ئه‌ڤرۆ،

تیما باسكێت بۆلا یانه‌یا زاخۆ ب ژڤانه‌ ئه‌ڤرۆ ل ده‌مژمێر چاری ئێڤاری یاریا خوه‌ ژ گه‌ڕا 16 یا خولا پلا نایابا ئیراقێ‌ ل باژێرێ‌ كه‌ركووكێ‌ ئه‌نجامبده‌ت ده‌مێ‌ دبیته‌ مێڤانا یانه‌یا غازا باكۆر، ژلایه‌كێ‌ دووڤه‌ ل سه‌ر ئاستێ‌ لاوان ل ده‌مژمێر دو یێ‌ پشتی نیڤرۆ هه‌ردو یانه‌ دێ‌ هه‌مبه‌ری ئێك بن.

ل دووشه‌مبیا بوری ژ چارچووڤێ‌ گه‌ڕا 15ێ‌ تیما زاخۆ شیابوو سه‌ركه‌فتنێ‌ ل سه‌ر گازا باكۆر بینیت ب82- 78خالان، ل سه‌ر ئاستێ‌ لاوان ژی سه‌ركه‌فت بوو ب 105- 21 خالان.

ل دۆر دووماهی به‌رهه‌ڤیێن نوونه‌را ده‌ڤه‌را به‌هدینان و كوردستانێ‌ جه‌گه‌ر عه‌لی كاپتنێ‌ تیما زاخۆ بۆ رۆژناما ئه‌ڤرۆ گۆت: ژبه‌ركو ئه‌ڤه‌ قۆناغا دویێ‌ یه‌ و هه‌موو تیم باشتر خوه‌ به‌رهه‌ڤكرینه‌ له‌وما چو ده‌لیڤه‌ نینن ژبلی سه‌ركه‌فتنێ‌، یاریا باسكێت بۆلێ‌ چركه‌یێن یاریێ‌ بوو د گرنگن و ئه‌نجام دهێته‌ گوهۆڕین ئه‌ڤچا هه‌ر یاریه‌كا دكه‌ین وه‌كو یا دووماهیا ئێكلاكه‌ره‌، یاریا ئه‌ڤرۆ ل گه‌ل غازا باكۆر ب سانه‌هی نابیت سه‌رباری قۆناغا ئێكێ‌ دا مه‌ سه‌ركه‌فتن ل سه‌ر تۆماركربوو لێ‌ ئه‌ڤرۆ دێ‌ دناڤ ئه‌رد و جه‌ماوه‌رێ‌ وێ‌ دا بیت ئانكو دێ‌ بهێزتربیت، ب گه‌نجێن باژێرێ‌ خوه‌ رژدین به‌رده‌وامیێ‌ بده‌ینه‌ ئه‌نجامێن باش پێخه‌مه‌ت ده‌ستڤه‌ئینانا ئارمانجا مه‌ ئه‌وژی رێزێن پێشیێ‌ و ده‌ربازبوون بۆ پله‌یی ئۆف.

بۆ زانین نه‌فت یا به‌غدایی ب 30 خالان سه‌رێ‌ لیستێ‌ دهێت، ب جووداهیا تۆماركرنا پۆینتا شورته‌ ل رێزا دویێ‌ دهێت، زاخۆ ب 25 خالان پێشڤه‌ هاتیه‌ رێزا پێنجێ‌، غازا باكۆر ب 22 خالان رێزا نه‌هێ‌ دهێت، سه‌رجه‌مێ‌ 13 یانه‌یان پشكداری د خولێ‌ دا دكه‌ن.

ئه‌ڤرۆ، قه‌یس وه‌یس

چاڤه‌ڕێ‌ دهێته‌ كرن ل ئه‌ینی و شه‌مبیا بهێت هه‌رسێ‌ یانه‌یێن پارێزگه‌هێ‌ و ئیدارا سه‌ربه‌خوه‌یا زاخۆ یاریێن خوه‌ یێن گه‌ڕا 15ێ‌ ژ قۆناغا ئێكێ‌ یا خولا پلا نایابا كوردستانێ‌ یا ته‌پا پێی ئه‌نجامبدان ئه‌وا هه‌موو یاری ل ده‌مژمێر دو یێ‌ پشتی نیڤرۆ هێنه‌ كرن.

