دێ‌ هێتە كڕین

ئەڤرۆ

هەولێر، قائید میرۆ:

پەیڤدارێ وەزارەتا كارەبێ خویا كر، پرۆسا سیستەمێ كارەبا كارت دێ كەڤیتە كاری و دبێژیت: سیستەمێ پریپەید دێ كاریگەری ل سەر ب كارئینانا كارەبێ هەبیت و وەلاتی زێدەتر دێ ئابووریێ د ب كارئینانا كارەبێ دا كەن.

ئومێد ئەحمەد، پەیڤدارێ وەزارەتا كارەبێ بۆ رۆژناما ئەڤرۆ دیار كر، بڕیار هاتیەدان سیستەمێ دانا كارەبێ بۆ وەلاتیان ببیتە كارت و سیستەمێ پریپەید دێ هێتە بجهئینان و گۆت: «ل گورەی ئەڤی سیستەمی كارەب ب كارت ل سەر وەلاتیان دێ هێتە بەلاڤكرن، ل دەستپێكێ ژی ل باژێڕێن مەزن و پڕۆژەیێن وەبەرهێنانێ یێن ئاكنجیبوونێ‌ سیستەمێ پریپەید دێ‌ هێتە بجهئینان، ئەگەر یێ سەركەفتی بوو ئەڤە سیستەمێ‌ كارەبێ‌ ل هەموو كوردستانێ‌ دێ بیتە كارت».

ئومێد ئەحمەد گۆتژی: «سیستەمێ پریپەید چەندین مفا هەنە، ژ وان ژی: كێمبوونا بارگرانیا ل سەر یەكەیێن كارەبێ، هەروەسا دەمێ كارەب دبیتە كارت وەلاتی دێ زێدەتر ئابووریێ د ب كارئینانا كارەبێ دا كەن، ئانكو وەلاتی ل گورەی پێدڤیاتیا خوە دێ كارەبێ‌ بكارئینن».

ئەڤرۆ

رێڤەبەرێ‌ بەنداڤێن دهۆكێ‌ دیار كر، نوكە كار ل سەر دروستكرنا هەژمارەكا بەنداڤان یێ‌ بەردەوامە، بڕیارە دو بەنداڤێن دی ل سنوورێ‌ پارێزگەها دهۆكێ‌ بهێنە دروستكرن و دبێژیت: هەموو ئەو رووبارێن ل سنوورێ‌ پارێزگەها دهۆكێ‌ دەرباز دبن، پڕۆژە ل سەر دێ‌ هێنە دروستكرن.

ئەندازیار فەرهاد محەمەد تاهر، رێڤەبەرێ‌ بەنداڤێن دهۆكێ‌ ئاشكرا كر، بارانبارینێن ئەڤ سالە كاریگەری ل سەر بەنداڤێن دهۆكێ‌ هەبوویە و رێژەكا بەرچاڤ یا ئاڤێ‌ د بەنداڤا دهۆكێ‌ دا هاتیە عمباركرن، بەنداڤا خنس ژی كو دووەم مەزنترین بەنداڤە ل پارێزگەها دهۆكێ‌، ئەڤ سالە تمامبوویە و هەتا نوكە ب بلنداهیا 23 مەتران ئاڤ تێدا هاتیە كۆمڤەبوویە و گۆت: «هەر ئەڤ سالە كار ل سەر دو بەنداڤێن دی هاتیە دەستپێكرن، ئەو ژی بەنداڤا گەلیێ‌ بەنداوایە ل دەڤەرداریا سێمێلێ‌ و بەنداڤا سپنە دو ل ناوچەداریا بامەرنێ‌«.

ئەندازیار فەرهاد محەمەد بۆ مالپەرێ‌ فەرمی یێ‌ پارتی گۆت: «پلان هەیە هەژمارەكا بەنداڤێن دی یێن مەزن ل هەرێما كوردستانێ‌ بهێنە دروستكرن، ژ وان ژی بەنداڤا باكرمان پاسێ‌ ل ناوچەداریا دینارتە و بەنداڤا مەنداوە د ناڤبەرا سنوورێ‌ هەردو پارێزگەهێن هەولێر و دهۆكێ‌ دا، ئەڤە بەنداڤێن مەزنن و مفایەكێ‌ باش بۆ عمباركرنا ئاڤێ‌ و بەرهەمئینانا كارەبێ‌ دێ‌ هەبیت».

