د. عەلی تەتەر، پارێزگارێ دهۆكێ ب ئامادەبوونا دەڤەردارێن دهۆكێ‌ و سێمێلێ دوهی 7/5/2024 سەرپەرشتیا كۆمبوونەكا تایبەت ل گەل رێڤەبەرێن فەرمانگەهێن پەیوەندیدار ل دۆر بەلاڤكرنا پارچەیێن ئەردی ل سەر فەرمانبەرا كر.
د كۆمبوونێ دا بەحسێ بڕیارا سەرۆكێ حوكمەتا هەرێما كوردستانێ بۆ بەلاڤكرنا پارچەیێن ئەردی ل سەر فەرمانبەرێن پارێزگەهێ ئەوێن بەری نوكە رازیبوون هەی و رێكارێن یاسایی یێن ئامادەكرنا پارچەیێن ئەردی بۆ بەلاڤكرنێ ل سەر فەرمانبەران ب گشتی هاتە كرن.
پارێزگارێ دهۆكێ تەكەز كر كو هەموو فەرمانگەهێن پەیوەندیدار كاروبارێن ئەنجامدانا ڤێ پرۆسێ ب رێكوپێكی و ل دووڤ رێنما و یاسایێن حوكمەتا هەرێما كوردستانێ پارچەیێن ئەردی بەرهەڤ بكەن بۆ وێ یەكێ ب یەكسانی ل سەر فەرمانبەر و تەخێن جڤاكی ئەوێن بەری نوكە رازیبوون هەی بەلاڤ بكەن و پشتەڤانیا پارێزگەهێ بۆ بجهئینانا ڤێ پرۆسێ دیار كر.
هەر د كۆمبوونێ دا لژنەكا بلند ب سەرۆكاتیا پارێزگارێ دهۆكێ و ئەندامەتیا دەڤەردار و رێڤەبەریێن پەیوەندیدار هاتە پێكئینان بۆ بجهئینانا بڕیارا سەرۆكێ حوكمەتا هەرێما كوردستانێ ل دور بەلاڤكرنا پارچەیێن ئەردی.

ب بەرهەڤبوونا مارك سترۆ، قونسلێ گشتی یێ ئەمریكا ل هەرێما كوردستانێ و وارشین سەلمان، دەڤەردارێ ئامێدیێ و دكتۆر حەسەن قاسم، سەرۆكێ رێكخراوا كوردستان بۆ شوونواران دوهی ٧/٥/٢٠٢٤ پڕۆژەیێ نووژەنكرنا دەرگەهێ بەهدینان یێ ئامێدیێ هاتە ڤەكرن، كو ژ لایێ زانكۆیا كولۆمبیا و ب پشتەڤانیا دارایی یا حوكمەتا ئەمریكا ڤە ب گوژمێ ٧٥٠ هزار دۆلاران دهاتە نووژەنكرن.
مارك سترۆ، قونسلێ ئەمریكا ل هەرێمێ‌ د كۆنگرەكێ رۆژنامەڤانی دا دیار كر، ب شانازی ڤە ئەو ئەڤرۆ ل ڤێرێ ئامادەبووینە ژ بۆ ڤەكرنا ڤی پڕۆژەی و گۆت: «نووژەنكرنا دەرگەهێ بەهدینان گەلەك گرنگیا خوە هەیە، لەو حوكمەتا ئەمریكا گوژمێ 750 هزار دۆلاران ژ بۆ پاراستنا ڤی دەرگەهی مەزاختن و دیرۆكا وی بۆ چەرخێ سێیێ ڤەدگریت و پێكڤەژیانا هەموو ئول و نەتەوەیان ل ڤێ دەڤەرێ د سەلمینیت».
قونسلێ ئەمریكا گۆتژی: «وەبەرهێنانا مە ل ڤێ دەڤەرێ بەلگەیە ل سەر بهێزبوونا پەیوەندیێن مە ل گەل هەرێما كوردستانێ و ئەڤ پەیوەندیە دێ بەردەوام بن، ئەم ل نێزیك و پێكڤە د بیاڤێن جڤاكی، كەرتێ بازرگانی و هونەری و خواندنێ و سێكتەرێن ئاسایشێ‌ دا كار دكەین».
وارشین سەلمان، دەڤەردارێ ئامێدیێ سوپاسیا قونسلێ ئەمریكا كر كو ل دەڤەرا ئامێدیێ بەرهەڤبوویە و گۆت: «پڕۆژێ نووژەنكرنا دەرگەهێ ئامێدیێ ژ لایێ زانكویا كولۆمبیا ڤە و ب پشتەڤانیا دارایی یا حوكمەتا ئەمریكا د هاتە نووژەنكرن و بەرهەڤبوونا قونسلێ ئەمریكا ژی ل ڤێرێ ژ بۆ راگەهاندنا دووماهی هاتنا كارێ نووژەنكرنا ڤی دەرگەهی بوویە، دیسا نێزیكی دو سالایە ب رەنگەكێ زانستی كار د نووژەنكرنا ڤی دەرگەهی دا دهاتە كرن».

