كوڕێ‌ باژێرێ‌ دهۆكێ‌ و دادڤانێ‌ نێڤدەولەتی زێرەڤان سالح فەقی بۆ یارییا كیك بۆكسینگێ‌ هاتە دەستنیشانكرن ل سەر ئاستێ‌ پلەیا دادڤانێن نایاب بۆ وەرگرتنا میدالییا زێری، پشتی شیایی د قارەمانییا جیهانێ‌ یا ڤەكری دا زێدەتری 30 یارییان ب سەركەفتییانە بڕێڤەببەت و بیتە جهێ‌ سەرنجراكێشا سەرپەرشت و پشكدارێن قارەمانیێ دا، ئەوا ل دووماهییا مەها بۆری ژلایێ‌ فیدراسیۆنا نێڤدەولەتی یا كیكبۆكسیگێ‌ WAKO ل باژێرێ‌ ئستەنبۆل یا توركیا رێكئێخستن.
ل دۆر ڤێ‌ یەكێ‌ دادڤانێ ناڤهاتی د داخویانیەكێ‌ دا بۆ رۆژنامەیا ئەڤرۆ گۆت: شانازیێ‌ دبەم وەكو ئێكەم دادڤانێ‌ كورد د قارەمانییا جیهانێ‌ یا ڤەكری دا ببمە جهێ‌ رازیبوونا رێكخەر و هەمی پشكدارێن قارەمانیێ‌ دا، ئەڤە ژی دەستكەفتەكە نە بتنێ‌ بۆ من بەلكو بۆ كوردستانێ‌ و پارێزگەها دهۆكێ‌ و دیسان ژبەر ڤێ‌ چەندێ‌ فیدراسیۆنا نێڤدەولەتی واكۆ ئەز هەلبژارتیمە ژبۆ ب دەستڤە ئینانا میدالییا زێری یا ئێك ژ باشترین دادڤانێن قارەمانیێ‌ دا،
هەروەسان زێرەڤان سالح گۆت: دەرئەنجامێ‌ ئاستێ‌ من دهێتە پێشبینیكرن ل دووڤ پلەكرنا دادڤانان بۆ قارەمانیەكا دی یا جیهانی ل ئۆرۆپا بهێمە داخوازكرن و ئەڤە ژی دەستكەفتەكێ‌ دی یە بۆ كوردستانێ‌، لڤێرە ئەز سۆپاسییا خێزانا خوە یا یارییا كیك بۆكسینگێ‌ دكەم ژ فیدراسیۆنا پارێزگەهێ‌ و ئیراقێ‌ و راهێنەر سالح كەكو و هەڤالێن خوە كو هەردەم پشتەڤانێن من بووینە، دیسان سۆپاسییا د. ئەحمەد قاسم سەرۆكێ‌ لژنەیا ئۆلمپی لەقێ‌ دهۆكێ‌ و یانەیا دهۆكێ‌ ژی كو ئەو ژی پشتەڤان بووینە، من هیڤیێن مەزن هەنە كو ل سەر ئاستێ‌ جیهانێ‌ دادڤانیێ‌ بكەم و دێ‌ رژدبم ل سەر كارێ‌ خوە هەتا بگەهمە ئەوێ‌ ئارمانجێ‌.

قەیس وەیس:

ئەندامێ‌ فیدراسیۆنا فوتبۆلا ئیراقێ‌ دیار كر سەرۆكێ‌ فیدراسیۆنێ‌ ب شیوەكێ‌ ئێكلایانە سەرەدەریێ‌ د مەزاختنا پارەیی دا دكەت و د نوكە دا خەزینەیا فیدراسیۆنێ‌ ڤالایە و قەرداربووینە.
