ئەڤرۆ

ئاكرێ‌، رەمەزان زەكەریا:

د. عەلی تەتەر، پارێزگارێ دهۆكێ‌ ب هەڤالینیا هەژمارەكا رێڤەبەریێن گشتی بەرێ‌ بنیاتی بۆ هەژمارەكا پڕۆژەیێن خزمەتگوزاری ل هەردو دەڤەرداریێن ئاكرێ‌ و بەردەڕەش دانا.
پارێزگارێ دهۆكێ‌ د سەردانەكێ دا بۆ دەڤەرداریا بەردەڕەش بەرێ بنیاتی بۆ هەژمارەكا پرۆژەیان ب گوژمێ‌ شەش ملیار و 542 ملیۆن دیناران دانا، كو پێك دهێن ژ: دروستكرنا قووناغا دویێ‌ یا سایدێ دویێ‌ ل سەنتەرێ ناوچەداریا دارەتۆ ب درێژاهیا 800 مەتران و دروستكرنا رێكا گوندێ قادسی ب درێژاهیا سێ‌ كیلۆ مەتران و 500 مەتران، دگەل دروستكرنا رێكا گوندێ كانی هەسپان ب درێژاهیا سێ‌ كیلۆمەتران، دیسا بەرێ بنیاتی بۆ دروستكرنا رێكا گوندێ ئێكمالە ب درێژاهیا 600 مەتران و چێكرنا رێكا دوساید ل گەرەكا رۆناهی و گەرەكا رۆشنبیری دانا، دروستكرنا رێك و ئاڤرێژێن پیشەسازیا نوو، رێكا ناڤخوە و قەسیس بۆ سەنتەرێ ناوچەداریا كەلەك و رێكێن ناڤخوەیی ل سەنتەرێ باژێرڤانیا بشریان.
دیسا ل ئاكرێ ژی ب گوژمێ هەشت ملیار و 912 ملیۆن و 450 هزار دیناران كۆمەكا پرۆژەیان ل دەڤەرا ئاكرێ بەرێ بنیاتی بۆ هاتە دانان و هاتنە ڤەكرن.
د. عەلی تەتەر، پارێزگارێ دهۆكێ‌ د سەردانا خوە دا بۆ دەڤەرداریا ئاكرێ، بەرێ بنیاتی بۆ ئاڤاكرنا دو قوتابخانەیێن 18 رێزی و 12 رێزی ل سەنتەرێ ناوچەداریا گردەسێن دان، بەرێ بنیاتی بۆ ئاڤاكرنا قوتابخانەكا 12 رێزی ل گەرەكا گولان ب گوژمێ ملیارەك و 239 ملیۆن و 698 هزار دیناران دانا، بەرێ بنیاتی بۆ چێكرنا دو بەنداڤێن بچووك ل ناوچەداریا بجیل و گوندێ شەرمن ب گوژمێ 855 ملیۆن و 250 هزار دیناران دانا، دیسا بەرێ بنیاتی بۆ چێكرن و سەخبێركرنا رێكێن ناڤخوەیی ل سەنتەرێ ناحیا بجیل ب گوژمێ 318 ملیۆن و 794 هزار دیناران دانا، بەرێ بنیاتی بۆ ئاڤاكرنا بنگەهەكێ ساخلەمیێ‌ ژ جۆرێ A ل سەنتەرێ ناوچەداریا دینارتە ب گوژمێ ملیارەك و 28 ملیۆن و 698 هزار دیناران دانا، بەرێ بنیاتی بۆ چێكرن و سەخبێركرنا رێكێن ناڤخوەیی ل سەنتەرێ ناوچەداریا دینارتە ب گوژمێ 327 ملیۆن و 591 هزار دیناران دانا.
پارێزگارێ‌ دهۆكێ‌ د سەرەدانا خوە دا بۆ ئاكرێ‌ پرۆژەیێن رێكا گوندێ گویسكێ دگەل سەخبێركرن و بەرفرەهكرنا پرا ئاسنی یا دویێ ل گەلیێ‌ زنتا ب گوژمێ 336 ملیۆن و 434 هزار دیناران ل گەل ئامیرێ تیشكا رەنینێ ل نەخۆشخانا گولان ب گوژمێ دو ملیار دیناران هاتنە ڤەكرۆن.

