ئامێدیێ، مه‌حمود نهێلی:

ب مه‌ره‌ما خوه‌ به‌رهه‌ڤه‌كرن بۆ وه‌رزێ زڤستانێ و رێگریكرن ژ كاركه‌فتنا تۆڕا كاره‌بێ ژ ئه‌نجامێ روودانا هه‌وا و بارانان، رێڤه‌به‌ریا كاره‌با ئامێدیێ ده‌ست ب هه‌وه‌كا سه‌خبێركرنێ ل سه‌ر تۆڕ و نه‌گه‌یینه‌رێن كاره‌بێ كریه‌، هه‌روه‌سا رابوویه‌ ب نه‌هێلان و راكرنا وان فاكته‌ران یێن دبنه‌ ئه‌گه‌رێ شۆرتێن كاره‌بێ و ژ كاركه‌فتنێ.

ئه‌ندازیار ئارام جلال، رێڤه‌به‌رێ به‌لاڤكرنا كاره‌با ئامێدیێ بۆ رۆژناما ئه‌ڤرۆ دیار كر، ئه‌و به‌رده‌وامن ل سه‌ر سه‌خبێریكرن و گوهۆڕینا نه‌گه‌یینه‌ران (عازلێن ستوینان) ل سه‌ر فیده‌رێ زێبار ل گوندێ دێویكێ و گه‌له‌ك فیده‌رێن دیتر یێن سه‌ر ب رێڤه‌بریا وان ڤه‌ و گۆت: “هه‌ژماره‌كا زۆرا نه‌گه‌یینه‌ران ل ده‌ڤه‌رێ هاتینه‌ شكاندن و ئه‌ڤ یه‌كه‌ دبیته‌ ئه‌گه‌ر، كو ستوونا ئاسنی ببیته‌ كاره‌ب و بگه‌هیته‌ ئه‌ردی و ده‌مێ بارنبارینان دبیته‌ ئه‌گه‌رێ ژ كاركه‌فتنا كاره‌بێ”.

ناڤهاتی دیار ژی كر، ب مه‌ره‌ما رێگریكرن ژ كاركه‌فتنێ د وه‌رزێ زڤستانێ دا ئه‌و رابووینه‌ ب بڕینا وان داران یێن د ناڤ هێلێن كاره‌بێ دا دره‌باز دبن، كو ده‌مێ هه‌وا و بارانان ب ئه‌گه‌رێ وان داران كاره‌ب ژ كار دكه‌ڤیت.

ناڤهاتی داخوازێ ژ وه‌لاتیێن ده‌ڤه‌رێ ژی دكه‌ت ل گه‌ل وان د هاریكار بن بۆ نه‌هێلانا دیاردا شكاندنا نه‌گه‌یننه‌رێن ستوینێن كاره‌بێ، كو دبیته‌ ئه‌گه‌رێ ژ كار ده‌ركه‌فتنا هێلێن كاره‌بێ و بارگرانی ل سه‌ر ملێن فه‌رمانبه‌رێن سه‌خبێریێ دروست دبیت.

ئه‌ڤرۆ:

ب گوژمێ‌ 39 ملیار دیناران پڕۆژه‌یێ‌ دروستكرنا جۆتسایدێ‌ رێیا به‌دریكێ‌ بۆ باعه‌درێ‌ هاته‌ راگه‌هاندن.

د. عه‌لی ته‌ته‌ر، پارێزگارێ‌ دهۆكێ‌ به‌رده‌وام ل گه‌ل وه‌زاره‌تێن په‌یوه‌ندیدار و نوونه‌راتیا حوكمه‌تا هه‌رێما كوردستانێ‌ ل به‌غدا دووڤچوونا پڕۆژه‌یێ‌ دروستكرنا جۆتسایدێ‌ رێیا به‌دریكێ‌ بۆ باعه‌درێ‌، دیسا په‌رله‌مانتارێن فراكسیۆنا پارتی ل په‌رله‌مانێ‌ ئیراقێ‌ ژی دووڤچوونا پڕۆژه‌ی دكر، د نوكه‌ دا ب گوژمێ‌ 39 ملیار دیناران و ب درێژاهیا 22 كیلۆمه‌تران ئه‌و پڕۆژه‌یه‌ هاته‌ راگه‌هاندن.

