ب بەرهەڤبوونا نوونەرێن مەكتەبا رێكخستنا پارتی دیموكراتی كوردستان ل پارێزگەها دهۆكێ‌ و بەرپرسێن حزبی و حكومی و جەماوەرەكێ‌ زۆر، سەنتەرێ‌ كۆماتە یێ‌ دیكیۆمێنتكرنا دیرۆكا شۆڕەشێ‌، دوهی 23/4/2024 رێورەسمێن دانەنیاسین و ئیمزاكرنا پرتووكا (ژ مهابادێ‌ تا حەمرینی) یا بیرەوەریێن خەباتكەرێ‌ دێرین (عەبدولباقی بامەڕنی) ئەندامێ‌ هیوا، پێشمەرگێ‌ هەردو بزاڤێن بارزان یێن 1943 و 1945، كۆمارا كوردستان ل مهابادێ‌ و پێشمەرگێ‌ هەردو شۆڕەشێن ئیلۆن و گولانێ‌ ل هۆلا كۆنفڕانسان گێڕان.
د رێورەسمێن دانەنیاسین و ئیمزاكرنا پرتووكا (ژ مهابادێ‌ تا حەمرینی) یا بیرەوەریێن خەباتكەرێ‌ دێرین (عەبدولباقی بامەڕنی) دا چەندین پەیڤ هاتنە پێشكێشكرن و تێدا بەحسی ژیانا خەباتكەری و كار و خەباتا وی و پرتووكا (ژ مهابادێ‌ تا حەمرینی) یا بیرەوەریێن خەباتكەرێ‌ دێرین (عەبدولباقی بامەڕنی) دیرۆكا شۆڕەشێن كوردی هاتە كرن.
دیسا هەر د رێورەسمان دا كۆرتیەك ل سەر كار و چالاكیێن سەنتەرێ‌ كۆماتە هاتە پێشكێشكرن.
پاشی پرتووكا (ژ مهابادێ‌ تا حەمرینی) یا بیرەوەریێن خەباتكەرێ‌ دێرین (عەبدولباقی بامەڕنی) هاتە ئیمزاكرن و ل سەر پشكداران هاتە بەلاڤكرن.

زاخۆ، دلۆڤان هالۆ:

شڤان عەبدی، بەرپڕسێ ڕاگەهاندنا ئیدارەیا سەربخوە یا زاخۆ بۆ ڕۆژناما ئەڤرۆ دیار كر كو دوهی 23/4/2024 شاندەكێ ئیدارەیا سەربخوە یا زاخۆ ب سەرۆكاتیا گۆهدار شێخۆ، سەرپەرشتێ ئیدارەیا سەربخوە یا زاخۆ، گەهشتنە وەلاتێ قەتەرێ و ب فەرمی هاتنە پێشوازی كرن.
بەرپڕسێ ڕاگەهاندنا ئیدارەیا سەربخوە یا زاخۆ، ئاماژە ب وێ چەندێ ژی كر كو د هەڤدیتنەكێ دا گۆهدار شێخۆ و سۆلتان حەسەن ئەلساعدی، ڕێڤەبەرێ وەبەرهێنانا قەتەرێ كۆمبوون، د ڤێ كۆمبوونێ دا بەحس ل دەلیڤەیێن وەبەرهێنانێ ل هەرێما كوردستانێ و ئیدارەیا سەربخوە یا زاخۆ هاتە كرن.
شڤان گۆت: «ل ڕۆژێن بهێن ژی سەرپەرشتێ ئیدارەیا سەربخوە یا زاخۆ و شاندێ د گەل دا دێ چەندین دیتن و كۆمبوونێن دی ل وەلاتێ قەتەرێ ئەنجامدەن».

