د داخویانیەکێ دا جێگرێ سەرۆکێ فیدراسیۆنا باسکتێبۆلا کوردستانێ بۆ رۆژنامه‌یا ئەڤرۆ دیار کر ل دەستپێکا سالا نوو دێ قارەمانیا ئافرەتان هێتە ڤەکرن و ئەو دێ بەردەوامن ل سەر ڤەکرنا قارەمانیان.
زێدەتر هشیار دوبانکی گۆت: پشتی دەست ب کاربوونا مه‌ هەر زوو هزر د ڤەکرنا چەند قارەمانیەکان دا ل سەر ئاستێ جودا ب سەرکەڤتیانە ب دووماهی هاتن، هه‌رچه‌نده‌ هنده‌ك قارەمانیان کێشه‌ بۆ مه‌ دروست بن تایبەتی ده‌مێ دەستنیشانکرنا یاریگەهان و پشکداریا یانەیان دا، ژبەر پشتەڤانیا کێم بۆ یاریا باسكێتبۆلێ گەلەک یانە پشکدار نابن د قارەمانیا دێ ب هێجەتا کێشەیێن ماددی و ئەڤە ژی د بیتە ئەگەرەک کێم یانە پشکدار بن، گەلەک جاران دبیتە کێشە دناڤبەرا یانەیان دا د دەستنیشانکرنا یاریگەهەکێ دا هەر یانەیەک دخوازیت یاریێن خوە ل نێزیکترین یاریگەهێن نێزیکی باژێرێ خوە بکەن لێ ئەم وی تشتی د هەلبژێرین یێ د بەرژەوەندیا سەرکەڤتنا قارەمانیێ دا بیت، بریارە ل دەستپێکا هەیڤا ئێک یا سالا نوو قارەمانیا باسکتبولا ئافرەتان بهێتە ڤەکرن و مە پەیوەندی ب یانەیان ژی کریە لێ هێشتا شێواز و جهێ خولێ نەهاتیە دەستنیشانکرن.
ناڤبری گۆت ژی: مە دڤێت ئاستێ ڤێ یاریێ بەر ب پێشڤەببەین و بکەینە یارییا دویێ د کوردستانێ دا و قارەمانیێن زێدەتر ژی بهێنە ڤەکرن، هه‌روه‌سان دێ خولا نایابا کوردستانێ ژی ڤەکەین و ئەڤچەندە ژی دێ بیتە ئەگەرێ پێش ئێخستنا ئاستێ یاریا باسکێتبولێ.

قەیس وەیس:

چاڤەڕێ‌ یە ئەڤرۆ چار یاریێن مایی ژ هەڤڕكیێن گەڕا نەهێ‌ یا قۆناغا ئێكێ‌ ژ خولا پلا نایابا كوردستانێ‌ یا تەپا پێی بهێنە كرن، خودانا سەرێ‌ لیستێ‌ ل دهۆكێ‌ یە و یا رێزا دویێ‌ ل زاخۆ یە و ئاكرێ‌ ژی ل سلێمانیێ‌ د یاریێن ئاگرین دا ئەوا بڕیارە هەموو یاری ل دەمژمێر دو یێ‌ پشتی نیڤرۆ بهێنە ئەنجامدان.
ل یاریگەها سێیێ‌ تیما یانەیا دهۆك دێ‌ مێڤاندارییا دەربەندیخان خودانا سەرێ‌ لیستا خولێ‌ كەت د یارییەكا بهێز و تاقیكرنەكا دی دا بۆ ئەلهۆیێن چیا ئەوا ب تنێ‌ نەهـ خال كۆمكرین ژ دو سەركەفتن و سێ‌ وەكهەڤی دگەل سێ‌ خوسارەتییان و رێزا 12ێ‌ دهێت، د بەرانبەر دا مێڤانا وێ‌ 14 خال كۆمكرینە و رێزا ئێكێ‌ دهێت، د ڤێ‌ یاریێ‌ دا یاریزانێن دهۆكێ‌ داخوازكرینە ژبۆ سەركەفتنێ‌ و ئاشتكرنا جەماوەرێ‌ خوە، حسێن عەبدوللا راهێنەرێ‌ تیمێ‌ دێ‌ ب هزرێن سێ‌ خالان هێتە دناڤ یاریگەهێ‌ دا.
