سالار محەمەد دۆسكی:

بریكارێ‌ وەزارەتا ژینگەها عیراقێ‌ ئاشكراكر، ل هەیڤا داهاتی دێ‌ گرێبەستا عیراقێ‌ ل گەل وەلاتێن كەنداڤی بۆ گرێدانا كارەبا عیراقێ‌ ل گەل وان وەلاتان كەڤیتە كاری و 7000 مێگاواتێن كارەبێ‌ دێ‌ هێنە زێدەكرن و هەرێما كوردستانێ‌ ژی دێ‌ ژ ڤێ‌ رێژێ‌ بەهرا خوە هەبیت.

ئەندازیار كامیران، بریكارێ‌ وەزارەتا ژینگەها عیراقێ‌ بۆ رۆژناما ئەڤرۆ گۆت: پیسبوونا ژینگەهێ‌ كاریگەری هەیە، بەلێ‌ گوهۆرینا كەش و هەوایی هوكار ئەم نینن، لەوما گرنگە هەردو حوكمەتێن عیراقێ‌ و كوردستانێ‌ وەك ئێك تیم كار بكەن ب وێ‌ مەرەمێ‌ كاریگەری یا پیسبوونا ژینگەهێ‌ ل سەر وەلاتیێن مە بهێتە كێمكرن.
كامیرانی ئەو ژی گۆت: مەترسیا كێمبوونا ئاڤا هەردو رووبارێن دیجلە و فۆرات هەتا سالا 2040ێ‌ دێ‌ گەلەك كێم بیت، ئەگەر ب ڤی رەنگێ‌ نوكە بیت، باشتر ئەوە ئەم كار بكەین دێ‌ چەوا سەردەریێ‌ ل گەل وێ‌ ئاڤێ‌ كەین و ئابوورێ‌ تێدا بكەین و ب رێكا تەكنولوژیا نوكە و سەردەم و ب ڤێ‌ رێكێ‌ دێ‌ پتر مفایی ژێ‌ وەرگرین.
هێشتا گۆت: ل دووڤ رێكەفتنێن ناڤدەولەتی، دڤێت ئەو وەلاتێن رووبارێن ئاڤێ‌ تێدا دەربازدبن، پشكا خوە یا ئاڤێ‌ وەربگرن، وەك حوكمەتا عیراقێ‌ هەتا نوكە مە چو سكالا ل سەر حوكمەتا توركیا ل نەتەوێن ئێكگرتی ل سەر كێمبوونا ئاڤێ‌ ل سەر عیراقێ‌ و ئیرانێ‌ تومارنەكرینە ل سەر بابەتی و بەردەوام دگەنگشێ‌ داینە ل گەل هەردو وەلاتان ب وێ‌ مەرەمێ‌ ئاڤا مە بهێتە زێدەكرن و رێژا نوكە دهێـتە ناف عیراقێ‌ دناڤبەرا (30% بۆ 40%) یە.
بریكارێ‌ وەزارەتا ژینگەها عیراقێ‌ ئەو ژی گۆت: هەبوونا پلاستیكی دناڤا ژینگەهێ‌ دا گەلەك كارتێكرن هەیە و هەتا 100 سالان دمینت و ئەڤە ژی گەلەك یا ب مەترسیە ل سەر مرۆڤان و ئاژەلان و ئاژەلێن ئاڤی و هەتا رووەكی ژی و گەلەك یا ب مەترسی یە، لەوما یا گرنگە خەلكێ‌ خوە هشیار بكەین كو پلاستیكی گەلەك كێم بكاربینین و پێ‌ گوهور ژی بۆ بهێتە دیتن، بۆ نموونە مرۆف دشێت كاغەزی بكاربینت بەرامبەر یێ‌ پلاستیكی دا كاریگەری كێمتر بیت و مەترسی ل سەر ژیانا خەلكی كێمتر لێ‌ بهێـت.
ناڤبری گۆت ژی: حوكمەتا عیراقێ‌ یا كار دكەت مولیدە بهێنە كێمكرن دا ژینگەه یا پاقژ بیت و هەیڤا داهاتی دێ‌ كارەبا عیراقێ‌ ب یا كەنداڤی ڤە هێتە گرێدان و 7000 هزار مێگاواتێن كارەبێ‌ دێ‌ ل تۆرا نشتیمانی یا كارەبا عیراقێ‌ هێنە زێدەكرن و پرۆگرام هەیە چەند رێكێن دی ژی بهێنە بكارئینان بۆ دابینكرنا كارەبێ‌ دا ژینگەه هەر یا پاقژبیت و ب هیڤی نە ئەڤ رێژا كارەبا ژ كەنداڤی رێكەفتن ل گەل هاتیەكرن پشكا هەرێما كوردستانێ‌ ژی بهێتە دابینكرن.
بریكارێ‌ وەزارەتا ژینگەها عیراقێ‌ ئەو ژی دیاركر، نوكە 10 پرۆژێن نوو هەنە و چەندین پرۆژە ل گەل وەزارەت و فەرمانگەهێن میری ژی هەنە ب وێ‌ مەرەمێ‌ بۆ سالێن داهاتی پتر گرنگی ب ژینگەهێ‌ بهێـتەدان و سەرۆك وەزیرێن عیراقێ‌ ژی پشتەڤانەكێ‌ هەرە باشە بۆ ژینگەهێ‌ و بودجەكا باش تەرخانكریە ب ڤێ‌ مەبەستێ‌.

