ئەلبووما دهۆكا كەڤن هاتیە چاپكرن و بڕیارە ب چاڤدێریا د. عەلی تەتەر، پارێزگارێ دهۆكێ د ڤێ حەفییێ دا مەراسیما ئیمزاكرن و بەلاڤكرنا ئەلبووما دهۆكا كەڤن ب چاپەكا سەردەم بهێتە گێڕان.
دیسا ل سەر راسپاردا مەسرور بارزانی، سەرۆكێ حوكمەتا هەرێما كوردستانێ، ئاریشا هەردو پڕۆژەیێن ئاكنجیبوونێ (ئارام ستی، شاهـ ستی) د كۆمبوونەكێ دا ب سەرپەرشتیا د. عەلی تەتەر، پارێزگارێ دهۆكێ و ب ئامادەبوونا فەهیم عەبدوللا، سەرۆكێ جڤاتا پارێزگەها دهۆكێ و حەمید عەلی، جێگرێ بەرپرسێ مەكتەبا رێكخستنا “پ. د. ك” ل پارێزگەها دهۆكێ و لایەنێن پەیوەندیدار و نوونەرێن بكڕێن شقێن هەردو پڕۆژەیان هاتە چارەسەركرن.

شڤان عەبدی، بەرپڕسێ ڕاگەهاندنا ئیدارەیا سەربخوە یا زاخۆ بۆ ڕۆژناما ئەڤرۆ دیار كر، ل ژێر چاڤدێریا گۆهدار شێخۆ، سەرپەرشتێ ئیدارەیا سەربخوە یا زاخۆ و ب گوژمێ چار ملیار و 664 ملیۆن دیناران بەرێ بنیاتی بۆ نەخۆشخانەكا مەزن و دو قاتی یا 40 تەختی ل سەر ڕووبەرێ 500 مەترێن دوجا ل دەڤەرداریا باتیفا هاتە دانان.
بەرپڕسێ ڕاگەهاندنا ئیدارەیا سەربخوە یا زاخۆ، ئاماژە ب وێ چەندێ ژی كر، ئەڤ نەخۆشخانە پێكهاتیە ژ پشكێن (هەوارهاتن، ڕاوێژكاری، تیشك، سۆنار، ژ دایكبوون، سێ هۆلێن نشتەرگەیان، تاقیگەهـ، كارگەها ئۆكسجینێ، مالا نۆژداران و پارك)ێ‌ و دێ‌ خزمەتەكا باش پێشكێشی وەلاتیێن دەڤەرێ‌ كەت.

ئەڤ سالە بۆ بیرەوەریا 40 سالیا جینۆسایدكرنا هەشت هزار بارزانیان ل سەر گورستانا جینۆسایدكریان چو رێورەسمێن فەرمی ناهێنە ئەنجامدان.
رێبوار رەمەزان بارزانی، رێڤەبەرێ شەهید و ئەنفالكریان ل بارزان بۆ ئەڤرۆ راگەهاند: ئەڤ سالە ل بیرەوەریا جینۆسایدكرنا هەشت هزار بارزانیان، كو دكەڤیتە 31/7 چو رێورەسمێن فەرمی ل گۆرستانا جینۆسایدكریێن بارزان ناهێنە ئەنجامدان.
ل دۆر ئەگەرێ‌ ئەنجام نەدانا رێورەسمێن فەرمی رێبواری گۆت: «ئەڤ سالە گەلەك رێورەسم ل دەڤەرا بارزان، تایبەت ڤەكرنا مۆزەخانا نیشتمانیا بارزانی هەبوون، هەموو مێهڤانان تاجە گولینە ل سەر مۆنۆمێنتا شەهیدێن جینۆسایدێ‌ دانا، لەورا ژی ئەڤ سالە ب فەرمی رێورەسم نابن، ب تنێ‌ ل سەر ئاستێ‌ ناڤخوەیی دێ‌ كەسوكارێن شەهیدێن جینۆسایدكریان سەردانا گۆرستانێ‌ كەن».

ب گوژمێ 677 ملیۆن دیناران دەست ب قێركرنا هەژمارەكا جاددەیێن ناڤخوەیی ل سەنتەرێ ناوچەداریا دێرەلۆكێ‌ هاتە كرن، كو پتریا وان دكەڤنە وان تاخێن نوو دهێنە ئاڤاكرن.
رێبەر سادق مستەفا، رێڤەبەرێ ناوچەداریا دێرەلۆكێ‌ بۆ رۆژناما ئەڤرۆ دیار كر، د چارچوڤێ ئەنجامدانا پڕۆژەیێن خزمەتگزاری دا، ئەوێن ل دەڤەرێ و ڤەكرن و قێركرنا جادەیان ل تاخێن نوو، دەست ب قێركرنا هەژمارەكا جاددەیێن ناڤخوەیی ل سنوورێ باژێرڤانیا وان هاتە كرن و گۆت: «ئەڤ جاددە دكەڤنە تاخێ شەهیدان و درێژاهیا وان دو هزار و 700 مەترن و گوژمێ 677 ملیۆن دیناران بو هاتینە تەرخانكرن و نوكە د قووناغێن داویێ دانە».

