ئەڤرۆ
چاڤەڕێ یە ئەڤرۆ پێنچ یاری ژ چارچووڤێ گەڕا 20ێ كو دبیتە یاریا ئێكێ یا قۆناغا دویێ ژ هەڤڕكیێن خولا پلا نایابا ئیراقێ یا تەپا پێی بهێنە ئەنجامدان، یانەیێن كوردستانی زاخۆ، هەولێر و نەوروز دێ دناڤ ئەرد و جەماوەرێ خوە دا مێڤانداریا یانەیێن بەغدایی و باشۆرێ ئیراقێ كەن.
ژبلی سەركەفتنێ چ ئەنجامێن دی د بەرژوەندیا زاخۆ دا نینن
ل دەمژمێر 5:15 ئێڤاریا درەنگ تیما یانەیا زاخۆ مێڤانداریا یانەیا كەرخ یا بەغدایی ل یاریگەها خوە كەت، كوڕێن خابووری ب دووماهیك ئینانا قۆناغا ئێكێ رێزا13 دهێت ژ پێنچ سەركەفتن، شەش وەكهەڤی و هەشت خوسارەتی هەنە و20 خال كۆمكرینە، مێڤانا وێ رێزا 10ێ دهێت ب كۆمكرنا 26 خالان، د قۆناغا ئێكێ دا زاخۆ ل باژێرێ بەغدا دگەل كەرخێ ب گۆلەكێ تووشی خوسارەتیێ بوو، بۆ ڤێ یاریێ راهێنەرێ زاخۆ حەیدەر عەبدولئەمیر گەشبینە ب زاخا یاریزانێن خوە و پشتگەرمیا جەماوەری قەرەبوویا یاریا بۆری بكەن ئەوێ دیاركری كو دڤێت دناڤ یاریگەها خوە دا بزاڤێ بكەن چو خالان ژ دەستنەدەن پێخەمەت پێشڤەچوونا تیمێ بۆ رێزێن باشتر، لێ یانەیا كەرخ ئێك ژ تیمێن سەرنجراكێشە و شیایە ببیتە تیمەكا هەڤڕك.
ب راهێنەرێ نوو هەولێر دێ دەست ب قۆناغا دویێ كەت
یانەیا هەولێر عەباس عوبێد وەكو راهێنەر، دەستنیشانكری ئەڤرۆ دێ ل یاریگەها خوە شەهید فرانسۆ حەریری دەمژمێر 7:30 شەڤ مێڤانداریا یانەیا كەربەلا كەت، تیما قەلا و منارە كاودانەكێ خراب دەربازدكەت ئەوا نوكە ب19 خالان رێزا 16ێ دهێت، بەرانبەری وێ كەربەلا ب21 خالان رێزا 14ێ دهێت دێ بزاڤێ كەت سەركەفتنا خوە یا بۆری ژ قۆناغا ئێكێ پارێزیت، لێ یانەیا هەولێر خودانا چار ناسناڤێن خولێ چ رێك نینن ژبلی سەركەفتنان و دێ بیتە تاقیكرنا ئێكێ یا كادرێ راهێنانێ، لەوما دبیت یاریەكا ب سانەهی نەبیت.
نەوروز گەشبینە د هەلكەفتێن ئادارێ دا سەركەفتنێ بینت
ژلایێ خوەڤە یانەیا نەوروز ل یاریگەها سلێمانیێ دێ مێڤانداریا یانەیا نەفت ئەلبەسرا ئێك ژ یاریێن گرنگ و ب هێز بۆ تیما كوردستانی ئەوا د نوكە دا 22 خال كۆمكرین و رێزا 12 دهێت و دێ بزاڤێ دكەت د هەیڤا هەلكەفتێن ئادارێ سەركەفتنێ بینت و بكەتە دیاری بۆ جەماوەرێ خوە، هەرچەندە یاریگەه دناڤبەر سلێمانیێ و هەولێرێ دایە بۆ ئەنجامدانا یاریێ و ئەڤرۆ دێ ئێكلابیت، ئەركێ نەوروزێ ب سانەهی نابیت بەرانبەر یانەیا بەسرایی ئەوا ب27 خالان رێزا نەهێ دهێت.
نيشاندان