا پارتى شۆڕش یا كرى!، پارتى نه‌فتا كوردستانێ ل ژێر كونترۆلا به‌غدا ده‌رێخست، حزبێن دیتر خوه دكه‌نه خوه‌دى ڤى پڕۆژه‌ى!، ده‌مێ ژبه‌ر ڤان ده‌ستكه‌فتێن پارتى بۆ كوردان ب ده‌ستڤه ئیناى ژانێن ده‌وڵه‌تبوونێ ئاخا كوردستانێ دگریت، هه‌مى ژانا دئێخنه دناڤ زكێ پارتی دا!!، واته بۆ ده‌ستكه‌فتا هه‌مى هه‌ڤالێن پارتینه و بۆ قوربانیدانان ژى هه‌میێ دئێخنه ل ژێر به‌رپرسیاریا پارتی دا!.
ئه‌و به‌ختێ پارتى هه‌ى ئه‌وه كو سیاسه‌تا ئه‌و حزبێن هه‌ڤڕكیێ ل گه‌ل پارتى دكه‌ن یا د ده‌ستێن دو جۆره كه‌سان دا، یان د هزر ژه‌نگى و بیرته‌نگ و ده‌روون تێكچوویینه، یانژى كه‌سێن سنێله‌یێن سیاسى و بێ ئه‌زمۆنن، ئه‌ڤ چه‌نده ژى فاكته‌رن كو مینا پێدڤى نه‌شێن كه‌یسا لاوازیا تێگه‌هشتنا جڤاكى ب گشتى بكه‌ن، بۆ نموونه ئه‌و حزب سه‌ركه‌فتن كو خه‌لكێ ده‌ڤه‌رێن سلێمانیێ و گه‌رمیان ب گشتى بخاپینن كو پارتى به‌رپرس بكه‌ن ب كێماسى و نادادپه‌روه‌رى و گه‌نده‌ڵیا ده‌ڤه‌رێن وان!، د ده‌مه‌كێ دا پارتى شیانێن گوهارتنا پۆلیسه‌كێ ل ده‌ڤه‌ره‌كا سلێمانیێ بۆ ده‌ڤه‌ره‌كا دیكه نینه!، لێ دژایه‌تیكرنا سه‌ربخوه‌یی و ئازادیا ڤى وه‌لاتى!، زه‌حمه‌ته خه‌لكه‌ك هه‌تا وى ڕاده‌ى یا ڤه‌مایی بیت كو ڤێ چه‌ندێ ژى ل وان لایه‌ن و حزبان بپه‌رژینیت!. مینا حزب به‌ختێ پارتى ل ڤێره‌یه كو نه‌یارێن وێ بۆ دژایه‌تى كرنا پارتى و تێكدانا پارتى، چه‌قۆ یا ل سه‌ر گه‌رده‌نا به‌رژه‌وه‌ندى یێن هه‌مى خه‌لكێ كوردستانێ داناى!، ئه‌وان حزبان ل داویێ و پشتى چه‌ندین ساڵان خاپاندنا خه‌لكێ خوه، نها ب كریار و پراكتیك دبێژنه خه‌لكى پرۆژه‌یێن نه‌ته‌وه‌یی و كوردایه‌تى یێن پارتینه، چاوا وان وه‌سا خه‌لك تێگه‌هاند كو جاشایه‌تى ژى شۆڕشه!، وه‌سا دیسا یێ تێدگه‌هینه‌ڤه كو كوردایه‌تیا ڕاسته‌قینه ژى هه‌ر پارتى یا كرى!، ئه‌ڤ چه‌نده ژى باشترین به‌خته كو پارتى د دیرۆكێ دا هه‌ى و زه‌حمه‌ته هه‌مى حزبه‌كێ ئه‌ڤ شانسه هه‌بیت كو نه‌یارێن وێ كار بۆ به‌رژه‌وه‌ندیێن وێ یێن حزبى بكه‌ن!.
حوكمه‌تا هه‌رێمێ چكریه؟!
سیاسه‌تمه‌دارێ زیره‌ك ب كێمترین قوربانیدان پترین ده‌ستكه‌فتان بده‌ستڤه دئینیت، دبیت ژى قوربانیا ئابوورى بده‌ت و ده‌ستكه‌فتا ئه‌وله‌هى ب ده‌ست بئینیت، ئه‌ڤجا وه‌ڵاته‌كێ مینا كوردستانێ یا نه‌سه‌ربخوه‌و خوه‌دى سه‌دان دوژمنێن ب هێز چاوا بێ قوربانیدان بهێته پاراستن؟!، گه‌له‌ك جاران حوكمه‌تا هه‌رێما كوردستانێ ژبۆ ده‌ستكه‌فته‌كا سیاسى قوربانیێن ئابوورى یێن داى، گه‌له‌ك جاران نه‌شیایه مینا پێدڤى بۆدجه ژبۆ كه‌رته‌كێ گرنگێ ئابوورى بمه‌زێخیت كو گرێدایی ب خوشگوزه‌رانییا جڤاكی ڤه‌یه، ژبه‌ر كو جڤاكى پتر ژ خۆشگۆزه‌رانیێ پێدڤى یا ب ئه‌وله‌هیێ هه‌بووى، ل سه‌ر ڤێ چه‌ندێ هنده‌ك خه‌لك ڕه‌خنه‌یێن دژوار ئاراسته‌یێ حوكمه‌تێ دكه‌ن كو گرنگى ب كه‌رتێ كشتوكالێ نه‌دایه و ب تنێ بۆدجه یا مه‌زاختى ژبۆ كه‌رتێ نه‌فتێ، به‌لێ ڕاسته!، لێ گه‌لۆ حوكمه‌تا هه‌رێمێ هنده شاره‌زایی نه‌بوویه كو بزانیت كه‌رتێ كشتوكاڵى یان پیشه‌سازى هه‌م خه‌لكێ جڤاكى دێ ژ ته‌مبه‌لیێ پارێزیت و هه‌م داهاتێ ڤان كه‌رتان مه‌زمونتر و ده‌مدرێژتره ژ كه‌رتێ نه‌فتێ؟!، هه‌كه خه‌لكه‌ك وه‌سا هزر دكه‌ت كو حوكمه‌تا هه‌رێما كوردستانێ هنده شاره‌زایی نینه د ڤان هه‌ڤكێشه‌یێن ساده بگه‌هیت، ئه‌ز ب هه‌مى باوه‌ر دبێژمێ (نه‌خێر!)، حكوكمه‌تا هه‌رێمێ باش د ڤان هه‌ڤكێشه و بالانسان دگه‌هیت، لێ دبێت هوونێن ڕێزدار د مه‌به‌ست و نیازێن حوكمه‌تێ نه‌گه‌هن ئان مه‌به‌ستێن دیكه هه‌بن، كه‌رتێ كشتوكاڵى دكاریت وه‌لاتى ژ لایێ ئێكونۆمی ڤه ب هێز بكه‌ت، لێ نكاریت مینا كه‌رتێ نه‌فتێ دگه‌ل كه‌رتێ ئابوورى لایه‌نێ سیاسی و ئه‌وله‌هی ڤه ژى مفا هه‌بیت.