بڕیاره‌ پشتی قووناغا ته‌نده‌ریێ‌ و شرۆڤه‌كرنێ‌ پڕۆژه‌ ب كه‌ڤیته‌ د قووناغا ب جهئینانێ‌ دا.

وه‌كو دیار ل سه‌ر رێیا به‌دریكێ‌ بۆ باعه‌درێ‌ گه‌له‌ك روودانێن هاتنوچوونێ‌ یێن دلته‌زین روو ددان، ئه‌ڤه‌ ژی بوویه‌ ئه‌گه‌ر، كو لایه‌نێن په‌یوه‌ندیدار بزاڤان بكه‌ن بۆ دروستكرنا وێ‌ رێیێ‌.

هه‌ولێر، سولین سلێمان:

وه‌زاره‌تا خواندنا بلند و ڤه‌كۆلینێن زانستی یا حوكمه‌تا هه‌رێما كوردستانێ وه‌رگرتنا هزار و ٣٠٠ ده‌رچوویێن دی یێن پۆلا ١٢ ئاماده‌یی ل زانكۆ و په‌یمانگه‌هان راگه‌هاند.

د. خه‌تاب ئه‌حمه‌د، رێڤه‌به‌رێ گشتیێ خواندن و پلاندانان و دووڤچوونێ ل وه‌زاره‌تا خواندنا بلند و ڤه‌كۆلینێن زانستی بۆ رۆژاناما ئه‌ڤرۆ دیار كر، ئه‌و ده‌رچوویێن پۆلا ١٢ ئاماده‌یی، كو به‌ری نوكه‌ ئه‌نجامێن وان هاتبوونه‌ نڤیسین و هووربینی ل دۆر نمره‌ و ناڤێن وان هاته‌ كرن و ل زانكۆ و په‌یمانگه‌هێن هه‌رێما كوردستانێ هاتنه‌ وه‌رگرتن.

ناڤهاتی گۆت: “مه‌ داخواز ژ وان ده‌رچوویان كریه‌، د هه‌فتیا داهاتی دا په‌یوه‌ندیێ ب وان كۆلیژ و په‌یمانگه‌هان بكه‌ن، ئه‌وێن ناڤێ وان لێ‌ هاتیه‌ وه‌رگرتن”.

گۆتژی: “د ده‌مه‌كێ‌ نێزیك دا ناڤێ وان ده‌رچوویان ژی دێ راگه‌هینین ئه‌وێن ب شێوازێ فورما راسته‌وخوه‌ داخوازی پێشكه‌ش كرین، كو ل زانكۆ و په‌یمانگه‌هان بهێنه‌ وه‌رگرتن”.

د. خه‌تاب ئاشكرا ژی كر، ئه‌ڤ ساله‌ ٣٦ هزار و ٦٨٠ ده‌رچوویێن پۆلا 12 ئاماده‌یی ل زانكۆ و په‌یمانگه‌هان هاتینه‌ وه‌رگرتن.

ئه‌ڤرۆ، سالار محه‌مه‌د دۆسكی:

رێڤه‌به‌رێ ئاڤدێریێ ل پارێزگه‌ها دهۆك دیاركر، ژ به‌ر چه‌ند كێشه‌یه‌كان، پرۆژێ كێشانا ئاڤێ ژ رووبارێ دیجله‌ بۆ سكرێ‌ دهۆك هاتبوو راوستاندن، نوكه‌ ب پشته‌ڤانیا پارێزگه‌رێ دهۆك دووباره‌ دێ ده‌ست ب كێشانا ئاڤێ هێته‌كرن و دێ ره‌وشا ئاڤێ ل سكرێ‌ دهۆك گه‌له‌ك باشتر لێ هێت.