غالب ئەلزاملی بۆ دەزگەهێن راگەهاندنێ‌ گۆت: عەدنان درجال سەرۆكێ‌ فیدراسیۆنا ئیراقێ‌ یا فوتبۆلێ‌ نا هێلیت چو ئەندام كار ب مەزاختنا پارەیەكی دا بكەت ئەوێن بۆ كار و چالاكیەكا فیدراسیۆنێ‌ دا بهێتە ب كارئینان بێ‌ رازیبوونا وی، هەروەسان هەر مەزاختیەكێ‌ دكەت مە ئاگەهدار ناكەت تا گەهشتییە وێ‌ ڕادەیی د نوكە دا فیدراسیۆن قەردار بوویە و چو د خزینەیا وێ‌ دا نەمایە.
هەروەسان گۆت: سەرۆكێ‌ فیدراسیۆنێ‌ بێ‌ رازیبوونا مە چەندین پێنگاڤ هاڤێتینە و بێ‌ ئاگەهدارییا مە چەندین كۆمبوون دگەل لایەنیێن دەرڤە هاتینە كرن ژ وانا دەستەكا لالیگایی كو بەری چەند خولەكا پێحەسیاینە، لەوما ئەم هندەك ئەندام ب نڤێسارەكا فەرمی داخواز ژ سەرۆك وەزیران محەمەد شیاع ئەلسودانی كرییە دۆڤچوونا ڤی بابەتی بكەت و چارەسەربكەت.

شاهۆ فەرید:

د زنجیرەیا پێناسە و دیرۆك و بەرهەڤیێن هەلبژارتیێن پشكدار د یۆرۆیا 2024ێ‌ دا ئەڤرۆ ژی دێ‌ پێزانێن دو كۆمێن دی یێن یۆرۆیێ‌ دیاركەین ئەوا بڕیارە هەڤڕكیێن وێ‌ ل 14ێ‌ ڤێ‌ مەهێ‌ وەلاتێ‌ ئەلمانییا مێڤاندارییا وێ‌ بكەت تێدا 24 هەلبژارتی هاتینە بەلاڤكرن ل سەر شەش كۆمان، بۆ هژمارەیا ئەڤرۆ دێ‌ ل سەر هەردو كۆمێن سێیێ‌ و چاری پێناسە كەین.
كۆما سێیێ‌: سلۆڤینیا، دانیمارك، سربیا، ئنگلتەرا.
د ڤێ‌ كۆمێ‌ دا بیت ئەركێ‌ ئنگلتەرا بۆ دەربازبوون بەر ب قۆناغا دویێ‌ ب زەحمەت نەبیت، هەرچەندە دێ‌ بیتە جارا 12ێ‌ پشكداری یۆرۆیێ‌ بیت و نەشیایە چو ناسناڤان ژ ب دەستڤە بینت، ئنگلتەرا خودانا درێسێ‌ سێ شێران ل یۆرۆیا بۆری گەهشتبوو یارییا دووماهیێ‌ لێ‌ دگەل هەلبژارتیێ‌ ئیتالیا ب لێدانێن پەنەلتیان ناسناڤ ژ دەستداـ لێ‌ بۆ وەرزێ‌ ئەڤ سالە هەمی پێشبینی بۆ هندێ دچن ناسناڤی دەستخوەڤە بییت، دبیت ب دوورئێخستا گرێلیچ و ماگوایری كارتێكرنێ ل سەر تیما ئنگلتەرایێ‌ نەكەت ئەوا دێ‌ ب پێكهاتێ پێشبینیكری بڤی شێوەیی بیت، گولپارێز بیگفورد، هێلا بەرەڤانیێ‌ ووكر، گومێز، تربیر، كونسا، هێلا ناڤین، ئارنولد، رایس، گوردن، هێلا هێرشبەریێ‌، هاری كین و بێلینگهام و فودین، هەلبژارتیێ‌ دویێ‌ یا ڤێ‌ كۆمێ‌ دانیماركە ئەوا بۆ جارا هەشتێ‌ یە پشكداری یۆرۆیێ دبیت، دبیت ئەو پشكداری نەبیت بۆ ناسناڤی لێ‌ سۆپرایز