ئەڤرۆ

ئەڤرۆ، نەوزاد هلۆری:

ب مەرەما گرنگیدان ب پڕۆژەیێن خزمەتگوزاری، ب ئامادەبوونا د. عەلی تەتەر، پارێزگارێ دهۆكێ، ب گوژمێ 11 ملیار دیناران بەرێ بنیاتی بۆ چەندین پڕۆژەیان ل سنوورێ دەڤەرداریا سێمێلێ هاتە دانان.
ل دۆر پڕۆژەیان و بەرنامێ ئاڤەدانكرنێ یێ نوو، پارێزگارێ دهۆكێ گۆت: (مە بەرێ بنیاتی بۆ كۆمەكا پڕۆژێن خزمەتگوزاری ل سنوورێ دەڤەرداریا سێمێلێ ب گوژمێ نێزیكی 11 ملیار دیناران دانا، پرۆژە هەموو یێن سالا 2022ێ نە و ل سەر بودجا حكومەتا هەرێما كوردستانێ دهێنە ئەنجامدان، هەروەسا ب هاریكاریا رێكخراوا GIZ یا ئەلمانی چەند پڕۆژێن ئاڤ و ئاڤرێژان ل سنوورێ دەڤەرداریا سێمێلێ ب گوژمێ دو ملیار دیناران دهێنە ئەنجامدان، ئەڤ سالە ژی دێ كۆمەكا دی یا پڕۆژێن خزمەتگوزاری د بیاڤێ‌ رێك و ئاڤ و كارب و پەروەردە و ساخلەمی و كەرتێن دی دا دێ هێنە ئەنجامدان).
ئەو پڕۆژەیێن خزمەتگوزاری یێن بەرێ‌ بنیاتی بۆ هاتیە دانان د بیاڤێن رێك و ئاڤ و پەروەردەێ‌ دانە و بڕیارە د دەمێ‌ خوە دا ب دووماهی بهێن بكەڤنە د خمەتا وەلاتیان دا.

ئەڤرۆ

د. عەلی تەتەر، پارێزگارێ دهۆكێ دوهی 11/3/2023 پێشوازی ل ئەكادیمیا دیپلۆماسیا ڤیەنا ب بەرهەڤبوونا د. مستەفا گوران، نوونەرێ حكومەتا هەرێما كوردستانێ ل وەلاتێ نەمسا كر.
د هەڤدیتنەكێ دا پارێزگارێ دهۆكێ پەیڤەك پێشكێش كر و تێدا باس ل رەوشا دەڤەرێ و هەرێما كوردستانێ و ئیراقێ و ب تایبەتی پارێزگەها دهۆكێ و رەوشا ئاوارە و پەنابەران و ئەو ئاستەنگێن دهێنە پێش ژ ئەنجامێ هشكەسالیا هەردو سالێن بۆری و بیاڤێ ژینگەهێ و پرۆسا ئاڤەدانی و پڕۆژەیێن خزمەتگوزاری كر.
د وێ‌ هەڤدیتنێ‌ دا دەرفەتا دانوستاندن و پرسیاران ب شاندێ قۆتابیێن ئەكادیمیا دیپلۆماسیا ڤیەنا هاتەدان و ب تێروتەسەلی ژ لایێ پارێزگارێ دهۆكێ ڤە بەرسڤ ل سەر پرسیارێن وان هاتەدان

ئەڤرۆ

ئەڤرۆ، رەمەزان و مەحمود:

د دو روودانێن جودا یێن هاتنوچوونێ‌ دا ل سنوورێ هەردو دەڤەرداریێن ئاكرێ و ئامێدیێ‌ سێ‌ كەسان گیانێ‌ خوە ژ دەست دا و 17 كەس ژی بریندار بوون.
رائید عیماد حسێن، پەیڤدارێ پۆلیسێن ئاكرێ بۆ ئەڤرۆ گۆت: ل چواڕیانا گردەسێن نێزیك پانزینخانا گۆلان روودانەكا هاتنوچوونێ‌ ژ جۆرێ‌ لێكدان د ناڤبەرا دو ترۆمبێلێن ژ جۆرێ ئوپل ڤیكترا دا روودا و د ئەنجام دا سێ كەسان گیانێ خوە ژ دەستدایە، كو دو ژ وان ئافرەت بوون و ئێك ژی زەلام بوو.
گۆتژی: «ل گەل برینداربوونا 12 كەسێن دی ب گرانی بریندار بوون و ب مەرەما چارەسەریێ‌ بۆ نەخۆشخانا تەنگاڤیان ل ئاكرێ هاتنە ڤەگوهاستن، دیسا بریندارەكا ژن ژ بەر دژواریا برینا وێ بۆ نەخۆشخانا تەنگاڤیان ل دهۆكێ هاتە هنارتن، بەلێ گیانێ خوە ژ دەست دا».
دیسا ژ ئەنجامێ روودانەكا هاتنوچوونێ ل گوندێ بەرێ كەڕ یێ‌ سەر ب دەڤەرداریا ئامێدیێ ڤە هەشت كەس بریندابوون.
مەسعود تاهر هاریكارێ، رێڤەبەرێ ساخلەمیا ئامێدیێ بۆ رۆژناما ئەڤرۆ دیار كر، ژ ئەنجامێ ڤێ روودانا هاتنوچوونێ هەشت كەس بریندار بوون و بۆ نەخۆشخانا هەوارهاتنێ ل ئامێدیێ هاتینە هنارتن، لێ‌ ژ بەر گرانیا برینێن دو ژ وان بۆ نەخۆشخانا دهۆكێ هاتنە هنارتن و گۆت: «روودان ژ ئەنجامێ لێكدانا سێ ترۆمبێلا ل گوندێ بەرێ كەڕ یێ سەر ب ناوچەداریا سەرسنكێ ڤە روودایە».

