رەمەزان زەكەریا

ل سنوورێ دەڤەرداریا ئاكرێ ئەڤ سالە رێژەكا مەزنا روودانێن ئاگر بەربوونێ ژلایێ رێڤەبەریا بەرەڤانیا باژێری هاتینە تۆماركرن و پتریا روودانێن ئەڤ سالە پەرێز و زەڤیێن گەنمی بووینە، بەلێ كەس ژی نەهاتیە دەستەسەركرن و هەتا ئەوێن ب دەست ژی ئاگر بەردایە گەنمی.

عەقید ئیبراهیم فەریق، رێڤەبەرێ بەرەڤانیا باژێری ل ئاكرێ بۆ ئەڤرۆ گۆت: ئەڤ سالە رێژا روودانێن ئاگر بەربوونێ زێدە بووینە و هەتا نوكە رێژا روودانا ژ 100 روودانا بووریە و پتریا وان روودانێن ئاگر بەربوونێ پەرێزێن گەنمی و زەڤیێن گەنمی بووینە و گۆت: ئەڤ سالە مە شیایە رێژەكا باش یا زەڤیێن گەنمی ژ ئاگر بەربۆنێ ب پارێزێن، ژ بەر كو دەمێ پەرێز دهێنە سۆتن، ئەگەر نەهێنە كۆنترۆل كرن دێ گەنم ژی هێتە سوتن، مە ل دەستپێكا دروینا وەرزێ گەنمی چەندین رێنمایی بەلاڤكرن كو وەلاتی و جوتیار پێكڤە پتر ژ روودانێن ئاگری د هشیار بن.
ئاشكراكر: هەتا نوكە كەس ل سەر سۆتن و ئاگر بەردانا ئاگری نەهاتیە دەستەسەركرن، هژمارەكا جوتیارا گازندا وێ چەندی كریە ئاگر ب دەست هاتیە بەردان، پشتی تیمێن مە دووڤچوون بۆ روودانێن ئاگر بەربوونێ كری، بەلێ ئاشكرا بوو ئاگر ب دەست هاتیە بەردان ب گەنمی، مە بەلگە هەنە ئاگر ب دەست هاتیە هەلكرن، بۆ وێ چەندێ زەڤیێن گەنمی بهێنە سۆتن، پێدڤیە جوتیار ل سەر حەقێ خۆ سكالایێ تۆمار بكەن ل دادگەهێ و مە ژی بەلگە هەنە، بەلێ هەتا نوكە كەسێ‌ سكالا نەكریە و كەس ژی نەهاتیە دەستەسەركرن.
ناڤبری گۆت: ئەڤ سالە ئێك كەس خەندقیە ل هاڤینگەهەكا گەلیێ زەنتا ل دەمێ وەرزێ گەشت و سەیرانان و دخوازین وەلاتی ل وان جها مەلەڤانیان نەكەن كۆ شارەزایی تێدا نەبی. .

هەولێر، سولین سلێمان

سەرهەنگ هەرێم جوتیارەكێ سنورێ پارێزگەها هەولێرێیە بۆ رۆژناما ئەڤرۆ گۆت: د ئەڤ سالەدا ل گەلەك جهان شتی هاتیە چاندن و نۆكە بەرهەمێن مە یێ شتی پێگەهشتیە و تاما وان گەلەك دخوشن و ب هەمی قەبارێن بچووك و مەزن و هەنە و گۆت: سوپاسیا وەزارەتا چاندنێ‌ دكەین كۆ هاوردەكرنا شتیێ‌ بیانی قەدەغەكریە، چونكی بەرهەمێن مە پێگەهشتینە، ئەڤە ژی وەك پشتەڤانییەكە ژ بۆ مە جوتیاران.
گۆت ژی: بهایێ شتیێن مە هندەك د ئەرزان و جیاوازن، ل سێ هزارا تا پێنچ هزاران دچیت، لێ ب بورینا چەند مەهەكێن دی ئەم دێ شێین قازانجێ خوە لێ بینین. حوكمەتا هەرێمی گەلەك پشتەڤانیا مە جوتیاران كریە، چ ب دابین كرنا كەلوپەلان یان ژی ب دروستكرنا سایلۆیان هاریكاریا مە كرینە.
ل دۆر ئامارێن وەزارەتا چاندنێ‌، ل سالا 2020 بەرهەمێ ناڤخۆیی یێ شتی 185 هزار تەن بووینە و 112 هزار ژی هاتنە هاوردەكرن، لێ ژبەر ئەگەرێن هشكەسالیێ بەرهەمێن سالا 2021 بۆ 108 هزار تەۆنا كێمبوون، ل سالا بوری ژی زێدەتر ژ 100 هزار تەنان بەرهەمێ ناڤخۆیی شتیا ل هەرێما كوردستانێ هەبووینە.