ئه‌ندازیار هێژا عه‌بدوالواحد سالح، رێڤه‌به‌رێ ئاڤدێریێ ل پارێزگه‌ها دهۆكێ بۆ رۆژناما ئه‌ڤرۆ گۆت: كارێ رێڤه‌به‌ریا مه‌ یێ سه‌ره‌كی ئه‌وه‌ دووڤچوون و چاڤدێری و پاراستنا ژێده‌رێن ئاڤێ ل سه‌ر ئه‌ردی بكه‌ین، وه‌ك رووبار و كانی و دیسا سكرێن ئاڤێ مه‌ هه‌نه‌ و بۆ ئومباركرنا ئاڤێ ژ 1000 چارگۆشا ده‌ست پێ دكه‌ت هه‌تا ملیون چار گۆشا.

زێده‌تر گۆت: دیسا جویێن ئاڤێ بۆ چاندنێ ل گوندان ب كونكریتی دهێنه‌ چێكرن و برگ هه‌نه‌ و ئاڤ دهێنه‌ ئومباركرن و مفا ژێ‌ بۆ چاندنێ دهێته‌ وه‌رگرتن، بیرێن سه‌ر ئه‌رد مه‌ هه‌نه‌ و كووراتی ژ 50 میتران زێده‌تر نه‌بیتن ده‌ستووردان ل ده‌ف مه‌ وه‌رگریت و پرۆژێن ستراتیجی مه‌ هه‌نه‌ بۆ كێشانا ئاڤێ ژ رووبارا بۆ بركێن مه‌زن و بهێته‌ بكارئینان بۆ چاندنێ.

هێژا ئه‌و ژی گۆت: هه‌ر سكره‌كێ بهێته‌ چێكرن، نه‌ ب تنێ مفا بۆ چاندنێ دهێـته‌ وه‌رگرتن، به‌لكو گه‌له‌ك جۆرێن مفای هه‌نه‌، ئاڤا ژێر عه‌رد دهێته‌ زێده‌كرن و دیسا بۆ ژینگه‌هێ و گه‌له‌ك جاران ئاژه‌لێن كیڤی ئاڤێ ژێ ڤه‌دخون، گه‌له‌ك جاران دبیته‌ جهه‌كێ گه‌شت و گوزاری و هه‌تا هنده‌ك سكر هه‌نه‌ ل ئێنشكێ جهێن گه‌شت و گوزاری ل ده‌ردوران دروست بووینه‌ و خه‌لك قه‌ست دكه‌نێ.

رێڤه‌به‌رێ ئاڤدێریێ ل پارێزگه‌ها دهۆك ئه‌و ژی گۆت: رێڤه‌به‌ریا ئاڤدێریێ ل دهۆكێ چار هوبه‌ هه‌نه‌ و زاخۆ بۆ ئیدارا سه‌ربه‌خۆ به‌لێ ئاكرێ و شێخان و ئامێدیێ هه‌نه‌ و مه‌ بزاڤكرینه‌ هوبه‌ ل سێمێل و به‌رده‌رش بهێنه‌ ڤه‌كرن، چونكه‌ هه‌ردوو ده‌ڤه‌ر ژ روویێ چاندنێ ڤه‌ گه‌له‌ك د به‌رفره‌هن و پێدڤیه‌ بهێنه‌ دروستكرن.

ل دور پرۆژێ كێشانا ئاڤێ ژ دیجله‌ بۆ سه‌ر سكرێ‌ دهۆكێ، رێڤه‌به‌رێ ئاڤدێریێ گۆت: ل ده‌سپێكێ وی پرۆژه‌ی دووماهی جار هنده‌ك كێشه‌ هه‌بوون و ب پشته‌ڤانیا پارێزگه‌رێ دهۆك مه‌ پێگوهورێ وان كێشا دیت كو ببه‌ینه‌ جهه‌كێ باشتر و كوژمه‌ك هاتیه‌ مه‌زاختن بۆ به‌لێنده‌ه‌ركی كه‌فتیه‌ و ل نێزیك دێ ده‌ست ب كاری هێته‌كرن و ئاڤ دێ ژ رووبارێ دیجله‌ بۆ سكرێ‌ دهۆكێ هێته‌ كێشان و ئه‌ڤ پرۆژه‌ سالێ دێ 15 ملیون سێ مه‌ترێن سێجا ل سه‌ر سكرێ‌ دهۆكێ زێده‌ كه‌ت.

