ئەڤرۆ

سەرۆك مەسعود بارزانی ڕادگەهینیت، هیچ بهانەیەك بۆ پاشئێخستنا هەلبژارتنێن پەرلەمانێ كوردستانێ نینە.
سەرۆك مەسعود بارزانی د هەڤپەیڤینەكا تایبەت دا ل گەل پێگەهێ (مۆنیتەر) یێ ئەمریكی، ئاماژە كر، نابێژم بڕیارا بودجەی 100% ب دلێ مەیە، بەلێ باوەریا من ئەوە پێنگاڤەكا ئەرێنی یە.
ل دۆر بەهرا بودجەیا هەرێما كوردستانێ، سەرۆك مەسعود بارزانی دبێژیت» ئەڤ پرسە د بۆری دا ب شێوەیەكێ نەدادپەروەرانە دژی هەرێما كوردستانێ هاتیە بكارئینان. نابێژم بڕیارا بودجە 100% ب دلێ مەیە، بەلێ باوەریا من ئەوە پێنگاڤەكا ئەرێنی یە بەر ب پێشڤە».
سەرۆك بارزانی دیاركر» ل سالا 2007، حوكمەتا هەرێما كوردستانێ یا بەرهەڤ بوو قانوونەك ل پەرلەمانی بهێتە ئامادەكرن. حوكمەتێن ئێك ل دووڤ ئێك یێن بەغدا پشتا خوە دا وێ چەندێ وهەتا نوكە نەگەهشتینە ئەنجامەكی، بەلێ ئەو سەقایێ ئەرێنی ئەوێ نوكە هەی، ب باوەریا من دبیت ببیتە ڕێخوەشكەرەك بۆ دروستبوونا قانوونا پەترۆلێ و پرسێن قانوونی یێن دی یێن هەلاویستی».
خۆیاكر ژی» هەلبژارتن د پێدڤی نە و پێدڤیە بهێنە ئەنجامدان، هیچ بژاردەیەكێ دی نینە، ئەگەر نە، دەزگەهێن حكومی دێ ڕەوایەتیا خوە ژ دەست دەن. هەكە هەر پارتەكا سیاسی بخوازیت ئاستەنگان بۆ هەلبژارتنان دروست بكەت، خوە پشتگوهـ دهاڤێژیت و هەلبژارتن دێ هەر هێنە ئەنجامدان».
سەرۆك بارزانی ئاماژە ب وێ چەندێ كر كو دبیت كارێن سەرەكی یێن ئەمریكا ل ڕۆژهەلاتا ناڤین هاتبنە گوهارتن، د دەمەكی دا كو چین و ئۆكراینا ل ڕێزا سەری یا ئەجیندایێن ئاسایشا نیشتمانی یا ئەمریكا دانە، بەلێ گوت ژی» ئەوە ب وێ ڕامانێ ناهێت ئەمریكا تشتان ل ئیراقێ و ڕۆژهەلاتا ناڤین ب كێم ببینیت» هەروەسا دگوت» نەشێین ڕەوشا نوكە ب ڕەوشا بەرێ هەمبەر بكەین، بەلێ ئەمریكا هێشتا ب گرنگی سەحدكەتە دەڤەرێ».
سەرۆك بارزانی پێشوازی ژی ل ڕێككەفتنا د ناڤبەرا سعودیێ و ئیرانێ دا ب ناڤبژیڤانیا چینێ كر و گوت» ب شێوەیەكێ سروشتی، ئەم دخوازین ناكۆكیێن د ناڤبەرا وەلاتێن دەڤەرێ نەمینن، ئیران و سعودیە دو وەلاتێن گرنگن ل دەڤەرێ».
سەرۆك بارزانی ئەوژی بەرچاڤكر» دبیت هێشتا زوو بیت بۆ وێ چەندێ بڕیارێ بدەین یان گەلەك تشتان ل سەر بێژین، بەلێ ب كێمی هەر بزاڤەك بۆ كێمكرنا گرژیان، پێشوازیێ لێ دكەین».
ل دۆر ڕۆلێ چینێ ل دەڤەرێ، سەرۆك بارزانی بۆ پێگەهێ مۆنیتەر گوت» وان ب هێمنی كاركریە بۆ پڕكرنا هندەك ڤالاتیان. هیڤیدارین ڕێككەفتنا د ناڤبەرا ئیرانێ و سعودیێ دا ئاماژەیەك بیت بۆ وێ چەندێ كو ئیران ژ زمانێ گەفێ دووركەڤیت و بەر ب زمانێ دانوستاندنێ و دیپلۆماسی بچیت، بۆ وێ ئێكێ بۆچوونا ئەوێن دی قبوول بكەت و ناكۆكیان ب ڕێكا تێكگەهشتنا هەڤپشك چارەسەر بكەت».
