د داخویانیەكێ‌ دا ئەندامێ‌ فێدراسیۆنا تێنسا ئەردی یا ئیراقێ‌ دیار كر ل دەستپێكا مەها بهێت شاندێ‌ هەلبژارتیێ‌ ئیراقێ‌ ب هەمی ژیێن خوە ل سەر ئاستێ‌ كوڕان و كچان دێ‌ بەر ب وەلاتێ‌ مسری چن ژبۆ دانانا كەمپەكێ‌ تایبەت یێ‌ راهێنانێ‌ ئەوا بۆ نێزیكی دو حەفتییان ڤەكێشیت و سێ‌ یاریزانێن كچ دناڤ هەلبژارتیێ‌ ئیراقێ‌ دانە.
زێدەتر سەعید خەلیل كو هەڤدەم سەرۆك شاندێ‌ هەلبژارتیێ‌ ئیراقێ‌ یە بۆ رۆژنامەیا ئەڤرۆ گۆت: ل دەستپێكا ڤێ‌ هەیڤێ‌ زێدەتری 23 یاریزانێن كوڕ و كچ ب ناڤێ‌ هەلبژارتیێ‌ ئیراقێ‌ بۆ ژیێن جودا دێ‌ بەر ب پایتەختێ‌ مسرێ‌ قاهیرە چن ژبۆ دانانا كەمپەكێ‌ راهێنانێ‌ یێ‌ 16 رۆژان، د ناڤ شاندێ‌ ئیراقێ‌ دا هەرسێ‌ كچێن پارێزگەها دهۆكێ‌ هانا ئاڤدەل حەسەن، زەلال سەعید خەلیل و لارا ئاڤدەل حەسەن، ئەوا دێ‌ ل دووڤ بەرنامە و ئەو پلانا هاتییە دانان ژلایێ‌ كادرێ‌ راهێنانێ‌ و فێدراسیۆنا تێنسا ئەردی یا ئیراقێ‌ ل دووڤ پلانەكا رێكخستی راهێنانێن تیۆری و پراكتیكی هەبن و ئەنجامدانا چەندین یاریێن هەڤالینی خوە بەرهەڤكرن بۆ قارەمانیێن داهاتی ل سەر ئاستێ‌ عەرەبی و ئاسیا، یا گرنگ ژی ئەڤ كەمپە دێ‌ بیتە پێنگاڤەكا باش ژبۆ پێشئێخستنا ئاستێ‌ یاریزانێن هەلبژارتیێ‌ ئیراقێ‌.
ژلایەكێ‌ دووڤە ناڤهاتی دیار كر د كۆمبوونا ڤێ‌ دووماهیێ‌ یا فیدراسیۆنێ‌ بڕیار هاتە دان خولا پلا ئێك بهێتە رێكخستن و ئەو یانەیێن رێزێن دووماهیێ‌ یێن پلا نایاب پاشڤە بهێنە پلا ئێك و دێ‌ د دەمەكێ‌ نێزیك ژڤانێن چالاكیێن داهاتی ژی هێنە راگەهاندن و گۆت: هەروەسان بڕیار هاتە دان هەموو یاریزان و راهێنەرێن هەلبژارتیێ‌ ئیراقێ‌ پێدڤیێن وەرزشی وەربگرن ژبۆ رێكخستنا درێسێ‌ وان و دیسان وەكو پشتەڤانی بۆ هەموو راهێنەران.

شاهۆ فەرید:

د دیدارەكێ دا راهێنەرێ‌ ئەكادیمییا تەپا پێی هەرمان حاجی بۆ رۆژناما ئەڤرۆ گۆت: پشتی كاروانەكێ درێژ دیاریا تەپا پێی دا من بوراندی د دەمەكێ‌ كێم دا ژبەر كارێ خوە وەكو فەرمانبەر دەست ژ یاریێ‌ بەردا، نۆكە دگەل ستافێ‌ خوە ئەكادیمیا پۆلیتەكنیك یا حكومی برێڤەدبەین، وەرزشا پارێزگەهێ پێدڤی پارەكێ زورە و پالپشتێ بهێتەكرن دا بشێن رێژەكا زۆرا یاریزانێن كورد و ئاستێ بلند بەرهەم بینین، دەمەكێ دا پالپشتی هەبوو هەڤدە یاریزانین كورد دناڤا پێكهاتێ دابوون، لی هاتنا قەیرانا ئەو یاریزانە ژی كێم بوون.
هەروەسان هەرمانی گۆت: پتریا سەروك یانەیان شیانێن رێڤەبرنێ نینە ژبەر نەبوونا پارەكێ باش، یاریزانێن بیانی ژی ئاستێ پێدڤی ژبەر نەدانا مووچەیان چاڤەڕێ‌ نابن، دڤێت هەر یانەك ژ ئەكادیمێن خوە تیمێن تازەپێگەهشتیان و لاوان چاڤدانێ ب دەنێ‌ هەتا بگەهینتە تیما سەرەكی، ئەڤە پێنگاڤەكا گرنگە چونگۆ ئەڤ یاریزانە ماوەكێ درێژ بۆ دەه سالا پێكڤەبن دی تیمێن باش مەهەبن، دیتنامن ژبەر نەبوونا خول و قارمانیێن كچا یێن بەردەوام و بەرنامێ تایبەت وانڤە تیمین وان دكێمن.
ناڤبری گۆت ژی: كا چەوا من دگەل هەڤالێن خوە بەرگری ناڤێ دهوكێ دكر چاڤدان هەبیت پێدڤیا كێم دێ یاریزانێن بیانی هەبن، هەر كەسێ ئەكادیمێ و تیمەكێ برێڤەدبەت دڤێت بزانیت كا ئەڤ یاریزانە داهات دا ب كێر ڤی وەلاتی دهێت نە بازركانیێ پێ بكەن، چونكۆ زاروك وەكو بەرپەرێ سپیە چەوا تە بڤێت دێ وەسا دەركەڤیت، چێنابیت ئەو ئەكادمێن دەمكی یاریزانا فێركەن دڤێت ڤی باژێری تژی یاریزانێن خومالی بكەین، بلا دەه سالان قوربانێ بدەین بۆ خاترا نڤشەكێ‌ نوو كو ل دووماهیێ نڤشەكێ ئاستێن بلندا بەرهەم ئنین.

