ئهڤرۆ، ههدار رهشید:
كێڤلا ئێكه ژ تاخێن پارێزگهها دهۆكێ كۆ بۆ دهمێ نێزیكی 10 سالانه ئهڤ تاخه یێ بێ خزمهتكاریێن دهستپیكی یه، وهلاتیێن ڤی تاخی ل سهر كیستێ خۆ كۆلانێن خۆ سهخبێر دكهن. دهربارهی ڤی بابهتی بۆچوونا وهلاتییان هاتیه وهرگرتن كا ئهگهر چنه و بۆچی ههتا نوكه ژلایێ خزمهتگۆزاریان ڤه چ بۆ تاخێ كێڤلا نههاتیه كرن و وان چ داخوازی ژ لایهنێن پهیوهندیدار ههنه.
ئافرهتهكا وی تاخی ل دۆر نهبوونا خزمهتكارییان ئاشكرا كر، ئهڤه نێزیكی 10 سالایه گازییا خوه دگههیننه لایهنێن پهیوهندیدار و كۆلانێن وان بهێنه سهخبێركرن، لێ ههتا نوكه چو نههاتیه كرن.
ئافرهتهكا دی یا تاخێ كێڤلا گۆت: چ خزمهتكاری ل تاخێ كێڤلا نینن و ل وهرزێ زڤستانێ گهلهك جاران ئهو زارۆیێن خوه فرێناكهنه قۆتابخانێ، ژبهر رێكێ ههمی دبیته تهقن و تهقن دهێته بهردهرگههێ وان كۆم دبیت و گوت ژی: ژبلی نهبوونا خزمهتكارییان ئاڤ ژی ل كێڤلا یا كێمه و ب شهڤێ دهێنه بهردان و ئهو دمیننه بێ ئاڤ.
ژلایهكی دی ڤه مامۆستایهكێ قوتابخانا كێڤلا ب ناڤێ هاریوان دبێژیت: وان ههمی كاودانێن حكومهتێ ل بهر چاڤ وهرگرتینه، لێ نزانن ههتا نوكه بۆچی چارهیهك ل حالێ وان نهكریه و گۆت: هندهك ژ خهلكێ ڤێ جادێ پاران كۆم دكهن و كۆلانێن خوه پێ سهخبیر دكهن، لێ ئهڤه نهچاره یه، ژ بهر كو ههمیان پێ چێنابێت ڤێ پارهی كۆم بكهن.
ناڤبری دیار ژی كر، جهێن پهیوهندیدار ب تنێ وان رازی دكهن و چ بۆ خهلكێ كێڤلا ناهێته كرن و خهلكێ ڤی تاخی بێزار بووینه ژ ڤێ ئاریشێ و وهرزێ زڤستانێ نێزیك بوو و ئهو نزانن كا دێ چارهیهك ل ئاریشا وان بیت یان نه.
ناڤبری دیار ژی كر، دو تهندهر هاتینه دانان لێ پارێ هاتیه تهرخانكرن بۆ ڤان تهندهران گهلهك یێ كێمه و بهلیندهر ب ڤی پارێ كێم كار ل سهر ناكهن.
داود، موختارێ گوندی كێڤلایه دبێژیت: چهندین ساله ئهو د ڤی حالی دا و ل گۆرهی یا پێدڤی كار بۆ وان ناهێته كرن و پارهكێ كێم هاتیه تهرخانكرن و ب وی كۆژمێ كێم چ چاره ل ئاریشا وان نابن، ههروهسا موختاری دوپات كر، تاخێ كێڤلا ب تنێ بیرهكا ئاڤێ لێ ههیه و پتری 800 مالان ب هیڤیا وێ بیرێ ڤهنه و وان داخواز یا ژ لایهنێن پهیوهندیدار كریه بیرهكا دی ژی بۆ وان دابین بكهن دا كو بشێن كارێن خوه پێ بكهن.
حهمید عبدولرهحمان، بهرپرسێ هۆبا تهكنیكی ل باژێرڤانیا تهناهیێ ئاشكرا كر، ژ سالا 2014ێ و ههتا نوكه چو پرۆژێن وهسا نههاتینه كو ئاریشا نههێلن و گۆت: كێڤلا ژی وهك ههر دهڤهرهكا وهكی دولبێ و حهوشكێ و جادێن وان ژی نهسهخبیركرینه، لێ پار نێزیكی كیلۆمهترهكێ جادێن وان هاتبوونه قێركرن و دیاركر، ئهڤ ساله ب كۆژمێ 700 ملیۆن دیناران دێ بۆ تاخێ كێڤلا یێ میتان هێن و د پلانێ دایه بهێنه چێكرن و كۆژمهی حكومهت دهسنیشان دكهت نهكۆ ئهڤ كۆژمه ل سالا 2022ێ هاتیه تهرخانكرن و ئهو كۆژمه ژی بۆ تاخێ كێڤلا هاتیه تهرخانكرن.
نيشاندان