رەمەزان زەكەریا:

د داخویانیەكێ دا سەرۆكێ یانەیا ئاكرێ ئاشكراكر ب دەستڤەئینانا ناسناڤێ خولا نایابا كوردستانێ بۆ جارا ئێكێ ددیرۆكێ دا یا چاڤەرێكری بوو ژبەركو ئەم بهێزبووین و مە پلانێن ناسناڤی هەبوون، شیان ب هەڤكاریەكا كۆم یا كادرێ‌ راهێنانێ‌، یاریزانان و پشتەڤانییا بەرپرسێن باژێرێ‌ خوە ئەڤی دەستكەفتەكێ مەزنە بۆ ئاكری بینن.
زێدەتر سەلاح ئیبراهیم بۆ ئەڤرۆ دیاركر پشتی ب دەستڤەئینانا ناسناڤی هەتا نوكە چ سۆز ب یانەیێ نەهاتینە دان ب تنێ كەسایەتیێ دەڤەرا ئاكرێ سەلوان تەیب بریاردایە ب بەخشینا 10 ملیۆن دینارا بۆ تیمێ‌ و گۆت: د هەمان دەمداپشتەڤانیا دارایی یا سەرۆكێ حوكمەتێ هاریكاریەكا باش بوو بۆ ب دەستڤەئینانا ناسناڤێ خولا نایابا كوردستانێ و گەهشتن ب یاریا دوماهیا كۆپا كوردستانێ .
ناڤهاتی ئاشكراكر: بڕیار ل 29ێ‌ ڤێ هەیڤێ یاریا دووماهییا كۆپا كوردستانێ بەرانبەر یانەیا هندرین ل یاریگەها زاخۆ یا نێڤدەولەتی بهێتە كرن پشتی ل یاریگەها خوە ب سەركەفتین ل سەر زاخۆ ب سێ‌ گۆلان بەرانبەر دو گۆلان، ب هیڤییا وێ‌ یەكێ‌ بشێن ناسناڤێ‌ دویێ‌ یێ‌ كوردستانێ‌ ژی ب دەستڤە بینن و گەشبینن ب گەینە ئارمانجا خوە.
سەرۆكێ یانەیێ گۆتژی: دێ هەموو بزاڤا كەین وەرزێ نوو پشكداری خولا ئیراقێ بین سۆز ب یانەیێ هاتیە دان، پشكداریكرن ل خولێن كوردستانێ و ئیراقێ پێدڤی ب پشتەڤانیەكا مەزنا دارایی و دو تیما هەیە ئەگەر پشتەڤانی بهێتە كرن دێ پشكدار بین .

شاهۆ فەرید:

د داخویانیەكێ‌ دا جێگرێ‌ سەرۆكێ‌ فیدراسیۆنا باسكێت بۆلا هەرێما كوردستانێ‌ دیار كر بۆ وەرزێ‌ ئەڤ سالە بڕیار هاتیە دان سێ‌ قارەمانی ل سەر ئاستێ‌ كوڕان و كچان بۆ یانەیێن هەرێمێ‌ بهێنە ڤەكرن كو دێ‌ چاڤدێرییا لژنەیا ئۆلمپی یا كوردستانێ‌ بیت و پشتەڤانییا حوكمەتا هەرێما كوردستانێ‌ هێتە رێكخستن.
زێدەتر هشیار دۆبانكی بۆ رۆژنامەیا ئەڤرۆ گۆت: بڕیار هاتیە دان سێ‌ قارەمانی بۆ وەرزێ‌ ئەڤ سالە بهێنە رێكخستن بڤی شێوەیی، خولا پلا ئێك و پلا نایاب ل سەر ئاستێ‌ كوڕان، خولا پلا نایاب ل سەر ئاستێ‌ كچان، مە نڤێسارێن فەرمی بۆ پرانییا یانەیێن هەرێمێ‌ هنارتینە و ئەم چاڤەڕێ‌ رازیبوونێ‌ نە كو بڕیارە دناڤبەرا خزیران و تەمووزا بهێت دا بیت، هەردەمێ‌ هژمارەیا یانەیان هاتنە دیاركرن دووڤدا دێ‌ دێ‌ جهـ و ژڤان هێنە دیاركر، خولێن نایاب ل سەر ئاستێ‌ كوڕان و كچان بشێوەیی خول ئێك قوناغ و یا پلا ئێك كۆمڤەبوون بیت.
هەروەسا ناڤهاتی گۆت ژی: ل دووڤ شیانێن بەردەست دێ‌ هەمی بزاڤان كەین قارەمانیێن خوە بەرفرەهـ بكەین لێ‌ ئەگەرێ كێمییا تیمێن كچا د ناڤا یانەیان دا نەچارین ئێك قارەمانی بۆ بهێتـە ڤەكرن، ئەم بەردەوامین ل سەر چالاكیێن خوە و چ سالا نە ڤەقەتیاینە، ئەڤە ماوەیێ نێزیكی دو سالانە دەستبكاربووین وەكو فێدراسیون ئەم بەردەوام چالاكیێن خوە ئەنجامدەین، ئەڤی دەمێ بوری دا مە خولا نایاب بۆ كوڕان ڤەكریە و مینی باسكێت بۆل و قارەمانیا لاوان رێكئخێستیە، هەروەسان شیاینە هەلبژارتیێ كوردستانێ دامەزرینن و كەمپەكێ راهێنانێ راهێنانێ‌ بۆ بەرهەڤ بكەین و شیان یاریەكا هەڤالینی دگەل هەلبژارتیێ ئێراقی ئەنجامدایە، لەوما ب پشتەڤانییا حوكمەتا هەرێما كوردستانێ‌ ئەم بەردەوامین ژبۆ پێشئێخستنا ڤێ‌ یاریێ‌ و ب هیڤی نە یانەیێن وەرزشی ژی دگەل مە د هاریكاربن ژبۆ هەمان ئارمانج.