ئه‌ڤجا بپرسین چاوا؟، بۆ نموونه ده‌مێ حكوكمه‌تا هه‌رێما كوردستانێ ملیاردان دۆلار مه‌زاختى و پترین گرنگى ب كه‌رتی نه‌فتێ داى، هه‌رێما كوردستانێ د قووناغه‌كا نازك دابوو، وه‌لاتێ توركیا ب چاڤه‌كێ نزم و بێ مفا ل كوردستانێ دنێرى، واته توركیایێ د سیاسه‌تا خوه‌دا وه‌ها دنێرى (هه‌كه ئه‌م سه‌ره‌ده‌ریێ ل گه‌ل كوردان بكه‌ین ل عیراقێ، ده‌ستكه‌فتێن مه دێ چ بن؟! (چنه ئان زۆر كێم)!، لێ ئه‌م دزانین كوردێن عیراقێ ببنه خوه‌دى كیانه‌كێ سه‌ربخوه ئه‌م دێ پتر زیانێ بكه‌ین و كوردێن توركیایێ ژى دێ حه‌سوودێ مافێن خوه یێن نه‌ته‌وه‌یی بن)، لێ حوكمه‌تا هه‌رێما كوردستانێ ب سه‌رۆكاتیا نێچیرڤان بارزانى ب هه‌ر میكانزم و قوربانیدانه‌كێ بیت شیا دچه‌ند سالێن كێم دا باوه‌ریێ ب مه‌زنترین كۆمپانیایێن جیهانێ بتایبه‌ت یێن نه‌فتێ بینیت كو بهێن و ل هه‌رێما كوردستانێ كار بكه‌ن، به‌رژه‌وه‌ندیێن ئابوورى یێن توركیا ب ده‌هان ملیارد دۆلار د سالێ دا هاتنه بلند كرن، هه‌ڤده‌م هاتنا كۆمپانیایێن مینا ئیكسۆن مۆبیل و چیڤرۆن یێن ئه‌مریكى و تۆتاڵ یا فڕه‌نسى هاتنه كوردستانێ كو سێ ژ پێنج كۆمپانیایێن جیهانێنه و مه‌زنترین كاریگه‌ریێ ل سه‌ر وزێ جیهانێ دكه‌ن، ئه‌ڤ پێنگاڤێن حوكمه‌تا هه‌رێما كوردستانێ ژبلى مه‌به‌ستێن ئابوورى، مه‌به‌ستێن وێ پتر زامنكرنا لایه‌نێ ئه‌وله‌هى و سیاسى و دبلۆماسى بوونه، واته حوكمه‌تێ ئه‌وله‌هى و ده‌ستكه‌فتێن سیاسى و دبلۆماسى كڕین كو كوردان نه‌بوو!، هه‌ر كه‌سه‌كێ هشیار دزانیت ئه‌گه‌ر كه‌رتێ كشتۆكاڵى و گه‌شتوگۆزارى و پیشه‌سازى و ئه‌له‌كتریكێ چه‌ندژى ب هێز ببان و پێشكه‌فت بان مه‌حال بوو بشێن ب ڕێژه‌یه‌كا كێم ژى مینا كه‌رتێ نه‌فتێ كاریگه‌ریێن پۆزه‌تیڤ بۆ سه‌ر ئه‌وله‌هی و سیاسه‌تا هه‌رێما كوردستانێ چێ بكه‌ن، حوكمه‌تا هه‌رێما كوردستانێ بو ئینانا كۆمپانیا و بزنسمه‌ن و بگره كرێكارێن ده‌ره‌كى ژى ئاسانكارى یێن زۆر كرن و قوربانیدان، نه ب وى ئاواییه كو حوكمه‌تا هه‌رێما كوردستانێ بێگانه‌په‌رسته ئانكو نه‌زانه!، ئه‌ڤ پێناسه‌یه بێ ویژدانییه، حكومه‌تا هه‌رێمێ دزانى ب هه‌بوونا به‌رژه‌وه‌ندییان دێ زلهێزو وڵاتێن ده‌ڤه‌رێ ژى ناچار بن دان ب مافێن گه‌لێ كورد دا ب ئینن و بپارێزن ژى، ده‌مێ ل ده‌ستپێكا شه‌ڕێ داعش دا “باراك ئۆباما” سه‌رۆكى وى ده‌مى یێ ئه‌مریكا بڕیارداى هه‌ولێر هێلا سۆره و نابیت مه‌ترسى بكه‌ڤنه سه‌رو هاریكاریا مه كرى، ژئه‌نجامێن سیاسه‌تا سه‌ركه‌فتی یا هه‌رێما كوردستانێ بوویه، خوه ژ به‌ر لایه‌نێ مرۆڤى نه‌بوویه!، ئه‌م هه‌ر ئه‌و مرۆڤین یێن ده‌هان ساڵان چاڤپووشى ل وان كاره‌ساتێن مینا كیمیابارانكرنا هه‌له‌بچه و ئه‌نفالێن كوردان دكرن!، ده‌مێ سه‌رۆك بارزانى شیاى فشارێ ب ئێخیته سه‌ر جیهانێ كو ڕێكێ بده‌ن پێشمه‌رگه ل سه‌ر ئاخا توركیا دا ده‌رباز ببیت و نه‌هێلیت كۆبانێ بكه‌ڤیت، به‌رهه‌مێن سیاسه‌ته‌كا سه‌ركه‌فتى بۆیه، لێ حوكمه‌ت نه‌شێت بێژیته جڤاكى داكو ئه‌مریكا مه بپارێزیت ئه‌م پتر گرنگیێ ب نه‌فتێ دده‌ین!.
