سەرۆكێ حوكمەتا هەرێما كوردستانێ ب هەلكەفتا سەركەفتنا كۆنگرەیێ پێنجێ یێ ئێكەتی نیشتمانی كوردستان، پیرۆزباهی ل سەرۆك و سەركردایەتیا ئێكەتیێ دكەت.
دوهی سێشەمبی 3/10/2023، مەسرور بارزانی، سەرۆكێ حوكمەتا هەرێما كوردستانێ پەیامەكا پیرۆزباهیێ ب هەلكەفتا سەركەفتنا كۆنگرەیێ پێنجێ یێ ئێكەتی نیشتمانی كوردستان بەلاڤكر و تێدا دبێژیت» ب هەلكەفتا سەركەفتنا كۆنگرەی و دەستنیشانكرنا سەركردایەتیا نوو یا ئێكەتیێ، پیرۆزباهیێ ل هەوە و هەموو ئەندام و لایەنگرێن حزبا هەوە یا خەباتكەر دكەم».
سەرۆكێ حوكمەتا هەرێما كوردستانێ گوت ژی» هیڤیدارم قۆناغەكا نوو د خزمەتا مللەت و نیشتمانی دەست پێ بكەن و پێنگاڤێن هەوە بۆ ئێكڕێزیێ و تەباییێ و پێشڤەبرن ب دەستكەفتان و پاراستنا نیشتمانی و بەرژەوەندیێن بلند یێن ئاخ و خەلكێ كوردستانێ چرتر بكەن و هەروەسا هەماهەنگی و پشتەڤانیا هەوە بۆ بجهئینانا پلان و بەرنامەیێن حوكمەتێ زێدەتر بكەن».

سەرۆكێ هەرێما كوردستانێ د سالڤەگەرا وەغەركرنا مام جەلالی دا دوپاتی ل ئێكڕێزیێ، تێكگەهەشتنێ و چارەسەركرنا كێشەیان و پاراستنا بەرژەوەندیێن گشتی دكەت.
دوهی سێشەمبی 3/10/2023، نێچیرڤان بارزانی، سەرۆكێ هەرێما كوردستانێ د پەیامەكێ دا د سالڤەگەرا وەغەركرنا مام جەلالی گوت» د سالڤەگەرا وەغەركرنا رەحمەتی سەرۆك مام جەلالی دا ب ڕێز و پێزانین ل خەبات و تێكۆشانا وی دا ژ پێخەمەت ئازادی و مافێن گەلێ كوردستانێ و ئیراقێ دنێرین».
سەرۆكێ هەرێما كوردستانێ گوت ژی» ب ڤێ هەلكەفتێ دوپاتیێ ل ئێكڕێزیێ و تێكگەهشتنێ و تەبایێ وچارەسەركرنا كێشەیان و پاراستنا بەرژەوەندیێن گشتی دكەین كو ئارمانج و خواستا سەرۆك مام جەلالی ژی بوو».

سەرۆكێ هەرێما كوردستانێ، نێچیرڤان بارزانی د پەیوەندیەكا تەلەفۆنی دا ل گەل بافل تالەبانی، سەرۆكێ ئێكەتی نیشتمانی كوردستان ب هەلكەفتا سەركەفتنا كۆنگرەیێ پێنجێ یێ ئێكەتیێ و هەلبژارتنا وی وەكو سەرۆكێ ئێكەتیێ پیرۆزباهی لێكر.
ب گۆرەی بەیاننامەیەكا سەرۆكایەتیا هەرێما كوردستانێ، نێچیرڤان بارزانی، سەرۆكێ هەرێما كوردستانێ د پەیوەندیەكا تەلەفۆنی دا ل گەل بافل تالەبانی، سەرۆكێ ئێكەتی نیشتمانی كوردستان» هیڤی خواست سەرۆك وسەركردایەتیا ئێكەتی نیشتمانی كوردستان د كار و ئەركێن خوە دا سەركەفتی بن و ئێكەتی و ئالیێن سیاسی پێكڤە كاری بۆ ب هێزكرنا ئێكڕێزی و تەبایی و پێكڤەكاركرنێ بكەن و هەموو ڕۆلێ خوە د پاراستنا مافێن دستووری یێن هەرێما كوردستانێ دا بگێرن».
ژ ئالیێ خوەڤە، بافل تالەبانی» سوپاس و پێزانینا خوە و ئێكەتیێ بۆ پەیوەندی و پیرۆزباهی و پشكداریا نێچیرڤان بارزانی د ڤەكرنا كۆنگرەیێ ئێكەتیێ دا دوپاتكر» .