عەلی حاجی:

د داخویانیەکێ دا ئەندامەکێ دەستەیا کارگێریا یانه‌یا زاخۆ یا وەرزشی بۆ رۆژنامه‌یا ئەڤرۆ دیار کر وان داخازا یاریا دووماهیێ ژ کوپا کوردستانێ یا فوتبۆلێ دناڤ یاریگەها زاخۆ دا کربوو و یاریگەها وان ژی ب تەمامی ئامادەیە.
زێدەتر دلژار عەدنان گۆت: ل دەستپێکا کوپا کوردستانێ وەکو کارگێریا یانه‌یا زاخۆ داخاز کربوو یاریا دووماهیێ ژ وێ کوپێ ل یاریگەها زاخۆ یا نێڤدەولەتی دا بهێتە ئەنجامدان و رازیبون ل سەر هات بوو کرن،مە ئێکەتیا تەپاپێی یا کوردستانێ ئاگەهدار کریە یاریگەها مە یا بەرهەڤە بۆ پێشوازیکرنا یاریا دوماهیێ و چ کێشە نینن بەلێ ب مەرجەکێ یاریگەها مە بهێتە پاراستن و نابیت ب چ ڕەنگان ژی جەماوەر بچیتە دناڤ چیمەنێ یاریگەهێ دا، ب هەمی ڕەنگان مە یاریگەها خوە ئامادە کریە ژ بۆ هەمبێزکرنا یاریا دووماهیێ دناڤبەرا یانا ئاکرێ و هندرێن دا و یاریگەها مە شیانێن وەرگرتنا زێدەتری ٢٠ هزار جەماوەری هەیە و ب دیتنا من جەماوەرێ زاخۆ ژی دێ ڕولەکێ باش هەبیت د تەماشە کرنا وێ یاریێ و پرکرنا یاریگەهێ و ئەڤ چەندە ژی دێ جوانیەکا دیتر دەتە وێ یاریێ و قارەمانیێ،هەتا نوکە فیدراسیۆنا فوتبۆلا کوردستانێ بابەتێ فروتنا پلێتان ئێکلا نەکریە و رێکێ نادەین ژی بێ یانه‌یا زاخۆ پلێت نەهێنە فروتن.
ناڤبری گۆت ژی: ئەم ب مافێ خوە ژی دزانین فروتنا پلێتێن یاریا دووماهیێ ب یانه‌یا زاخۆ بهێتە دان ژبەرکو یاریا دووماهیێ د یاریگەها مە دایە.

تیما تێنسا سەر مێزێ‌ یا یانەیا دهۆك دەست ڤالا ژ قۆناغا ئێكێ‌ یا خولا پلا نایابا ئیراقێ‌ ل سەر ئاستێ‌ كوڕان ڤەگەڕیا پشتی ژ سەرجەمێ‌ شەش یاریێن خوە دا نە شیایی چو سەركەفتنان بینت، د هەڤڕكیێن وان دا ئەوا ل پارێزگەها سلێمانیێ‌ ب پشكدارییا 16 یانەیان ب شێوەیێ‌ خول ئێك گەڕا ب دو قۆناغان هاتیە كرن.
تیما دهۆكێ‌ دگەل هەر ئێك ژ جەیش، سلێمانیە، برایەتی، حەشد ئەلشەعبی، كویە، ئەكاد، نەفت ئەلشیمال و غاز ئەلجنوب تووشی خوسارەتیێ‌ بوو كو ژ سەرجەمێ‌ پێنج یاریزانان بتنێ‌ ب سێ‌ یاریزان پشكداری كربوون ئەوژی نیبار ئەحمەد، هێژا بەشار و زانیار رەجەب ئەوێن بەرانبەر یانەیێن دی ئاستەنگ دیتی و نەشیان ب سەركەڤن.
ل دووڤ داخویانیێن فیدراسیۆنا تێنسا سەر مێزێ یا ئیراقێ‌ قۆناغا دویێ‌ دێ‌ ل تیرمەها بهێت دەستپێكەت، لێ‌ بەری دو چالاكیێن ل سەر ئاستێ‌ نێڤدەولەتی و دەرڤە دێ‌ ل باژێرێ‌ سلێمانیێ‌ هێنە كرن ئەو ژی، ڤاڤارتنێن كێشوەرێ‌ ئاسیا ل سەر ئاستێ‌ هەلبژارتییان دەربازبوون بۆ ئۆلمپیادا فرەنسا 2024ێ‌، دیسان قارەمانییا رۆژئاڤا ئاسیا ل خزیرانا بهێت.
بۆ زانین تیما دهۆكێ‌ د قۆناغا دویێ‌ دا دێ‌ یاریێ‌ بەرانبەر سیناعە، دەربەندیخان، سەماوە، زیقار یا تایبەتمەند، نەجەف، ئاشتی و برایەتی كەت، ل دووماهیێ‌ تیما ئێكێ‌ هەتا هەشتێ‌ دێ‌ دەربازبنە قۆناغا دووماهیێ‌ و یاریێن وان بشێوەیی دو قۆناغ هێنە كرن.