سەبارەت هێرشێن مووشەكی یێن ئیرانێ بۆ سەر هەرێما كوردستانێ، سەرۆك بارزانی گوت» ئەو هێرشە ب تمامی د ڕەوا نینن و تۆمەتێن وان ژی د بێ بنەما بوون».
سەرۆك بارزانی زێدەتر گوت» هندەك ژ دەزگەهێن ئیرانی، بۆ وێ ئێكێ شكەستنێن خوە د ناڤخوەیا وەلاتی دا ڤەشێرن، بزاڤ دكرن بهانەیەكێ ببینن، ئیران وەلاتەكێ جیرانە، ل دەف مە هیچ گرژیەك مە ل گەل نینە، دخوازین هندی دشیاندا بیت مە پەیوەندیێن ئاسایی دگەلدا هەبن».
هەر ل دۆر كێشەیێن ئیرانێ، سەرۆك بارزانی گوت» ئەم نە پشكەكین ژ ئێكلاكرنا ململانیێن دەرەكی ل گەل ئیرانێ. ئەم نەشێین ڕێكێ بدەین ئاخا مە ببیتە پێگەهەك بۆ گەفكرنێ ل سەر ئاسایشا جیرانێن مە».
سەرۆك بارزانی پێشوازی ل پێنگاڤێن وەلاتێن ئەرەبی بۆ نێزیكبوونێ ژ سووریێ دكەت و دبێژیت» ل سالا 2011، سووریێ ڕەوشەكا ئالۆزی بخوەڤە دیت ژ ئەگەرێ كوشتن، ئاوارەبوون، پەنابەران و وێرانكاری، بەلێ هیچ ئاماژەیەك نینە كو ل پاشەڕۆژێ دێ چ ڕوو دەت، كی دێ بیتە شوینگر؟ هیچ بەرسڤەكا ڕۆهن نینە، هیچ سیاسەتەكا ڕۆهن ژی نینە بۆ پاشەڕۆژا سووریێ».
ب نێزیكبووونا وەلاتێن ئەرەبی ژ دیمەشقێ، سەرۆك بارزانی دبێژیت» د شیاندایە جۆرەكێ سەقامگیریێ بۆ وی وەلاتی ب دووڤ خوە دا بینیت و ب كێمێ دووماهیێ ب توندوتیژیێ بینیت تاكو ئاستەكێ ڕەوشێ ئاسایی بكەت».
سەبارەت ڕەوشا كوردان ل دەڤەرێ، سەرۆك بارزانی دبێژیت» كورد ئێك نەتەوەنە» هەروەسا ئاماژە ب وێ چەندێ كر» بەردەوام نەدادپەروەری دژی كوردان هاتیە ئەنجامدان، كو بوویە ئەگەرێ شەڕی و ململانێ، بەلێ كوردان شیا بمینن. پێدڤیە حوكمەتێن ستەمكار وانەیان وەرگرن كو ستەم و توندوتیژی، چو چارەسەریەكێ پەیدا ناكەن. بەلكو ڕێكا ڕاست، دیتنا دەلیڤەیەكا هەڤپشك و بكارئینانا ئامرازێن ئاشتیانەیە».
ل دۆر دەڤەرێن جودا یێن كوردستانێ، سەرۆك بارزانی دبێژیت» هەر دەڤەرەكا كوردی تایبەتمەندی، پێگەهـ و ڕەوشا خوە د ناڤ وان وەلاتان دا هەیە كو تێدا دژین. لەوما نەشێین بێژین كو ئەو شێوازێ ل ئیراقێ هەی، د شیاندایە ببیتە نموونەیەك یان نەخشەڕێ بۆ كوردێن سووریێ، توركیا و ئیرانێ. پێدڤیە چارەسەریان د ناڤ وان وەلاتان دا بهێنە دیتن».
سەرۆك بارزانی هەروەسا باس ل وێ چەندێ ژی كر» پێدڤیە هەموو وەلات خوە ژ بكارئینانا سیاسەتا سەركوتكرنێ و نكۆلیكرنێ دوور بكەن، هەروەسا پێدڤیە بزاڤ و كۆمەلێن كوردی ژی توندوتیژیێ بكارنەئینن. پێدڤیە دەلیڤەیا هەڤپشك بۆ دانوستاندنێ هەبیت بۆ وێ ئێكێ چارەسەریەك بهێتە دیتن، تاكو كوردێن وان وەلاتان بشێن مفای ژ مافێن دیموكراسی و ناسنامەیان وەربگرن».