ناڤهاتی گۆتژی: «مە پلان هەیە مفای ژ هەموو وان رووباران وەربگرین، یێن ل سنوورێ‌ پارێزگەها دهۆكێ‌ را دەرباز دبن، هەتا ئاڤا كانیا ژی ب هەدەر نەچیت و پڕۆژە ل سەر بهێنە دروستكرن، دیسا هەر بەنداڤەكا دهێتە دروستكرن ژی، مە بزاڤا كری مفا بۆ كەرتێن چاندن و گەشتوگوزارێ‌ هەبیت، داكو پڕۆژە ل بەر بهێنە كرن و دەلیڤێن كاری ژی بۆ وەلاتیان دابین بكەن».

ئەڤرۆ

رەمەزان زەكەریا

گوندێ سپی مال ل سنوورێ دەڤەرداریا ئاكرێ، ئێكە ژ وان گوندێن ب ناڤ و بانك بۆ كەرتێ چاندنێ و هەتا هزار خانیێن پلاستیكی ل ڤی گوندەی هەنە و رۆژانە پشكا دوو پارێزگەها بەرهەمێ خۆمالی بەرهەمی دئینن و رەوانەی بازاری دكەن و تێدا هەموو جۆرە كەسكاتیەك دهێتە چاندن و ئێك ژ جوتیاران ژی دبێژیت: دخوازین حوكمەت دەمێ پێگەهشتنا بەرهەمێ نافخۆیێ جوتیاران ل كوردستانێ بەرهەمێ بیانی راگریت، بۆ وێ چەندێ جوتیار مفاداربن ژ بەرهەمێ خۆ و زەرەر نەگەهیتێ.

تالب ئەحمەد، جوتیارەكێ گوندێ سپی مالە ل سنوورێ ئاكرێ بۆ ئەڤرۆ گۆت: گوندێ سپی مال بناڤ و بانگە ب كەرتێ چاندنا ناڤ خانیێن پلاستیكی و نوكە ل گوندی هەتا هزار خانیێن پلاستیكی هەنە و كەرتێ چاندنێ ل ناڤ دا دهێتە كرن و هەموو خەلكێ گوندێ خانی هەنە چاندنا هەمە جۆر ل گوندی دهێتە بەرهەمئینان و هەر تشتێ رۆژانە پێدڤی بیت دهێتە چاندن، بەرهەمەكێ پاقژ و ساخلەم ب ئاڤا پاقژ دهێتە ئاڤدان، بەرهەمێ وێ‌ رۆژانە دهێتە رەوانەكرن بۆ پارێزگەهێن هەولێر و دهۆك و هەموو دەڤەرداریێن وێ.

ناڤبری گۆت ژی: نوكە رێژا پتریا جوتیاران بەرهەمێ خیارا چاندیە كۆ رێژا سێ ل سەر ئێك خانیێن گوندی هەموو خیارن، هەر دوو خانیا رۆژانە تەنەكا خیارا دهێتە بەرهەمئینان، بەلێ بهایێ وێ گەلەك یێ ئەرزانە و كیلۆ ب 450 دینارا دهێتە فرۆتن، دخوازین حوكمەتا هەرێما كوردستانێ رێگریێ ل خیارێ بیانی بكەت و نوكە بەرهەمێ مە یێ‌ گەهشتی و ئەم رۆژانە خەرجیەكا زۆر لێ دكەین و ب ئەرزانی دفرۆشین، بەرهەمێ ئیرانێ زۆر كاریگەری یا هەی ل سەر بەرهەمێ مە یی نافخۆیی، هەتا بەرهەمێ بیانی نەهێتە راگرتن بەرهەمێ جوتیارێن نافخۆیی دێ ب ئەرزانی هێتە فرۆتن.