ژلایێ‌ خوەڤە تیما یانەیا زاخۆ ل یاریگەها دەلال دێ‌ مێڤاندارییا یانەیا پێشمەرگەیێ‌ هەولێرێ‌ كەت ئێك ژ یاریێن دی یێن بهێز بۆ كوڕێن خابووری و دێ‌ بزاڤێ‌ كەت بەردەوامیێ‌ بدەتە ئەنجامێن باش، پشتی د یارییا بۆری دا و د دێربیێ‌ پارێزگەهێ‌ دا شیابوو ب دو گۆلان بەرانبەر گۆلەكێ‌ سەركەفتنێ‌ ل سەر تیما دهۆكێ‌ بینت، زاخۆ ب14 خالان رێزا دویێ‌ دهێت ژ سێ‌ سەركەفتن و دو وەكهەڤی و دێ‌ شەڕی بۆ سێ‌ خالان كەت پێخەمەت دەستڤە ئینانا سەرێ‌ لیستێ‌ ب مەرجەكی تیما دهۆك وەكهەڤی یان خوسارەتیێ‌ بگەهینتە تیما دەربەندیخان، ژلایێ‌ خوەڤە یانەیا پێشمەرگەیێ‌ هەولێر ژی ب هیڤیێن مەزن خەونا سەرێ‌ لیستێ‌ دبینت ئەوا 13 خال كۆمكرین و رێزا سێیێ‌ دهێت و بزاڤێن وی تیما زاخۆ خوسارەت بكەت و دهۆك ژی دەربەندیخان خوسارەت بكەت ژبۆ وەرگرتنا سەرێ‌ لیستێ‌، بۆ زانین تیما زاخۆ ئێكانەیە د خولێ‌ دا چو خوسارەتی نەداینە.
ژلایەكێ‌ دووڤە تیما پایتەختێ‌ نەورۆزێ‌ یانەیا ئاكرێ‌ دێ‌ ل باژێرێ‌ سلێمانیێ‌ بیتە مێڤانا یانەیا سەید سادق ب هیڤیێن بەردەوامییا سەركەفتنان ب سەرپەرشتیا راهێنەرێ‌ گەنج یێ‌ باژێرێ‌ ئاكرێ‌ هەژار سابر ئەوێ‌ د حەفتیا بۆری دا وەكو راهێنەر ئێكەم سەركەفتن ئینایی دگەل هندرین ب گۆلەكێ‌ بێ بەرانبەر پشتی دەستكاركێشانا راهێنەرێ‌ بەری وی یێ‌ سۆری یۆنس سلێمان ژبەر ئەنجامێن لاواز، د نوكە دا تیما ئاكرێ‌ ب11 خالان رێزا هەشتێ‌ دهێت ژ سێ‌ سەركەفتن و دو وەكهەڤی و سێ‌ خوسارەتیان، بەرانبەر دا سەید سادق هەشت خال هەنە و رێزا 13ێ‌ دهێت.

كارگێرییا یانەیا ئافرەتێن دهۆكێ‌ ب فەرمی گرێبەست دگەل كادرەكێ‌ نوو راهێنانێ‌ و دەهـ یاریزانێن كچ ئیمزاكر ژبۆ پشكداریێ‌ د قارەمانییا هەرێما كوردستانێ‌ یا فۆتسالێ‌ دا ئەوا دهێتە چاڤەڕێ‌ كرن هەڤڕكیێن وێ‌ ل 23ـێ‌ ڤێ‌ مەهێ‌ هەڤڕكیێن وێ‌ بهێنە ئەنجامدان.
ب فەرمی گرێبەست دگەل هەر ئێك ژ خەیری ئەحمەد وەكو راهێنەر، دلۆڤان محەمەد هاریكارێ‌ وی و دەریا یونس راهێنەرا گۆلپارێزان و دەهـ یاریزانێن كچ ژ وانا سیپەل شوكر كو ئێك ژ گۆلكەرێن خولێن ئیراقێ‌ و كوردستانێ‌ یە.