هەردەم دهێنە پێش، هەلبژارتیێ‌ دانیماركێ‌ دبیت ب پێكهاتێ پێشبینیكری ئەوژی، گۆلپارێز، رووناو، هێلا بەرەڤانیێ‌، كرستنسن، ئندرسن، ڤیستگارد، هێلا ناڤین پاهۆـ هویبرگ، نۆرگات، ماهیلی، ئێركسن، هێلا هێرشبەری، وێنت، هویلەند، هەلبژارتییا سێیێ‌ یا ڤێ‌ كۆمێ‌ سربیا یە كو دهێتە هژمارتن ئێك ژ هەسپێ رەشێ دهێتە دیتن بۆ هەر قارەمانیەكێ‌، شارەزایێن وەرزشی یێن ئۆرۆپایێ‌ بۆ ڤێ‌ یۆرۆیێ‌ ژی ئەڤچەندە دایە زانین، سەرباری بتنێ‌ چار جاران پشكداری د یۆرۆیێ‌ دا كرییە، پێكهاتێ پێشبینكری گۆلپارێز، ملینكوڤێچ، هێلا بەرەڤانیێ‌، ساباجێكـ گودیل، فێلكوڤێچ، بافلوفێچ،هێلا ناڤین، مسكوڤێچ ،ساڤێچ، تادێچ ، هێلا هێرشبەریێ‌، گایسینوڤێچ، زڤیدكوڤێچ، ڤلاهوڤێچ،چارەمین هەلبژارتی د كۆما سێیێ‌ دا هەلبژارتیێ‌ سلۆڤینیایە ئەوا دبیتە جارا دویێ‌ د دیرۆكا خوە دا پشكداری قارەمانییا نەتەوەیێن ئۆرۆپا دبیت، دبیت ئەو هێز و شیان نەبن دەربازبیتە قۆناغا دویێ‌ ل دووڤ دیرۆكا پشكداریێن وێ‌، پێكهاتیێ پێشبینكری گۆلپارێز، بێلێچ، هێلا بەرەڤانیێ‌، كارگن، دوركوزێچ، بیول ،زانگ، هێلا ناڤین، هورفات، تیشرێن، كوریتێچ، هێلا هێرشبەران، سوپرار، ملاكار و ڤێپكێن.
كۆما چارێ‌: پۆلەندا، هۆلەندا، نەمسا، فرەنسا.
دهێتە هژمارتن ئێك ژ كۆمێن ئاگرین د قارەمانییا نەتەوەیێن ئۆرۆپا یۆرۆیا 2024ێ‌ ژ بەرهەبوونا هەلبژارتیێن ب هێز د كۆمێ‌ دا ئەوێن د یاریێن دووماهیێ‌ و بلندكرنا ناسناڤان هاتینە دیتن، دبیت پێشبین ڤێ‌ كۆمێ‌ بۆ رێزبەندیا و سەركەفتنێ‌ ب زەحمەتبن و جەنگێ پلێتانە بۆ دەربازبوونا قوناغا دیڤدا ژی ئاگرینە، هەلبژارتیێ‌ هۆلەندا ئێك ژ بەربژارێن ناسناڤی كود بیتە پشكداریا وێ‌ یا 11ێ‌ لێ‌ بتنێ‌ ئێك جار ناسناڤ ب دەستخوەڤە ئینایە ل سالا 1988ێ‌ بوو، ل دووڤ راپۆرتێن رۆژنامەڤانی دبیت پشت گەرمیێ‌ پێكهاتیێ‌ خوە یێ‌ دیاركری بیت ئەوژی، گۆلپارێز، فێربونك، هێلا ناڤین، دیلاخت، بلێند، دیڤان، توریدا، هێلا ناڤین، شوتن، ڤینالدوم، كرافنبرك، هێلا هێرشبەریێ‌، بروبی، دی پای، فرین بۆنك، هەلبژارتیێ‌ دویێ‌ یێ‌ سەنگا خوە هەیی د یۆریۆیێ‌ دا ئەوژی نەمسایە، سەرباری پشكداریێن وێ‌ یێن كێم كو جار چاران بوویە لێ‌ بوویە هەلبژارتییەكێ‌ بزەحمەت تایبەت ل ڤان