جەماوەرێ‌ هەردو یانەیێن شێلادز و تەناهی چاڤ ل سەركەفتنا ئێكێ‌ یا تیمێن خوە نە، ژ چارچووڤێ‌ هەڤڕكیێن گەڕا دویێ‌ و قۆناغا دووماهیێ‌ یا خولا پلا دو یا كوردستانێ‌ دەربازبوون بەر ب پلا ئێكا تەپا پێی هێنە ئەنجامدان، یانەیێن پارێزگەهێ‌ پێدڤی ب سەركەفتنێ‌ هەنە ژبۆ گەشكرنا هیڤیێن دەربازبوونێ‌ ئەوا بڕیارە یاریێن وان ل دەمژمێر پێنجی ئێڤاری بهێنە كرن.
ل یاریگەها زانكۆیا دهۆك تیما یانەیا تەناهی دێ‌ د ناڤ جەماوەرێ‌ خوە دا مێڤاندارییا یانەیا پەروەردە یا هەولێری كەت، د یاریا ئێكێ‌ دا تەناهی دگەل مەخمۆر ل سلێمانیێ‌ ب گۆلەكێ‌ تووشی خۆسارەتیێ‌ بوو، بۆ ڤێ‌ یاریێ‌ سەرۆكێ‌ یانەیا تەناهی جاسم شەعبان بۆ رۆژناما ئەڤرۆ گۆت: دێ‌ هەمی بزاڤان كەین سێ‌ خالێن یاریێ‌ كەین پێخەمەت ڤەگەڕیان بۆ هەڤڕكیێن خولێ‌ و هیڤیێن دەربازبوونێ‌، سەرباری ئەركێ‌ مە ب زەحمەتە و كاودانێن مە یێن دارایی د هەستیارن لێ‌ یا دشیان دا بیت دێ‌ شەڕی بۆ سەركەفتنان كەین.
ژلایێ‌ خوەڤە تیما شێلادزێ‌ دێ‌ ژ دەرڤەیی یاریگەها خوە ل باژێرێ‌ سلێمانیێ‌ بیتە مێڤانا یانەیا بەختیاری د یاریەكا ب سانەهی نابیت بۆ كوڕێن شێلادزێ‌ ئەوا د یاریا ئێكێ‌ دا دگەل مەخمۆر ب گۆلەكێ‌ وەكهەڤبوویی، لێ‌ بۆ ڤێ‌ یاریێ‌ بتنێ‌ سەركەفتن ئارمانجە پێخەمەت هەڤڕكی بۆ پلێتا دەربازبوونێ‌ و گەشبینە ب كۆمەكا گەنجێن دەڤەرێ‌ و پارێزگەهێ‌ پشكدارییا خوە یا ئێكێ‌ بكەتە دەستكەفتەك، ژ یاریێن یێن ئەڤرۆ، هەلەبجەیا شەهید دێ‌ مێڤاندارییا مەخمۆر كەت.

