ل سنوورێ ئیدارەیا سەربخوە یا زاخۆ، د ئێك ڕۆژ دا چار كەس د خابووری دا خەندقین.
ڕائید جەمال هەسن، ڕێڤەبەرێ بەڕەڤانیا باژێری ل زاخۆ بۆ ڕۆژناما ئەڤرۆ دیار كر كو كەسەكێ 14 سالی بناڤێ (ئە. ئا. ی) كو خوەجهێ مسێریكێ یە ل گوندێ دولا د خابووری دا خەندقیە و كەسەكێ 13 سالی بناڤێ (م. ئە. ق) ل نێزیك گوندێ چەمكویركێ د خابووری دا خەندقیە.
ڕێڤەبەرێ بەڕەڤانیا باژێری ل زاخۆ، ئاماژە ب وێ چەندێ ژی كر كو كەسەكێ دی یێ‌ 14 سالی بناڤێ (ئە.ح. م) ل نێزیك گوندێ چەمسیرمۆ د خابووری دا خەندقیە و كەسەكێ دی یێ 17 سالی بناڤێ (ر. خ. س) كو خوەجهێ دەڤەرداریا سێمێلێ یە ل گوندێ چەمسیرمۆ د خابووری دا خەندقیە و گۆت: «ژ لایێ تیما نقوومڤانێن بەڕەڤانیا باژێری ل زاخۆ لاشێ وان ژ ئاڤێ هاتیە دەرئێخستن و بۆ نەخوەشخانا داد ل زاخۆ هاتنە هنارتن».
ل دووڤ زانیاریان پشتی روودانا خەندقینا وان چار كەسان، كرنا مەلەڤانیان د خابووری دا هاتە قەدەغەكرن.

هەولێر، قائید میرۆ:

ئەندامەكێ كورد یێ لژنا نەفت و غازێ ل پەرلەمانێ ئیراقێ ئاشكرا كر، كار ژ بۆ ئەرزانكرنا بهایێ پانزینێ ل هەرێما كوردستانێ دهێتە كرن و وەزارەتا نەفتا ئیراقێ دیاركریە، ئەرزانكرنا بهایێ پانزینێ پێدڤی ب مەزاختنا بودجەی هەیە.
دكتۆر سەباح سوبحی، ئەندامێ لژنا نەفت و غازێ ل پەرلەمانێ ئیراقێ بۆ رۆژناما ئەڤرۆ دیار كر، كار ژ بۆ ئەرزانكرنا بهایێ پانزینێ ل هەرێما كوردستانێ دهێتە كرن و وەزارەتا نەفتا ئیراقێ دیاركریە، ئەرزانكرنا بهایێ پانزینێ پێدڤی ب مەزاختنا بودجەی هەیە، ژ بەركو حوكمەت پارەی ژ بۆ پارزینگەهێن نەفتێ د مەزێخیت و ئەو پارە ژی د ناڤا قانوونا بودجەی دا دهێتە دیاركرن، لەوڕا بڕیارە پارەیێ پێدڤی بهێتە مەزاختن و پانزینا 450 دیناری ل هەرێما كوردستانێ بهێتە بەلاڤكرن.
دكتۆر سەباح سوبحی گۆت: «هەموو بزاڤەكێ دێ كەین بۆ ڤێ چەندێ بهایێ پانزینێ ل هەرێما كوردستانێ ببیتە 450 دینار مینا پارێزگەهێن ناڤەڕاست و باشوورێ ئیراقێ، بەلێ پێتڤیە كۆمبوون ل گەل ئالیێ ئیراقی بهێنە كرن و حوكمەتا فیدڕال پشتەڤانیا بەرهەمئینانا پانزینێ بكەت، ئەم دێ ل سەر هەولێن خۆ بەردەوام بین ل گەل وەزارەتا نەفتا ئیراقێ هەتا میكانیزمەك بهێتە دانان».

