بێوار حەمدی:

رێڤەبەریا لاوان ل پارێزگەها دهوكێ بەرپرسە ژ سەرپەرشتیكرن و دووڤچوونا وان ناڤەندێن سەر ب رێڤەبەریا وان ڤە، رێڤەبەرێ لاوان ژی دبێژیت: ئەم ب رێیا رێڤەبەریا خۆ ژی هەموو بزاڤان دكەین دەلیڤێن كاری پەیدابكەین، دا كو گەنج بشێن داهاتەكی بۆ خۆ پەیدابكەن.

هەكار محەمەد ئەمین، رێڤەبەرێ لاوان ل پارێزگەها دهۆكێ د دیدارەكێ دا بۆ رۆژناما ئەڤرۆ گۆت: رێڤەبەریا مە سە ر ب وەزارەتا رەوشەنبیری و لاوان ڤەیە، ئەڤ رێڤەبەریە بەرپرسە ژ جێبەجێكرنا پلانا ئستراتیجی یا درێژخایەن و یا كورت خایەن ژ بۆ خزمەتكرن و پێشڤەبرنا گەنجان، ئەم ل دووڤ شیانێن خۆ كاردكەین، دا كو ئەڤ هەردوو پلانە ب رێیا وان ناڤەندێن وەرزش و لاوان یا كو ب سەر ب رێڤەبەریا مە ڤە، هەروەسا ب چالاكیێن گشتی پراكتیزە دبن.
هەكاری گۆت ژی: رێڤەبەریا لاوان بەرپرسە ژ سەرپەرشتیكرن و دووڤچوونا وان ناڤەندێن سەر ب رێڤەبەریا مەڤە كو دبنە 10 ناڤەند، هەروەسا مالا لاوان و حوكمەتێ ژی و گۆت: (كار و بزاڤێن مە دروستكرنا شیان و پێچێبوونانە ل دەڤ گەنجان ژلایێ هزری و جەستەیی ڤە و دروستكرنا بەهرەیان، گرنگیدان ب بەهرەمەندان ب رێیا خۆلێن جۆراوجۆر و فەستیڤالێن ساڵانە، د ماوێ 20 مەهێن بۆریدا مە شیایە 1670 چالاكیێن جۆراوجۆر ئەنجام بدەین).
د بەردەوامیا ئاخفتنا خۆ دا هەكاری دیار كر، ئەم ب رێكا رێڤەبەریا خۆ ژی هەموو بزاڤان دكەین گەنج ببنە خودان كار و بشێن داهاتەكی بۆ خۆ پەیدابكەن، بەلێ ب مخابنی ڤە د نوكە دا بارێ ئابووری هند یێ هاریكار نینە ئەم بشێین پتر دەلیڤێن كاری بۆ گەنجان برەخسینین و گۆت: (مە ژ بۆ داهاتی ژی پلان هەنە كار و چالاكیێن خۆ ژی بەرفرەهتر لێ بكەین، وان چالاكیان ئەنجام بدەین یێن دگەل خواست و ئارەزویێن گەنجان دگونجن).
ل دووماهیێ ژی هەكاری گۆت: (داخوازا مە ئەوە پتر دەلیڤێن كاری بۆ گەنجان بهێنە ڤەدیتن، ئەڤجا چ ژ لایێ حوكمەتێ ڤە بیت یان ژی كەرتێن تایبەت، كومپانی و سەرمایەدار و رێكخراوێن مە پتر رۆلێ خۆ بگێرن و دەلیڤێن كاری بۆ گەنجێن مە پەیدابكەن، نە كو گەنجێن بیانی و قەرزێن جوراوجور ژی بۆ هەموو گەنجان دابین بكەن).

شاهۆ فەرید:

گەنجەكێ‌ پارێزگەها دهۆكێ‌ دیار كر، دڤێت حوكمەت ل گۆرەی هزرێن گەنجان كاری بۆ وان پەیدا بكەت و گۆت: ژبەر نەبوونا یاسایەكا دورست بۆ دیاركرنا دەمژمێر و پارەیی، گەنجێن مە بێ كار ماینە، دڤێت ژلایێ حكومەتێ ڤە ژی پالپشتیەكا باش بۆ هەبیت، هزرێن وانا بۆ بكەنە كار.

كاوە فارس خودانێ‌ گرۆپەكێ باژێرێ دهۆكێ یە پێك دهێت ژ ستودیو و گول فروشی و دیاریان و هۆلەكا بچووك بۆ رۆژبوونان و شەڤێن خەنایێ، د دیدارەكێ دا بۆ رۆژناما ئەڤرۆ گۆت: هەڤال و هەڤپشكێ من موهەنەدی پێشنیازا ڤی كاری بۆ من دیار كر، ئەم قوتابی بووین ل بەشێ زانستێ كومپیوتەری و حەزا من ل سەر كارێ فوتۆیێ هەبوو، ل دووڤ دا مە جهەكێ باش و گونجای هەلبژارت بشێین پتر خزمەتا بووك و زاڤایان بكەین، ل دەسپێكێ ئاستەنگ گەلەك هەبوون، بەلێ مە هەموو شیانێن خوە مەزاختن، پێشكەفتنەكا باش مە ئێخستە كارێ خوە و كێماسی مە چارەكرن، ستافەكێ باش مە هەیە سێ ژ وان كچن ل گەلمە كاردكەن، خەلكەكێ زۆر قەستا مە دكەت، ژبەر كارێ مە بوویە جهێ رازیبوونا خەلكەكی.
زێدەتر كاوەی گۆت: دڤێت گەنج پووتەدانێ بدەتە خوە و هەولبدەت سەرخوە كاربكەت، بشێت دەلیڤەیان بۆ خوە پەیداكەت، پشتبەستنێ نەدەتە كارێ حكومی، ئەو هێزا خوە بینتە دەرێ و خوە ئاڤاكەت، هەر هزرەكا هەبیت بزانیت دێ ل جهەكی گونجیت، بلا پێشكێش بكەت دا بۆ بیتە دەلیڤە، مە چەندین خولێن فێركرنا كارێ فوتویێ ڤەكرینە، یێ قەستا مە ژی بكەت دێ فێركەین، ژبەر نەبوونا یاسایەكا دورست بۆ دیاركرنا دەمژمێر و پارەیی، گەنجێن مە بێ كار ماینە، دڤێت ژلایێ حكومەتێ ژی پالپشتیەكا باش بۆ هەبیت، هزرێن وانا بۆ بكەنە كار.