ئەڤرو ٢٣ـێ نیسانا ٢٠٢٤ـێ ب سەرپەرشتیا ماجد سەید سالح، جێگرێ پارێزگارێ دهۆكێ و ب ئامادەبوونا چەندین رێڤەبەر و نوونەرێن رێڤەبەریێن حكومی ل دووڤ فەرمانا وەزارەتا ناڤخوە یا حوكمەتا هەرێما كوردستانێ ب مەبەستا پتر گرنگیدان ب گوندان و پێشڤەبرنا كەرتێ چاندنێ‌ و دانانا رێكار و رێنما و ئامادەكاریێن بەرفرەهكرن و ڤەگوهاستنا جهێ گوندان و چەند ئاریشەیێن دی، دوهی 23/4/2024 ئێكەم كۆمبوون هاتە ئەنجامدان و تێدا بەحس ل بجهئینانا رێنمایێن وەزارەتا ناڤخوە هاتە كرن، كو چەند بڕیار هاتینەدان و هندەك ژ وان ژی ئەڤێن ل خوارێ نە:-
ـ ئەو گوندێن جهێ ئاڤاكرنێ بۆ ئاكنجیبوونێ د ناڤ حەرەمێ گوندی دا نەمابیت، دشێن داخوازیا بەرفرەهكرنا گوندی بكەن
ـ بەرفرەهكرن و ڤەگوهاستنا گوندان ل سەر داخوازیا خەلكێ رەسەنێ ئاكنجیێن گوندی بیت ب چەند مەرجێن جودا.
ـ بەرفرەهكرن و ڤەگوهاستن ژ وان گوندان ناگریت ئەوێن جهـ دكەڤیتە بەر ماستەرپلانا یەكەیێن كارگێری و جهێن قەدەغەكری.
ـ داخوازیێن خەلكێ گوندان بۆ ئەڤان مەرەما پێدڤیە ب رێكا موختارێن گوندان د پەسەندكری بن.

شیرەتكارێ سەرۆك وەزیرێن ئیراقێ ڕاگەهاند: حەفتیا بهێت لژنەكا تایبەت بۆ كێمكرنا ڕسوماتێن ڤیزا توركیا دێ كۆمبیت و بڕیارا كێمكرنا ڕسۆماتان دێ هێتەدان.
فادی شەمەری، شیرەتكارێ سەرۆك وەزیرێن ئیراقێ دیار كر كو ئێك ژ خالێن كۆمبوونا سوودانی و ئەردوگانی پرسا كێمكرنا ڕسوماتێن دانا ڤیزا توركیا بوو ل ئیراقێ، بۆ ڤێ مەرەمێ ژی ل حەفتیا بهێت لژنەكا تایبەت بۆ كێمكرنا ڕسوماتێن ڤیزا توركیا دێ هێتە پێكئینان و پشتی كۆمبوونێ دێ بڕیارا كێمكرنا ڕسۆماتێن ڤیزا ناڤهاتی هێتەدان.

سولین سلێمان:

پەیڤدارێ وەزارەتا كارەبا حوكمەتا هەرێما كوردستانێ رادگەهینیت كو د نوكە دا پتری 18 دەمژمێران كارەب بۆ وەلاتیان دهێتە دان و دێ‌ یا بەردەوام بیت.
ئومێد ئەحمەد، پەیڤدارێ وەزارەتا كارەبا حوكمەتا هەرێما كوردستانێ بۆ رۆژناما ئەڤرۆ گۆت: «نوكە رۆژانە پتری 18 دەمژمێران كارەب بۆ وەلاتیان دهێتەدان، ل هندەك دەڤەران ژی پتر دهێتەدان، ژ بەركو د نوكە دا خواست ل سەر كارەبێ كێمبوویە، هندی پلەیێن گەرمێ‌ بلند نەبن كارەب ب ڤی رەنگی دێ‌ هێتەدان».
ناڤهاتی گۆتژی: «پلانا وەزارەتا كارەبی ئەوە كو د وەرزێ‌ گەرمێ‌ ژی دا بەرهەمئینانا كارەبێ‌ زێدە بكەین و بشێن پتر دەمژمێرێن كارەبێ‌ بدەینە وەلاتیان».

