قەیس وەیس:

بڕیارە ل ئەینیا بهێت دەست ب گەڕا 22ێ‌ یا خولا ئیراقێ‌ یا تەپا پێی بۆ یانەیێن پلا نایاب بهێتە كرن، یانەیێن كوردستانێ‌ دێ‌ بۆ قەرەبوو و دۆبارە سەركەفتن و پاراستنا رێزبەندیێن خوە هێنە د ناڤ یاریگەهێ‌ دا.
– دهۆك ب پشتگەرمیا جەماوەرێ‌ خوە گەشبینە بۆ سەركەفتنێ‌
ل دەمژمێر 9:30 شەڤا ئەینیا بهێت جەماوەرێ‌ وەرزشی یێ‌ یانەیا دهۆك ب ژڤانە بۆ پشتەڤانیا تیما خوە دەمێ‌ ل یاریگەها سەرەكی یا یانەیێ‌ مێڤانداریا یانەیا نەفت ئەلوەسەت دكەت ب هیڤیێن قەرەبوویا خالان و پاراستنا جهێ‌ خوە، پشتی د یاریا بۆری دا تووشی خوسارەتیەكا نە چاڤەڕێ‌ كری بووی بەرانبەر تیما نەفت ب چار گۆلێن پاقژ، د نوكە تیما دهۆكێ‌ 35 خال كۆمكرینە و رێزا شەشێ‌ دهێت، نەفت ب19 خالان رێزا18ێ‌ دهێت، ئەلهۆیێن چیا گەشبینن ب پشتگەرمیا جەماوەرێ‌ خوە قەرەبوویا سێ‌ خالێن یاریا بۆری بكەن و ڤەگەڕێنە سەركەفتنان.
– زاخۆ و نەوروز دێ‌ هەڤڕكیێ‌ بۆ رێزبەندیێ‌ كەن
د دیدارەكا كوردستانی دا و تاما كلاسیكۆیێ‌ چاڤەڕێ‌ یە تیما تەپا پێی یا یانەیا زاخۆ ل باژێرێ‌ سلێمانیێ‌ ببیتە مێڤانا یانەیا نەوروز ئەوا دێ‌ ل شەمبیا بهێت دەمژمێر 3:30 ئێڤاری هێتە كرن، كوڕێن خابووری 26 خال كۆمكرینە و رێزا 13ێ‌ دهێت، خودانێن ئەردی 29 خال هەنە و رێزا 12ێ‌ یە، زاخۆ د یاریا بۆری دا دگەل زەورا ب گۆلەكێ‌ وەكهەڤبوو و نەوروز ب سێ‌ گۆلان سەركەفتن ل سەر سیناعە ئینابوو، یاریەكا ب سانەهی نابیت و هەردو یانە بزاڤان دكەم زێدەتر خوە ژ رێزبەندیا داكەفتێ‌ دووربكەن.
هەولێر چاڤ ل سەركەفتنا حەفتێ‌ یە
نوونەرا چارێ یا كوردستانێ‌ د خولا نایابا ئیراقێ‌ دا تیما یانەیا هەولێر دێ‌ ل باژێرێ‌ بەغدا بیتە مێڤانا یانەیا حدوود د ئەركەكێ‌ ب زەحمەت بۆ سەركەفتنێ‌، هەولێر پشتی سەركەفتنا بۆری ل سەر كارەبا ب مۆرالەكا بلند دێ‌ بزاڤێ‌ كەت بەردەوامیێ‌ ب دەتە سەركەفتنان ئەوا نوكە 25 خالان رێزا14ێ‌ دهێت، حدوود31 خال كۆمكرینە و رێزا 13ێ‌ دهێت.
ژ یاریێن دی، ئەینی شورتە- نەفت، شەمبیێ‌ كەرخ- ئەلقاسم، سیناعە- نەجەف، زەورا- دیوانیە، ئێكشەمبیێ‌ نەفت میسان- تەلەبە، نەفت بەسرا- كەربەلا، جەویە- كارەبا.

ئەڤرۆ

كوڕێ‌ باژێرێ‌ دهۆكێ‌ و یاریزانێ‌ رەڤەندا كورد ل ئەلمانیا زانا فەتاح هادی ناسناڤێ‌ قارەمانیا ئەلمانیا یا ڤەكری ل سەر كێشا خوە ب دەستڤە ئینا، پشتی شیایی رێزا ئێكێ‌ بهێت د هەڤڕكیێن واندا ئەوا ل باژێرێ‌ میۆنخ هاتیە كرن.
ل دۆر ڤێ‌ یەكێ‌ سالح كەكۆ راهێنەرێ‌ یاریزانێ‌ ناڤهاتی بۆ رۆژناما ئەڤرۆ گۆت: زانا فەتاح ئێك ژ یاریزانێن مە یێن خودان شیان دگەل یانەیا دهۆكێ‌ بوو ل وەلاتێ‌ ئەلمانیا وەكو رەڤەندا كورد پشكداری قارەمانیا ئەلمانیا یا ڤەكری بوو ل سەر ئاستێ‌ یاریا كیك بۆكسینگێ‌ بۆ كێشا 63كگم ئەوێ‌ شیایی ب ناسناڤێ‌ قارەمانیێ‌ بهێتە خەلاتكرن پشتی سێ‌ سەركەفتن ئیناین وەكو یاریزانێ‌ ژێگرتی ژلایێ‌ ئێكەتیا كیك بۆكسینگا ئەلمانیا دێ‌ پشكداریێ‌ د قارەمانیا نێڤدەولەتی یا پرۆفێشنال بیت ئەوا بڕیارە ل دەهێ‌ خزیرانا بهێت ب پشكداریا باشترین یاریزانێن وەلاتێ‌ ئۆرۆپا هێتە كرن.
هەروەسا ناڤهاتی گۆت: یا شانازیێ‌ پێ‌ دبەین كو ژبلی بوویە قارەمان یاریزانێ‌ مە ئالایێ‌ كوردستانێ‌ د مەراسیما وەرگرتنا میدالی و باوەرنامەیا قارەمانیێ‌ و پەسندكرنێ‌ كو ئێك ژ یاریزانێن باوەرپێكری ژلایێ‌ ئێكەتیا كیك بۆكسینگا ئەلمانیا بۆ قارەمانیێن داهاتی.
بۆ زانین زانا فەتاح هادی ئێك ژ یاریزانێن تیما كیك بۆكسینگا یانەیا دهۆكێ‌ بوو ل سەر دەستێ‌ راهێنەرێ‌ خوە سالح كەكو و هەڤكاریا بابێ‌ خوە فەتاح هادی كو ئەوژی كاپتنێ‌ تیمێ‌ یە شیایە ئاستێ‌ خوە بلندبكەت و ل 2020 وەكو رەڤەندا كورد ل ئەلمانیا ئاكنجی بوویە.