هەولێر، قائید میرۆ:

ئیبراهیم مەندەلاوی، ڤەكۆلەرێ سیاسی و جڤاكی بۆ رۆژناما ئەڤرۆ دیار كر، كوردان بەری 32 سالان ژ سفرێ دەستپێكریە بۆ حوكمڕانیێ ب شیانێن زۆر كێم و سنوردار، دەستپێكێ كێماسیێن زۆر هەبوون ل دەزگەهێن حوكمەتێ كەسێن شارەزا و بسپۆر هژمارا وان زۆرا كێم بوو، بۆ نموونە چەند كەسەكێن كێم هەبوون مامۆستایێن زانكۆیێ یان دادوەر و شارەزایێن قانوونی، بەلێ نوكە هەرێما كوردستانێ ب هزاران شارەزا و بسپۆر د هەموو بیاڤاندا هەنە.
ئیبراهیم گۆتژی: (مخابن ئەم نەشیاینە وەكی پێدڤی مفا ژ شیانێن وان كەسان وەربگرین، ب شێوەیەكی كەسێن گونجایی ل جهێن گونجایی بهێنە دانان، هەروەسا وەك پێدڤی نەشیاینە بازاڕی بۆ دەرچوویێن زانكۆ پو ەیمانگەهان ڤەبینین، ئەڤە ژی بۆیە ئەگەر هەموو كەس داخوازا دامەزراندنێ ل كەرتێ گشتی بكەن، مخابن پشتی سالا 2003ێ هەتا بەری شەڕێ داعش لەشكەرەكێ فەرمانبەران هاتینە دامەزراندن، بێی پێداچوون و پێدڤیان خەلك هاتینە دامەزراندن و گەهشتە قۆناغەكێ رێژا كەسێن مفادار ژ وەرگرتنا مووچەی گەهشتیە ئاستەكێ مەترسیدار).
مەندەلاوی دا زانین كو ددەمێ نوكەدا 40%ێ كەسێن سەر هەژدە سالیێ هاتینە دامەزراندن، ئەڤەژی بۆیە بارەكێ گران ل سەر حوكمەتێ و بۆیە ئەگەر خەلك هزر د كارێ ئازاد دا نەكەت و دەلیڤە ژی بۆ كەسێن خودان شیان نەهێلایە، ل گورەی ئامارێن بەردەست دناڤبەرا سالێن 2004ێ هەتا 2013ێ بهزاران كەس هاتینە دامەزراندن زۆربەیا وانژی باوەرنامە هەبووینە، بەلێ سالا 2013ێ بۆ 2014ێ 30 هەتا 40 هزار كەس هاتینە دامەزراندن، بەلێ دەرچوویێن زانكۆیان ددەمێ 9 سالاندا زۆر ژ ڤێ هژمارێ زێدەترە و نە هەڤسەنگیەك پەیدا كریە، ئەڤەژی بۆیە ئەگەر كێمترین دەلیڤە بۆ دەرچوویێن نوكە و نفشێ نوكە هەیە).
ئیبراهیم مەندەلاوی گۆتژی: (پێدڤیە كار بهێتە كرن داكو بشێین كار بۆ نفشێ نوكە بكەین و دەلیڤا كاری بۆ بهێتە ڤەدیتن، هەتا حوكمەت فەرمانبەرێن پێدڤی نەبن لادەت، هەمبەردا خەلكێ بسپۆر و شارەزا بهێتە دامەزراندن، چونكە دامەزراندنا كەسێن شارەزا و لادانا كەسێن نە پێدڤی دێ بیتە ئەگەرێ بهێز كرنا ئەدایێ حوكمەتێ و گۆت: (ژ وان ژی كار بهێتە كرن بۆ راستڤەكرنا قانوونا خانەنشینیێ بشێوەیەكێ رێك بهێتە ڤەكرن فەرمانبەر بهێنە خانەنشینكرن و كەسێن گەنج بهێنە دامەزراندن، هەروەسا مۆلەتێن دۆم درێژ هەبن بۆ فەرمانبەران و دەلیڤا كاری ل كەرتێ تایبەت بۆ هندەك فەرمانبەرێن حوكمەتێ بهێتە ڤەدیتن، ژلایەكێ دیڤە دڤێت كار ل سەر ڤەگوهاستنا فەرمانبەران دناڤبەرا وەزارەتێن حوكمەتێ بهێتە كرن، هەروەسا ناڤەندەك بهێتە دامەزراندن بۆ كەسێن بێكار و ل كەرتێ تایبەت و گشتی هەكە پێدڤی ب دامەزراندنێ هەبیت مفا ل ئەڤێ ناڤەندێ بهێتە وەرگرتن).