ل ئه‌ینیا بهێت تیما یانه‌یا دهۆك دێ‌ به‌ر ب هه‌ولێرا پایته‌خت چیت و بیته‌ مێڤانا یانه‌یا سۆران، تیما پارێزگه‌هێ‌ د مه‌ترسیا دا كه‌فتنێ‌ دا یه‌ و لاوازترین ئه‌نجام و ئاست نیشان داینه‌ ئه‌وا نوكه‌ ب 11 خالان ژ 13 یاریان نه‌ه خوساره‌تی، دو وه‌كهه‌ڤی و سێ‌ سه‌ركه‌فتن رێزا 15ێ‌ و دووماهیێ‌ دهێت، ژلایێ‌ خوه‌ڤه‌ سۆران ب 17 خالان رێزا نه‌هێ‌ دهێت، ژ یاریێن ئه‌ینیێ‌، شێروانه‌- سیروانی نوو، شه‌قلاوه‌- ئارارات.

ل شه‌مبیا بهێت تیما یانه‌یا زاخۆ دێ‌ ل یاریگه‌ها ده‌لال مێڤانداریا یانه‌یا ده‌ربه‌ندیخان كه‌ت، كوڕێن خابۆری ب 16 خالان رێزا 11ێ‌ دهێت ژ چار سه‌ركه‌فتن، چار وه‌كهه‌ڤی و پێنچ خوساره‌تی، بۆ ڤێ‌ یاریێ‌ دێ‌ ب پشته‌ڤانیا جه‌ماوه‌رێ‌ خوه‌ بزاڤێ‌ كه‌ت سێ‌ خالان ژ مێڤانا خوه‌ وه‌ربگریت ئه‌وا ب 19 خالان رێزا شه‌شێ‌ دهێت، ژلایێ‌ خوه‌ڤه‌ یانا ئاكرێ‌ ژی د رێزبه‌ندیه‌كا مه‌ترسیداره‌ یا داكه‌فتنێ‌ دایه‌ بۆ پلا ئێك ئه‌وا نوكه‌ ب 16 خالان رێزا 13ێ‌ دهێت دێ‌ مێڤانداریا یانه‌یا سه‌ید سادق كه‌ت خودانا رێزا هه‌شتێ‌ ب 17 خالان، ژ یاریێن رۆژا شه‌مبیێ‌، برایه‌تی- هندرین، چوارقۆرنه‌- پێشمه‌رگه‌یا هه‌ولێر.

بۆ زانین پێشمه‌رگه‌یا هه‌ولێرێ‌ ب 28 خالان سه‌رێ‌ لیستێ‌ دهێت، ئارارات ب 23 خالان و برایه‌تی ب 20 خالا رێزێن دویێ‌ و سێیێ‌ دهێن.

ئه‌ڤرۆ، هه‌رهین محه‌مه‌د:

داخویانیه‌كێ‌ دا ئاشتی موسته‌فا راهێنه‌رێ‌ تیما ته‌پا پێی یا یانا دهۆك بۆ ئه‌ڤرۆ دیاركر به‌ری ب بیته‌ راهێنه‌ر د زانی ئه‌ركێ‌ وی ب زه‌حمه‌ته‌ ژبه‌ر چه‌ند ئه‌گه‌رێن سه‌ره‌كی و د نوكه‌ دا ئه‌نجام د گرنگ نینن.

زێده‌تر ناڤهاتی كۆت: ده‌ستپێكا خولا پلا نایابا كوردستانێ‌ یانێ‌ كادرێ‌ خوه‌ یێ‌ راهێنانێ‌ هه‌بوو و بیست رۆژێن دووماهیێ‌ ده‌ست به‌رهه‌ڤیان كربوو ئه‌ڤچه‌نده‌ ژی كارتێكرنێ‌ ل یاریزانان كر، هه‌روه‌سان هه‌لبژارتنا هنده‌ك یاریزانان بۆ تیما دهۆكێ‌ ب مخابنی ڤه‌ نه‌ ل ئاست بوون دڤیابا نه‌هاتبانه‌ وه‌رگرتن  دیسان لاوازی هه‌یه‌ ژلایێ‌ دارایی ڤه‌ و شه‌ش یاریزانان یانه‌ ب جه هێلا ژبه‌ر نه‌دانا مووچه‌یی و ئه‌ڤه‌ ژی ئه‌گه‌رێ‌ سه‌ره‌كی بوو.

هه‌روه‌سان ئاشتی مسته‌قا گۆتژی: مه‌ گه‌له‌ك كێماسی د تیما خوه‌ دا هه‌نه‌ و كارگێریا تیمێ‌ سۆزا دایه‌ من ژ رۆژا هاتیمه‌ ل گه‌ل وان ئه‌و گوهۆڕینان بكه‌ین و هنده‌ك یاریزانان بۆ خولا ئیراقێ‌ به‌رهه‌ڤبكه‌ین تایبه‌ت یێن كورد و هاریكاریا تیمێ‌ بكه‌ن مه‌ تیم نینه‌ و هنده‌ك ژ وان یاریزانێن مه‌ بۆ جارا ئێكێ‌ یه‌ یاریێ‌ دكه‌ن و كارگێریێ‌ گۆتیه‌ ئه‌نجام نه‌یێ‌ گرنگه‌ و یا گرنگ ئه‌وه‌ یاریزان ب خۆه‌ به‌رهه‌ڤبكه‌ین و ئه‌ڤ ساله‌ مه‌ هه‌ڤڕكی نه‌ڤێت و مه‌ یاریه‌ك یا مای و مه‌ هژمارتیه‌ ئه‌و یاریێن مه‌كرین ل گه‌ل وێ‌ یاریا بهێت بنه‌ یاریێن هه‌ڤالینیێ‌ بۆ تیمێ‌ و یاریزانێن گه‌نج و ئه‌نجام نه‌یێ‌ گرنگه‌ و بتنێ‌ مه‌ دڤێت مفای ژ یاریزانان بینین.