ئەڤرۆ

دوهی شەمبیێ 18/3/2023 سەرۆك مەسعود بارزانی مێهڤانداریا هەژمارەكا مەزن ژ بالیۆز و قونسۆل و نوونەرێن وەلاتان و ڕێكخستێن نێڤدەولەتی و هێزێن هەڤپەیمانان ل ئیراقێ و هەرێما كوردستانێ كر.
د وێ مێهڤانداریێ دا سەرۆك بارزانی پەیڤەك پێشكێشی مێهڤانان كر و تێدا گەلەك ب گەرمی ب خێرهاتنا مێهڤانان كر و سەرەرای ئاماژە دان ب گرنگیا هێما هەلكەفتێن مەها ئادارێ و نەورۆزێ بۆ گەلێ كوردستانێ هیڤیا وێ چەندێ بۆ خواست كو د ڕۆژێن چەژن و بێهنڤەدانێ دا دەمەكێ خوەش ل كوردستانێ ببۆرینن.
د درێژیا پەیڤا خوە دا، سەرۆك بارزانی باسێ ڕەوشا سیاسی و پەیوەندیێن د ناڤبەرا حوكمەتا فیدرالی یا ئیراقێ و حوكمەتا هەرێما كوردستانێ كر و ئاماژەكر كو دەلیڤەیەكا باش بۆ چارەسەركرنا كێشەیان هەیە و ئیرادە و خواست دهێتە دیتن بۆ وێ چەندێ كێشە ب تێكگەهشتنێ و پشتبەستنێ ب دەستووری و ل سەر بنەمایێ وان ڕێككەفتنان بهێنە چارەسەركرن كو د ناڤبەرا ئالیێن هەڤپەیمانیا ئیدارەیا دەولەتێ یێن حوكمەت پێكئینای هاتینە گرێدان. سەرۆك بارزانی سەرەدانا چەند ڕۆژێن بۆری یا محەمەد شیاع سۆدانی بۆ هەرێما كوردستانێ ب دەلیڤەیەكا باش بۆ تێكگەهشتنا زێدەتر د ناڤبەرا هەرێما كوردستانێ و حوكمەتا فیدرالی ل سەر نەهێلانا ناكۆكیان هەژمارت.
هەروەسا سەرۆك بارزانی ئاماژە ب پرۆسەیا سیاسی یا ناڤخوەیا هەرێما كوردستانێ ژی كر و دووپاتكر كو بۆ وێ چەندێ شەرعیەت ل هەرێما كوردستانێ نەچیتە دبن پرسیارێ ڤە پێدڤیە ئەڤ سالە هەلبژارتن بهێنە ئەنجامدان و ئەوژی ڕاگەهاند كو هاریكاری و هەماهەنگیەكا باش دناڤبەرا تیمێن نێڤدەولەتی و ئالیێن پەیوەندیدارێن حوكمەتا هەرێما كوردستانێ دا هەیە بۆ بەرهەڤیێن هەلبژارتنێن هەرێما كوردستانێ.
ل دۆر مافێن پێكهاتەیان د هەلبژارتنان دا سەرۆك بارزانی دووپاتكر كو نابیت هیچ دەستێوەردانەك د مافێ پێكهاتەیان دا بهێتە كرن و ئیرادە یەكا دیاركری ل سەر پێكهاتەیێن هەرێمێ بهێتە سەپاندن و پێدڤیە ڕێز ل ئیرادەیا پێكهاتەیێن ئایینی و نەتەوەیی یێن كوردستانێ بهێتە گرتن و پێكهاتە و ڕێكخراوا نەتەوێن ئێكگرتی هەر سیستەمەكێ بۆ پشكداریكرنا پێكهاتەیان ب باش بزانن ل دەف مە ژی دێ پەسەند بیت.