ب ئامادەبوونا دكتۆر سالار عوسمان، بەرپرسێ پشكا رەوشەنبیری و ڕاگەهاندنا پارتی دیموكراتی كوردستان، كۆلیژا پەروەردە و بنیات ل زانكۆیا سەلاحەدین مەڕاسیمەكا تایبەت ب هەلكەفتا 126 سالیا ڕۆژا ڕۆژنامەگەریا كوردی ئەنجام دا.
د مەراسیمێ‌ دا هەر ئێك ژ د. سالار عوسمان و زیرەك كەمال و مامۆستا محەمەد شەریف ئیبراهیمی چەند بابەتێن تایبەت ب هەلكەفتا سالڕۆژا ڕۆژنامەگەریا كوردی پێشكێش كرن.
د. سالار عوسمان د وێ‌ مەراسیمێ‌ دا سیمینارەك ب ناڤێ‌ (ڕاگەهاندن و گرفتا نەڕاستیێ) پێشكێش كر و تێدا باس ل ڕاگەهاندن و كاریگەریا ڕاگەهاندنێ‌ ل سەر تاك و جڤاكی و ژیانێ‌ كر.
دیسا د پشكەكا دی یا سمینارا خوە دا دكتۆر سالار باس ل پشكەك ژ وان میدیایان كر كو كارێ‌ وان بوویە بەلاڤكرنا نەراستیان، ب مخابنیڤە ژی رۆل د تێكدانا ژیان و سیاسەت و پێكڤەژیانا جڤاكێ‌ مە دا هیە و هندەك كەس و لایەن پشتەڤانیا وان دكەن.
د. سالار د بەردەوامیا سمینارا خوە دا باس ل زیرەكیا دەستكرد كر و ئاماژە ب وێ‌ چەندێ‌ ژی كر كو زیرەكیا دەستكرد ب تنێ‌ لایەنێ‌ باشیێ‌ نینە، هەروەسا زیرەكیا دەستكرد د نوكە دا بوویە گەف ل سەر جڤاكان و سیستەمێ‌ بانكی ژی، لەو دڤێت هشیاری زیرەكیا دەستكرد بین، ژ بەركو ب تنێ‌ لایەنێ‌ باش نینە، بەلكو خرابی و نەرێنی ژی تێدا هەیە.
پاشی هەر ئێك ژ زیرەك كەمال و محەمەد شەریف سمینارێن خوە پێشكێشكرن و د دووماهیێ‌ ژی دا ئامادەبوویان و رۆژنامەڤانان و مامۆستایێن زانكۆیێ‌ ب پرسیار و دیتن و تێبینیێن خوە سمینارێن وان زەنگینكرن.

بێوار باجلوری:

بو گەهشتنا هەر هیڤی و ئارمانجەكێ و كاركرنەكێ وەستیان بۆ دڤێت و پێدڤی یە گەنج كار ژ بۆ بكەت دا بشێت ببیتە خۆدان داهاتەكێ باش، بازرگانەكی ژی گۆت: ژیێ من هەژدە ساڵ بوو دەمێ من دەست ب كاری كری و بابێ من هەر ژ زارۆكینیێ ئەز فێردكرم كارێن خێرخوازی بكەم.

دانا شوكری، ئاكنجیێ باژێرێ دهوكێ یە و كارێن بازرگانی دكەت، د دیدارەكێ دا بۆ رۆژناما ئەڤرۆ گۆت: ژیێ من 18 ساڵ بوو دەمێ من ل كومپانیێ دگەل بابێ خۆ كاركری، بێگومان هەر كارەكێ هەبیت وەستیان و زەحمەت بۆ دڤێت و من ژی گەلەك زەحمەت بر تا كۆ شیام د كاری دا شارەزاببم، ئەڤجا ژ بۆ هەر كارەكی پێتڤی یە مرۆڤ كار ژ بۆ بكەت دابشێت ببیتە خۆدان داهاتەكێ باش.
دانای زێدەتر گۆت: هەر ژ زارۆكینیێ بابێ من ئەز فێركریمە كارێن خێرخوازی بكەم و وەسا نیشا من دا چ جاران ب كرنا خێرێ پارەیێ مرۆڤی كێم نابیت، ئەڤ كارێن خێرخوازی ژی ژ بۆ خۆدێ نە و دیسان دا كۆ ببیتە هاندانەك بۆ هەر كەسەكێ پێچێبوی پشتی مە ژی ڤان كارێن خێرخوازی بكەت و ل دووڤ شیانێن خۆ دەستێ هاریكاریێ درێژ بكەن.
د بەردەوامیا ئاخفتنا خۆدا دیاركر ژی، ئەز دبێژمە هەمی گەنجان كا تۆ چەند خۆ د وەستینی دێ هندێ ب دەست خۆڤە ئینی، راستە كۆردستان یا د قەیرانان دا دەرباز دبیت، بەلێ بزاڤێ بكەن بەردەوام لڤینان بكەن ژ بۆ كاركرنێ و گۆت: (زەنگینی هۆسا یا ب ساناهی نینە وەكۆ هندەك هزر دكەن، بەلكۆ بەرۆڤاژی دڤێت مرۆڤ گەلەك یێ بێهنفرەه بیت تاكۆ بشێت ب حەلالی زەنگین بیت و بشێت هاریكاریا دەست كورتان ژی بكەت).