دیدار، سالار محەمەد دۆسكی:

زیندانیێ‌ سیاسی مراد دەروێش عەلی فەتاح بێسفكی، ل سالا 1961هاتیە دوونایێ‌، خواندنا سەرەتایی و ناڤنجی ل ناحیا مانگێشكێ‌ تمامكریە و ئامادەیا پیشەسازی ل دهۆك ب دووماهی ئینایە، نوكە بەرپرسێ‌ رێكخراوا زاویتە یا سەر ب لژنا ناوچا برایەتی یا پارتی دیموكراتی كوردستانە.
زیندانیێ‌ سیاسی مراد دەروێش، بۆ رۆژناما ئەڤرۆ گۆت: ل سالا 1977ێ‌ كاك (بەشیر بەرۆشكی) مرۆڤێ‌ مە بوو و مە باوەری ب ئێك دو هەبوو ل گەل هاتمە ناڤ گورستانا بەرۆشكێ‌ و ژ من خواست بچمە دناڤ رێكخستنێن نهێنیێن پارتی دیموكراتی كوردستان دا و گۆت: حەزكەم كار بكەین ل گەل مە چونكە بنەمالا هەوە یا نشتیمان پەروەرە و خەباتكەرە و بابێ‌ تە پێشمەرگە بوو و چەندین جاران بریندار بوویە و یا گرنگە ل سەر مللێت مە بەردەوامیێ‌ بدەینە ڤێ‌ خەباتێ‌ و ئەڤە دەسپێك بوو هاتیمە ناف رێزێن پارتی دیموكراتی كوردستان دا، وی دەمی ناڤێ‌ رێكخراوا مە (شەفەق) بوو وبەرپرسێ‌ رێكخراوا مە كاك (سەربەست بابیری) بوو، پشتی هاتیمە ناڤ رێزێن پارتی مە دەست بكارێ‌ خوە كر و بەلاڤووك لژنا دهۆك ب رێكا چەند هەڤالان دگەهشتنە مە و مە چەند قوتابیان ب شەڤ بەلاڤدكرن، وی دەمی رێكخستنا هەمی یا ئێك دو نەنیاسی و هەر ئێكی بتنێ‌ چەند كەسەك نیاسین و ب شەڤ مە ئەف كارە دكر و ب رۆژ ئەم چووینە دەواما خوە ل پیشەسازیا دهۆك، ل قوناغا دووماهیێ‌ رێكەفتی 14/2/1980 وانا مە یا زمانێ‌ عەرەبی بوو و مامۆستا (سەدیق شەڕو) بوومە دهات و مامۆستایێ‌ خودێ‌ ژێ‌ رازی (سەدیق شەڕو) هاتە دەف من و گۆت موردار ئەمنا دهۆك هاتینە دەف مامۆستا (رەمەزان مارونیسی) رێڤەبەرێ‌ قوتابخانێ‌ و هەكە تشتەك لدەف تە هەبیت خوە قورتال بكە، و مامۆستا (سەدیق شەرۆ) هات گۆت موردار دەردورێن قوتابخانێ‌ هەمی هاتینە گرتن و رێك نینە تو خوە قورتال بكەی، و هەمان دەم خزمەتكار هاتە پولێ‌ و گۆت بلا (موردار) بهێتە دەف رێڤەبەری، و بتنێ‌ ناڤێ‌ مە هات و بەری بچمە دەف رێڤەبەری من سەحكرە رێكەكێ‌ برەڤم لێ‌ هەر وەك مامۆستایی پێشتر گۆتی هەمی رێك دگرتی بوون، و نەشیام دەركەڤم و نەچاربووم چووم دەف رێڤەبەری، و هندەك ئەمنێن روینشتی بوون گۆت تویێ‌ زیرەكی رێڤەبەری گۆتێ‌ ژ هەر 10 قوتابیێن ئێكێ‌ یە ل سەر ئاستێ‌ قوتابخانێ‌، و ئەوا گۆتە رێڤەبەری دێ‌ بەین هندەك ڤەكولینێ‌ ل گەل كەین و زڤرینین، ب دو ترۆمبێلان برمە ئاڤاهیێ‌ بەرامبەر دێرا بەرانی چاڤێت من گرێدان و دەستێن من پشتێ‌ گرێدان و هاڤێتمە ژوور و پشتی ماوەكێ‌ دو هاتن و گەلەك قوتام، هەتا ئێڤاری و دووڤ دا هاتن ئاڤ هاڤێتە من و دووڤ برمە ژوورەكا بچووكتر و هەڤالێن من دی ژی هات بناڤێ‌ ( عەبدوباست، قادر بابیری، ئازاد بادی، لوقمان، صەباح، عادل) چەند كەسەكێن دی ئینان ناڤێت وان نوزانم، و هەڕوو سپێدێ‌ دبرینە قوتانێ‌ و مە دانپیدان نەدكر، رۆژەكێ‌ گەلەك قوتام من هەواركرە (محەمەد)ی ئەوێ‌ ئەز قوتام گازیكر (محەمەد) وەرە ئەڤە یێ‌ گازی تە دكەت، ئێكێ‌ رەش هات و دامە بەرشەقا و زێدەتر قوتام و هەمی جورێن ئەشكەنجەدانێ‌ ل گەل مە دهاتنەكرن.