، هەرهین محەمەد:

بەرپرسێ‌ رەوشەنبیری و راگەهاندنا هێزا دهۆك یا پاراستنا ژینگەهێ‌ راگەهاند، ئەو رەوشەنبیری ل دەڤ خەلكی دروست بوویە و ژینگەهێ‌ دپارێزن و ژ بەری نوكە باشترە. ل سالا بووری كەسەك ژ ئەگەرێ‌ تێكدان و برینا داران ب كوژمێ‌ 90 ملیون دیناران هاتە سزادان و دیسان د ئەڤ سالە ژی دا (178) كەسێن راڤا ماسییان دكەن هاتنە گرتن و هاتنە رەوانەكرن بۆ دادگەهێ‌.

عەبدولستار عەبدولحەمید، بەرپرسێ‌ رەوشەنبیری و راگەهاندنا هێزا دهۆك یا پاراستنا ژینگەهێ‌ گۆت: ل دەستپێكا هەیڤا پێنچ مە كومبوونەك ئەنجامدا ل گەل هەموو سازیێن ژینگەهپارێز، وەكو رێڤەبەریا پولیسێن دارستانێ‌ و دارستان و پاوانان و فەرمانگەها ژینگەهێ‌ و رێڤەبەریا بەرگێریا شارستانی و تیما فرۆكەڤانی، ژ بۆ هندێ‌ هەماهەنگی دناڤبەرا مە هەموویان دا هەبیت و هەر روودانەكا ئاگربەربوونێ‌ پەیدا بیت ل دەڤەرێ‌ ئەم هەموو پێكڤە ب ئێك تیم پشكداربین د كونترولكرنا وی ئاگری دا، هەروەسا پارێزگارێ‌ دهۆكێ‌ ژی كەسەكێ‌ ژینگەه دوستە و نڤیسارەكا فەرمی ژ لایێ‌ وان ڤە دەركەفتیە كو هێزا دهۆك یا پێشمەرگێ‌ پاراستانا ژینگەهێ‌ كرە بەرپرسێ‌ ژوورەكا عەمەلیاتا و ب سەرپەرشتیا فەرماندێ‌ هێزێ‌ عەمید جەمال و ئەو دام و دەزگەهێن ناڤێن هاتین و ل گەل رێڤەبەریا رێكو پرا و رێڤەبەریا شارەوانیا دهۆكێ‌ بوونە و ئەڤە ژی بوونە ئەندام ل گەل ئەوێ‌ ژوورا من بەحسكری ژ بۆ ئەوێ‌ چەندێ‌ هەماهەنگی دناڤبەرا مە دا دروست بیت و ب زووترین دەم كونترولا ئاگری بكەین.
ناڤهاتی گۆت ژی: ئەو ئاگرێ‌ بەردبیتە ژینگەهێ‌ جوراو جورن و هندەك جاران ژی ژ ئەگەرێ‌ خەمساریێ‌ یە و گەلەك جاران خەلكێ‌ مە دێ‌ چیتە سەیرانان، پشتی ژ وی جهی دهێن وی ئاگری ناڤەمرینن و نەڤەمراندنا ئاگری ژی هەكە هەوایەكێ‌ كێم ژی بهێت دێ‌ ئاگر بەربیتە ژینگەهێ‌، ژبەر كو ئەڤ سالە بارانێن باش هاتینە و پیش و پەلەخ دروست بوویە، بەلێ‌ ئەڤ سالە خەلكێ‌ مە باشتر لێ هاتیە.
زێدەتر ژی گۆت: ل سالا بوری كەسەكی ل دەڤەرا لومانا رووبەرەكێ‌ مەزن یێ‌ داران بڕی بوو و كەسەك ژی هاتە رەوانەكرن بۆ دادگەهێ‌ و پشتی دادگەهێ‌ كارێ‌ خوە ل گەل ب دووماهی ئینای هاتە سزادان ب كوژمێ‌ ب 91 ملیون دیناران و هەر كەسەكێ‌ خوە هەكە شوك ژی د دەستی دابیت ئەم دگرین و ئەم سوزنامەكێ‌ ل سەر چێدكەین و دووبارە نەكەڤە و ئەو كەسێ‌ ژەهرێ‌ دكەنە دناڤ ئاڤێ‌ دا و بەری چەندەكێ‌ ژی ل رووبارەكی ل دەڤەرا شێخان روودایە و ب وی رەنگی گەلەك ماسی و گیانەوەرێن دی یێن ئاڤی مرن و خوە هەكە ئەو ئەوان ماسیان بخوت، یات ب فرۆشیت زیانێن خوە هەنە و دووڤچوونا وی كەسی ژی یا بەردەوامە یێ‌ ئەو كارە كری.