بێوار حسێن زێباری

دەڤەرێن هەرێما كوردستانێ ب دەرامەتێ خوە یێ هشك دزەنگینن، چونكو دەڤەرێن دەشت و چیایی ژی یێن باش هەنە و ئەڤە ژی بوویە ئەگەرێ هندێ ئەڤ متایە ژی بوویە ئێك ژ داهاتێن رۆژێ یێن گرنگ بۆ ژیانێ.

كەرەم یونس، ئێكە ژ گەنجێن دەڤەرێ خویا كر: دگەل هاتنا هەر وەرزەكێ ل دەڤەرێ خەلك سەرەدانا ئاقاری دكەن بۆ بدەستڤەئینانا متایەكی بۆ ژیانا خوە، هەم بۆ فرۆتنێ و هەم ژی بۆ خوارنێ بكارئینن.
زێدەتر دبێژیت: گەنگران ل دەڤەرەكێ‌ بۆ دەڤەرەكا دیتر جوداهیەك هەیە، ژ روویێ جوانی و قەبارێ خوە و هەتا تام و چێژەك جوداهی ژی هەیە، لەوما گەنگرا چیایی و كوێستانان جوداهیەك وەها هەیە و دەربارێ بهایێ ژی زێدەتر گۆت: بها ژی جوداهیی هەیە ل دەڤەرێ و سال بۆ سال ژی دگەل بازاڕێ رۆژێ یە كۆ ئەڤ سالە ب 12 هزارا نەهاتیە خوارێ و پتر دهێتە فرۆتن.
مزگین زێباری، ئێكە ژ بكرێن متایێ ل سنۆرێ ناحیا دینارتە دا ئاشكرا كر: ئەڤە چەندین سالە ئەم كارێ كرین و فرۆتنا متایێ دكەن ل دەڤەرێ و گۆت: ئەڤ متایە ژی سال بۆ سالی و گوند بۆ گوندی جوداهییەك هەیە و ئەم فێر بووینە ژی هەتا متایی هەر گوندەكێ چ تری و سماق و مازی و گەنگر و هەر تشتەك دیتر بیت پتریا وان دزانین كانێ یێ‌ كیژ گوندیە و ژ روویێ جۆر و بهایێ وێ ژی ئەم دزانین و سالانە ئەگەر چ روودان یان هشكەسالی و كارتێكرنا سروشتی نەبیت بەرهەمەك باش دهێتە ئینان ل دەڤەرێ.
ل گورەی بهایێ وی ژی بكری زێدەتر گوت: راستە ئەم كارێ كرین و فروتنا وان دكەین و وەك كار ئاسانكاریەك بۆ خەلكی دكەین ئەو بەرهەمێ خوە ببەن بۆ ئاكرێ و دهۆك هەر لێرە لێ دكرین و هەتا زۆر جارا دچینە گوندان یان جهێن دیتر بۆ كرینی و سال بۆ سالێ ژی جوداهیەك هەیە و ئەڤ سالە ژی بهایەك باش هەیە، لێ ل گۆرەی جۆرێ جوان دمینیت.