ئاكرێ‌، رەمەزان و صەباح:

ل سنوورێ دەڤەرداریا ئاكرێ كار ل سەر هەژمارەكا پڕۆژویێن ئاڤێ دهێتە كرن، كو ئاكرێ سالانە ئاریشەیا كێمئا ڤێ هەیە و چاڤەرێی تەمامبوونا پڕۆژەیێ ستراتیژیێ ئاڤا ئاكرێ دهێتە كر.
شەعبان خەلیل بەرواری، دەڤەردارێ ئاكرێ ب وەكالەت بۆ ئەڤرۆ گۆت: «حوكمەتا هەرێما كوردستانێ گرنگیەكا باش ب پڕۆژەیێن هەمەجۆر ل دەڤەرا ئاكرێ ل سەنتەرێ باژێری و گوندێن دەڤەرێ دایە».
ناڤهاتی گۆتژی: «ئەڤ سالە هەژمارەكا زۆر یا پڕۆژەیان د هەموو بیاڤان دا هاتینە بجهئینان و نوكە ژی كار ل سەر چەندین پڕۆژەیێن ئاڤێ ل دەڤەرێ دهێتە كرن، ژبلی سەنتەرێ باژێری، ل گوندێن دەردوور ژی پڕۆژە دهێنە بجهئینان».
شەعبان خەلیل خویا ژی كر، ب گوژمێ پتری شەش ملیار دیناران هەژمارەكا پڕۆژەیێن ئاڤێ هاتینە بجهئینان، هندەك ژ وان پڕۆژەیان د قووناغا بجهئینانێ دانە و رازیبوون ل سەر هەژمارەكا دی یا پڕۆژەیان هاتیە كرن.

دهۆك، لەزگین جوقی:

دەڤەردارێ‌ سێمێلێ‌ دیار كر، ب گوژمێ‌ 35 ملیار دیناران هەژمارەكا پڕۆژەیێن نوو یێن خزمەتگوزاری ل دەڤەرداریا سێمێلێ‌ دێ‌ هێنە بجهئینا و دبێژیت: نوكە ئەڤ پڕۆژە د قووناغێن راگەهاندن و تەندەران دانە، هەر دەمێ‌ هاتنە راگەهاندن، دەست بجهئینانا وان دێ‌ هێتە كرن.
مەحمود خەلیل، دەڤەردارێ‌ سێمێلێ‌ بۆ ئەڤرۆ خویا كر، هەژمارەكا جاددەیێن 60 مەتری و 30 مەتری ل دەڤەرداریا سێمێلێ‌ دێ‌ هێنە چێكرن و یاریگەهەكا وەرزشی ل سێمێلێ‌ دێ‌ هێتە دروستكرن، دیسا چەندین پڕۆژەیێن دی یێن گرنگ و ستراتیژی دێ‌ هێنە چێكرن و گۆت: «نوكە ئەڤ پڕۆژە د قووناغێن راگەهاندن و تەندەران دانە، پشتی دهێنە راگەهاندن و بالێندەر وەردگرن، هەمی پڕۆژە دێ‌ كەڤنە د وارێ‌ بجهئینانێ‌ دا، نوكە كارەكێ‌ گەلەك باش ل دەڤەرداریا سێمێلێ‌ بۆ خزمەتكرنا وەلاتیان دهێتە كرن».
گۆتژی: «چەندین پارچەیێن ئەردی ژی هاتینە فرۆتن ل باژێرڤانیان ئەو ژی دێ‌ بنە خزمەتگوزاری بۆ وەلاتیان، هەر باژێرڤانیەك د سنوورێ‌ خوە دا دێ‌ خزمەتگوزاریان بجه ئینیت، هەتا نوكە باژێرڤانیێن سەر ب سێمێلێ‌ ڤە ب گوژمێ‌ پێنج ملیار دیناران پارچەیێن عەردی فرۆتینە هەمی دێ‌ بنە پڕۆژە بۆ خزمەتكرنا وەلاتیان».

دهوك، لەزگین جوقی

رێڤەبەرێ‌ كۆچ و كۆچبەران و بەرسڤدانا قەیرانان ل پارێزگەها دهۆكێ‌ دیار كر، بەرنامێ‌ زڤرینا ئاواران بۆ شنگالێ‌ ب رێیا رێكخراوا lomدەستپێكریە، د ماوەیێ‌ دوو رۆژان 116 خێزان ژ كەمپا شاریا زڤرینە شنگالێ‌«.