د راگەهاندنەكێ‌ دا یانەیا ئافرەتێن دهۆك سۆپاسییا د. عەلی تەتەر پارێزگارێ‌ دهۆكێ‌ دكەت و گۆت: ژبەر پشتەڤانییا بەردەوام سۆپاسیەكا بێ‌ سنۆر ئاراستەیی د. عەلی تەتەر دكەین و دیسان پشتی هەمی مەزاختیێن تیما مە یا فۆتسالێ‌ ب ستۆیێ‌ خوە ڤەگرتی، دیسان سۆپاسیا نڤێسینگەها تایبەت یا پارێزگەری ئەوێن رۆلەكێ‌ باش هەبوویی ژبۆ پشتەڤانییا یانێ‌ پێخەمەت پشكداریا تیما مە د چالاكیێن وەرزشی دا، ئەم سۆزێ‌ ددەین ب هەمی هێز و شیانێن خوە بێخینە كار پێخەمەت بەردەوامی دان ب پێشئێخستنا وەرزشا ئافرەتان ل پارێزگەها دهۆكێ‌.
بۆ زانین ل دووڤ نڤێسارا فەرمی یا رێڤەبەرییا گشتی یا وەرزشی ل هەرێما كوردستانێ‌ هەر ئێك ژ سەردار سالح وەكو سەرۆك یانە، ئامینا فەریق جێگرا سەرۆكی، ڤانا محەمەدعەلی بەرپرسا دارایی و هەر ئێك ژكەسكین مەسعۆد، ئەنیس خالد و پرژین جیهاد وەكو ئەندامێن یانەیێ‌ ب شێوەیێ‌ بەروەخت بۆ سێ‌ هەیڤان هاتینە دانان و دووڤدا دێ‌ هەلبژارتنێن فەرمی بۆ كارگێرییا نوو هێنە كرن.

كارگێرییا یانەیا هەولێر ب نەدانا شایستەیێن یانەیێن كوردستانێ‌ حوكمەتا ئیراقێ‌ گونەهباركریە و جوداهیێ‌ دناڤبەرا یانەیێن هەرێمێ‌ و یێن ئیراقێ‌ دا دكەن پشتی ئەنجوومەنێ‌ وەزیرێن ئیراقێ‌ رازیبوویی ل سەر دانا چار ملیار دیناران بۆ هەر یانەكا پشكدار د خولا ستێرێن ئیراقێ‌ دا.
ئەڤچەندە هات پشتی عەدنان درجال سەرۆكێ‌ فیدراسیۆنا تەپا پێی یا ئیراقێ‌ ل دووماهییا مەها چرییا ئێكێ‌ یا بۆری راگەهاندی كو حوكمەتا ئیراقێ‌ رازیبوویە ل سەر پارڤەكرنا چار ملیار دینار بۆ هەر یانەكا پشكدار د خولا ستێرێن ئیراقێ‌ دا.
موسا محسن ئەندامێ‌ كارگێرییا یانەیا هەولێر بۆ دەزگەهێن راگەهاندنێ‌ گۆت: هەولێر یانەكا مەزنە و ژ هەژی ئەڤان ئاریشەیان و پاشڤەچوونا ئەنجامێن تیمێ‌ د خولێ‌ دا نینە، هەكە یانەیێن هەرێمێ‌ خوە ژ خولا ستێرێن ئیراقێ‌ ڤەكێشا دێ‌ ئاستەنگ كەفتنە درێیا خولێ‌ دا، حوكمەتا ئیراقێ‌ بڕیارا دایی چار ملیار بۆ هەر یانەكا پشكدار د خولێ‌ دا لێ‌ ئەڤ بودجە بۆ یانەیێن هەرێمێ‌ تەرخانەكرینە و ئەڤە نە دادپەروەرییە.
هەروەسان گۆت: هەروەسان ئەم گازندا ژ فیدراسیۆنا تەپا پێی یا ئیراقێ‌ دكەین ئەوێن 800 ملیۆن دینار بۆ یانەیێن د خولێ‌ دا بەلاڤكرین ژ ئەوان سپۆنسەر و ریكلام و مافێن ڤەگۆهاستنێ‌ و چو بۆ مە نە هاتە هنارتن، لەوما مافێ‌ مەیە ئەم داخواز بكەین و ئەم ژ د چوارچووڤەیێ‌ ئیراقا فێدرالداینە، بلا ژبیرا وان نەچیت ئەو دەمێ‌ یاریگەها ئەلشەعب یا نێڤدەولەتی ل بەغدا پێدڤی ب نووژەنكرنێ‌ بوو سەرۆكێ‌ حوكمەتێ‌ نێجیرڤان بارزانی نووژەنكرنا وێ‌ ب ستۆیێ‌ خوەڤەگرت و هەروەسان یاریگەهێن كوردستانێ‌ تایبەت یاریگەها شەهید فرانسۆ حەریری ئەوا بوویە ئەگەر دۆرپێچا وەرزش ل سەر ئیراقێ‌ بهێتە راكرن.

