ئەڤرۆ
د داخویانیەكێ‌ دا رێڤەبەرێ‌ وەرزشی ل پارێزگەها دهۆكێ‌ دیار كر ل دووماهی كۆمبوونا رێڤەبەریا وان دگەل یانەیێن وەرزشی ل سنۆرێ‌ پارێزگەها دهۆك و ئیدارا سەربەخوەیا زاخۆ دۆپاتی ل سەر هەماهنگی دناڤبەرا هەردو لایان هاتە كرن ژبۆ باشتكرن و پێشختنا وەرزشێ‌.
زێدەتر سەفەر جەعفەر بۆ رۆژناما ئەڤرۆ گۆت: مەرەما سەرەكی یا كۆمبوونا مە دگەل یانەیێن وەرزشی ئەوبوو كو بەلاڤكرنا دووماهی رێنمایێن رێڤەبەریا گشتی یا وەرزشی ل هەرێما كوردستانێ‌ و دانانا پلان و رێكخستنێ‌ بۆ كار و چالاكیێن داهاتی و زێدەتر هەماهنگی دناڤبەرا یانەیێن وەرزشی ل پارێزگەهێ‌ دگەل رێڤەبەریا مە ژبەركو ئەم لایەنێ‌ فەرمی یێ‌ وەرزشی ل حوكمەتا هەرێمێ‌ دڤێت هەر بابەت و كارەكێ‌ گرێدایی ب حكومەتێ‌ ڤە هەماهنگی دگەل مە بهێتە كرن پێخەمەت ئاسانكاری و هاریكاریا هەموو یانەیان هەردەمێ‌ پێدڤی ب كارەكێ‌ حكومی هەبن و دێ‌ بزاڤێ‌ كەین بۆ هەر كارەكێ‌ ژبۆ پێشخستنا وەرزشێ‌ و دشیان دا بیت ئەم ببینە پڕەك بوو هەڤكاری و پشتەڤانیێ‌، پێنەڤێت بوو داهاتی دا كۆمبوون ژی بەردەوامبن.
ژلایەكێ‌ دووڤە ناڤهاتی ئەوچەندە ژی دیاركر سەرباری كاودانێن نوكە یێن دارایی و هەبوونا 19 یانەیان ل سنۆرێ‌ پارێزگەها دهۆكێ‌ و ئیدارا سەربەخوەیا زاخۆ ب هیڤی نە رێكخستنەكا باش بۆ هەموو یانەیا بهێتە كرن ژ لایەنێ‌ ئیداری، چالاكیان و هەلسەنگاندنەكا دروست كو ب كەڤیتە دخزمەتا هەموو جورە یاریێن وەرزشی، یا دشیان دابیت وەكو حوكمەتا هەرێمێ‌ بەردەوام پشتەڤانێ‌ وەرزشێ‌ و یانەیان بین.

ئەڤرۆ
دهێتە چاڤەڕێ‌ كرن ئەڤرۆ ل دەمژمێر دو و نیڤێ‌ پشتی نیڤرۆ چار یاری ژ هەڤڕكیێن گەڕا 19ێ‌ یا خولا پلا نایابا كوردستانێ‌ یا تەپا پێی بهێنە ئەنجامدان.
ل یاریگەها سێیێ‌ تیما یانەیا دهۆك دێ‌ مێڤانداریا یانەیا هندرین كەت، تیما ئەلهۆیێن چیا د هێلا مەترسیا داكەفتنێ‌ دانە بۆ پلا ئێك ئەوا نوكە ب 14 خالان رێزا 15ێ‌ و دووماهیێ‌ دهێت ژ چار سەركەفتن، دو وەكهەڤی و 10 خوسارەتی، ژلایێ‌ خوەڤە تیما هندرین 26 خال كۆمكرینە و رێزا سێیێ‌ دهێت، دهۆكێ‌ پێدڤی ب سێ‌ خال هەیە ژبۆ راوەستاندنا ژدەستدانا خالان و گەشتكرنا هیڤیێن مانا خوە د خولێ‌ دا، ژلایێ‌ خوەڤە تیما یانەیا ئاكرێ‌ دێ‌ ل هەولێرا پایتەخت بیتە مێڤانا یانەیا شەقلاوە، ئاكرێ‌ ل رێزا 10ێ‌ ب شەش سەركەفتن، پێنچ وەكهەڤی 23 خال كۆمكرینە، تیما مێڤاندار 24 خال كۆمكرینە و رێزا چارێ‌ دهێت، نوونەرا پارێزگەهێ‌ چاڤ ل سەركەفتنێ‌ یە ژبۆ پێشكەڤتن بەر ب رێزێن باشتر.
ژ یاریێن دی یێن ئەڤرۆ، پێشمەرگەیێ‌ هەولێر دێ‌ سۆران مێڤان كەت و سیروانی نوو دێ‌ بیتە مێڤانا دەربەندیخان.