پیر دەیان، رێڤەبەرێ‌ كۆچ و كۆچبەران و بەرسڤدانا قەیرانا ل پارێزگەها دهۆكێ‌ راگەهاند، گەلەك ئاواران ل كەمپا شاریا و كەمپا بێرسفی ئێك ناڤێ خۆ بۆ شنگالێ‌ تۆماركرینە، لێ‌ پرۆسەیا زڤرینا ئاواران بۆ شنگالێ‌ گەلەك سست بوویە، ژبەركو هاریكاریا ئاواران ناهێـتە كرن دەمێ‌ دزڤرنە شنگالێ‌ و نوكە ب رێیا رێكخراوا lom دەمێ‌ ئاوارە دزڤرنە سەر جهێن خۆ هاریكاریا وان دهێتە كرن».
زێدەتر گۆت: هەتا نوكە پتر ژ 300 هزار ئاواران ل ناڤ 16 كەمپان دا ماینە، هندەك ژی ژ دەرڤەی كەمپان دژین، هەتا نوكە پتر ژ 40 هزار كەسێن ئاوارە ژ كەمپان یێن زڤرینە شنگالێ‌، د بەرامبەر دا هندەك ئاوارە دووبارە ژ شنگالێ‌ زڤرینە كەمپان و هاریكاریێن رێكخراوان بۆ ئاواران گەلەك كێمبووینە، ئەم داخواز دكەین پشتەڤانیا ئاواران بهێتە كرن».
پیر دەیان ئەو ژی دیار كر، ڤەگەریانا ئاواران بۆ شنگالێ‌ یا بەردەوامە، ئاوارە بۆ ڤەگەریانا شنگالێ‌ د ئازادن، هەر ئاوارەكێ‌ بڤێت دشێت داخوازیا خۆ بۆ زڤرینا شنگالێ‌ پێشكێش بكەت، هەموو ئاسانكاری دگەلدا دهێنە كرن، لێ‌ ئاریشە ئاوارە ئەوە دبێژن ل شنگالێ‌ د ئارام نینین، گەلەك ئاوارە هەنە خانیێن وان خراببووینە و نەشێن ڤەگەرن هەكە هاریكاریا وان نەهێتە كرن بۆ ئاڤاكرنا خانیان».
ناڤهاتی گۆت ژی:» بۆ هەر خێزانەكا بزڤریتە شنگالێ‌ نوكە هزار و 240 دولار دهێنە مەزاختن، ئەڤ كوژمێ‌ پارەی ب دوو قوناغا دهێتە دان، د قوناغا ئێكی دا دەمێ‌ ئاوارە ژ كەمپێ‌ دەردكەڤن و دچنە شنگالێ‌ 600 دولاران وەردگرن، دەمێ‌ دگەهنە شنگالێ‌ ژی قوناغا دوویێ‌ وەردگرن.

ئامێدیێ‌، محمود نهێلی

ژبەر نەبوونا چ جهێن ڤەحەواندنێ‌ و شایستەیێن دارایی و مۆچەیەكی دیاركری، ئاریشە بۆ زارۆیێن بێ‌ سەمیان ل سنورێ‌ دەڤەرداریا ئامێدیێ‌ دروستبووینە و ب دروستی چاڤدێریا وان ناهێتە كرن.

بارز عەبدولعەزیز وەك ڤەكۆلەرێ‌ جڤاكی بۆ رۆژناما ئەڤرۆ دیار كر، نەبوونا چو بنگەهێن ڤەحەواندنا زارۆیێن بێ‌ سەمیان ل دەڤەرا ئامێدیێ‌ ئاریشە بۆ وان زارۆیان دروست كرینە یێن دایبابێن خوە ژ دەست داین، ب چ رێكا هەبیت و ماینە بێ‌ خودان و گۆت: ڤەكرنا بنگەهەكێ‌ بۆ ڤان زارۆیان گرنگیا خوە هەیە و ئێك ژلایێ‌ وێ‌ یەكێ‌ كو ئەڤ زارۆیە هەست پێ‌ بكەت گرنگی پێ‌ دهاتە دان و یا دویێ‌ ژی دبیتە ئەگەرێ‌ بەردەست بوونا داتایان بۆ وێ‌ یەكێ‌ هەر خێرخوازەك یان ژی رێكخراوەك هاریكاریێ‌ بكەت دێ‌ ئامار بەردەست بن و كەس بێ‌ بەهر نابیت، هەروەسا ژلایێ‌ ئابووری ڤە ژی دێ‌ پتر هاریكار بیت دەبارا ژیانا وانا.
رێڤەبەریا چاڤدێریا خێزانی ل ئامێدیێ‌ بۆ رۆژناما ئەڤرۆ دیاركر، ل سنورێ‌ رێڤەبەریا وان هژمارەكا زارۆیان هەنە و نەهاتینە توماركرن، چونكە ل بەری 2014 توماركرنا ڤان كەسان هەبوویە ل بەشێ‌ خێزانا و حوكمەتێ‌ موچەكی هەیڤانە بۆ تەرخانكر بوون و گۆت: پشتی سالا 2014 ئەڤ هاریكاریە هاتینە راوەستاندن و توماركرنا ناڤان ژی هێشتا دەست پێ‌ نەهاتیە كرن.
و تەكەز كر، ئەڤ زارۆیە یێن بێ‌ بەهرن ژ هەر هاریكاریێن حكومەتێ‌ و دەزگەهـ و رێكخراوێن نافخوەیی و نێڤدەولەتی و وەك پێدڤی هاریكاریا وان ناهێتە كرن و گۆت: ئەو یێن بەرهەڤن د گەل دا بچنە هەر جهەكی هەبیت ل هەر شەش ناوچەداریێن سەر ب دەڤەرداریا ئامێدیێ‌ ڤە.
دەربارەی جهێ‌ ڤەحەواندنا ڤان زارۆیان ژی ناڤهاتی ئاشكراكر، نوكە ل سنورێ‌ دەڤەداریا ئامێدیێ‌ چو جهەكێ‌ ڤەحەواندنێ‌ نینە و گۆت: ل سەنتەرێ‌ پارێزگەهێ‌ هەیە، لێ‌ هندەك ژ زارۆیان نەڤێت بچنە وێرێ‌، كەس و كارێن وان ناهێلن بچنە جهێن ب ڤی رەنگی و ب كێماسی دبینن و یا باش ئەوە بو ڤەحەواندنا ڤان زارۆیان ل دووڤ بۆچوونا وان ب خوە بیت.