ئەڤرۆ

ئاكرێ‌، رەمەزان زەكەریا:

رێڤەبەریا رۆشنبیری و هونەری یا ئاكرێ ب هەڤكاریا كۆمپانیا ئێم ئار ئێف دێ ئەڤ سالە ب رەنگەكێ تایبەت و جودا كەرنەڤالا نەورۆزا ئاكرێ ئەنجامدەن.
دلشاد عەلی، رێڤەبەرێ رۆشنبیری و هونەری ل ئاكرێ ب وەكالەت بۆ ئەڤرۆ گۆت: «دوهی 18/3/2023 بەرنامێ كەرنەڤالا نەورۆزێ ل ئاكرێ‌ دەستپێكر و پێشانگەها وێنێن جهێن شوونواری ییێن ئاكرێ و پانۆراما دیرۆكا خواندنێ ل ئاكرێ لایێ رێڤەبەریا شوونوارێن ئاكرێ‌ و رێڤەبەریا پەروەردا ئاكرێ هاتە ڤەكرن، دیسا بەرهەمێن خۆمالی یێن ئاكرێ ژ لایێ رێڤەبەریا چاندنا ئاكرێ هاتنە نیشادان و خوارنێن كوردەواری یێن ئاكرێ ژ لایێ رێڤەبەریا گەشتوگوزارا ئاكرێ هاتنە نیشادان دگەل كەڤالێن شێوەكارێن ئاكرێ ژ لایێ پەیمانگەها هونەرێن جوان یا ئاكرێ ڤە و ڤەكرنا پێشانگەها وێنێن ئاكرێ ژ لایێ رێڤەبەریا رۆشنبیری و هونەریا ئاكرێ و نیشادانا كارێن دەستی یێن ئافرەتێن بەهرەمەند ژ لایێ رێڤەبەریا چاڤدێریا خێزانی دگەل هژمارەكا چالاكیان ژ لایێ قوتابخانا كەلێ ڤە و ڤەكرنا پێشانگەها پەرتووكان ژ لایێ پەرتووكخانا گەشبینڤە دگەل پێشكێشكرنا كۆنسێرتەكا هونەری ژ لایێ رێڤەبەریا رۆشنبیری و هونەریا ئاكرێ و ڤەكرنا پرۆژێ خەملاندنا رێكا كەلها كەڤن».
گۆتژی: «ئەڤرۆ ژی ئامێرێن پێشكەفتی و رۆناهی دێ هێنە دانان دگەل هەلكرنا سرودێن نیشتمانی و نەورۆزێ، سوبەهی ژی 20/3/2023 دێ كۆنگرێ رۆژنامەڤانی هێنە سازكرن بۆ بەرپرسێن دەڤەرێ و دەڤەردارێ‌ ئاكرێ ل سەر كەرنەڤالا نەورۆزێ و هەلكرنا مەشخەلا نەورۆزێ ل كۆچكا مێهڤانداریا و هەلكرنا خەتیرێن ئاگرێ نەورۆزێ ل كەلها دێرین و كەلەكەڤنێ و سەرێ تویشی و رەزێ میری و گرێ توپا و گرێ شێخمافی، دگەل نیشاندانا تاڤگەهەكا ئاكرێ د ناڤبەرا كەلها دێرین و كەلەكەڤنێ دگەل لێدانا زەنگا ئاگەهداركرنێ و نیشاندانا یاریێن ئاگرێ».