د. ئیحسان مەنسور، تایبەتمەندێ ددانا و خەلكێ باژێرێ دهۆكێ، دەرمانەكێ نوو دژی بەكتریایێن ددانان داهێنا و باوەرنامەیا داهێنانێ ل وەزارەتا پلاندانانا ئیراقێ وەرگرت.
د. ئیحسان مەنسور بۆ ئەڤرۆ گۆت: «من دەرمانەك بۆ رێگریكرنێ ل بەكتریایێن ددانان داهێنا و باوەرنامەیا داهێنانێ ژ وەزارەتا پلاندانانا ئیراقێ وەرگرت، كو ئەڤە دبیتە جارا ئێكێ د جیهانێ دا دەرمانەكێ ژ ڤی جۆری دهێتە داهێنان».
گوتژی: «پێكهاتەیێن ڤی دەرمانی هەموو ب رێژەیا 100%ێ ژ گیایێن سروشتی نە، ل قووناغا ئێكێ ئەم شیاین دەرمانی ب داهێنین، ل قووناغا بهێت دێ ل هیڤیا ئێك ژ كۆمپانیێن بەرهەمئینانا دەرمانان بین، كو ڤی دەرمانی دروست بكەت و بێخیتە د بازاری دا».

ئامێدیێ، مەحمود نهێلی:

ژ ئەنجامێ بوردۆمانا فرۆكەیەكا بێ فرۆكەڤان، ئاگر بەربوو ئاقارێ گوندێ بەرچێ ل سنوورێ ناوچەداریا دێرەلۆكێ‌ و د ئەنجامێ دا رێژەیەكا زۆر یا ئاقارێ گوندێ ناڤهاتی هاتە سۆتن و زیانێن زۆر گەهاندنە خەلكێ وێ دەڤەرێ.
رەڤەند گوهەرزی شاهد حال ل دەڤەرێ بۆ رۆژناما ئەڤرۆ دیار كر، ژ ئەنجامێ بوردۆمانكرنا فرۆكێن بێ فرۆكەڤان، دوهی ئاگر بەربوو ئاقارێ گوندێ بەرچێ و سەرگەلێ و گۆت: «ئەڤ ئاگرە گاڤ بۆ گاڤێ زێدەتر لێهات و رێژەیەكا زۆر یا دارستانێ و ئاقارێ گوندێن بەرچێ و سەرگەلی و بلاڤە ل دەڤەرا نهێلێ سۆتن».
گۆتژی: «ئەڤ بوردۆمانە گەلەك یا نێزیكی گوندی بوو، لەو ترس و دودلی ل جەم وەلاتیێن وێ دەڤەرێ پەیداكریە».

صەباح زوهێر

رێڤەبەرێ‌ ئاڤا ئاكرێ‌ راگەهاند، سالانە ل وەرزێ‌ هاڤینێ‌َ كێشا كێمیا ئاڤێ‌ ل گەلەك تاخ و گوندان ل ئاكرێ‌ سەرهلددەت و ئەم ناچارین ب تانكەران بۆ وان تاخان ئاڤێ‌ دابین بكەین و گۆت: ل ئاكرێ‌ پرۆژێن باش هەنە، ئەگەر ئەو پرۆژە تەمامبن، دێ‌ بەشەكێ‌ زۆر ژ كێشا ئاڤێ‌ ل تاخ و گوندان چارەسەربیت.