موردار دەروێش بێسفكی، زێدەتر ژی گۆت: وی دەمی ئێكێ‌ كورد هەبوو بناڤێ‌(فەلاح حەسەن) خەلكێ‌ سلێ مانیێ‌ بوو و دەمێ‌ دبوو زێرەڤانیا وی دا هێت مە ژ پیان ڤە ب پانكێ‌ ڤە كەت و ب كێبلا دقوتاین و پانك دزڤراند و هەر ئاخفتنەكا هەبا یا كرێت دگۆت و نێزیكی چار هەیڤان مامە ل زیندانێ‌ ، ئەم هەر حەفت دبێ‌ سەرۆشین بووین و خێزانێن مە چ دەنگ و باسێن مە نەزانین، رۆژەكێ‌ ب ترۆمبێلان برینە ئەمنا دهۆك دەف رێڤەبەری و گۆت بۆچی هەوە ئەف كارە كرینە دیسا مە ئینكار كر و مە دانپیدان نەكر و پشتی چەند پرسیاران رێڤەبەرێ‌ ئەمنێ‌ گۆت، ب بریارا سەرۆك كوماری (سەدام حسێن) هوون دێ‌ هێنە ئازادكرن، كێ‌ پرسارەك هەیە، وی دەمی بتنێ‌ من زمانێ‌ عەرەبی زانی و من گۆتێ‌ ئەم قوتابی نە قوناغا دووماهیێ‌ پیشەسازی و چەند هەیڤ ژ خواندنا مە چووینە و ئەگەر هوون كاغەزەكێ‌ بدەنە مە كو ئەم ل دەف هەوە بووین رەنگە بزڤرینە خواندنا خوە و تەمام بكەین، رێڤەبەرێ‌ ئەمنێ‌ گۆت : ما خێر دسەرێ‌ هەوە هەیە چەند هەیڤە ل زیندانێ‌ و بچن بخوینن و ناجح بن؟ ئینا كاغەزەك نڤێسی و ئەم هاتینە ئازادكرن و ڤەگەریاینە سەر خواندنا خوە وێ‌ سالێ ئەز هەر ژ دەه قوتابیێن ئێكێ‌ بووم ل پیشەسازیا دهۆك و من خواندنا خوە ب دووماهی ئینا و هاتمە ئاگەهداركرن كو من ماف هەیە بچمە زانكۆیا مویسل بخوینم چونكە ژ سەركەفتیێن ئێكێ‌ مە، چوومە زانكۆیا مویسل و راگرێ‌ كولیژێ‌ گەلەك ل ناڤێ‌ من گەریا و نەدیت گۆتە پشكا تومارێ‌ و ئەوا لێگەریا ئاگەهداركر كو نڤسیارەك ژ ئەمنا دهۆك هاتیە ل سەر ڤی قوتابی كو ل گەل پێشمەرگەی یە و ماف نینە بەردەوامیێ‌ بدەتە خواندنێ‌ ل زانكۆیا مویسل و راگرێ‌ كولیژێ‌ لێبورین ژ من خواست كو نەشێم بخوینم.