ده‌مێ ئه‌وله‌هى و سیاسى كورد هاتنه پاراستن، ئه‌ڤجا حوكمه‌ت ژى دێ هزر دخۆشگوزه‌رانیا خه‌لكێ كوردستانێدا پتر كه‌ت، چێبوونا ده‌وڵه‌تا سه‌ربخوه‌ژى زامنێ ئینانا وێ قووناغا خۆشگوزه‌رانیێ یه.
پێدڤیه بترسین..؟!
ل ده‌ستپێكا نڤیسینا دیرۆكێ دا هه‌تا نوكه‌ژى كو تێدا دژین، شه‌ر و برین و كوشتن بۆ نه‌ته‌وه‌یا كورد یا هه‌بووى و هه‌یى!، پڕانیا وان شه‌ڕان كوردان بۆ ڕزگاركرن یان پاراستنا نه‌ته‌وه‌یێن دیتر یێن كرین!، واته یێن هاتیه بكارئینان، جار ل دژى به‌ریتانیایا مه‌زن، جار ل دژى ئه‌رمه‌نیان، جار ل دژى ئیسرائیلیان، جار ل دژى سه‌فه‌ویان بۆ ئۆسمانیان و جار به‌روڤاژى، بارا پتر ژى ب ڕێیا ده‌ره‌به‌گ و بیروباوه‌رێن ئاینى كورد دهاتنه خاپاندن و بكارئینان، چ وه‌لاته‌كێ جیهانێ بێ باجێن مه‌زن نه‌شیایه ده‌وله‌تا خوه ڕابگه‌هینیت، پڕانیا ده‌وڵه‌تان ده‌مێ سه‌ربخوه‌بوونا خوه ڕاگه‌هاندى د قه‌یرانێن دارایی و خزمه‌تگۆزارى و فه‌رهه‌نگی دا بوون، ئێك ژ وان ئه‌مریكا كو ل ژێر داگیركاریا به‌ریتانیا ب قوربانیدانا سه‌دان هزار كه‌سان ل ساڵا 1776 سه‌ربخوه‌یی ڕاگه‌هاند كو ئاستێ وان یێ ره‌وشه‌نبیرى و ناڤخوه‌یی د قه‌یرانه‌كا مه‌زن دا بوو، هه‌تا ڕاده‌یه‌كێ كو هێشتا به‌نده ئانكو كویله هه‌بوون و بازار ل سه‌ر دهاته كرن، ل سه‌ر ئازاد كرنا به‌نده‌یان و قه‌ده‌غه‌كرنا ڤى بازارى شه‌ره‌كێ ناڤخوه ل ئه‌مریكا چێبوو كو 25 ساڵان ڤه‌كێشا و 620 هزار كه‌س هاتنه كۆشتن. ئێك ژ بێ واتاترین و پڕخاپینۆكترین ڕسته‌یێن ل دژى سه‌ربخوه‌یێ ژ لایێ هنده‌ك لایه‌ن و خه‌لكێن كوردستانێڤه ب كاردهێت ئه‌وه كو دبێژن: كه‌هره‌با‌و خزمه‌تگۆزارى و مووچه..هتد دئاسته‌كێ لاوازدانه مه ده‌وله‌ت بۆچییه!، د ڕاستیدا فاكته‌رێ سه‌ره‌كیێ هه‌مى به‌دبه‌ختى و ڤه‌مانا كوردان نه‌بوونا ده‌وڵه‌تا سه‌ربخوه‌یه، چ ولاته‌كێ جیهانێ بێ ئه‌گه‌ر خه‌لكێ خوه نه‌كرییه قوربانى داكو وه‌لاتێ خوه ڕزگار بكه‌ت، ئه‌گه‌ر وڵاتێن ژێر ده‌ست كێشه‌یێن خزمه‌تگوزارى و ئازادى و مافێن مرۆڤان ب گشتى هه‌بان، چ جاران خه‌لكى قوربانى نه‌ددا كو ل ژێر داگیركه‌ریێ ده‌ربهێن و سه‌ربخوه بن، نه‌خاسمه ل رۆژهه‌لاتا ناڤین و ئه‌ڤجا نه‌ته‌وه‌یا كورد!، پێتڤییه هه‌مى تاكه‌كێ كورد وێ ڕاستیێ بزانیت كو ئه‌و نیڤ ئازادییا نوكه هه‌یی ب پاڵپشتیا هێزێن نیڤ ده‌وله‌تییه كو هنده‌ك به‌رژه‌وه‌ندیێن وان دخوازن ژ لایه‌نێ سیاسى و ئابوورى و دبلوماسیڤه هاریكار بن و ئه‌گه‌ر ئه‌م نه‌شێین ده‌وڵه‌تا خوه دابمه‌زرینین گۆمان دوێ چه‌ندێدا نینن كو ئه‌ڤ به‌رژه‌وه‌ندیێن وان وڵاتان دێ ل ستراتیژى و درێژخایه‌ن بنه به‌رژه‌وه‌ندیێن ده‌مكى و ته‌كنینكى، پێتڤییه تاكێ كورد وێ ڕاستیێ بزانیت كو ئه‌گه‌ر هنده‌ك په‌یوه‌ندیێن سیاسى لسه‌ر ئاستى كه‌سێتى و حزبى دناڤبه‌را سه‌رۆك بارزانى و پارتى دگه‌ل وڵاتێن زلهێز نه‌بان و حكومه‌تا هه‌رێما كوردستانێ روله‌كێ نایاب ل ڕاكێشانا كومپانیاو نوێنه‌رایه‌تى و قونسولێن جیهانێ …هتد نه‌گێڕابا مه‌حال بوو وڵاتێن زلهێز پاڵپشتییا هێزێن پێشمه‌رگه بكه‌ن، و ئه‌و چه‌كێ لاوازێ مه هه‌ى زور ب زه‌حمه‌ت بوو كو هه‌مى كوردستان نه‌كه‌ڤیته ژێر ده‌ستێن هێزه‌كا تیرورستى و هوڤى یا داعشڤه، ئه‌ز باوه‌رم هه‌ركه‌سه‌كێ كورد دخه‌ونێدا ببییت چه‌كدارێن داعش هاتینه دده‌رگه‌هێ مالا ویدا دێ ب دل قوتانه‌كا توند ل خه‌وێ هه‌لپه‌ریت و چ جاران ژى وێ خه‌ونێ ژ بیرناكه‌ت!