سالێن دووماهیێ‌ دا، پێكهاتێ پێشبینیكری گۆلپارێز، بێنتێز، هێلا بەرەڤانیێ‌، دانسو، فوبر، براس، بوستێچ، هێلا ناڤین، سویلات، كرێلێچ، باومگارتنر، ویمیر، شمێد، هێلا هێرشبەریێ‌، ئارنانتوڤێچ، دوەم هەلبژارتیێ‌ ب هێز و بەربژار بۆ ناسناڤی ئەوژی فرەنسایە كو دهێتە نیاسین دیكلێن شینین ل ئۆرۆپا ئەوا دهێتە گۆتن دڤێن ئەڤ جارە هەر رێكەكا هەبیت بگەهنە ناسناڤێ خوە یێ سێیێ‌، پێكهاتێ پێشبینیكری گۆلپارێز، ماینیان، هێلا بەرەڤانیێ‌، كوندی، كوناتی، ئوبامیكانۆ، هێلا ناڤین،كۆلۆمۆانی، كانتێ، فوفاننا، هێرناندێز، هێلا هێرشبەریێ‌، مپاپی، گریزمان و تورام، هەلبژارتیێ‌ سێیێ‌ ئەوژی پۆلەندا كو ئێك ژ هەلبژارتیێن ب هێزە و خودان سەنگە د ناڤ قارەمانیێ‌ دا و پرانییا یاریزانێن وێ‌ خودان شیانن د یانەیێن ئۆرۆپادا ب سەركێشییا لیڤاندۆڤێسكی، پشكداریا پێنجێ‌ یە د یۆرۆیێ‌ دا دكەت هەرچەندە بێ‌ ناسناڤ بوویە لێ‌ بوویە ستریەكا دژوار بەرانبەر هەلبژارتیێن د كۆمێن خوە دا، ل دووڤ داخویانیێن بەرپرسێن وەرزشی یێن پۆلەندایێ‌ ئەو گەشبینن بۆ قۆناغێن دریژ بچن، پێكهاتیێ‌ دووماهیێ‌ یێ‌ پێشبینیكری ، گۆلپارێز، وورد، هێلا بەرەڤانیێ‌، روودون، دەیڤێز، میڤاپ ، هێلا ناڤین، روبرتسون، جێمس، ئێمپادۆ، ولیەمس، هێلا هێرشبەریێ‌، جونسون و لێڤاندوڤیسكی و مۆرۆ.
ئەو شەش كۆمێن هاتینە بەلاڤكرن
كۆما ئێكێ‌: ئەلمانیا، ئیسكوتلەندا، هنگاریا، سویسرا.
كۆما دویێ‌: ئیسپانیا، كرواتیا، ئیتالیا، ئەلبانیا.
كۆما سێیێ‌: سلۆڤینیا، دانیمارك، سربیا، ئنگلتەرا.
كۆما چارێ‌: پۆلەندا، هۆلەندا، نەمسا، فرەنسا.
كۆما پێنجێ‌: بەلجیكا، سلۆڤینیا، رۆمانیا، ئۆكراین.
كۆما شەشێ‌: پۆرتۆگال، توركیا، چیك، جورجیا.
قارەمانێن یۆرۆیێ‌
ل دووڤ دیرۆكا ئێكەم قارەمانی ل سالا 1960 هاتییە كرن وی دەمی هەلبژارتیێ‌ ئێكەتییا سوڤیەتی ئێكەم ناسناڤ ب دەستڤەئینابوو، ب گشتی 16 قارەمانی هاتینە ئەنجامدان هەر ژ سالا ناڤهاتی، هەردو هەلبژارتیێن ئەلمانیا و ئسپانیا خودان پترترین ناسناڤن هەر ئێك سێ‌ جاران ب دەستڤە ئینایە، هەردو هەلبژارتیێن ئیتالیا و فرەنسا دو جاران، هەر ئێك ژ پۆرتۆگال، یونانستان، دانیمارك، هولەندا، چیكوسلۆڤاكیا و ئێكەتییا سوڤیەتی جارەكێ‌ ب دەستڤە ئیناینە.