ناڤبری گۆت ژی: سیسته‌مێ پێشتر، نه‌ ب تنێ ل عیراقێ، هه‌تا وه‌لاتێن جیران ژی ئه‌و سیسته‌مێ كێشانا ئاڤێ نه‌بوویه‌، نوكه‌ هه‌ر سیسته‌مێ به‌رێ هاته‌ بكارئینان و ل نێزیك دێ ده‌ست ب كاری هێته‌كرن.

رێڤه‌به‌رێ ئاڤدێریێ ل پارێزگه‌هێ ئه‌و ژی گۆت: ژ به‌ر هشكه‌سالیا ل جیهانێ ب گشتی په‌یدا بووی و ل ده‌ڤه‌را مه‌ ب تایبه‌ت كارتێكرن ل ده‌ڤه‌را مه‌ كریه‌، ئه‌و كانیێن ده‌ستێ‌ مه‌ گه‌هشتیێ سه‌رجه‌مێ 3048 و نێزیكی 798 كانیا هشك بووینه‌ و ئه‌ڤه‌ جهێ مه‌ترسی یه‌، ئه‌گه‌ر باران نه‌هێن، ره‌نگه‌ گه‌له‌كێن دی هشك بن و گه‌له‌ك كانیێن دی ژی هه‌نه‌ ل جهێن محره‌م ژ به‌ر كاودانێن ئێمناهیێ ده‌ستێ مه‌ نه‌گه‌هشتیێ و رووبار ژی ژێده‌رێن وان ژ وه‌لاتێ توركیا دهێنه‌ كوردستانێ. (خابیر، زیێ مه‌زن، دیجله‌) توركیا وه‌ك خۆ سه‌ره‌ده‌ریێ دكه‌ت ل دووڤ رێنما و یاسایێن ناف ده‌وله‌تی ناچن دڤێت عیراق بهێته‌ سه‌رخه‌ت.

ل دور كێشه‌ و ئاریشێن رێڤه‌به‌ریێ ژی ناڤبری گۆت: ل ڤان دو سالان دا و ب تایبه‌ت  كابینا نه‌هێ خزمه‌تێن مه‌زن ل ده‌ڤه‌رێ كرینه‌ و هنده‌ك پرۆژه‌ هاتینه‌ بجهئینان، هه‌تا نوكه‌ ژی هنده‌ك پرۆژه‌ وه‌ك سكرێن بچووك ل (گه‌لناسكێ، باكوزێ، باگێرا ) گه‌له‌ك گوندێن دی ژی دهێنه‌ چێكرن  و دو پرۆژه‌ ل قوناغا ته‌نداران دانه‌ و كومه‌كا دی یا بیرێن ل سه‌ر ئه‌رد دهێنه‌ چێكرن و (10) به‌نداڤێن بچووك ل نێزیك دێ‌ هێنه‌ راگه‌هاندن. ل ڤان سێ سالان كارێن باش هاتینه‌كرن، مه‌ به‌نداڤێن ئاخێ (57) هه‌نه‌ كو حوكمه‌تێ دروست كرینه‌ و پێشتر خه‌لكی بێی مه‌ دروستكرن و نوكه‌ نڤیساره‌ك ل هه‌می فه‌رمانگه‌ه و یه‌كێن كارگێری به‌لاڤ بوویه‌ كو نابیت خه‌لك بێی رازیبوونا مه‌ سكرا دروست بكه‌ت، چونكه‌ گه‌له‌ك جاران ئه‌و به‌نداڤ دبیته‌ مه‌ترسی بۆ سه‌ر ژیانا وه‌لاتیان و پشته‌ڤانیا خه‌لكی دكه‌ین ئاڤا ژێر ئه‌رد كوم بكه‌ت و نه‌ ئاڤا ژێر ئه‌رد.