، پێتڤییه تویێ كورد وێ ڕاستیێ بزانى بێ هه‌بوونا ده‌وڵه‌تا كوردى نه‌ك بتنێ ئازادییا ته یا ئاخفتنێ و ژیانه‌كا ئاسایی دیار نینه دێ به‌ره‌ف چ ئاقاره‌ك چیت، به‌لكى پشت ڕاستبه ئه‌ڤرۆ نه سوبه‌هى ئه‌گه‌ر ئه‌ڤ داعشه‌ژى وڵاتێ ته داگیر نه‌كه‌ت دێ سه‌رده‌مه‌كێ ڕاستى ڤان تراژیدیاو به‌دبه‌ختیان بى، واته پێتڤییه كورد ل نه‌بوونا ده‌وڵه‌تێ بترسن، ل وێ چه‌ندێ بترسن ئه‌گه‌ر ڕاپرسى نه‌هێته كرن و ده‌لیڤه نه‌بیت ده‌وڵه‌تا خوه دابمه‌زرینن، دامه‌زراندنا ده‌وڵه‌تێ واته چێكرنا هێزه‌كا موكم و پرۆفیشناڵ و پڕچه‌كێ سه‌ربازى، واته دابینكرنا ئه‌وله‌هى و خزمه‌تگۆزارى و خۆشگوزه‌رانى ب جوره‌كێ زۆر باشتر. ترسیان ل گه‌فێن وڵاتێن دیكه ئان پشتگیرى نه‌كرنا وڵاتێن زلهێز، تێنه‌گه‌هشتنه‌كا زوره ل سیاسه‌تێ و واقعێ وه‌لاتێن دیكه، وڵاتێن مینا عیراقێ و ئیرانێ و سوریێ و توركیا هه‌رچه‌ندا پێ چێبوى یا كرى كو نه‌گه‌هینه ڤێ قوناغێ و نكارن خراپتر بكه‌ن و ئه‌و بخوه‌ژى باش دزانن كارتێن وان یێن سه‌ره‌كى یێن سوتى و بتنێ كارتا ترساندنا خه‌لكێ كوردستانێ یا دده‌ستێن واندا ماى (پشت ڕاستم دێ ب هه‌بوونا ده‌وڵه‌تا كوردى ڕازى بن بتایبه‌ت توركیا كو گرێدایی ب به‌رنامه‌و سیاسه‌تا وڵاتێن رۆژئاڤاڤه‌یه)، وڵاتێن زلهێزژى ناڕاسته‌وخۆ ده‌لیڤه یا دایه‌مه ده‌وڵه‌تێ بكه‌ینه دیفاكتۆ، پێدڤییه مه هند لیاقه‌ت و هشیارى هه‌بیت ڤێ پیچه‌كێ تێبگه‌هین.
ژێرخانا ئابوورى بۆ ده‌وله‌تا كوردستانى
ئێك ژ گرنگترن خالان كو ژ بۆ دامه‌زراندنا ده‌وله‌ته‌كێ گه‌ره‌گه گرنگى پێ بهێته‌دان، ژێرخانا ئابووریه كو حوكمه‌تا هه‌رێما كوردستانێ سه‌خمه‌راتى گه‌له‌ك كێماسیان كاره‌كێ نایاب ژ بۆ ئه‌نجامدایه، د چ وڵاته‌كێ نوو پێگه‌هشتی و نه‌سه‌ربخوه‌دا نینه كو هه‌مى كایه‌یێن ڕێڤه‌به‌ریێ و حوكمڕانیێ ب شێوه‌یه‌كێ بێ كێماسى برێڤه‌بچن، ب تایبه‌ت ده‌مێ فاكته‌رێن جوگرافى و سیاسى كاریگه‌ریێن نێگه‌تیڤ ل سه‌ر وه‌لاتى هه‌بن، هه‌كه ئه‌م ب هوورى لێكدانه‌ڤه‌یه‌كێ ژبۆ سیاسه‌تا حوكمه‌تا هه‌رێما كوردستانێ بكه‌ین كو پشتى سه‌رهه‌لدانێ به‌رپرس بۆ ب ده‌ڤه‌ره‌كێ كو د دیرۆكا وێ دا ل جهێ خزمه‌تگوزاریێ و ئاڤه‌دانیێ ب تنێ باریت و كیمیا ل سه‌ر وه‌ركربوو، ل شوونا په‌ره‌پێدانا كه‌رتێ گه‌شتوگوزاریێ، حوكمه‌تێن داگیركه‌ر د ماسته‌ر پلانێن خوه‌دا هزر ل سه‌ر چێكرنا باره‌گایێن سه‌ربازى دكرن و جاده‌یێن كوردستانێ د به‌رژه‌وه‌ندیێن ستراتیژیێن خوه یێن سه‌ربازى و ئه‌منى دا چێدكرن، ل شوونا پێشخستنا كه‌رتێ په‌روه‌ردێ و