ژێدەرەكێ تایبەت راگەهاند، مەسرور بارزانی، سەرۆكێ‌ حوكمەتا هەرێما كوردستانێ‌ دێ بەرێ بنیاتی بۆ پڕۆژەیێن دروستكرنا هەردو پاركێن پیشەسازی و ئالۆكا و پڕۆژەیێ جۆتسایدكرنا ڕێكا باعەدرێ بۆ دهۆكێ دانیت.
پاركا پیشەسازی د كەڤیتە ڕۆژهەلاتێ سەنتەرێ باژێرێ دهۆكێ و ل سەر ڕووبەرێ 46 دۆنەمێن ئەردی دێ هێتە ئاڤاكرن.
پاركا ئالۆكا دكەڤیتە باكوورێ ڕۆژئاڤایێ باژێرێ دهۆكێ و مەزنترین پاركا كوردستانێ و ئیراقێ یە و ل سەر ڕووبەرێ 900 دۆنەمێن ئەردی دێ هێتە دروستكرن.
سەردار شێخ یەحیا، دەڤەردارێ‌ شێخان ڕاگەهاند، بڕیارە سوباهی مەسرور بارزانی، سەرۆكێ‌ حوكمەتا هەرێما كوردستانێ‌ بەرێ بنیاتی بۆ پڕۆژەیێ جۆتسایدكرنا جاددەیا باعەدرێ بۆ دهۆكێ ب دانیت.
ڕێكا د ناڤبەرا هەولێرێ بۆ دهۆكێ ب تنێ 26 كیلۆمەترێن ئێك سایدی مایە، ئەو ژی ل باعەدرێ هەتا دهۆكێ یە و گۆت: «دەمێ پڕۆژەی دو سالن و پێنج ئۆڤەرپاس د ناڤ دا دێ‌ هێنە دروستكرن».

فارس عیسا، سەرۆكێ‌ نوونەرایەتیا حوكمەتا هەرێما كوردستانێ‌ ل بەغدا، دوهی رۆژا ئێكشەمبی رێكەفتی 2/6/2024 ل نڤیسینگەها خوە یا تایبەت پێشوازی ل (ئایدن مەعروف) وەزیرێ‌ كاروبارێن پێكهاتەیان ل حوكمەتا هەرێما كوردستانێ‌ كر، د روونشتنەكێ‌ دا بەحسێ‌ رەوشا هەرێما كوردستانێ‌ و ئیراقێ‌ و دەڤەرێ‌ ب گشتی هاتە كرن، هەروەسا بەحسێ‌ سەرەدانا ڤێ‌ دووماهیێ‌ یا مەسرور بارازانی، سەرۆكێ‌ حوكمەتا هەرێما كوردستانێ‌ بۆ بەغدا و كۆمبوونێن وی ل گەل مەزنە سەركردە و بەرپرسێن ئیراقێ‌ و ئەنجامێن وێ‌ یێن باش هاتە كرن.
هەروەسا هەردو لایان بەحسێ‌ رەوشا پێكهاتە و كێم نەتەوە و ئایینان ل ئیراقێ‌ ب شێوەیەكێ‌ گشتی و هەرێما كوردستانێ‌ ب شێوەیەكێ‌ تایبەتی كر، هەروەسا دوپاتی ل سەر پاراستنا ماف و ئەركێن وان د دستووری دا هاتە كرن، هەروەسا وەزیرێ‌ كاروبارێن پێكهاتەیان ل حوكمەتا هەرێما كوردستانێ‌ ئاماژە ب سیاسەتا حوكمەتا هەرێما كوردستانێ‌ كر بۆ پاراستن و دەستەبەركرنا مافێن هەموو كێمەنەتەوەیان ل هەرێما كوردستانێ‌ و رژدیا بەرێز مەسرور بارازانی، سەرۆكێ‌ حوكمەتا هەرێما كوردستانێ‌ بۆ پشكداریكرنا هەر ئالیەكی د پرۆسەیا دیموكراتی دا ل هەرێما كوردستانێ‌، ب تایبەت ژی د هەلبژارتنێن پەرلەمانێ‌ كوردستانێ‌ دا.
دیار ژی كریە كو هەردەم حوكمەتا هەرێما كوردستانێ‌ ب چاڤەكێ‌ یەكسان ل هەموو ئایین و نەتەوەیێن ل هەرێما كوردستانێ‌ دژین دنێڕیت و هەردەم خەمخۆر و پشتەڤانا مافێن وانە.

هەولێر، قائید میرۆ:

