ئەڤە بۆ ماوەیێ دور رۆژە ل باژێرێ سلێمانیێ حەفت راهێنەرێن پارێزگەها دهۆكێ پشكداری د خولەكا نێڤدەولەتی یا یارییا كیك بۆكسینگێ بن لیڤێل دو دا كرییە ئەوا ژلایێ فیدراسیۆنا یارییا ناڤهاتی ب سەرپەرشتییا فیدراسیۆنا جیهانی و بەرهەڤبوونا وانەبێژێن شارەزا دهێتە ب ڕێڤەبرن.
ل دۆر ڤێ یەكێ مەحفوز ئیبراهیم ئەندامێ فیدراسیۆنا ئیراقێ یارییا كیك بۆكسینگێ گۆت: ل دووڤ بەرنامەیێ رێكخستی یێ فیدراسیۆنا مە وب هەڤكاری دگەل یا جیهانی خولا دویێ یا نێڤدەولەتی ل سەر ئاستێ راهێنەران دێ ل باژێرێ سلێمانیێ هەر دوهی هەتا 28ێ ڤێ مەهێ یا بەردەوامبیت، بڕیارە هژمارەیەكا گەلەك یا راهێنەران پشكدارن كو هەمی ژی ژلایێ یانەیێن وەرزش ڤە هاتینە دەستنیشانكرن ئەوا ئەڤ خولە دێ ژلایێ وانەبێژێن شارەزا یێن نێڤدەولەتی هەر ئێك ژ ئۆكراینی رۆمیۆ ئۆیسا، یێ ئیتالی ئۆمینكۆ ماندالاری، یێ پۆلەندی رادێك لیڤاكۆڤێك و یێ سویدی سامی سلام كو دهێنە هژمارتن شارەزایێن فیدراسیۆنا واكو یا نێڤدەولەتی.
ژلایەكێ دووڤە ناڤهاتی ئەوێ د هەمان دەمدا سەرۆكێ فیدراسیۆنا پارێزگەها دهۆكێ بۆ رۆژنامەیا ئەڤرۆ گۆت: بڕیارە ژ پارێزگەها دهۆكی حەفت راهێنەر پشكداربن و بڤی شێوەیی، سالح كەكۆ ژ یانەیا دهۆك، عەبدولرەزاق سەعید ژ یانەیا ئامێدیێ، نێجیرڤان خەلەف ژ یانەیا زاخۆ، مەحمود عەبدولقادر ژ یانەیا تەناهی، فەرید حەسەن ژ یانەیا شێخان، مەلەڤان كامیران ژ یانەیا پۆلیتەكنیك و ئەحمەد ئیدریس ژ یانەیا گارە.
مەحفوز ئیبراهیمی گەشبینییا خوە دیاركر كو ئەڤ رێژەیا راهێنەرێن پارێزگەهێ گەلەك باشە و گۆت: گەشبینم پشكدارییا حەفت راهێنەرێن پارێزگەهێ دێ مفایی گەهینتە پرۆسێسا پێشئێخستنا ئاستێ یارییا كیكبۆكسینگە ل پارێزگەهێ و هەمی راهێنەر خودان شیان و ئەڤ خولە دێ پلەیا وان بلند كەت ل سەرئاستێن جودا.
حەفت راهێنەرێن پارێزگەهێ دێ پلەیا خوە یا نێڤدەولەتی بلند كەن
نيشاندان