سەرۆك مەسعود بارزانی ل سەلاحەددین پێشوازی ل جەنەرال مەكفارلێن فەرماندەیێ هێزێن هەڤپەیمانان ل ئیراقێ و سووریێ كر.
د دیدارەكێ دا بەردەوامیا گەفێن تیرۆرستان و پێدڤیا هەماهەنگیا جڤاكێ نێڤدەولەتی بۆ ڕێكگرتنێ ل هێزبوونا تیرۆرستان هاتە باسكرن.
چاكسازیێن وەزارەتا پێشمەرگەی تەوەرەكێ دی یێ وێ دیدارێ بوو و جەنەرال مەكفارلێن سوپاسیا بزاڤێن سەرۆك بارزانی كر بۆ سەرئێخستنا چاكسازیێن وەزارەتا پێشمەرگەی.

سەرۆكێ هەرێما كوردستانێ، نێچیرڤان بارزانی پێشوازی ل ماوریتزیۆ گرێگانتی، بالیۆزێ ئیتالیا ل ئیراقێ كر. د دیدارەكێ دا سەرۆكێ هەرێمێ سەرەرای سوپاسیا پشتەڤانیا ئیتالیا بۆ ئیراقێ و هەرێمێ گوت» سەقایەكێ ئەرێنی د ناڤبەرا بەغدا و هەولێرێ دا بۆ چارەسەریا كێشەیان دروستبوویە و د خوەشحالین ب پێنگاڤێن نوكە یێن حوكمەتا فیدرالی و جهێ ئومێدێ نە».
دیاركر ژی»بەغدا هەڤپشكا سەرەكی یا هەرێما كوردستانێ یە و ژبلی چارەسەركرنا كێشەیان، هیچ ڕێكەكا دی ل بەردەم حوكمەتا هەرێما كوردستانێ و حوكمەتا ئیراقێ دا نینە». بالیۆزێ ئیتالیا ل ئیراقێ ژی دیاركر» چارەسەركرنا كێشەیێن بەغدا و هەولێرێ دێ بیتە ئەگەر جڤاكێ نێڤدەولەتی زێدەتر بەر ب ئیراقێ و هەرێما كوردستانێ ڤە بهێت و بوارێ وەبەرئێنانا بیانی ل ئیراقێ و هەرێمێ زێدەتر ببیت».

سەرۆكێ هەرێما كوردستانێ، نێچیرڤان بارزانی، ل گەل شاندەكێ بلند یێ ئەمریكی ب سەرۆكایەتیا تێری وولف هاریكارێ تایبەت یێ سەرۆكێ ئەمریكا و ڕێڤەبەرێ بلند بۆ ڕۆژهەلاتا ناڤین و باكوورێ ئەفریكا ل جڤاتا ئاسایشا نیشتمانی .د كۆمبوونەكێ ڕەوشا سیاسی و ئابۆری یا ئیراقێ و هەرێما كوردستانێ هاتە باسكرن و بیروڕا هاتنە ئالۆگوركرن سەبارەت پەیوەندیێن بەغدا و هەولێرێ. شاندێ بلند یێ ئەمریكی بەردەوامیا پشتەڤانی و هاریكاریا ئەمریكا بۆ ئیراقێ و هەرێما كوردستانێ دووپاتكر، هەروەسا ئێكڕێزیا هێزێن سیاسی یێن كوردستانی ب تایبەتی پارتی و ئێكەتی ب پێدڤی زانی بۆ دەربازكرنا ئاستەنگێن نوكە ل ئیراقێ و هەرێما كوردستانێ. هەروەسا هەردو ئالیان دووپاتی ل پشتەڤانیا محەمەد شیاع سۆدانی و كارنامەیا حوكمەتا وی كر.

ئەڤرۆ

پشتی بیڤەلەرزا ل باژێرێ عەفرینێ دەزگەهێ خێرخوازیێ بارزانی ل وی باژێری ب هەمی رەنگەکێ خزمەتا وەلاتیان دکەت، نها ژی د چارچۆڤێ هەوا پاقژکرنا باژێری و هەروەسا چاندنا داران ژی هاریکاریا خەلکی دکەن و ئەو یەک ژی بوویە جهێ دلخۆشیا وەلاتیێن عەفرینێ.