ئه‌ڤرۆ، زاخۆ، عه‌لی حاجی:

د داخویانیه‌كێ‌ دا سه‌رۆكێ‌ یانا باتیفا یا وه‌رزشی بۆ رۆژناما ئه‌ڤرۆ دیاركر یاریگه‌ها تیما وان یا ته‌پا پێی تێكچوویه‌ و پێدڤی ب نووژه‌نكرنێ‌ یه‌ و داخوازا ئاڤاكرنا ئێكا نوو كریه‌.

زێده‌تر ئه‌یهه‌م جامی گۆت: ئه‌ردێ‌ یاریگه‌ها مه‌ یا ته‌پا پێی ب كێر یاریكرنێ‌ ناهێت و چه‌ند یاریزانێن مه‌ تووشی هنگاڤتنێ‌ كرینه‌ و دیسان جهێ‌ روونشتنا جه‌ماوه‌ری به‌رته‌نگه‌ هه‌تا جهێ‌ خوه‌ گوهۆڕینا یاریزانان ژی نینه‌ و نه‌چارین یاریزانێن مه‌ ل ئاڤاهیێ‌ ئێكه‌تیا لاوێن دیمۆكراتا كوردستانێ‌ خوه‌ ب گوهۆڕن، له‌وما یاریگه‌ها مه‌ پێدڤی ب نووژه‌نكرنێ‌ یه‌ ژبۆ خوه‌ قۆرتالكرنا ئه‌ڤان ئاریشه‌یان و چاره‌سه‌ریا درۆست یاریگه‌هه‌كا مۆدرێن بهێته‌ ئاڤاكرن ل دووڤ خاستا خه‌لكی و وه‌رزشڤانێن ده‌ڤه‌رێ‌ ژبه‌ركو ئه‌و یاریگه‌ها نوكه‌ یا مه‌ نینه‌ به‌لكو یا بنگه‌هێ‌ وه‌رزش و لاوان و ئێكه‌تیا لاوانه‌ وه‌كو هاریكاری بوو مه‌ به‌ر ده‌ستكریه‌.

ل دووماهی ناڤهاتی گۆت: هه‌تا نوكه‌ ب سۆپاسی ڤه‌ ئیدارا سه‌ربه‌خوه‌یا زاخۆ ب رێیا قائیمه‌قامیا قه‌زا باتیفا به‌رهه‌ڤییا خوه‌ دیاركریه‌ كو ده‌مه‌كێ‌ نێزیك دێ‌ ترۆمبێله‌كا ڤه‌گۆهاستنا یاریزانان دابینكه‌ت.