ئەڤرۆ
سێ‌ یاریزانێن كیك بۆكسینگا یانەیا دهۆك جهێ‌ خوە دناڤ رێزێن هەلبژارتیێ‌ ئیراقێ‌ دا پاراستن پشتی شیاین رێزێن ئێكێ‌ و دویێ‌ بهێن، ژ چارچووڤێ‌ قارەمانیا ناسناڤێ‌ سۆپەرا ئیراقێ‌ ئەوا ل ئەینیا بۆری ب پشكداریا 72 یاریزانێن ئیراقێ‌ بۆ 12 كێشین جودا ل هۆلا گرتیا كۆلیژا پەروەردەیا چەستەیی و زانستێن وەرزشی ل زانكویا دهۆك هێتە كرن.
بۆ سیستەمێ‌ فۆل كۆنتاك زانا سالح كەكۆ شیا بۆ كێشا 67كگم رێزا ئێكێ‌ بهێت، دیسان ل سەر سیستەمێ‌ كەی وەن بۆ كێشا 71كگم عەلی عزەت رێزا دویێ‌ هات، هەڤالێ‌ وی ئەلند عەبدولرەحمان رێزا دویێ‌ بۆ كێشا 91كگم ب دەستڤە ئینا و دەرئەنجامێ‌ هنگاڤتنا وی نەشیا بەردەوامیێ‌ بدەتە هەڤڕكیێ‌.
ل دۆر ڤێ‌ یەكێ‌ مەحفۆز ئیبراهیم سەرۆكێ‌ ئێكەتیا كیك بۆكسینگا پارێزگەها دهۆكێ‌ بۆ ئەڤرۆ گۆت: وەكو رێكخستن پێخوەشحالین ئەم شیاین ب سەركەفتیانە ب دووماهی بینن پێنەڤێت ئەڤە ژی بۆ هەڤكاریا هەر ئێك ژ نوونەراتیا دهۆك یا لژنا ئۆلمپی، كولیژا پەروەردا جەستەیی و زانستێن وەرزشی ل زانكۆیا دهۆك، رێڤەبەریا تەندرۆستی و هەرلایەنەكێ‌ هەڤكاریا مە كری و مە دۆپاتكر كو پارێزگەها دهۆكێ‌ هەردەم جهێ‌ وەرزشێ‌ و رێكخستنا سەركەفتی یە و بەرهەڤبوونا سەرۆكێ‌ ئێكەتیا كیك بۆكسینگا عەرەبی بەلگەیە ل سەر شیانێن مە یێن رێكخستنی.
لدۆر لایەنێ‌ هۆنەری سالح كەكۆ راهێنەرێ‌ پارێزگەهێ‌ و هەلبژارتیێ‌ ئیراقێ‌ گۆت: هەڤڕكیەكا بهێز دهاتە كرن تایبەت دگەل یاریزانێن شارەزا یێن هەلبژارتیێ‌ ئیراقێ‌، مە ب نەهـ یاریزانان پشكداری كربوو، ناسناڤ ەك دەستڤەئینا و دو یێن رێزێن دویێ‌ هاتن، ئاریشە چەند یاریزانێن مە و یێن باژێرێ‌ سلێمانیێ‌ تووشی غەدرا دادڤانان بوون ژلایێ‌ كۆمكرنا خالان ڤە، هەرچەوابیت بۆ داهاتی دێ‌ باشتر خوە بەرهەڤكەین و هێشتا دەستپێكا وەرزێ‌ نوو یە.

ئەڤرۆ

جاسم بن حەمەد ئال سانی سەرۆكێ‌ ئەنجوومەنێ‌ كارگێریا بەنكا قەتەری یا ئسیلامی راگەهاند ئەوان 600 ملیۆن یۆرۆ بۆ كرینا یانەیا مانچستەر یۆنایتد یا ئنگلتەرایێ‌ بەرهەڤكرینە و رژدن بۆ كرینا یانێ‌.
هژمارەكا مەزن یا دەزگەهێن راگەهاندنێ‌ نووچەیێ‌ كرینا یانەیا مانچستەر یۆنایتد ژلایێ‌ جاسم بن حەمەد كرینە مانشێتێن سەرەكی و سەرنجراكێش، ژبەركو ئەو پارەیێ‌ بوو هاتیە تەرخانكرن كو دگەهیتە شەش ملیار یۆرۆیان ل گەل دا هەموو قەرێن وێ‌ بهێنە دان نێزیكی 580 ملیۆن یۆرۆ، دیسان سەخبیكرن ژێرخانەیا وەرزشی و دانانا چەند یاریگەهێن دی بۆ مانچستەر یۆنایتد و وەبەرهێنانەكا باش.
جاسم بن محەمەد یێ‌ 42 سالی دیاركر هەر ژ زارووكینا خوە حەز ژ ڤە یانێ‌ هەبوو و رژدە بۆ كرینا یانێ‌ و سۆزدایە ب هێز ڤەگەڕینتە ناسناڤێن پرێمەرلیگ و چامپیۆنز لیگ و جەماوەرێ‌ ڤەگەڕێنتە چەرخێ‌ دەستكەفتان.