ئەڤرۆ

ب مەرەما نووكرنا سۆز و پەیمانان، دوهی میدیاكار و رەوشەنبیرێن سەر ب دەزگەهێن رۆژنامەڤانی یێن سەر ب پشكا رەوشەنبیری و راگەهاندنا پارتی ب سەرپەرشتیا د. سالار عوسمان، بەرپرسێ‌ پشكا ناڤبری سەرەدانا مەزارێ‌ نەمران ل بارزان كر و سۆز و پەیامانێن خوە بۆ رێبازا پیرۆزا بارزانی نووكرنە ڤە.
د. سالار عوسمان، بەرپرسێ‌ پشكا رەوشەنبیری و راگەهاندنا پارتی د پەیڤەكێ‌ دا ل سەر مەزارێ‌ نەمران دیار كر، رێبازا پیرۆزا بارزانیێ‌ نەمر رێبازا بەرخوەدان و دادپەروەری و سەرخوەبوونا كوردستانێ‌ یە، ئەڤرۆ ژی ئەم وەكو قوتابی و موریدێن ڤێ‌ رێبازا پیرۆز هاتینە كو سۆز و پەیمانێن خوە نوو بكەینە ڤە و ل سەر ڤێ‌ رێبازێ‌ ب دلسۆزی و وەفاداری خزمەتا گەل و وەلاتی بكەین.
د. سالار عوسمان د پەیڤا خوە دا خویا كر، بارزانیێ‌ نەمر ب درێژاهیا ژیێ‌ خوە خەبات بۆ ب دەستڤەئینانا مافێن رەوایێن كوردستانیان دژی زۆرداران كریە و ژییێ‌ خوە هەموو د رێیا خزمەتكرنا گەل و وەلاتێ‌ خوە دا بۆراندیە، لەو بۆ مە یێ‌ بوویە باشترین چاڤلێكەر و چەڤەنگ، كو ئەڤرۆ ئەم ژی ل هەمان رێبازا وی بەردەوام بین.

ئەڤرۆ

ئامێدیێ، مەحمود نهێلی:

پشتی گەنجەك ب مەرەما كۆمكرنا گول و گیایێن بهارێ ل گەل هەڤالێن خوە قەستا چیایێ كورەژاری كری، دوهی ١٨/٣/٢٠٢٣ د چیایی دا دفڕیت و ئێكسەر گیانێ خوە ژ دەست ددەت.
ئێك ژ كەسوكارێن وی گەنجی بۆ رۆژناما ئەڤرۆ دیار كر، ئەو گەنجە ل گەل هەڤالێن خوە ب مەرەما ئینانا گیایێن بهارێ دوهی قەستا چیایێ كورەژار كربوو و گۆت: «هەر دوهی پشتی نیڤرۆ ئەڤ گەنجە د كەڤرەكێ بلند دا دكەڤیت و هەتا هەڤالێن وی گەهشتینە سەر جەنازێ وی گیانێ خوە ژ دەست دا بوو».
گۆتژی: «ناڤێ وی گەنجی عەبدوللەتیف نوری یە و خێزاندارە، ژییێ‌ وی نێزیكی ٣٠ سالیێ یە و خەلكێ گوندێ هریاشكێ یە و ئاكنجیێ كومەلگەها سیریێ یا گرێدایی ناوچەداریا شێلادزێ یە».

ئەڤرۆ

سالار محەمەد دۆسكی:

سەرۆكا پشكا شوونواران ئاشكراكر كو قوتابیێن پشكا شینوران ل زانكۆیا دهۆك جوداهیەكا مەزن ل گەل هەمان پشك ل زانكۆیێن دی یێن كوردستانێ هەنە، چونكە قوتابیێن پشكا وان وەك پراكتیك زێدەتر كاردكەن و دیاركر كو د بەرنامەی دایە ل سالێن بهێت گەشتێن زانستی بۆ وەلاتێ مسرێ ئەنجام بدەن و گۆت: دهێتە چاڤەرێكرن ل سالا داهاتی گرەكێ شوونواری بۆ پشكێ بهێتە پێشكێشكرن و قوتابی وەك كارەكێ پراكتیكی دێ وان جها هەلكولن دا ڤەكۆلینان ئەنجام بدەن.