هەولێر، قائید میرۆ

فراكسیۆنێن د ناڤا جڤاتا نوونەرێن ئیراقێ دا د بەرهەڤ نینن بۆ دەنگدانێ ل سەر پارێزگەهبوونا هەلەبجە و پەرلەمانتارەكێ كورد ژی ئاماژە ب وێ چەندێ دكەت، ئەرەبێن شیعە و یێن سوونە ژی مەرجێن خوە هەنە بۆ دەنگدانێ ل سەر پارێزگەهبوونا هەلەبجە. هەروەسا دبێژیت، بزاڤێن مە دبەردەوامن بۆ وێ چەندێ بڕیارا پارێزگەهبوونا هەلەبجە ژ ئالیێ جڤاتا نوونەرێن ئیراقێ ڤە بهێتە پەسەندكرن.
ئامانج هەركی، ئەندامێ جڤاتا نوونەرێن ئیراقێ ژ فراكسیۆنا پارتی دیموكراتی كوردستان بۆ ڕۆژنامەیا (ئەڤرۆ) گوت» پەرلەمانتارێن ئیراقێ پێشەمان نەبووینە ل سەر دەركرنا بڕیارا پارێزگەهبوونا هەلەبجە، بەلێ وان ژی مەرجێن خوە هەنە، شیعە دخوازن دگەل بڕیارا پارێزگەهبوونا هەلەبجە قەزا تلەعفەر ژی ئەوا نوكە ب سەر پارێزگەها نەینەوا ڤە ببیتە پارێزگەه، هەروەسا فراكسیۆنێن سوونی ژی دخوازن قەزا فەلۆجە ئەوا ب سەر پارێزگەها ئەنبار ڤە ببیتە پارێزگەه مینا هەلەبجە».
گوت ژی» مە ئاریشە دگەل پارێزگەهبوونا چ قەزایەكێ نینە، بەلێ ئەم ناڤەشێرین وەكی كورد دگەل پارێزگەهبوونا تلەعفەر نینین، چونكە مە دیت ل سەر دەستێ قەزا تلەعفەر چ ب سەرێ كوردان هاتیە و ئەزموونێن تەحل مە دگەل تلەعفەر هەنە، هەرچەندە بزاڤێن مە د بەردەوامن بۆ وێ چەندێ بڕیارا پارێزگەهبوونا هەلەبجە بهێتە دەركرن ژئالیێ جڤاتا نوونەرێن ئیراقێ ڤە، چونكە هەكە فراكسیۆنێن دی ڕازی نەبن ئەم نەشێین بڕیارێ دەربكەین، ژ بەر كو كوردان ٦٣ پەرلەمانتار دناڤا جڤاتا نوونەرێن ئیراقێ دا هەنە و بڕیارا پارێزگەهبوونا هەلەبجە ژی پێدڤی ب زێدەتری نیڤا دەنگێن ئەندامێن جڤاتا نوونەران هەیە».
ژئالیێ خوەڤە شوان كەلاری، ئەندامێ جڤاتا نوونەرێن ئیراقێ ژ فڕاكسیۆنا پارتی دیموكراتی كوردستان بۆ ڕۆژنامەیا (ئەڤرۆ) گوت» ئەڤە چەندین جارە دەنگدان ل دۆر پارێزگەهبوونا هەلەبجە دهێتە پاشئێخستن، ڤێ چەندێ ژی مەرەمێن سیاسی ل پشت هەنە، ڕاستە بەهانەیێن خوە هەنە، بەلێ ئەم د وێ باوەریێ داینە تنێ بابەتەكێ سیاسی یە و هندەك ئالیێن ئیراقی ناخوازن پارێزگەهەكا دی بۆ هەرێما كوردستانێ زێدە ببیت، چونكە هەكە هەلەبجە ببیتە پارێزگەه دێ شایستەیێن دارایی هەبن وەكو هەر پارێزگەهەكا دی یا ئیراقێ، ئەگەرێ ژناڤبرنا ڕژێما بەرێ یا ئیراقێ بۆ هەبوونا چەكێ كیمیایی ڤەدگەڕیت كو هەمبەری خەلكێ سڤیلێ هەلەبجە هاتیە بكارئینان و ئەو ئازادیا نوكە ل ئیراقێ هەی بەرهەمێ خەلكێ هەلەبجەیە، لەوڕا ئەز ب باوەرم ل دوماهیێ دێ پڕۆژە قانوونا پارێزگەهبوونا هەلەبجە هەر هێتە پەسەندكرن، ل دوماهی كۆمبووناجڤاتا نوونەرێن ئیراقێ بڕیار هاتەدان پڕۆژە قانوونا پارێزگەهبوونا هەلەبجە بهێتە گیرۆكرن ئەم ژی ڕازیبووین هەتا دەنگێن پێدڤی ب دەستڤە بینیت، چونكە هەكە بهێت و پڕۆژە قانوون دەنگێ پێدڤی بدەستڤە نەئینیت ئەڤە دێ كەڤیتە خولەكا دی یا جڤاتا نوونەرێن ئیراقێ».