پشتی بڤەلەرزا ل باژێرێ عەفرینێ یێ رۆژئاڤایێ کوردستانێ، دەزگەهێ خێرخوازیێ بارزانی وەکو ئێکەم دەزگەهێ خێرخوازی هاریکاریا خەلکێ لێقەومی کر و نها ژی د چارچۆڤێ کارێ ئاڤەندانیێ و خزمەتکرنا خەلکی ل وی باژێری، دەزگەهێ خێرخوازیێ بارزانی رۆلەکێ گەلەک گرنگ دگێریت، کارمەندێن دەزگەهێ خێرخوازیێ بارزانی ل گەل خەلکی دەست ب پاقژکرنا کۆلانان دکەن، داران دچینن و بەردەوام ژی هاریکاریێن مرۆڤی پێشکێشی خەلکی دکەن.
د ڤێ دەربارێ دا محەمەد عەفرینی چالاکڤانێ مافێن مرۆڤی راگەهاند، دەزگەهێ خێرخوازیێ بارزانی ئێکەم دەزگەهێ خێرخوازیێ بوو هاریکاری گەهاندنە باژێرێ عەفرینێ، نها ژی نڤیسینگەها دەزگەهێ خێرخوازیێ بارزانی ل عەفرینێ هاتیە ڤەکرن و بەردەوام هاریکاریێن مرۆڤی پێشکێشی وەلاتیان دهێنە کرن، براستی ژی ئەو یەک کارەک گەلەک مەزنە، وەکو وەلاتیێن عەفرینێ ئەم سوپاسیا سەرۆک بارزانی، دەزگەهێ خێرخوازیێ بارزانی و هەرێما کوردستانێ دکەین، کو د رەوشەکا وەسا دژوار دا هاریکاریا مە کرن، ئەو یەک جهێ شانازیێ یە.
ناڤهاتی ئەو یەک ژی دیار کر، بەری نها ژی سەرۆک بارزانی و هەرێما کوردستانێ گەلەک هاریکاریا رۆژئاڤایێ کوردستانێ کرینە، ئەم ژبیر ناکەین کا چاوا پێشمەرگێن کوردستانێ شیان ب رێیا تورکیا دەربازی باژێرێ کۆبانێ ببن و وەسا باژێر ژ دەستێ رێکخستنا تیرۆرستی یا داعشێ هاتە رزگار کرن و گۆت: (براستی ژی سەرۆک بارزانی و هەرێما کوردستانێ هەتا نها گەلەک هاریکاریا رۆژئاڤایێ کوردستانێ کرینە، لێ مخابن نها ژ بەر گەلەک ئەگەران رەوشا رۆژئاڤایێ کوردستانێ باش نینە، ناکۆکی د ناڤبەرا هێزێن کوردی دا هەنە، ئەم هێڤیدارین کو د چارچۆڤێ بزاڤێن بەری نها یێن سەرۆک بارزانی دا جارەکا دی هەر دو جڤاتێن کوردی یێن رۆژئاڤایێ کوردستانێ دەست ب دانوستاندنان بکەن، چونکی نها پتر ژ هەر دەمەکێ پێدڤیا مە وەکو کوردێن رۆژئاڤایێ کوردستانێ ب ئێکگرتنێ هەیە، هەکە کورد ئێکگرتی بن دێ شێن گەلەک کارێن مەزن بکەن، مخابن نها ژ بەر ناکۆکیێن د ناڤبەرا هێزێن کوردی دا پێگەهێ کوردان ژی ل سووریێ لاواز بوویە).
هەژی ئاماژەپێدانێ یە، کو پشتی بیڤەلەرزا ل باژێرێ عەفرینێ یێ رۆژئاڤایێ کوردستانێ دەزگەهێ خێرخوازیێ بارزانی وەکو ئێکەم دەزگەهێ خێرخوازی شیا هاریکاریێن مرۆڤی پێشکێشی خەلکێ لێقەومی بکەت، هەروەسا ژ بۆ هندێ دەزگەهێ خێرخوازی بشێت بەردەوام هاریکاریا خەلکی بکەت نڤیسینگەهەکا خۆ ل باژێرێ عەفرینێ ڤەکریە و نها ئەو نڤیسینگەه کارێن باش دکەت و ئەو یەک ژی بوویە جهێ دلخۆشیا هەموو وەلاتیان ل عەفرینێ، چونکی ژ بەر رەوشا خراب یا وی باژێری پێدڤیا خەلکی ب هاریکاریان هەیە.