رەمەزان زەكەریا

سالانە ل سنوورێ دەڤەرداریا ئاكرێ رێژا چاندن و بەرهەمئینانا برنجێ كوردی زێدە دبیت، ژبەر وێ خواستا بەردەوام ل سەر برنجێ كوردیێ ئاكرێ یێ‌ هەی، ئەڤ چەندە بوویە ئەگەر جوتیارێن دەڤەرێ گرنگیەكا زێدەتر بدەنە برنجێ كوردی.

ئەندازیار فازل مستەفا، رێڤەبەرێ چاندنا ئاكرێ بۆ ئەڤرۆ گۆت: جوتیارێن دەڤەرا ئاكرێ سالانە گرنگیەكا باش ب بەرهەمێ چاندنا برنجێ كوردی ددەن، ئەڤ سالە هەتا نوكە 4 هزار دونەم هاتینە چاندن و پێشبینی دكەین هەتا دووماهیا وەرزی بگەهیتە 12 هزار دونەما، ئەڤە پشتی وێ چەندێ دهێت كو سالانە خواستەكا باش ل سەر برنجێ كوردی هەیە ل نافخۆیا كوردستانێ و باشوورێ عیراقێ و دەرڤەی كوردستانێ ل ڤان دووماهیا چەندین جارا برنجێ كوردیێ ئاكرێ هاتیە رەوانەكرن بۆ دەرڤەی كوردستانێ.
ناڤبری گۆت ژی: ئاخ و ئاڤا ئاكرێ بۆ چاندنا برنجی گەلەك یا گونجایە ئەو رێژا مایی ژبەر كرین و فرۆتنا گەنمی یە ل ڤێ هەیڤێ پاشی دێ چاندنا برنجی ب رەنگەكێ بەرفرەهـ دێ دەست پێكەت و چەندین جۆرێن برنجی هێنە چاندن ل دەڤەرێ.
ناڤهاتی خویاكر: سالانە بەرهەمێ برنجێ كوردی ل دەڤەرێ زێدە دبیت و خواستەكا باش ل سەر هەیە، بهایێ برنجی ل دووڤ وەرزێ بەرهەمئینانا برنجی دهێتە دیاركرن، بەلێ ب رەنگەكێ گشتی بەردەوام بهایێ برنجی یێ بلندە و ئەڤە ژی بوویە ئەگەر رێژا چاندن و بەرهەمئینانێ سالانە زێدەتر ببیت چەند خواست ل سەر برنجی زێدە دبیت هند رێژا چاندنێ ژی زێدە دبیت.

ئەڤرۆ ، زنار تۆڤی:

خودانێ‌ هاڤینگەها شەرانش دیار كر، ل سالێن بەری نوكە هاتنا گەشتییاران باشتربوویە، هەكە گەشتییارێن عەرەب نەهێن، ئەم ژی دێ‌ دەرگەهێن ڤێ‌ هاڤینگەهێ‌ گرین و چینە مالێن خۆ، لەوما پشتبەستنا مە ل سەر هاتنا گەشتییارێن عەرەبە و خەلكێ‌ مە كێم دهێت و ئەوێن دهێن ژی پرانییا وان ل رۆژێن ئەینییا دهێن.

هەرمان عەلی، خودانێ‌ هاڤینگەها شەرانش ل ئیدارا سەربەخۆیا زاخۆ بۆ رۆژناما ئەڤرۆ دیار كر، هەر چەندە جهێن شۆلەژێ‌، هەتا رادەكێ‌ باش هاریكارییا مە كرییە، بەلێ‌ ئەم دخوازین ئەو رێیا دهێتە سیلاڤا شەرانش بهێتە چێكرن و بەرفرەهكرن، دیسان ئەڤ جهێ‌ مە یێ‌ گەشتییاری بهێتە مەزنكرن و بەرفرەهكرن، هەروەسا بەری نوكە سالانە مە 10% یا داهاتێ‌ گەشتییاری ددا حكومەتێ‌، ل ڤان دو سالێن بوری هاتنا گەشتییاران بۆ هاڤینگەها مە گەلەك یا كێم بوو، بەلێ‌ ئەڤ سالە هەتا رادەكێ‌ ژ ڤان دو سالێن بوری باشترە و ل رۆژێن هەلكەفت و جەژنان دا، رۆژانە دناڤبەرا ( 400 – 500) گەشتییارێن ناڤخۆیی و بیانی سەرەدانا هاڤینگەها شەرانشێ‌ دكەن.
ناڤهاتی گۆت ژی: نوكە ل رۆژێن ئەینی گەشتییار پتر سەرەدانا ڤێ‌ هاڤینگەهێ‌ دكەن، پرانییا وان گەشتییاران ژی عەرەبن، هەروەسا هەتا رادەكێ‌ كورد ژی سەرەدانا هاڤینگەها مە دكەن، دیسان دڤێت پتر چاڤدێری ژ لایێ‌ جهێن شۆلەژێ‌ ڤە بۆ مە هەبیت و خزمەنگۆزاری باشتر بهێنە چێكرن، چونكو نوكە ئەو رێیا دهێتە ڤێ‌ هاڤینگەهێ‌ نەیا باشە و ئەم دخوازین بهێتە چێكرن، كارەبا مە ژی نە 24 دەمژمێرییە، بەلێ‌ ئەم ب هیڤینە رەوشا گەشتییاری ل دەڤەرا مە باشتر لێ‌ بهێت، دیسان ئیدارا سەربەخۆیا زاخۆ ژی پتر هەڤكارییا مە دكەت، ئەڤە 10 سالە ئەز دناڤا كارێ‌ گەشتییارییێ‌ دا كار دكەم.