ناڤهاتی ئاشكراكر، ل گوندێ سپی مال ژبلی بەرهەمێ خیارا رێژەكا باش یا بەرهەمێ باجان سوركا هاتیە چاندن و پێشبینی دهێتە كرن ئەڤ سالە رێژا بەرهەمێ ئێكجار زێدەببیت، ئێكانە داخوازیا جوتیارێن گوندی ئەوە بەرهەمێ بیانی دەما پێگەهشتنا بەرهەمێ نافخۆیی بهێتە راگرتن، ئەو باجان سوركا ل گوندێ سپی مال دهێتە بەرهەمئینان گەلەك یا باشە بۆ خوارنێ و كرین و فرۆتنەكا باش ل سەر هەیە ل كوردستانێ.

تالب خویاكر: فلفل ئێكە ژ وان بەرهەمێن كەسكاتی كو گرنگیەكا باش پێ هاتیە، دگەل بەرهەمێن دی یێن چاندنێ و خواستەكا باش ل سەر هەیە خوارنەكا سەرەكیا پتریا مالانە ب رەنگەكێ گشتی و رۆژانە گرنگیا گوندێ سپی مال ئەوە خو ل هەموو بەرهەمەكێ كریە خودان ب گرنگیڤە.

ناڤبری گۆت : بەرهەمێ گەلەك زۆر كەرەفس و رەشاد و قۆرادە كو هژمارەكا جوتیاران ب رێژەكا باش چاندیە راستە بهایێ وێ یێ ئەرزانە، بەلێ ئێكە ژ بەرهەمێن خۆ فرۆش و بلەز د بازاری دا، لەورا ژی مە ل گوندی باش گرنگی دایە ڤان بەرهەمان.

تالب خویاكر، بەرهەمێ شتی ئێكە ژ وان بەرهەمێن ل كوردستانێ خواستەكا زۆر ل سەر هەیە جوتیاران ژی گرنگی دایێ ئەو بەرهەمێن ل بازاری خواست ل سەر هەبیت و بلەز كرین و فرۆتن پێ بهێتە كرن مە ل گوندی چاندیە، بەلێ جوتیارا ب گشتی پێدڤی ب پشتەڤانیێ هەیە بۆ وێ چەندێ رێژا بەرهەمێن خۆ زێدەتر بكەن.

ئاشكراكر، بەرهەمێ پیڤازان بەرهەمەكێ گرانە بۆ كرین و فرۆتنێ ل گوندی گرنگیەكا باش پێ هاتیە دان رووبەرەكێ مەزن ئەردێ ب پیڤازان هاتیە چاندن، ب رەنگەگێ گشتی ل گوندێ سپی مال هەموو بەرهەمەكێ رۆژانە یێ خوارنێ هەیە و گرنگیا خۆ ژی هەیە ل بازاری خواستەكا باش ل سەر هەیە .

تالب گۆتژی: ئاریشا هەمبەر جوتیارێن گوندێ سپی مال ئەوە، هەر چار وەرزێن سالێ كارێ چاندنێ دكەن، بەلێ بهایێ وان دەرمان و پێدڤیێن چاندنێ گەلەك یێ گرانە، بۆ نموونە كیمیا ب 140 هزارایە، خەلكێ گوندی گرنگیەكا باش ب چاندنێ دایە و چەندین تەن كێمیا دڤێت ئەگەر بۆ جوتیارا بهێتە دابینكرن ب ئەرزانی دێ بیتە رێكخۆشكەرەك بۆ پتر گرنگی دان ب كەرتێ چاندنێ، سەرەرای هندێ‌ دخوازین حوكمەت دەمێ پێگەهشتنا بەرهەمێ نافخۆیێ جوتیاران ل كوردستانێ بەرهەمێ بیانی ئەوێن ب رێكا دەرگەهێن سنووری دهێتە نافخۆیا كوردستانێ راگریت بۆ وێ چەندێ جوتیار مفاداربن ژ بەرهەمێ خۆ و زەرەر نەگەهیتێ، ئەگەر بەرهەمێ بیانی بەردەوام بهێت، بهایێ بەرهەمێ نافخۆیی ل بازاری دێ كێم بیت و ب ڤێ چەندێ دێ زەرەر مەند بین.