ئه‌ڤرۆ، هه‌دار ره‌شید:

كه‌سكاتیێ‌ د ناڤبه‌را هه‌ردو جادێن بله‌ز و خزمه‌تكاری یێن ئیتیتێ‌ دا هاتیه‌ چاندن بۆ جوانیا داروباران و جوانكرنا جاددێ‌ یه‌، به‌لێ‌ ئه‌ڤ جهه‌ بۆ بهێنڤه‌دان و روونشتنا خه‌لكی مایه‌. به‌رپرسێ‌ راگه‌هاندنا باژێرڤانیێ‌ ژی دبێژیت: د پلانێ‌ دایه‌ پاركه‌ك لێ‌ بهێته‌ دروستكرن، دا كو خه‌لك بۆ بهێنڤه‌دانێن خوه‌ قه‌ستا جاددا نه‌كه‌ن.

وه‌لاتیه‌كی ب ناڤێ‌ هه‌رمان حه‌جی دیاركر، ل ئیتیتێ‌ چ پارك و جهێن بهێنڤه‌دانێ‌ یان گوهورینا سه‌قای نینن، ئه‌ڤ جهه‌ یێ‌ دووره‌ ژ دووكێل و بایێ‌ پیس و ڤی جهی سه‌قایه‌كی پاقژ هه‌یه‌، له‌ورا ئه‌و قه‌ستا ڤێ‌ جهی دكه‌ن و گوت: كه‌سكاتیێ‌ ئێتیتێ‌ زیانێن خۆ ژی هه‌نه‌، ب تایبه‌ت بۆ خێزانێن خودان زارۆ، ژ به‌ر كو هاتن و چوونا ترۆمبێلا گه‌له‌ك یا بله‌زه‌ و مه‌ترسی یا ل سه‌ر ژیانا زارۆیان هه‌ی.

ژنه‌كێ‌ به‌حس ل كه‌سكاتیێ‌ د ناڤبه‌را هه‌ردو جاددێن ئێتیتێ‌ دا كر و گوت: ژلایێ‌ سه‌قای ڤه‌ گه‌له‌كا خۆشه‌، به‌لێ‌ د هه‌مان ده‌م دا مه‌ترسیێن خوه‌ ژی هه‌نه‌ و روودانێن هاتنوچوونێ‌ گه‌له‌ك روودده‌ن.

ئێك ژ خودانێن كافیێن ئێتیتێ‌ گۆت: ئه‌ڤ كه‌سكاتیه‌ هاتیه‌ چاندن دا كو جادده‌ جوان بیت، لێ‌ خه‌لكێ‌ مه‌ كریه‌ جهێ‌ سه‌یرانان و بهێنڤه‌دانێن خۆ و جوانیێ‌ ناهێلین و گه‌له‌ك جاران به‌رمایكێن خو دهێلنه‌ ل وێرێ‌.

ئیسماعیل مسته‌فا، به‌رپرسێ‌ راگه‌هاندنا باژێرڤانیا دهۆكێ‌ دیار كر، پشتی ڤان چه‌ند سالێن دووماهیێ‌ ئه‌و جادده‌ چێبووی، خه‌لكێ‌ مه‌ گه‌له‌ك قه‌ستا جهێن ناڤه‌ندێن جاددا دكه‌ن و گۆت: تاخه‌كێ‌ ئاكنجیبوونێ‌ یه‌ و ترۆمبێل ل وێ‌ جادێ‌ گه‌له‌ك بله‌ز هاتن و چوونێ‌ دكه‌ن و گه‌له‌ك جاران ئه‌و داخواز ژ خه‌لكی دكه‌ن ل ڤان جهان نه‌روونن و گۆت: رێكخستنه‌كا باش ژلایێ‌ باژێرڤانیا دهۆكێ‌ ڤه‌ هاتیه‌ كرن بۆ جادا ناڤبری و د پلانێ‌ دایه‌ پاركه‌ك لێ‌ بهێته‌ دروستكرن، دا كو خه‌لك بۆ بهێنڤه‌دانێن خوه‌ قه‌ستا جاددا نه‌كه‌ن.