لایه‌نێ فه‌رهه‌نگى یێ جڤاكى كار ژبۆ هه‌ڕفاندنا قوتابخانه و هه‌ر هزر و بیره‌كا ئازادیخواز و مفادار دكر و په‌ره ب ئایدۆلوژیایێن مه‌ترسیدار و به‌رته‌نگێن خوڕافى و هۆزى ددان، ده‌هان خالێن دیكه كو مینا میراته‌كێ نێگه‌تیڤ ژبۆ حوكمه‌تا هه‌رێما كوردستانێ مابوون، پشتى سه‌رهه‌لدانێ ژى هێشتا داگیركه‌ر و دوژمنێن كوردستانێ كاریگه‌ریێن ڕاسته‌وخوه ل سه‌ر دۆخێ هه‌رێمێ هه‌بوون. بۆ نموونه هه‌تا نها ژى ژبه‌ر وان پرسگرێكێن وه‌لاتێن داگیركه‌ر ژبۆ كوردستانێ چێدكه‌ن نه‌فت و هه‌مى سامانێن كوردستانێ یێن بازرگانییا نیڤده‌وله‌تى ب ئه‌رزانتر ل بهایێ بازاران دهێنه فرۆتن، كۆمپانى ب ته‌نگه‌زاریڤه دهێنه كوردستانێ ژ ترسا چێبوونا پرسگرێكان ژلایێ وه‌لاتێن داگیركه‌ر ڤه كو هه‌رێما كوردستانێ سه‌روه‌ریا ده‌وله‌ته‌كا سه‌ربخوه نینه داكو بشێت د هه‌مى كاودانه‌كێ دا به‌رگیریێ ژ به‌رژه‌وه‌ندیێن هه‌ڤپشك یێن خوه و كۆمپانیایان بكه‌ت، ژ لایێ سیاسی و ئه‌وله‌هیڤه هنده‌ك لایه‌ن و كه‌سایه‌تی یێن كوردستانێ هه‌مى ده‌مه‌كێ ل ژێر بڕیار و فه‌رمانێن دوژمن و داگیركه‌ران بوون و خزمه‌تا ئه‌جنده و ستراتیژییه‌تێن وان دكه‌ن كو ل دژى به‌رژه‌وه‌ندیێن كوردستانێ و خه‌لكێ وێنه. ئه‌ڤ خالێن مه به‌حس لێ كرى پشكه‌كن كو ب گشتى ل سه‌ر رێیا پێشكه‌فتنا كارێن حوكمه‌تا هه‌رێمێ ئاسته‌نگ و كێشه‌یێن مه‌زن چێدكرن، لێ سه‌خمه‌راتى ڤان هه‌مى پرسگرێكان، حوكمه‌تا هه‌رێمێ ب تایبه‌ت نێچیرڤان بارزانى رۆله‌كێ مه‌زن گێرا و ل سه‌ر هه‌مى ئاسته‌نگان زالبوون و د شه‌ڕێن ئابوورى و دبلۆماسی دا ل دژى نه‌یار و دوژمنێن كوردستانێ سه‌ركه‌فتن، بۆ نموونه چه‌ندین سالان حوكمه‌تا عیراقێ هه‌مى شیانێن خوه مه‌زاختن كو نه‌هێلیت كۆمپانیایێن زه‌به‌لاحێن جیهانێ بهێنه كوردستانێ تا ڕاده‌یه‌كێ حوكمه‌تا عیراقێ هوشداری دا كۆمپانیایا (ئیكسون موبیل) كو مه‌زنترین كۆمپانیا نه‌فتێ یا جیهانێ یه، هه‌كه ل هه‌رێما كوردستانێ كار بكه‌ت دێ ل عیراقێ كه‌نه د لیسته‌یا ڕه‌شدا و ئێدى نه‌شێن ل چ جهه‌كا دیكه‌یا عیراقێ كار بكه‌ن، ئیسكۆن مۆبیل د ناڤبه‌را هه‌رێما كوردستانێ و حوكمه‌تا عیراقێدا كوردستان هه‌لبژارت، هه‌رێما كوردستانێ هه‌تا كو به‌رى شه‌ڕێ داعش د ڕێڕه‌وه‌كا ب له‌زدا پێشكه‌فتن دكرن، چێبوونا شه‌ڕێ داعش و شكه‌ستنا مه‌زن یا بهایێ نه‌فتێ د ئیراده‌یا حوكمه‌تا هه‌رێما كوردستانێدا نه‌بوون و كاودانێن نیڤده‌وله‌تى بوون، پشكا شێر یا ڤى شه‌ڕى بۆ كوردستانێ ما، هه‌روه‌سا بڕینا بۆدجا هه‌رێما كوردستانێ و خشیانا نێزیكى دو ملیۆن ئاواره‌یان بۆ كوردستانێ مه‌زنترین فشار ل سه‌ر حوكمه‌تێ چێكرن كو هه‌كه ئیراده و خۆڕاگیرییا خه‌لكێ كوردستانێ و هه‌دار و سه‌رخوه‌بوونا حوكمه‌تێ نه‌بایه دبیت هه‌ر تشته‌ك ژ ده‌ست چووبان، لێ دوباره هێدى هێدى كوردستانێ ڕێره‌وا پێشكه‌فتنێ دگریته‌ڤه و ئه‌زموونێن گرنگ ژى ژ ئه‌زمه و ئه‌و كاودانێن خراب وه‌رگرتن كو ل سه‌ر هه‌رێما كوردستانێدا ده‌رباز بووى.