وەزیرێ باژێڕڤانی و گەشتوگوزارێ ل حوكمەتا هەرێما كوردستانێ‌ ئاشكرا كر، كار بۆ بجهئینانا بەلاڤكرنا پارچەیێن ئەردی دهێتە كرن و بڕیارە سوبەهی 9/5/2024 كۆمبوونەكا دی یا بەرفرەه ب مەرەما بەرهەڤیێن بەلاڤكرنا پارچەیێن ئەردی بهێتە ئەنجامدان.
ساسان عەونی، وەزیرێ باژێڕڤانی و گەشتوگوزارێ راگەهاند: «بەرپرسێن باژێڕڤانیان ل هەموو پارێزگەه و ئیدارەیێن سەربخۆ د كۆمبوونا سوبەهی دا دێ ئەوان نەخشەیێن هاتینە داخوازكرن بۆ بەلاڤكرنا پارچێن ئەردی پێشكێشی وەزارەتێ كەن، ب مەرەما ڤەدیتنا پارچێن ئەردی د ناڤا ماستەرپلانێن باژێڕڤانیان دا».
ناڤهاتی گۆت: «ئەو باژێڕڤانیێن پێدڤی ب بەرفرەهكرنا سنوورێ ماستەرپلانێ هەی، ماستەرپلانا وان دێ هێتە بەرفرەهكرن، داكو دەلیڤەیا بەلاڤكرنا پارچێن ئەردی هەبیت، چونكی حوكمەت ل سەر بەلاڤكرنا پارچێن ئەردی یا رژدە».

دهۆك، لەزگین جوقی:

سەرۆكێ لیژنا ساخلەمیێ ل پەرلەمانێ ئیراقێ دیار كر، پشتی دروستكرنا دو نەخۆشخانێن 100 تەختی ل باشیكێ‌ و تلكێفێ‌، بڕیارە ل ڕۆژێن بهێن نەخۆشخانا 100 تەختی یا شنگالێ ژی بكەڤیتە د وارێ‌ بجهئینانێ دا، ل ناوچەداریا زوممار ژی نەخۆشخانەكا 50 تەختی دهێتە بجهئینان.
د. ماجد شنگالی، سەرۆكێ لیژنا ساخلەمیێ ل پەرلەمانێ ئیراقێ بۆ ئەڤرۆ گۆت: «پشتی مە گەلەك بزاڤ بۆ دروستكرنا نەخۆشخانێن گشتی ل ناوچەیێن كوردستانی یێن دەرڤەی ئیدارا هەرێمێ‌ كرین، هەژمارەیەكا نەخۆشخانەیێن گشتی ل وان دەڤەران كەفتنە د وارێ‌ بجهئینانێ دا، بڕیارە ل چەند ڕۆژێن بهێن نەخۆشخانا 100 تەختی یا شنگالێ ژی بكەڤیتە د وارێ‌ بجهئینانێ دا، دیسا بڕیارە ل دەڤەرداریێن شێخان و مەخموور و ناوچەداریا گوێڕ ژی نەخۆشخانێن گشتی بهێنە دروستكرن.

هەولێر، قائید میرۆ:

پەیڤدارێ رێڤەبەریا گشتیا حەج و عومرێ ل هەرێما كوردستانێ دیار كر، دووماهیا ڤێ مەهێ‌ ئێكەم كاروانێ حەجیێن هەرێما كوردستانێ بەر ب وەلاتێ سعوودیێ دێ ب ڕێكەڤیت و هەموو بەرهەڤی ژی بۆ ئەنجامدانا پرۆسا حەجا ئەڤ سالە هاتینە كرن.
كاروان ستونی، پەیڤدارێ حەج و عومرا هەرێما كوردستانێ بۆ رۆژناما ئەڤرۆ دیار كر، حوكمەتا هەرێما كوردستانێ ب رێیا وەزارەتا ئەوقاف و كاروبارێن ئایینی هەموو بەرهەڤی بۆ ئەنجامدانا فەریزا حەجا ئەڤ سالە ئەنجامداینە و گۆت: «بڕیارە دوماهیا ڤێ مەهێ‌ ئێكەم كاروانێ حەجیێن هەرێما كوردستانێ بەر ب وەلاتێ سعوودیێ ب ڕێكەڤیت و رێڤەبەریا گشتیا حەج و عومرێ ژی بەرهەڤیێن خوە ل گەل تیمێن تایبەت بۆ ڤەگوهاستنا حەجیان كرینە».
كاروان ستونی گۆتژی: «هەتا دوماهیا مەها داهاتی چوونا حەجیان دێ بەردەوامبیت، هزار و 500 حەجی ب رێیا هشكانی دێ گەشتا حەجا ئەڤ سالە ئەنجام دەن و یێن دی ژی ب رێیا فڕۆكخانێ، هەر سال هەژمارەكا تیمێن حوكمەتێ ل وەلاتێ سعوودیێ دهێنە جێهگیركرن بۆ خزمەتكرنا حەجیان و ئەز دشێم بێژم ژ لایێ خزمەتا حەجیان ڤە هەرێما كوردستانێ نموونەیە و خزمەتەكا بەرچاڤ دهێتە كرن».

زاخۆ، دلۆڤان هالۆ:

ڕێڤەبەریا هاتنوچوونا ئیدارەیا سەربخوە یا زاخۆ، د ڕاگەهاندنەكێ دا، كو ئاراستەیی وەلاتی و شۆفێران كرییە، تێدا هاتیە: ڕاوەستاندنا تڕۆمبێلان ل جاددەیا كۆڕنیشێ پرا دەلال هاتیە قەدەغە كرن.
ڕێڤەبەریا هاتنوچوونا ئیدارەیا سەربخوە یا زاخۆ د وێ‌ ڕاگەهاندنێ‌ دا خویا كریە كو جاددەیا كۆرنیشێ پرا دەلال هەر ژ تڕافیكلایتا نەخوەشخانا ژیان هەتا فلكا گولان راوەستاندنا تڕۆمبێلان هاتیە قەدەغەكرن، دیسا جاددەیا ناڤا بازاڕی ژی هەر ژ خوارنگەها هۆستا كەمال هەتا فلكا بارزان ڕاوەستاندن ل هەر دو لایێن جاددەیێ هاتیە قەدەغەكرن و هیڤیدارین وەلاتی و شۆفێر ئاگەهدار بن، داكو نەهێنە سزادان.