هەرهین محەمەد:

د داخویانیەكێ‌ دا سەربەست محەمەد، یاریزانێ‌ یانەیا تەناهی و مووسل بۆ ئەڤرۆ گۆت: گەلەك یانەیان داخاز ژمن كریە بۆ وان یاریێ‌ بكەم، لێ‌ من رەتكرینە چونكو ماموستایێ‌ وانا وەرزشێ‌ مە و دیسان یاریزانێ‌ یانەیا تەناهی مە و حەفتیێ‌ سێ‌ رۆژان راهێنانان دكەم و دهەمان دەم دا یاریێ‌ بۆ یانەیا موسل ژی دكەم.
ناڤهاتی زێدەتر ژی گۆت: داهاتێ‌ یانەیا مووسل و تەناهی هندی ئێكە و چو جوداهی دناڤبەرا وان دا نینە و داهاتێ‌ یانەیا تەناهی گەلەك یێ‌ كێمە و گەلەك یاریزان ژ دەرڤە دهێنە یاریێ‌ و مەزاختیێ‌ وان گەلەكە و یاریزان هەموو دەمێ‌ خوە دەتە یاریێ‌ و نەشێت چو كارێن دی بخوە بكەت و هەكە داهاتیێ‌ یانێ‌ یێ‌ كێم بیت یاریزان ژی چو مفای بخوە ژ یانێ‌ نابینت، چونكو داهاتێ‌ یانێ‌ گەلەك ب زەحمەت دهێت و كارگێریا یانێ‌ و كاپتنێ‌ تیمێ‌ گەلەك زەحمەتی دبەن هەتا كو داهاتەكی ب دەستخوە ڤە دئینن پێخەمەت ل یاریزانان ب مەزێخن و داخازیا من ژ حكومەتێ‌ و جهێن پەیوەندیدار گرنگیێ‌ ب وەرزشێ‌ ب گشتی بدەن ب تایبەت تەپاپێی و ژبەركو هەر وەلاتەك ب تەپاپێی دهێتە نیاسین.

ئەڤرۆ

شرۆڤەكارێ‌ وەرزشی یێ‌ یاریا تەپا پێی و راهێنەرێ‌ پارێزگەهێ‌ وەحید رەشید دیار كر ئاستێ‌ تیما زاخۆ یاری بۆ یاری بەر ب باشتر دچیت لێ‌ شیانێن یاریزانێن وێ‌ د سنۆردارن و یا ژ هەژی سەركەفتنێ‌ بوو دگەل زەورا.
زێدەتر ناڤهاتی گۆت: پشتی هاتنا راهێنەر حەیدەر عەبدولئەمیر دیاربوو كارەك بۆ زاخۆ كری و بەلگەژی دیاربوو دەستپێكەكا خراب هەبوو لێ‌ یاری بۆ یاری باشتر لێهات و ژ هەژی سەركەفتنێ‌ بوو بەرانبەر زەورا لێ‌ ژبەركو شیانێن هندەك یاریزانێن وێ‌ سنۆردارن مفا ژ گەلەك دەلیڤا نە وەرگرتن، یا جەماوەری ژی بەرنیاسن وەكو ئێك ژ مەزنترین جەماوەرە ل ئیراقێ‌ و هێزا تیمێ‌ بوو چنكو رێژەكا مەزن و پشتەڤانیەكا بهێز دكرن بتنێ‌ وەكو تێبینی دڤیابا ئەو یاریێن ئاگرین نە هاتبانە دناڤ یاریگەهێ‌ ژبەركو قەدەغەیە و رەوشا یاریگەهێ‌ تێكدا، وەكو ناڤ ژی تیما زەورا ب یاریزانێن هەلبژارتیێ‌ ئیراقێ‌ و پیشەكارێن شارەزا ئەڤچەندە زێدەتر بەرژوەندیا زەورا دابوو لێ‌ یاریزانێن زاخۆ شیان خوە ل بەر هێرشێن وان ژی بگرن و رێزبەندیا هەردو تیما ژی بەلگەیە، هیڤییا من ئەوە یاریێن بهێت یانەیێن كوردستتانێ‌ ئانجامێن باش دەستخوەڤە بینن.