ئەڤرۆ
ل دووڤ دەنگۆباسێن هاتینە بەلاڤكرن ل هەولێرا پایتەخت كارگێریا یانەیا هەولێر بڕیاردایە بۆ یاریا بهێت ژی ژ چارچووڤێ‌ خولا پلا نایابا ئیراقێ‌ یا تەپا پیێ س‌پارتا خوە ل سەر راهێنەرێ‌ كورد عەبدولقادر حسێن بكەت دوور ژ هەر ئەنجامەكی.
ل دەستپێكا وەرزێ‌ نوو یێ‌ خولێ‌ یانەیا هەولێر گرێبەست دگەل نزار مەحرۆسی ئیمزاكر بوو لێ‌ پشتی بۆرینا دو یاریان دگەل كەربەلا و كارەبا تووشی خوسارەتیێ‌ بووین دەست بەرداری راهێنەری بوون، دووڤدا گرێبەستێ‌ ل گەل غازی فەهەد ئیمزاكر ئەوێ‌ 13 یاری ب رێڤەبرین، ژبەر بەردەوامیا ئەنجامێن لاواز بتنێ‌ سێ‌ سەركەفتن ئینابوون راهێنەرێ‌ ناڤهاتی ژی دەست ژ كارێ‌ خوە بەردا، یانەیا هەولێر نەچاربوو هاریكارێ‌ راهێنەری یێ‌ كورد عەبدولقادر حسێن ل جهێ‌ وی ب دانیت ئەوێ‌ ژلایێ‌ جەماوەری ڤە پشتەڤانیەكا باش بوو دهێتە كرن، ل دووڤ ژێدەرێن دەست ب رۆژناما ئەڤرۆ كەفتین كو كارگێریا یانەیا هەولێرێ‌ بڕیاردا بۆ یاریا بهێت هەتا قۆناغا ئێكێ‌ ژی ب دووماهی بهێت سپێرتێ ل سەر بكەت و دوور نینە هەكە ئەنجام د باشبن قۆناغا دویێ‌ راهێنەرێ‌ كورد بەردەوامبیت، ئەڤ پێنگاڤە دێ‌ بیتە یا دویێ‌ پشتی یانەیا دهۆكێ‌ هەر ژ دەستپێكا خولا پلا ئێك و هەتا بۆرینا 17 گەڕان ژ خولا پلا نایاب سپارتا خوە ب راهێنەرێ‌ كورد و یێ‌ پارێزگەهێ‌ سلێمان رەمەزان كریە ئەوێ‌ هەتا نوكە ئەنجامێن دلخوەشكەر دەستڤە ئیناینە.

ئەڤرۆ
پشتی زێدەتری سالەك و نیڤا راهێنەرێ‌ بەرێ‌ یێ‌ یانەیا ریال مەدرید زێنەدین زێدان ڤەگەڕیانا خوە بۆ كارێ‌ راهێنەراتیێ‌ راگەهاند و دو یانەیێن مەزنێن ئۆرۆپا دەرگەهێ‌ خوە بوو ڤەكر.
رۆژناما لۆ ڤیگارۆ یا فرەنسی دیار كر پشتی بێ هیڤی بوونا زێنەدین زێدانی بۆ سەرپەرشتیا هۆنەری یا هەلبژارتیێ‌ وەلاتێ‌ خوە كو ئێكەتیا فرەنسا بڕیار دایی گرێبەستا راهێنەرێ‌ هەلبژارتیێ‌ تیما خوە دیدێ‌ دیشامب نوو بكەت، هەموو پێشبینی بۆ هەردو یانەیێن پاریس سانجێرمان و یۆڤانتۆس یا فرەنسی دیاركرینە دێ‌ زێدان بیتە راهێنەرێ‌ ئێك ژ هەردو یانەیێن مەزنێن ئۆرۆپا و دوور نینە هەر ژ دەستپێكا هەیڤا بهێت هەموو بابەتێن گرێدایی ژ ئێك یانەیێن ناڤهاتی ئێكلا بكەت گرێبەستا خوە ئیمزابكەت و زێدانێ‌ دوورخستیە ئەو راهێنەراتیا یانەیا ریال مەدرید بكەت.