ئەندامەكێ لژنەیا پەترۆل و وزێ ل جڤاتا نوونەرێن ئیراقێ ڕاگەهاند: دبابەتێ هنارتنا پەترۆلا هەرێما كوردستانێ و كەركووكێ دا، ئاریشە د ناڤبەرا حوكمەتا ئیراقێ و توركیا دا هەنە، د ڤێ مەهێ دا سەرۆك كۆمارێ توركیا دێ سەرەدانا ئیراقێ كەت و دێ دانوستاندنێ ل سەر بابەتێ پەترۆلێ و پەكەكێ ل گەل بەرپرسێن ئیراقێ كەت و نوكە ئەو ئاریشەیێن د ناڤبەرا توركیا و ئیراقێ دا هەین یێن بەر ب چارەسەریێ دچن.
سەباح سوبحی، ئەندامێ جڤاتا نوونەرێن ئیراقێ ژ فراكسیۆنا پارتی دیموكراتی كوردستان و ئەندامێ لژنەیا پەترۆل و وزێ ل جڤاتا ناڤبری بۆ ڕۆژنامەیا (ئەڤرۆ) گوت» بابەتێ هنارتنا پەترۆلا هەرێما كوردستانێ و كەركووكێ گەهشتیە قۆناغا دووماهیێ، كو ڕۆژانە 485 هزار بەرمیلن، نوكە بەرهەڤی دهێنە كرن بۆ سەرەدانا رەجەب تەیب ئەردۆغانی سەرۆك كۆمارێ توركیا بۆ ئیراقێ، هەروەسا حوكمەتا ئیراقێ سكالایەك ل سەر هنارتنا وێ پەترۆلا ب ڕێكا توركیا دچیت بریە و د بەرامبەر دا حوكمەتا توركیا ژی داخوازا قەرەبووكرنێ ژ ئیراقێ دكەت».
ناڤهاتی گوت ژی» نە هنارتنا پەترۆلا هەرێما كوردستانێ ب ڕێكا بوریان بۆ بەندەرێ جەیهان یێ توركی، پەیوەندی ب ئیراقێ و توركیا ڤە هەیە، حوكمەتا توركیا داخواز كریە ب گۆژمێ 13 دۆلاران بۆ هەر بەرمیلەكێ داشكاندن بۆ بهێتە كرن، هەڤشێوەیێ ئوردنێ كو نوكە ئیراق پەترۆلێ ب 14 دۆلاران كێمتر ژ بازارێ پەترۆلێ دفرۆشیتە ئوردنێ، هەروەسا كۆمپانیا بۆتاش یا توركی ژی داخواز دكەت بۆ هەر بەرمیلەكێ 7 دۆلاران بدەنە وان، حوكمەتا ئیراقێ ئاریشە ل گەل وان مەرجێن حوكمەتا توركیا هەنە، بەلێ نوكە گڤاشتنێن نێڤدەولەتی و ب تایبەتی یێن ئەمریكا ل سەر ئیراقێ هەنە و ئەم ب هیڤینە كو ل ڤان نێزیكان ئەو ئاریشە چارەسەر ببن و پەترۆلا هەرێما كوردستانێ جارەكا دی ب ڕێكا بەندەرێ جەیهان یێ توركی بۆ دەرڤە بهێتە هنارتن».