ئەندازیار زرار ئەحمەد، رێڤەبەرێ‌ ئاڤا ئاكرێ‌ بۆ رۆژنامەیا ئەڤرۆ دیار كر، هژمارەكا پرۆژێن ئاڤێ‌ ل چەند مەهێن بوری ئەڤ سالە دا ل سنورێ‌ قەزا ئاكرێ‌ و دەوروبەر هاتینە جێبەجێكرن، ئەڤ پرۆژە هەمی هاتینە جێبەجێكرن د ماوێ‌ شەش هەیڤێن بوری كو كەفتینە د خزمەتا خەلكی دا، هندەك ژ وان هێشتا ئاریشا كارەبێ‌ یا مای و ئەگەر ئاریشا كارەبێ‌ تەمامبوو، دێ‌ ئەو ژی كەڤنە د خزمەتا وەلاتیان دا.
سەبارەت پرۆژێن نها دهێنە جێبەجێكرن ل سنورێ‌ قەزا ئاكرێ‌ ناڤهاتی گۆت: هژمارەكا دی یا پرۆژان ل ژێر جێبەجێكرنێ‌ دانە، ئەو ژی پرۆژێن ئاڤا (گوندێ‌ خرپێ‌ و گوندێ‌ زنتا و گوندێ‌ گسێ‌ و گوندێ‌ زانا و كولانا بیرەكا ئەڤێ‌ بۆ گەرەكا سوسنا و گوندێ‌ شارانێ‌ و گەرەكا شورەش و دانانا تۆرا ئاڤێ‌ ل گەرەكا پیشەسازیا ئاكرێ‌ و كولانا بیرەكا ئاڤێ‌ بۆ گەرەكا شورەش و سمیلان،كولانا بیرەكێ‌ بۆ گەرەكا گولان) ئەڤ پرۆژە نوكە ل ژێر جێبەجێكرنێ‌ دانە و كار تێدا دهێتەكرن.
زێدەتر گۆت: هژمارەكا دی یا پرۆژێن ئاڤێ‌ ل سنورێ‌ قەزا ئاكرێ‌ رەزامەندی بۆ هاتیەكرن، لێ هێشتا نە كەفتینە د وارێ‌ جێبەجێكرنێ‌ دا، لێ‌ هاتینە راگەهاندن و ل دەمەكێ‌ نێزیك بۆ بەلێندەران بكەڤیت، دێ‌ كەڤنە د وارێ‌ جێبەجێكرنێ‌ دا، هەروەسا پرۆژێ‌ ئاڤێ‌ سەنتەرێ‌ ناحیا دینارتە و گوندێ‌ مەزرینگان و گوندێ‌ ئامادا ژێری و گوندێ‌ شوش و گورانكا بچووك دگەل پرۆژێ‌ ئاڤا گەرەكا سووسنا كو ئەڤە ئێك ژ پرۆژێن گرنگە ژلایێ‌ ئەنجوومەنێ‌ وەزیران پارە بۆ ڤی پرۆژەی هاتیە دانان كو ب ڤێ‌ چەندێ‌ ئاریشا ئاڤێ‌ دێ‌ ل ڤێ‌ گەرەكێ‌ چارەسەربیت، ڤان پرۆژان ژی رەزامەندی بۆ هاتیەكرن و هاتینە راگەهاندن.
گۆت هەروەسا پرۆژێ‌ دی بۆ هەردوو گەرەكێن كوچینە و كوردستان و گەهاندنا كارەبا بەردەوامە بۆ بیرێن وان گەرەكان و مە داخوازكریە ل توركیا كو كێبلێ‌ كارەبێ‌ بهێت دێ‌ كارەبا 24 دەمژمێری بۆ وان بیران دابین كەین و ئاریشا وان ژی یا ئاڤێ‌ دێ‌ چارەسەربیت.
سەبارەت وان گەرەكێن ئاڤ ب رێكا تانكەرێن ئاڤێ‌ بۆ دهێتە دابینكرن، ئەندازیار زرار ئەحمەد گۆت: نها ئەو گەرەكێن پتری هەموویان ل سەنتەرێ‌ ئاكرێ‌ كێشا كێم ئاڤیێ‌ هەی هەردوو گەرەكێن كوچینەی و گەرەكا شورەش كو د وەرزێ‌ هاڤینێ‌ دا ئەم ب رێكا تانكەرێن ئاڤێ‌ پێدڤیا وان دابین دكەین كو ئەڤ چەندە ژی گەلەك جاران دبیتە جهێ‌ گازندێ‌، لێ‌ مە چ چارەیێن دی نینە، هەتا ئەو پرۆژێن مە ئاماژە پێكری بهێنە جێبەجێكرن دێ‌ كێشا ئاڤێ‌ یا وان تاخان هەموویان چارەسەربیت.