هێشتا گۆت: دەمێ‌ ئەم دزیندانێ‌ دا شەڤەكێ‌ دو كچ ژی ئینانە زیندانێ‌ بناڤێ‌(كوردستان و بێریڤان) گەلەك ئەشكەنجەدان و گەلەك دكرنە قێری و ئەوا كچان دگۆتێ‌ عەیب شەرمە بۆ هەوە ئەم قوتابی و هەوە ئەم ئیناینە و هەتا درەنگی شەف مان و برن و مە نزانی ئەو كینە و هەتا نوكە نوزانم كی بوون.
مراد دەروێش بێسفكی، بەحسێ‌ ئاشكرابوونا شانا نهێنی كر و گۆت: هەڤالەكێ‌ مە بەلاڤووك بەلاڤەدكرن و ئێكسەر هاتە دەستەسەركرن و گەلەك قوتا و ب رێكا وی ئەم هەمی هاتینە ئاشكراكرن وی دەمی رێكخراوا مە (سەربەست بابیری، جەمیل بێسفكی، قادر قاچاخ، كاوە مەجلمەختی ، ئەحمەد مەلا قاسم، حسێن بێسفكی) بوو و ئەم هەمی قوتابی بوون و دەمێ‌ هاتینە دەستەسەركرن ئەڤە ژی رێكخراوا مە بوو و چەند رۆژا پشتی دەستەسەركرنا مە مانە ل دهۆك و دووڤ دا خوە قورتالكرن و گەهشتنە ناف رێزێن پێشمەرگەی.
هێشتا گۆت: 1/3/1979ێ‌ دەمێ‌ دەنگ و باسێ‌ وەغەركرنا خودێ‌ ژێ‌ رازی بابێ‌ روحی یێ‌ نەتەوا كورد (مەلا مستەفا) هاتیەمە ل سەر رحلێ‌ من ئەو مێژوو دروستكر و چێكر وەغەركرن، مامۆستایەكێ‌ كورد پەروەر مەهەبوو بناڤێ‌(رەمەزان مارونسی) هاتە هنداف من و زانی برمە ئیدارێ‌ و گۆت هەرە وێ‌ مێژوویێ‌ ژێ بە دا چ ئاریشە بووتە و خێزانە تە دروست نەبن و نەچاربووم هاتم من ژێبر.
مراد گۆت: پشتی هاتیمە ئازادكرن ل هەیڤا 10 سالا 1980 رەحمەتی (فەتەح گولی) بەرپرسێ‌ لژنا دهۆك ل گەل پتر ژ (80) پێشمەرگا هاتنە گوندێ‌ مە بێسفكی و جارەكا دی مە ب رێكا وی پەیوەندی خوە دروستكرنە ڤە، خودێ‌ ژێ‌ رازی گەلەك پرسیار ل سەر ئەشكەنجەدانا بەعسی یا ژ من كرن.
دەروێشی گۆت: كوردینی گەلەك یا شرین بوو و مە دڤیا دئازادبین و ب ئازادی باخڤین و كەسەكێ‌ باوەری ب كەسەكێ‌ نەبوو باخڤیت، زولم و زورداری یا بەعسییا ئەگەر بوو ئەم هەمی خوە دناڤا رێكخستنێن نهێنی دا ئاڤا بكەین و خزمەتا مللەتێ‌ خوە بكەین.
مراد دەروێشی گۆتژی: ل سەر هلدانێ‌ ژی پشكداری مە دئازادكرن باژێرێ‌ خوە دا كر و چەندین شەران و هەتا شەرێ‌ دژی تیرۆرستێن داعش ژی مە پشكداری كر و هەتا نوكە ژی بەردەوام.
ل دووماهیێ‌ مراد دەروێش گۆت: داخازێ‌ ژ حوكمەتا هەرێما كوردستانێ‌ دكەم زێدەتر چاڤدانێ‌ ل زیندانیێن سیاسی بكەت و هندەك كەس هەنە چەند رۆژێن كێم زیندان بووینە یان رەنگە هەر زیندان نەبووینە ئەڤرۆ هەمی ماف و ئمتیازاتێن زیندانیێن فعلی وەردگریت و ئەڤە ژی مافێن زیندانیێن راستەقینە دهێتە بەرزەكرن.