ئه‌ڤرۆ ژێرخانا ئابووریا حوكمه‌تا هه‌رێما كورستانێ گونجایترینه ژبۆ ڕاگه‌هاندنا ده‌وڵه‌تا كوردستانێ، شه‌ڕێ مه یێ ئابوورى ب سه‌ركه‌فتنا هه‌رێما كوردستانێ ل گه‌ل حوكمه‌تا عیراقێ ب داوى هاتیه، ئه‌گه‌ر توركیا ل دژى ده‌وڵه‌تا كوردى ڕاوه‌ستیابا، به‌رى نها و نها ژى دكاریت ده‌روازه‌یێن خوه ل سه‌ر كوردستانێ بگریت و وێ ڕێكێ تێست بكه‌ت، لێ توركیا یا د بالانسێن نیڤده‌وله‌تی دا و باش دزانیت باجا دژایه‌تیكرنا ده‌وڵه‌تا كوردى دێ زۆر یا گران بیت و ده‌وڵه‌ته‌كا كوردى مه‌ترسى نینن ل سه‌ر وانا، ئه‌ڤرۆ هه‌ر كورده‌كێ ل به‌رهه‌مێ سه‌ربخوه‌بوونێ دترسیت، ب تنێ خوه دخاپینیت و خرابیێ ل گه‌ل دیرۆك و ئارمانج و قوربانیدانێن گه‌لێ كورد دكه‌ت.
نه جوداخوازی و نه عیراقچى
ریفراندۆم ئانكو گشتپرسى واته ڤه‌گه‌رایانا ده‌سه‌ڵات و رێڤه‌به‌ریێن سیاسى و ئیدارى ژ بۆ ده‌نگێ خه‌لكێ وه‌لاتى، هه‌مى وه‌لاتێن جیهانێ ژ بۆ رێڤه‌به‌ریا خوه ژ هه‌مى لایه‌كێڤه خوه‌دى قانوون و دستوورێن تایبه‌ت ب وه‌لاتێ خوه‌نه كو گه‌ره‌كه ئه‌و دستوور و قانوون ژ لایێ خه‌لكێ وه‌ڵاتیڤه ب پرانى هات بیته ئه‌رێ كرن، ئه‌و ده‌مێن كاودانێن نوو دكه‌ڤنه د رێیا ده‌سه‌لاتێ دا كو د ناڤا دستوور و قانوونێن وه‌لاتى چاره‌سه‌رى ژ بۆ نه‌هات بیته دانان ئانكو ئێكلا نه‌كربیته‌ڤه، ده‌سه‌لات ژ بۆ ڕاكرنا به‌رپرسیاریێ په‌نایێ دبه‌نه به‌ر ده‌نگێ خه‌لكێ وه‌لاتى، بۆ نموونه هه‌كه وه‌لاته‌كى بڤێت دستوورێ خوه بگوهۆریت پێدڤیه ل گه‌ل ب پڕانى ب ده‌ستكاریكرنا دستوورى ڕازى ببن، هه‌روه‌كى مه به‌رى چه‌ند مه‌هان گشتپرسیا توركیا ل سه‌ر گوهارتنا دستوورى دیت، ئه‌گه‌ر پشكه‌كا وه‌لاتى كو خوه‌دى تایبه‌تمه‌ندیێن ژ هه‌ژى و قانوونی بن و بڤێت سه‌ربخوه‌بوونێ ڕابگه‌هینن ده‌سه‌لات دكاریت ڤى مافى ژبۆ خه‌لكێ خوه فه‌راهه‌م بكه‌ت و ڕێزێ ل بۆچوونا پڕانى بگریت، هه‌كه ده‌سه‌لاتێ ئه‌ڤ كاره ژ بۆ گه‌لێ خوه نه‌كر واته ئه‌و ده‌سه‌لات ل دژى ده‌نگ و بۆچوونا پڕانیا خه‌لكێ وه‌لاتیه و بۆچوونا خوه ب تنێ ل سه‌ر جڤاكى دسه‌پینن.
ئه‌ڤرۆ ل كوردستانا باشۆر ب سه‌رۆكایه‌تیا مه‌سعود بارزانى كار هاتیه كرن كو ل 25 ئیلۆنا 2017 خه‌لك چاره‌نڤیسێ وه‌لاتێ خوه دیار بكه‌ت، گه‌لۆ خه‌لكى دڤێت ل ژێر ده‌سه‌لات و حوكمڕانیا عیراقێ به‌رده‌وام بن ئانكو دخوازن سه‌ربخوه‌بوونێ ڕابگه‌هینن و ئێدى وه‌لاتێ خوه بڕێڤه‌ببه‌ن بێ كو ده‌سه‌لاتێن ده‌ره‌كى كاریگه‌ریێ ل سه‌ر بڕیار و سه‌روه‌ریا وان هه‌بیت، لێ مخابن هنده‌ك لایه‌ن و پارچه حزبێن سیاسى ب سه‌ركردایه‌تیا ته‌ڤگه‌را گۆڕان بزاڤێ دكه‌ن ڤى مافى ل خه‌لكێ كوردستانێ وه‌ربگرن و ب به‌هانه‌یێن بێ واتا و نامه‌نتق ده‌ست ب خاپاندنێ و سه‌ردابرنا خه‌لكى كرینه و په‌نایێ بۆ هه‌ر وه‌لات و لایه‌نه‌كێ داگیركه‌ر دبه‌ن كو ڤێ پڕۆسسا دیمۆكراسى و به‌رهه‌مێ خوین و قوربانیدانا خه‌لكێ كوردستانێ ژناڤببه‌ن!، ئه‌ڤ لایه‌نێن دژه ڕیفراندۆم به‌هانه‌یێن سه‌یر دگرن و دبێژن ده‌مێ ریفراندۆمێ نینه!، ئه‌ڤ خاپاندنه تا ڕاده‌یه‌كێ پێكه‌نینا وى د بێ واتا و شه‌رمینۆكن، ڕیفراندۆم پرسیاره‌كه ل خه‌لكى دهێـته كرن نه‌ك جودا بوونه!، واته ئه‌گه‌ر وه‌كى گۆڕان و هه‌ڤپه‌یمانێن وێ دبێژن سه‌ربه‌خۆیی دنوكه‌دا كاره‌كێ باش نینه و ڤه‌مان دگه‌ل عیراقا شیرین و شاما شه‌ریف باشتره، خه‌لكێ كوردستانێ نه‌چار نینن ب پڕانى ده‌نگى ب ئه‌رێ بده‌ن و دێ وه‌ڵاتى ل ژێر حوكمێ عه‌ره‌با هێلن، جارژى دبێژن ڕیفراندۆم ژ بۆ ڤه‌مانا بارزانییه!، ئه‌ڤ به‌هانه‌یێن بێ واتا ژ هه‌ژى به‌رسڤدانێ نینن ژبه‌ركو كه‌سێن شێت ناچن ده‌نگى بده‌ن، ئه‌و كه‌سێن ده‌نگى ژى دده‌ن دزانن ده‌نگدانێ په‌یوه‌ندى ب كوردسیكێ بارزانیڤه نینه و پرسیارا ریفراندۆمێ ناپرسیت وه دڤێت بارزانى ئانكو پارتى ل سه‌رۆكایه‌تیێ بمینیت ئان نه!، به‌لكى دبێژیت وه دڤێت سه‌ربخوه بن ئان نه؟.