ئەڤرۆ

ئەڤرۆ 12ێ ئادارێ 32 سال ل سەر سەرهلدانا دەڤەرداریا ئاكرێ دەربازبوون، كو سپێدەهیەكا زوو یا 12/3/1991 جەماوەرێ ئاكرێ دژی زولم و زۆرداریا رژێما بەعس سەرهلدان كر و باژێر ئازاد كر.
د وێ‌ رۆژێ‌ دا جەماوەرێ دەڤەرداریا ئاكرێ و بەردەڕەش و ناوچەداریێن دینارتە و بجیل و گردەسێن دژی زۆلما رژێما بەعس سەرهلدان كر و ئەو دەڤەرە هاتنە ئازادكرن و ئالایێ كوردستانێ هاتە بلندكرن و دروشمێن ئازادیێ باژێر تژیكرن.
ئەڤرۆ ل ژێر دەسهەلاتا حوكمەتا هەرێما كوردستانێ د هەموو بیاڤان دا دەستێ ئاڤەدانیێ گەهشتیە دەڤەرێ‌ و پڕۆژێن خزمەتگوزاری دهێنە بجهئینان.
دیسا ب هەمان هەلكەفت، رێڤەبەریا رۆشنبیری و هونەری و بزاڤا رۆشنبیری ل ئاكرێ‌ دێ‌ هەژمارەكا چالاكیان ئەنجامدەن.

ئەڤرۆ

دهۆك، لەزگین جوقی:

رێڤەبەریا هاتنوچوونا پارێزگەها دهۆكێ‌ ئاگەهداریا هەموو شۆفێر و پێشانگەهێن ترۆمبێلان و بكڕێن ترۆمبێلان دكەت خوە ژ كڕین و فرۆتنا ترۆمبێلێن ئەورۆپی و بێ‌ سەرەتا دوور بكەن، داكو ترۆمبێلێن وان دەستەسەركرن و نەهێنە سزادان.
رێڤەبەریا هاتنوچوونا پارێزگەها دهۆكێ‌ ل پەیچی خوە یێ‌ تۆرا جڤاكی یا فەیسبووكی راگەهاندیە: «نابیت كڕین و فرۆتن ب ترۆمبێلێن ئەورۆپی یێن بێ‌ سەرەتا بهێتە كرن، لەورا ژی ئاگەهداریا خودان پێشانگەهێن كڕین و فرۆتنا ترۆمبێلان و بكڕێن ترۆمبێلان دكەین خوە ژ كڕین و فرۆتنا ترۆمبێلێن ئەورۆپی و بی سەرەتا دوور بكەن و نابیت كڕین و فرۆتن ب ڤان جۆرە ترۆمبێلان بهێتە كرن و نابیت ب ناڤێ‌ مە بازرگانیێ‌ بكەن».
ئاشكرا ژی كر، هەر كەسەكێ‌ پێگیر نەبیت و كڕین و فرۆتنێ‌ ب ترۆمبێلێن بێ‌ سەرەتا بكەت دێ‌ پیرابوونێن یاسایی د گەل دا هێنە وەرگرتن.

ئەڤرۆ

هەولێر، قائید میرۆ:

پەیڤدارێ وەزارەتا شەهید و ئەنفالكریان ئاشكرا كر، قووناغا ئێكێ یا ئاڤاكرنا شوقەیان بۆ كەسوكارێن شەهیدان دەستپێكریە و حەفتیا بۆری هەردو وەزارەتێن شەهیدان و ئاڤاكرنێ گەهشتینە رێكەفتنێ بۆ ئاڤاكرنا یەكەیێن ئاكنجیبوونێ بۆ كەسوكارێن شەهیدان.
عادل مەلا سالح، پەیڤدارێ وەزارەتا شەهیدان بۆ رۆژناما ئەڤرۆ دیار كر، پشتی بڕیارا سەرۆكایەتیا جڤاتا وەزیران بۆ ئاڤاكرنا شوقەیان بۆ كەسوكارێن شەهیدان و گۆت: «حەفتیا بۆری وەزیرێ شەهیدان و ئەنفالكریان سەرەدانا وەزارەتا ئاڤاكرنێ كریە ب مەرەما دەستپێكرنا قووناغێن دەستپێكێ یێن ئاڤاكرنا یەكەیێن ئاكنجیبوونێ بۆ كەسوكارێن شەهیدان، رێككەفتن هاتیە كرن قووناغا ئێكێ بهێتە دەستپێكرن و ئیدی ئەرد ل سەر كەسوكارێن شەهیدان ناهێتە بەلاڤكرن و شوقە دێ هێنە ئاڤاكرن و ل سەر كەسوكارێن شەهیدان دێ‌ هێنە بەلاڤكرن».
عادل مەلا سالح گۆتژی: «سالێن بۆری ب دەهان پارچێن ئەردی ژ لایێ حوكمەتا هەرێما كوردستانێ ڤە ل سەر كەسوكارێن شەهیدان هاتینە بەلاڤكرن، بەلێ مخابن بەلاڤكرنا پارچێن ئەردی نەشیایە ئاریشەیا ئاكنجیبوونێ بۆ كەسوكارێن شەهیدان چارەسەر بكەت، لەوڕا د كۆبوونەكا سەرۆكایەتیا جڤاتا وەزیراندا، وەزیرێ شەهیدان پێشنیاركریە شوقە بۆ شەهیدان بهێنە ئاڤاكرن».