فیدراسیۆنا باسكێت بۆلا ئیراقێ‌ دیار كر ل ناڤەراستا ئەیلۆنا بهێت هەڤڕكیێن خولا نایاب یا وەرزێ‌ 2023- 2024 دەستنیشانكرن ئەوا بۆ وەرزێ‌ چارێ‌ ل دووڤ ئێك تیما یانەیا دهۆكێ‌ پشكدار نابیت و هەكە ڤەگەڕییت دڤێت مەرجێن فیدراسیۆنا ناڤهاتی بجه بینیت.
فیدراسیۆنا باسكێت بۆلا ئیراقێ‌ دیاركر دناڤبەرا 10 بۆ 15ێ‌ ئەیلۆنا بهێت 13 یانە دێ‌ پشكداری وەرزێ‌ نوو یێ‌ خولا پلا نایاب بن ژ وانا یانەیا زاخۆ وەكو نوونەرا ئێكانە یا پارێزگەها دهۆكێ‌ و هەرێما كوردستانێ‌ و هەر ئێك ژ نەفت، حەشد ئەلشەعبی، شورتە، دیفاع ئەلجەوی، دیجلە ئەلجامعە، غازا باكۆر، كارەبا، حللە، كەرخ، نەفتا باكۆر، دیوانیە و تیجارە.
لدۆر یانەیا دهۆك د. خالد نەجم بۆ رۆژنامێ‌ دیاركر بوو هەتا نوكە چو نڤێسارێن فەرمی بۆ مە نەهاتینە و هەكە بهێت ژی مە مەرجێن تایبەت هەنە بۆ ئەوان یانەیێن خودان ناسناڤ و بەرنیاس وەكو دەرفەتەك و رێزگرتنەك ژبۆ ڤەگەڕیانا وێ‌ بۆ پلا نایاب ژ وانا دڤێت كۆمەكا باش یا یاریزانێن هەلبژارتیێ‌ ئیراقێ‌ و پیشەكار هەبن دا بشێت پشكداربن، هەكە شیانێن ئینانا یاریزانێن بڤی ئاستی نەبن و حەز بكەت پشكداریێ‌ بكەن دێ‌ ل ڤاڤارتنێن خولا پلا دو، دیسان ئێك هەتا بگەهیتە پلا نایاب.
هەروەسان ناڤهاتی گۆت: بۆ پلا ئێك یا وەرزێ‌ بهێت یانە هاتینە پەسەنكرن ژپۆ پشكداریێ‌ ئەو ژی ئەكاد، دەربەندیخان، عومال نەینەوا، ناسریە، تەزامن، نەفت میسان، نوعمانیە، ئەلیەقزە، سامرا، ئیمام ئەلموتقین، فورات، قەلعەت سوكەر، ئەلوەحدە، شەترە و حەبانیە.
بۆ زانین دووماهی پشكداریا باسكێت بۆلا یانەیا دهۆك ل وەرزێ‌ 2019-2020ێ‌ بوو، د قۆناغا ئێكێ‌ یا خولێ‌ دا دهۆك رێزا چارێ‌ هاتبوو و دەربازبوو قۆناغا دویێ‌، دگەل یانەیا نەفت بەسرا یاریەكێ‌ وەكهەڤبوو و ئێكێ‌ خوسارەت بوو.

راپۆرتنێن رۆژنامەڤانی بووینە مژارا رۆژانە یا گرێبەستا ستێرێ‌ فرەنسی و یانەیا پاریس سانجێرمان كێلیان مباپی تایبەت پشتی یانەیا وی بڕیار دایی پشكداری كەمپێ‌ راهێنانێ‌ نەبیت ئەڤچەندە بوویە جهێ‌ گۆمانێ‌ ل سەر مانا وی و بەرانبەر دا رۆژانە ئۆفەرێن گران بۆها ژلایێ‌ یانەیێن ئۆرۆپا و سعۆدیێ‌ بۆ دهێنە پێشكێشكرن.
ل دووڤ رۆژنامەیا لێكێپ یا فرەنسی یانەیا ریال مەدرید یا ئسپانی دووماهی ئۆفەرا پێشكێشی مباپی كری 250 ملیۆن یۆرۆنە ئەڤ كۆژمە ئەوە یێ‌ بەری نوكە یانەیا پارێسی داخواز كری، لێ‌ ژ نشكەكێ‌ ڤە و ب شێوەكێ‌ فەرمی یانەیا هیلال یا سعۆدیێ‌ ئۆفەرا مباپی كرە سەرئێك زێدەكرن و هەڤڕكی، جارا ئێكێ‌ 270 ملیۆن یۆرۆ بۆ مباپی دانان، پشتی ڤێ‌ ئۆفەرێ‌ هەر ئێك ژ یانەیێن مانچستەر یۆنایتد، تۆتنهام و چێلسی یێن ئنگلتەرا و ئەنتەر میلان یا ئیتالی و بەرشەلۆنا یا ئسپانی هاتنە دناڤ بازاری دا ئەڤچەندە بۆ ئەگەر یانەیا هیلال ئۆفەرا خوە بگەهینە 300 ملیۆن یۆرۆ كو دبیتە ئۆفەرەكا پیڤایی ل سەر ئاستێ‌ جیهانێ‌، لێ‌ فیدراسیۆنا تەپا پێی یا فرەنسا هاتییە سەر هێل و گەڤ ل یانەیا پاریس سانجێرمان كرینە نابیت سڤكاتیێ‌ ب یاریزانی بكەت و یاسایا پارەیێ‌ پاقژ پشتگۆهـ پاڤێژیت.