ئه‌ڤ ده‌لیڤه پشتى هزاران ساڵان و ده‌ریایه‌كا خوینێ و به‌دبه‌ختیێ ژ بۆ كوردان یا هاتیه پێش، ل هه‌ر سه‌رده‌مه‌كێ ب جوره‌كێ دوژمنێن كوردان بزاڤ دكرن كو ئه‌ڤ قووناغه نه‌گه‌هیت و كورد وێ رۆژێ نه‌بینن، جار چه‌ك دكره دده‌ستێن جاشاندا و ل دژى شوڕشێ ب كار دئینان، نهاژى پێنڤیسى دكه‌نه دده‌ستێن جاش و كرێ گرتیاندا و ده‌زگه‌هێن ڕاگه‌هاندنێ ژبۆ وان ته‌رخان دكه‌ن داكو خه‌لكى ب خاپینن و ل ڤان قووناغێن داویێ شكه‌ستنێ ب ئینن و نه‌گه‌هینه وێ رۆژێ كو ئالایێ كوردستانێ ل باره‌گایێ نه‌ته‌وه‌یێن ئێكگرتى بهێته بلند كرن. وه‌لاتێ مه پێدڤیا ب سه‌ربخوه‌بوونێ هه‌ى، ئه‌لته‌رناتیڤێ سه‌ربخوه‌بوونێ هه‌بوونا ئه‌نفال و كیمیاباران و سه‌ربڕینا كچ و كوڕێن كوردانه، گه‌ر سه‌ربخوه نه‌بین د هه‌رده‌مه‌كێ دا هاتنا هێزه‌كا هۆڤانه یا مینا داعش یا چاڤه‌ڕێكریه و هه‌تاكو ژیان هه‌یه دێ د ته‌نگه‌زاریێ و دلته‌نگیێ دا ژین، ئه‌ڤرۆ پێدڤیه كورد به‌رسڤا خوینا شه‌هیدێن خوه و به‌دبه‌ختى و مال وێریانیا خوه ب سه‌ربخوه‌بوونا وه‌لاتى بده‌نه‌ڤه، ئه‌ڤه كێمترین به‌رسڤه بۆ جانێ شه‌هید و قوربانیدانێن كوردان.
هه‌كه سه‌رۆك بارزانى ب مه‌رجێن گۆڕان ڕازى بوو؟
پارتى هه‌مى ده‌مه‌كێ ته‌كه‌زێ ل سه‌ر وێ چه‌ندێ دكه‌ت كو هه‌مى خه‌بات و شۆڕش و ئارمانجێن وان سه‌خمه‌راتى دامه‌زراندنا ده‌وڵه‌ته‌كا كوردى بوویه و هه‌ر كاره‌كێ پێدڤى بیت دێ ژپێخه‌مه‌ت سه‌ركه‌فتنا ڤى پڕۆژه‌ى ئه‌نجامده‌ن، پارتى بۆچى ب مه‌رجێن گۆڕان ڕازى نابیت و ژپێخه‌مه‌ت ڤێ پرۆژێ دیرۆكى كو هزاران شه‌هیدێن بۆ داى ته‌نازولێ بۆ ڕكێن بزاڤا گۆڕان و هه‌ڤالین وان ناكه‌ت؟!، ئه‌گه‌ر پارتى ب كێماتى دبینیت ته‌نازولێ ژبۆ “یوسف محه‌مه‌د” بكه‌ت، خوه پێدڤیه بیرا پارتى بینین كو پشتى سه‌رهه‌لدانا 1991 چه‌ند مه‌هان ل گه‌ل سه‌رۆكێ حزبا به‌عس یا ژناڤچوویی ڕوونشتن كو به‌رپرسێ پیترین وان نه‌هامه‌تی و تراژیدیان بوو یێن ل سه‌ده‌یا ده‌رباز بوویدا ب سه‌رێ گه‌لێ كورد دا هاتى، واته پارتى ژپێخه‌مه‌ت دۆزه‌كێ یا به‌رهه‌ڤ بوویه ل گه‌ل هوڤه‌كێ روونیت، لێ بۆچى “یوسف محه‌مه‌د” بزاڤا گۆڕان ناپه‌رژینن و بابه‌تى ئێكلا ناكه‌ن؟!، ئه‌ڤه پرسیاره‌كه كو پێدڤیه بهێته‌كرن و ل سه‌ر پارتیه هه‌كه پرسیار ژى لێ نه‌هێته كرن بۆ خه‌لكى ڕۆن بكه‌ن داكو جه‌وهه‌رێ بابه‌تى دیار ببیت.