ستێرێ‌ هۆلەندی و یانەیا بەرشەلۆنا یا ئسپانی فرینكی دی یۆنگ ئەگەڕێ‌ن خوسارەتییا تیما كاتەلۆنی ب ستۆیێ‌ هەمی یاریزانان ڤە گرت، پشتی د شەڤا دەربازبوویی دگەل یانەیا جیرۆنا ب چار گۆلان بەرانبەر دو گۆلان تووشی خوسارەتیەكا ب ئەنجامێ‌ نە چاڤەڕێ‌ كری بوون ژ چارچووڤەیێ‌ هەڤڕكیێن گەڕا 16ێ‌ ژ خولا ئسپانیا یا تەپا پێی.
دییۆنگی بۆ رۆژنامەیا ئاس یا ئسپانی گۆت: خوسارەتییا دگەل جیرۆنا ئەم هەمی بەرپرسیارن ژبەركو ئەو ئاستێ‌ پێدڤی ل سەر مە نە هاتە نیشاندان و مە ب درۆستی كار ل سەر تەپێ‌ نە كر، لێ‌ ئەڤ خوسارەتییە سرۆشتییە بەرانبەر تیمەكێ‌ سەرێ‌ لیستێ‌ دوور ژ ناڤی و بەرشەلۆنا ب یارییەكێ‌ نا كەڤیت و چو ئاریشە مە نینن ژبەركو بتنێ‌ حەفت خالان ژ سەرێ‌ لیستێ‌ دوورین ئەڤجا گەشبینم دێ‌ بهێز ڤەگەڕین بۆ سەركەفتنان.

بڕیارە ئەڤرۆ هەڤڕكیێن قارەمانییا جیهانێ‌ یا تەپا پێی مۆندیالا 2023ێ‌ ل سەر ئاستێ‌ یانەیا ل جەدەیا وەلاتێ‌ سعۆدیێ‌ هێتە بڕێڤەبرن.
د ڤێ‌ مۆندیالێ‌ دا شەش یانە دگەل مێڤاندارا قارەمانیێ‌ دێ‌ پشكداربن ئەوێن ل وەرزێ‌ بوری بووینە قارەمانێن كێشوەران چامپیۆنز لیگ، هەر ئێك ژ مانچستەر ستی یا ئنگلتەرا قارەمانا ئۆرۆپا، كلۆپ لیۆن یا مەكسیكی قارەمانا كۆنكاكاڤ، ئۆكلاند سێتی یا نیۆزیلەندا قارەمانا ئۆقیانۆسیا، ئۆراوا رێد یا چاپانی قارەمانا كێشوەرێ‌ ئاسیا، فلرمنێنزی یا بەرازیلی قارەمانا كۆپا لیپرتادۆرێس ژ ئەمریكا باشۆر، ئەهلی یا مسری قارەمانیا كێشوەرێ‌ ئەفریقیا و یانەیا ئیتحاد جەد یا سعۆدیێ‌ مێڤاندارا قارەمانیێ‌.
یاریا ئەڤرۆ، ئیتحاد – ئۆكلاند ستی دەمژمێر نەهی شەڤ، رۆژا ئەینی لیۆن- ئۆرارا دەمژمێر 5:30 مەغرەب، ئەهلی – سەركەفتیێ‌ ئیتحاد و ئۆكلاند، دوشەمبییا بهێت، فلۆمینینزی – سەركەفتیێ‌ یارییا لیۆن و ئۆرارا، سێ‌ شەمبییا بهێت 19-12-2023ێ‌، سەركەفتیێ‌ یارییا ئەهلی دگەل مانچستەر ستی، بۆ زانین یارییا دووماهیێ‌ دێ‌ ل22ێ‌ ڤێ‌ مەهێ‌ هێتە كرن.