هەولێر، قائید میرۆ:
پەیڤدارێ وەزارەتا دارایی ئاشكرا كر، حوكمەتا فیدڕال یا پێگیر نینە بۆ شێوازێ ب رێڤەبرنا دەرگەهێن سنووری و دبێژیت: ب تنێ ڤێ مەهێ حوكمەتا هەرێمێ ژ داهاتێ ناڤخوە 321 ملیار دینار بۆ مووچەی مەزاختینە.
هونەر جەمال، پەیڤدارێ وەزارەتا دارایی دیار كر، هەرێما كوردستانێ یا پێگیرە ب ئەڤان بڕیار و رەسمێن گومركی یێن بۆ خالێن سنووری و فڕۆكەخانان هاتینە دیاركرن، بەلێ حوكمەتا ئیراقێ ب رەسمێن گومركی یا پێگیر نینە و گۆت: «ئەڤە ژی بوویە ئەگەر زۆر جاران بازرگان بەر ب خالێن گومركی یێن گرێدایی ئیراقێ ڤە بچن بۆ ئینانا كەلوپەلان، چونكی ئیراق هندەك ئاسانكاریان ژ دەرڤەی قانوونێ بۆ بازرگانان دكەت، مە ژی وەك هەرێم بزاڤ كرینە ئەو ئاریشە بهێنە چارەسەركرن، هەتا بازرگانێن مە خالێن سنووریێن ئیراقێ بكار نەئینن بۆ ئینانا كەلوپەلان و كاریگەری ل سەر خالێن سنووریێن هەرێمێ نەبیت».
هونەر جەمال گۆتژی: «ب تنێ ڤێ مەهێ 321 ملیار دینار كورتئینان د بەلاڤكرنا مووچێ فەرمانبەران دا هەبوویە و حوكمەتا هەرێما كوردستانێ ژ داهاتێ ناڤخوە شیایە ئەڤێ كورتئینانێ تژی بكەت، چونكی داهاتێ ناڤخوە ب تنێ بۆ بەلاڤكرنا مووچەی نینە، بەلكو مەهانە مەزاختیێن زۆر هەنە و ژ داهاتێ ناڤخوە دهێنە دابینكرن، هەر ل مووچێ وانەبێژان هەتا ئاڤدانا باخچەیان و دابینكرنا خوارنێ بۆ نەخۆشخانە و چاكسازیان و میزانیا وەزارەت و فەرمانگەهێن حوكمەتێ هەموو ل سەر داهاتێ ناڤخوەیە».
نيشاندان