د. ژیار سەدیق رەمەزان سەرۆكا پشكا شوونواران ل زانكۆیا دهۆك بۆ رۆژناما ئەڤرۆ ئاشكرا كر، ل سالا خواندنێ (2022- 2021) پشكا شوونواران هاتیە دامەزراندن و هەتا نوكە قوتابی گەهشتینە قوناغا دوویێ و 57 قوتابی بخوینن و سیستەمێ خواندنێ پولوونی یە و گۆت: د ڤی ماوێ كێم دا گەلەك ژ زانكۆیێن بیانی سەرەدانا پشكا شوونواران كرینە و شیاینە گەلەك پێنگاڤێن باش د ئاستێ بلندكرنا ئاستێ زانستیێ قوتابیان دا ب هاڤێژن.
د. ژیارێ ئەو ژی ئاشكراكر، بۆ بابەتێن شوونواری وانە ژلایێ چوار مامۆستان ڤە ل پشكێ دهێنە گۆتن، دیسا بۆ بابەتێن تایبەتمەندیێ ژی مە مامۆستایێن وانەبێژ هەنە ل زانكۆیێن هەولێرێ و مووسل وانا بۆ قوتابیان بێژن و مە هیڤی هەنە ل پاشەرۆژێ بشێن ڤان قوتابیان ئاڤا بكەین و ل دەمەكێ نێزیك ببنە هەلگرێن باوەرنامێن بلند و پشكا شوونواران برێڤەبەن.
سەرۆكا پشكێ ئەو ژی گۆت: رێكخراوا شوونوارێن كوردستانێ د. حەسەن ئەحمەد قاسم گەلەك پشتەڤانێ پشكا شوونوارانە و دهێتە چاڤەرێكرن ل سالا داهاتی گرەكێ شوونواری بۆ پشكێ بهێتە پێشكێشكرن و قوتابی وەك كارەكێ پراكتیكی دێ وان جها هەلكولن دا ڤەكۆلینان ئەنجام بدەن.
ل دور گرفتان ژی گۆت: پشكا شوونواران پێدڤی ب پشتەڤانیەكا باشتر یا مادی هەیە و دیسا داخازێ ژ رێكخراوێن حوكمی و نەحوكمی دكەین پشتەڤان بن بۆ ڤێ پشكێ‌ دا ل پاشەرۆژێ بشێن كارێن باشتر ئەنجام بدەین، دەست خوشیێ ل سەرۆكاتیا زانكۆیا دهۆكێ دكەین كو ئاڤاهیەكێ باش بۆ پشكا مە تەرخانكریە و یێ گونجایە ل گەل خواندنا قوتابیان.
هێشتا گۆت: مە وەكا گەشتێن زانستی هەیە یا قوتابیان و ئەف سالە قوتابیێن مە گەشتێن زانستی بۆ گەلەك دەڤەران ئەنجامداینە ل دهۆكێ و دەرڤەی پارێزگەهێ و جیاوازی یا قوتابیێن مە ل گەل زانكۆیێن دی ئەوە قوتابیێن مە گەلەك گەشتێن زانستی ئەنجام دەن وەك پراكتیك و ئەڤە ل زانكۆیێن دی ل هەمان پشك نینە و مە هیڤی هەنە گەشتەكا زانستی بۆ قوتابیێن خوە بۆ پارێزگەها نەینەوا ل دەڤەرا حەزەر و باژێرێ ئاشوریان دروست بكەین و دیسا سەرەدانا بابل ژی بكەین و هەكە پشتەڤانیا مە بهێتەكرن د بەرنامێ مەدایە قوتابیێن خوە بۆ گەشتەكێ بۆ وەلاتێ مسرێ ئەنجام بدەن.
زێدەتر گۆت: دەرچوونا ئێكەم خولا قوتابیان ژ پشكا مە دێ بیتە دەرگەه بۆ ڤەكرنا دەلیڤێن كاری بۆ قوتابیان ل بەر موزەخانا كاربكەن و جهێن شوونواری ب پارێزن و ببنە رێبەرێن گەشتیاری بۆ گەشتیاران شرۆڤەبكەن.