ئه‌ڤرۆ،

تیما ته‌پا پێی یانه‌یا گاره‌ ئێك ژ سه‌نته‌رێن خوه‌ كۆمكرنا گه‌نجن و لاوێن باژێرێ‌ دهۆكێ‌ نه‌ تایبه‌ت ل ده‌وروبه‌رێن خوه‌ تاخێن تاخێن جۆدا، ب درێژاهییا ژیێ‌ خوه‌ یێ‌ دامه‌زراندنێ‌ هه‌ر ژ سالا 1995ێ‌ و هه‌تا ئه‌ڤرۆ سه‌ده‌هان گه‌نجان حه‌ز و ڤیانا خوه‌ یا یاریا ته‌پا پێی ب ناڤێ‌ یانه‌یا گاره‌ د خول و قاره‌مانیێن كوردستانێ‌ و ئیراقێ‌ دا بجه ئیناینه‌، ب ده‌هان یاریزان ژی بۆ یانه‌یێن دی یێن پارێزگه‌هێ‌ به‌رهه‌ڤ دكرن و هه‌روه‌سان وه‌كو ده‌لیڤه‌كا كاری بوو یا هنده‌ك گه‌نجان، ئانكو  خزمه‌ته‌كا مه‌زن بۆ وه‌رزشا پارێزگه‌ها دهۆكێ‌ كریه‌، لێ‌ لایه‌نێ‌ نه‌رێنی یا ڤێ‌ یانێ‌ دارایی بوو و نه‌بوونا داهاتیه‌ك كو هه‌ر ژ به‌ری 17 سالان ده‌ستپێكربوو هه‌تا گه‌هشته‌ یا ئه‌ڤرۆ كو ب نه‌چاری تیما وان یا ته‌پا پێی د خولا پلا ئێكا كوردستانێ‌ دا پشتی نه‌ ئه‌نجامدانا سێ‌ یاریان بهێته‌ دوورخستن ژ خولێ‌ ژبه‌ر كو یاریزانێن وێ‌ بۆ ماوێ‌ سێ‌ هه‌یڤێن بوری مووچه‌یێ‌ خوه‌ نه‌ وه‌رگرتی ب بایكۆتێ‌ كاروانێ‌ تیما گاره‌ راوه‌ستاند!، دێ‌ ب مخابنی ڤه‌ ژی بێژم وه‌رزشا پارێزگه‌ها دهۆكێ‌ به‌ره‌ ب پاشڤه‌ چوونێ‌ دچیت و گه‌نجێ وه‌رزشڤان زه‌ره‌رمه‌ندێ‌ ئێكانه‌یه‌، ترسا مه‌ ب گه‌هیته‌ كاروانێ‌ یانه‌كا دی یا مه‌زن ل پارێزگه‌هێ‌ ئه‌وژی یانه‌یا زێره‌ڤانی سه‌رباری د ماوه‌كێ‌ كورت دا چار ناسناڤێن خولا كوردستانێ‌ و قاره‌مانیا هه‌رێمێ‌ ب ده‌ستخوه‌ڤه‌ ئینا و بوو لایه‌نه‌كێ‌ هێزێ‌ یێ‌ وه‌رزشا پارێزگه‌هێ‌ و كوردستانێ‌ و مه‌ وه‌رزشڤانا شانازی پێ‌ دكر، لێ‌ مخابن ژیێ‌ وێ‌ گه‌له‌ك نه‌ ڤه‌كێشا ئه‌وا ل 2011 هاتبوو دامه‌زراندن ل 2020 هاته‌ هه‌لوه‌شاندن ب بۆهانا قه‌یرانا دارایی و نه‌بوونا پشته‌ڤانیێ‌! ئانكو یانه‌یا زێره‌ڤانی ب ده‌ستكه‌فت و ناڤێ‌ خوه‌ یێ‌ گران بتنێ‌ نه‌ه سالا ڤه‌كێشا و هیڤیێن ده‌هان یاریزان، راهێنه‌ران و جه‌ماوه‌رێ‌ وێ‌ ڤه‌مراندن و بێ‌ سه‌رۆشین ما! مه‌ نه‌ زانی مه‌ره‌ما ڤه‌كرنا وێ‌ چو بوو! داخستنا وێ‌ ژبه‌ر چو بوو! كی ئه‌گه‌ر بوو! بۆچی هوسا ب سانه‌هی! پێنه‌ڤێت زه‌ره‌رمه‌ندێ‌ ئێكانه‌ ژی هه‌ر گه‌نج و لاوێن باژێرێ‌ دهۆكێ‌ بوو! دبیت نه‌بوونا پلان یان دوبه‌ره‌كی یان شێوێ‌ به‌روه‌خت و بێ‌ هزر ئه‌ڤ یانه‌ ژیه‌كێ‌ كورت ده‌ربازبكه‌ت! ترسا مه‌زن یا نوكه‌ ئه‌وه‌ دوور نینه‌ ئه‌ڤ ئێشه‌ ژ یانه‌یا گاره‌ بگریت و رۆژه‌ك بهێت بێژن وه‌خته‌كی یانه‌كا ب ناڤێ‌ گاره‌ ژی هه‌بوو!! خودان یاریگه‌ه و تیمێن جودا! ژبه‌ركو پاشه‌رۆژا ڤێ‌ یانێ‌ ژی دیار نینه‌ ژبه‌ر نه‌بوونا پشته‌ڤانیێ‌! نه‌بوونا داهاتیه‌كێ‌ بشێن كارێن خوه‌ ب دروستی پێ‌ بكه‌ن! نه‌بوونا وه‌به‌رهێنانه‌كێ‌ كو هه‌موو یانه‌یێن پارێزگه‌هێ‌ ژی بۆ دنالن!! له‌وما هیڤییا مه‌ ئه‌وه‌ ژ لایه‌نیێن په‌یوه‌ندیدار ل رێكه‌ چاره‌كێ‌ بۆ یانه‌یێن پارێزگه‌هێ‌ په‌یدابكه‌ن به‌ری چاره‌نڤیسێ‌ وان وه‌كو یێ‌ یانه‌یا زێره‌ڤانی لێ بهێت.