جێگرا سەرۆكێ لیژنا چاندنێ ل پەرلەمانێ ئیراقێ دیار كر، پشتی بزاڤێن سەرۆكێ حوكمەتا هەرێما كوردستانێ بڕیارە رێژەیا وەرگرتنا بەرهەمێ گەنمێ جۆتیاران بهێتە زێدەكرن و دبێژیت: ئەڤرۆ بڕیار دێ هێتەدان چەند رێژەیا گەنمی بهێتە وەرگرتن.
زۆزان كۆچەر، جێگرا سەرۆكێ لیژنا چاندنێ ل پەرلەمانێ ئیراقێ بۆ رۆژناما ئەڤرۆ دیار كر، لیژنەیەك هەیە بناڤێ لیژنا 57 بڕیار هاتبوودان ب تنێ 30%ێ بەرهەمێ گەنمێ جۆتیارێن هەرێما كوردستانێ بهێتە وەرگرتن و گۆت: «د دووڤ دا رێژە هاتە زێدەكرن بۆ 600 هزار تەنێن گەنمی هەتا 700 هزار تەنان، بەلێ هێشتا ئەم رازی نینین ل دۆر پشكا هەرێما كوردستانێ، چونكی بەرهەمێ گەنمێ هەرێما كوردستانێ دووملیۆن تەنن، دوماهی رێژە 700 هزار تەن هاتینە دیاركرن، بەلێ د سەرەدانا خۆ یا بۆ بەغدا دا سەرۆكێ حوكمەتا هەرێما كوردستانێ داخواز ژ سەرۆكوەزیرێن ئیراقێ كر هاریكاریا جۆتیاران بهێتە كرن».
زۆزان كۆچەر گۆتژی: «پشتی بزاڤێن مەسرور بارزانی، سەرۆكێ حوكمەتا هەرێما كوردستانێ بڕیارە ئەڤرۆ هەتا سوبەهی رێژەیا گەنمێ هەرێما كوردستانێ بهێتە زێدەكرن، ئەڤرۆ بڕیار ل دۆر زێدەكرنا پشكا هەرێما كوردستانێ دێ هێتەدان و ئەز باوەر دكەم بگەهیتە 800 هەتا 900 هزار تەنێن گەنمی، بهایێ كڕینا گەنمی ژی هاتیە دیاركرن، بۆ هەر تەنەكێ 850 هزار دینارن، گەنمێ جۆتیاران مەترسی ل سەرە و مە داخواز كریە لەز بهێتە كرن نێزیكە دەرگەهێ سایلۆیا بهێتە ڤەكرن».

ئاكرێ‌، رەمەزان زەكەریا:

د چارچوڤێ بجهئینانا پڕۆژێن خزمەتگوزاری دا ل ناوچەداریا دینارتە جاددەیێن چار گوندان دهێنە قێركرن.
ئەندازیار محسن میرانی، رێڤەبەرێ سەخبێری و پاراستنا رێك و پران ل ئاكرێ بۆ ئەڤرۆ گۆت: «رێكێن گوندێن كورتكا نوو و كەڤن و گوندێن شڕتا و ئاڤدەلكا دهێنە قێركرن».
گۆتژی: «ب درێژاهیا 10 كیلۆمەتران و 500 مەتران جاددە ل ناوچەداریا دینارتێ ب گوژمێ ملیارەك و 773 ملیۆن و 619 هزار دیناران دهێنە بجهئینان، ب تەمامبوونا ڤی پڕۆژەی دێ پتری 600 سەرۆك خێزان مفاداربن».

ب مەرەما پشتەڤانیكرنا ئافرەتان ژ بۆ پەیداكرنا ئابۆرەكێ‌ سەربخوە و پتر خزمەتكرنا خێزانێن وان و ژ بەر كێمیا هەبوونا دەلیڤەیێن كاری ل شێلادزێ‌، خۆلەكا كارێن دەستی بۆ هەژمارەكا ئافرەتان هاتە ڤەكرن.
ئاخچین جبرائیل، بەرپرسا جڤاتا ئافرەتان ل ئامێدیێ‌ بۆ ئەڤرۆ گۆت: «ئەم ب ئەركێ‌ خوە دبینین، كو خوە ل ئافرەتێن شێلادزێ‌ بكەینە خودان و مە ب هەماهەنگی ل گەل تایێ‌ خوە یێ‌ ناڤەندا شێلادزێ‌ خۆلەكێ‌ بۆ هەژمارەكا ئافرەتان ڤەكەین و دەستێ‌ وان ئافرەتان بگرین و شیانێن وان ب هێز بێخین، كو د پاشەرۆژێ‌ دا بشێن هاریكاریا خێزانێن خوە بكەن، لەورا مە ئەڤ پێنگاڤە هاڤێت و دێ‌ ل سەر ڤی ئەركێ‌ پیرۆز د بەردەوام بین».

ئامێدیێ، مەحمود نهێلی:

ژ ئەگەرێ بڕینا داران دادگەها دێرەلۆكێ‌ بڕیارا سزادانێ ب گوژمەكێ پارەی بۆ هەشت كەسان دەركر.
ژێدەرەكی ژ پۆلیسێن دارستانێ بۆ رۆژناما ئەڤرۆ دیار كر، ل مەها یازدە یا سالا بۆری چەند كەسەك راببوون ب بڕینا دارێن تەڕ ل ئاقارێ گوندێ هاریكا ل سنوورێ ناوچەداریا دێرەلۆكێ‌ و گۆت: «ل سەر بڕینا ڤان داران هەشت كەس هاتبوونە دەستەسەر كرن و پشتی ڤەكۆلینان ب كەفالەت هاتبوونە ئازادكرن».
وی ژێدەری دیار ژی كر، ب بڕیارا دادگەها دێرەلۆكێ‌ ئەو هەشت كەسە ب گوژمێ سێ ملیۆن دیناران بۆ هەر ئێكی یان ژی زیندانكرن بۆ دەمێ‌ شەش هەیڤان هاتنە سزادان و گۆت: «ئەم داخوازین وەلاتی خوە دوور بكەن ژ بڕینا داران، هەم ژ بۆ شوونكرنا دارستانێ و پاراستنا ژینگەهێ، هەم ژی ژ بۆ پاراستنا سلامەتی و دووركرن ژ سزادانێ و پێرابوونێن یاسایێ».
دیسا هەمان ژێدەری دیار ژی كر، هەر ل سەر گرتن و كوشتنا كەوان چەند كەسەكێن دی ژی هاتینە دەستەسەركرن و نوكە ل ژێر ڤەكۆلینێ دانە.