ئەڤرۆ
ڤەکۆلەرەکێ ناڤدار یێ تورکیا راگەهاند، هەلبژارتنێن ڤێجارێ دێ گەلەک جودا و د هەمان دەمی دا ژی ئالۆز بن، چونکی د بیست سالێن بۆری دا چو بەربژارەک بهێز ل دژی ئەردۆغانی نەبوو، لێ نها رەوش ب تەمامی هاتیە گوهۆڕین و گەلەک فاکتەرێن دەرڤە و ناڤخوەیی ژی د بەرژەوەندیا ئەردۆغانی دا نینن.
عەبدولقادر سێلڤی ڤەکۆلەرێ ناڤدار یێ تورکیا راگەهاند، هەلبژارتنێن ڤێجارێ ل تورکیا وەکو چو هەلبژارتنێن بیست سالێن بۆری نابن، چونکی بەری نها هەمی تشت د بەرژوەندیا ئەردۆغانی دا بوون، لێ نها ل دژی ئەردۆغانی ئۆپۆزسیۆنەکا بهێز هاتیە ئاڤاکرن و هەروەسا د ئاستێ ناڤخوەیی و دەرڤە دا ژی گەلەک تشت د بەرژەوەندیا ئەردۆغانی دا نینن، لێ ئەو یەک رامانا هندێ نادەت دێ کەمال کچلدار ئوغلۆ ب ساناهی بیتە سەرۆک کۆمارێ تورکیا، چونکی ئەردۆغان و پارتیا بزاڤا نەتەوەپەرست ژی ب هەموو رەنگەکێ کار دکەن دا بشێن کاریگەریێ ل هەستێ نەتەوەپەرستان بکەن، نها هەڤپەیمانیا جمهور یا کو ئەردۆغان سەرۆکاتیا وێ دکەت ب هەموو رەنگەکێ کار دکەت دا بشێت دەنگێ ئۆپۆزسیۆنێ لاواز بکەت.
ناڤهاتی راگەهاند راپرسیێن هەتا نها هاتینە کرن نیشا ددەن ئەردۆغان نابیتە سەرۆک کۆمارێ تورکیا، لێ دڤێت ئەم باش بزانین د سیاسەتێ دا گەلەک جاران هندەک گوهۆرینێن نەچاڤەرێ کری روو ددەن کو کاریگەریا خۆ ل هەستێ خەلکێ دکەن، ژ بەر هندێ ژی دڤێت ئەم چاڤەرێی گوهۆرینێن مەزن بین ل تورکیا، دبیت د ناڤ مەهەکێ دا گەلەک گوهۆڕینێن نوو روو بدەن، راستە نها فاکتەرێن دەرڤە و ناڤخوەیی د بەرژەوەندیا ئەردۆغانی دا نینن، لێ ئەو یەک رامانا هندێ ژی نادەت دێ ئەردۆغان و هەڤپەیمانیا وی بێدەنگ روونێن و چ نەکەن و گۆت: (ئەز وەسا دبینم ڤێجارێ هەوا پرۆپگاندا هەلبژارتنان گەلەک یا دژوار بیت، بەربژار دێ گەلەک ب توندی ل دژی هەڤدو ئاخڤن، ئانکۆ ب کورتی ڤێجارێ دێ ل تورکیا هەلبژارتنەک گەلەک جودا برێڤە چیت، ئەو یەک دێ کاریگەریا خۆ ل هزرا وەلاتیان کەت، چونکی ئارمانجا سەرەکی یا ئەردۆغانی دێ ئەو بیت دا بشێت نێرینا خەلکی ل هەمبەر ئۆپۆزسیۆنێ و کلچدار ئوغلۆی بگوهۆڕیت، ژ بەر کو براستی ژی ڤێجارێ رەوشا ئەردۆغانی و هەڤپەیمانیا وی باش نینە).
ڤەکۆلەرێ ناڤدار یێ تورکیا ئەو یەک ژی دیار کریە، ئەمریکا و وەلاتێن ئێکەتیا ئۆرۆپا ڤێجارێ ناخوازن ئەردۆغان ببیتە سەرۆک کۆمارێ تورکیا، ئەو پشتەڤانیێ ل کچلدار ئوغلۆی دکەن، راستە هەتا نها ب رەنگەکێ ئاشکرا وان چ نەگۆتیە لێ دیارە ژ بەر گەلەک ناکۆکیان وان دڤێت ڤێجارێ ئەردۆغان ل سەر دەستهەلاتێ نەمینیت، چونکی د ١٠ سالێن بۆری دا سیاسەتا ئەردۆغانی گەلەک ئاریشە بۆ بەرژەوەندیێن ئەمریکا ل دەڤەرێ دروست کرینە، هەری دووماهیێ ژی ژ بەر شەرێ ئۆکرانیایێ و هەلوەستێ تورکیا وەلاتێن ئێکەتیا ئۆرۆپا و ب تایبەتی ژی ئەمریکا ژ ئەردۆغانی توورە نە و وان نەڤێت ڤێجارێ ئەردۆغان ببیتە سەرۆک کۆمارێ تورکیا.
نيشاندان