پشتى بڕینا بۆدجه‌یا هه‌رێما كوردستانێ ژلایێ به‌غداڤه و ل نشكه‌كێڤه چێبوونا شه‌ڕه‌كێ مه‌زن ل گه‌ل هێزه‌كا هۆڤانه‌یا مینا داعش و هاتنا سه‌دان هزار ئاواره‌یان و شكه‌ستنا بهایێ نه‌فتێ، كوردستان كه‌فته د باردۆخه‌كێ زۆر خراب و مه‌ترسیدار دا، ژ هه‌مى لایه‌كێڤه ب تایبه‌ت لایه‌نێ مه‌عنه‌وى و ده‌روونى خه‌لكێ كوردستانێ به‌ر ب هه‌لوه‌ریان و كه‌فتن دچوو، هه‌ر كه‌سه‌كێ ب وژدان كو خوه‌دى زڕه‌یه‌ك ڕه‌وشتێ ڕاستى گۆتنێ بیت دێ په‌رژینیت كو سه‌رۆك “مه‌سعود بارزانى” فاكته‌رێ خۆڕاگریا پێشمه‌رگه بوو و ئه‌گه‌ر كه‌سایه‌تیا وى و كه‌س و كارێن وى نه‌هاتبانه پێش، هه‌م ژلایێ سه‌ربازى، هه‌م ژلایێ دبلۆماسى و سیاسى كو جیهان ڕازى كر ب له‌ز پشتگیریا كوردستانێ بكه‌ن، ئه‌ڤ وڵاته زۆر زه‌حمه‌ت بوو نه‌كه‌ڤیته ژێر كونترۆلا داعشدا، به‌لێ ڕاسته هه‌بوونا به‌رژه‌وه‌ندیێن ستراتیژی یێن ئابوورى و سیاسى و سه‌ربازى یێن وڵاتێن رۆژئاڤا كاریگه‌رییه‌كا مه‌زن ل سه‌ر ڤێ چه‌ندێ هه‌بوو، لێ ژ بلى مالباتا بارزانى چ لایه‌نه‌كێ دیكه رۆله‌كێ پێدڤى یێ پۆزه‌تیڤ هه‌بوو دچێكرنا وان به‌رژه‌وه‌ندیاندا؟ّ!، ب كورتى و كوردى ئه‌گه‌ر 99% به‌رپرسێن ڤى وڵاتى كارێ خوه مینا پێدڤى نه‌كربیت، ئه‌و 1% به‌رپرسیاریا خوه ب دڵسۆزى و سه‌ركه‌فتیانه ئه‌نجامداى ئه‌سته‌مه ژبلى سه‌رۆك بارزانى كه‌سه‌كێ دیكه بیت. ئه‌ڤجا!، ته‌ڤگه‌را گۆڕان و كومه‌ڵا ئیسلامى و هه‌ڤهه‌لویستێن وان چاڤ ل هه‌مى كێماسی و مه‌ترسیان نقاند بوون و هه‌مى هێزا خوه یا ئابوورى و سیاسى و دبلۆماسى ب باشى و خرابى و ئاڤاكرن و تێكدان ب تنێ ل دژى كه‌سایه‌تیا سه‌رۆك “مه‌سعود بارزانى” دمه‌زاخت!، واته ب تنێ بزاڤ دكر وێ خالێ ژناڤ ببه‌ن كو كوردستان ل سه‌ر ڕاوه‌ستیایى و نه‌هه‌ڕفتى!!، ئه‌ڤان كاودانان په‌یامه‌كا ب هێز دا بارزانى و هه‌مى كه‌سه‌كێ پیچه‌كا تێگه‌هشتنێ و وژدانێ هه‌بیت كو نیازێن ته‌ڤگه‌را گۆڕان چالاك كرنا په‌رله‌مانى و ڤه‌گه‌ڕیانا “یوسف محه‌مه‌د” ژبو سه‌رۆكایه‌تیا په‌رله‌مانى نینن، دیار بوو ته‌ڤگه‌را گۆڕان هه‌بوونا گه‌نده‌لیێ و نایه‌كسانیێ هه‌میان دكه‌ته چه‌ك ب تنێ كو ل دژایه‌تیا سه‌روه‌ریا كوردستانێ بكه‌ت نه‌ك ژناڤبرنا گه‌نده‌ڵیێ و نایه‌كسانیێ.
ئه‌گه‌ر پارتى ڕازى بوو و ئه‌و به‌هانه بۆ ته‌ڤگه‌را گۆڕان نه‌هێلان و هه‌رچیا گۆڕان ڤیا ئه‌نجام بده‌ت دێ به‌ر ب چ ئاقاره‌ك ڤه چین؟، د ئێكه‌م پێنگاڤ دا گۆڕان دێ ل په‌رله‌مانى مژارا سه‌رۆكاتیا هه‌رێمێ ئازرینیت و بزاڤێ كه‌ت سه‌رۆك بارزانى ل پێش شه‌مه‌نده‌فڕا خوه نه‌هێلن و لابه‌ن، ده‌مێ لابر دویه‌م پێنگاڤ دێ دژى ته‌وقیتا ریفراندۆمێ ڕاوه‌ستن و دێ بێژن سه‌رۆكه‌كێ نه‌شه‌رعى ئه‌و رۆژێ دیار كرى و پێدڤیه ئه‌م دیار بكه‌ن، هه‌كه دیسا سه‌ركه‌فتن ئیناو ته‌وقیت هه‌لوه‌شاند، دێ بێژن ئه‌م بخوه دێ ته‌وقیته‌كێ دیكه دانین و دێ هه‌ر هه‌یامه‌كێ ب به‌هانه‌یه‌كا نامه‌نتق خوه ل پرۆسسا ڕیفراندۆمێ ڤه‌دزن هه‌تا كو ئه‌ڤ بابه‌تێ سه‌ربخوه‌یی بوونا كوردستانێ سڤك دكه‌ن و ژناڤ دبه‌ن.
ئه‌ڤ حزبێن دژایه‌تییا ده‌وڵه‌تا كوردى دكه‌ن، حزبێن وان ئامراز نینن ژ بۆ خزمه‌تكرنا نه‌ته‌وه‌یی یا كورد، به‌لكى ئه‌وان مینا تۆڕه‌كا مافیا و به‌رژه‌وه‌ندیخوازان حزب یێن دامه‌زراندنى وه‌كو ئامراز بۆ پێكاندنا ئارمانجێن خوه یێن تایبه‌ت و كڕین و فرۆتن ب ئاخ و شه‌ره‌ف و كه‌رامه‌تا كوردستانێ، ب كردارژى نووكه یێ ل به‌رچاڤێن مه دسه‌لمینن.
نيشاندان
WP Facebook Auto Publish Powered By : XYZScripts.com