ئه‌ڤرۆ،

كارگێریا یانا دهۆك یا وه‌رزشێ‌ بڕیاردا بۆ وه‌رزێ‌ نو یێ‌ خولا پلا نایابا ئیراقێ‌ سیسته‌مێ‌ كارپێكرنا پلێتێن چوونا ژوورا یاریگه‌هێ‌ و بوهایێ‌ ل سه‌ر چه‌ند ژ په‌لۆكێن یاریگه‌ها وان یا ته‌پا پێی و جهێن تایبه‌ت ڤی ئای پی و سوبه‌هی د یاریا ئێكێ‌ یا خولێ‌ دا ل گه‌ل یانا شورته‌ دێ‌ كارپێكه‌ن.

رێگر ئه‌حمه‌د ئه‌ندامێ‌ كارگیریا یانا دهۆك بۆ رۆژناما ئه‌ڤرۆ گۆت: ژبۆ رێكخستنا یاریگه‌هێ‌ و ل دووڤ سیسته‌مێ‌ جیهانی بڕیار هاتیه‌ دان چوونا هنده‌ك جهێن تایبه‌ت و ناڤ یاریگه‌هێ‌ ب پلێت بیت لێ‌ پرانیا جهێن دی یێن په‌لۆكا دێ‌ بێ‌ به‌رامبه‌ر بیت بتنێ‌ لایێ‌ vip ئه‌وا دێ‌ دناڤبه‌را 50 بۆ 150 هزار دیناران بیت و دیسان لایێ‌ چه‌پێ‌ یێ‌ ڤی ئای پی بتنێ‌ دێ‌ ب سێ‌ هزار دیناران بیت و یێ‌ راستی بۆ پشته‌ڤانێن تیما هه‌ڤڕك هێته‌ ته‌رخانكرن.

هه‌روه‌سان ناڤهاتی دیاركر مه‌ره‌ما سه‌ره‌كی ژ ڤێ‌ پێنگاڤێ‌ ئه‌وه‌ كو ئه‌ڤ پاره‌یێ‌ دهێته‌ وه‌رگرتن بۆ سه‌خبیركرن و پاقژكرنا یاریگه‌هێ‌ بیت و چاره‌كرنا هه‌ر كێماتیه‌كا د ناڤ یاریگه‌هێ‌ دا و گۆت: ژبۆ ئاسانكاریا هاتنا جه‌ماوه‌ری بۆ یانێ‌ دێ‌ هنده‌ك ترۆمبێلێن كوسته‌ر ل تاخێن جودا هێنه‌ دانان پێخه‌مه‌ت جه‌ماوه‌ر بێ‌ به‌هرنه‌بیت و پشته‌ڤانیا یانا خوه‌ بكه‌ت.

ئه‌ڤرۆ، قه‌یس وه‌یس

دهێته‌ چاڤه‌ڕێ‌ كرن ئه‌ڤرۆ وه‌رزێ‌ نوو یێ‌ خولا پلا نایابا ئیراقێ‌ یا ته‌پا پێی ب پشكداریا 19 یانا و ئه‌نجامدانا چار یاریان ژ گه‌ڕا ئێكێ‌ هێته‌ كرن ژ وانا چار یانێن هه‌رێما كوردستانێ‌ ئه‌و ژی، دهۆك، زاخۆ، هه‌ولێر و نه‌وروز ئه‌وێن سوبه‌هی دێ‌ یاریێن خوه‌ كه‌ن.

یاریێن ئه‌ڤرۆ بڤی شێوه‌یی دێ‌ هێنه‌ كرن، زه‌ورا- سیناعه‌، ته‌له‌به‌- ئه‌لقاسم، كاره‌با- نه‌فت ئه‌لوه‌سه‌ت، حدوود – چاڤه‌ڕێ‌ یه‌ هه‌كه‌ بڕیارا ئێكه‌تیا ئاسیا یا ته‌پا پێی رێك نه‌ دا یانا دیوانیه‌ پشكدار بیت.

سوبه‌هی یانێن كوردستانێ‌ دێ‌ بڤی ره‌نگی یاریێن خوه‌ كه‌ن، دهۆك ل ده‌مژمێر 7:30 شه‌ڤ مێڤانداریا قاره‌مانا وه‌رزێ‌ بوری یانا شورته‌ كه‌ت، زاخۆ ل به‌غدا بیته‌ مێڤانا كه‌رخ، هه‌ولێر ل باشۆرێ‌ ئیراقێ‌ بیته‌ مێڤانا كه‌ربه‌لا و نه‌وروز ب به‌سرا مێڤانا نه‌فت ئه‌لبه‌سرایه‌، هه‌روه‌سان جه‌ویه‌- نه‌جه‌ف، نه‌فت ئه‌لمیسان- نه‌فت.

ئه‌ڤرۆ،

تیما ڤۆلی بۆلا یانا سه‌نحاریب ل سه‌ر ئاستێ‌ كچان نوونه‌را پارێزگه‌ها دهۆكێ‌ گه‌شبینه‌ د ماوێ‌ دو حه‌فتیان دا ناسناڤه‌كێ‌ دی ل سه‌ر ئاستێ‌ ئیراقێ‌ ب ده‌ستخوه‌ڤه‌ بینت پشتی تیما وان یا باسكێت بۆلێ‌ ناسناڤێ‌ ئیراقێ‌ ئینایی.

ده‌ستپێكا هه‌ڤڕكیێن وان ل ئه‌ینیا بوری هه‌ڤڕكیێن قاره‌مانیا ئیراقێ‌ بۆ یاریا ڤۆلی بۆلێ‌ ل سه‌ر ئاستێ‌ كچان ل هۆلا گرتیا یانا سه‌نحاریب هاته‌ ئه‌نجامدان ئه‌وا تێدا حه‌فت یانه‌ پشكدارن و هاتینه‌ به‌لاڤكرن ل سه‌ر دو كۆمان ئه‌و ژی كۆما ئێكێ‌، سه‌نحاریب، ئه‌كاد، ئه‌مانه‌ و ئیسكان، كۆما دویێ‌ ئه‌ڤرۆدێت، قه‌ره‌قۆش و ئه‌رمه‌ن، یاریێن وان ب شێوه‌یێ‌ خول كۆمڤه‌بوون ژلایێ‌ ئێكه‌تیا ڤۆلی بۆلا ئیراقێ‌ دهێنه‌ ڕێڤه‌برن و قۆناغا دویێ‌ سیسته‌مێ‌ تیما ئێكێ‌ ل گه‌ل یا چارێ‌ و تیما ئێكێ‌ یا كۆما دویێ‌ ل گه‌ل خودانا رێزا دویێ‌ یا كۆما دویێ‌.

دیاریا ئێكێ‌ دا یانا سه‌نحاریب سه‌ركه‌فتن لسه‌ر یانه‌یا ئه‌مانه‌ ئینابوو ب سێ‌ كۆما بێ‌ به‌رامبه‌ر، 25-12-, 25-10 و 25-14 خالان، ئه‌ڤرۆ دێ‌ مێڤانداریا هه‌ڤڕكا خوه‌ ئه‌كاد كه‌ت.

ل دۆر ڤێ‌ یه‌كێ‌ داود ره‌به‌ن سه‌رۆكێ‌ یانا سه‌نحاریب بۆ رۆژناما ئه‌ڤرۆ گۆت: سه‌رباری ئاسته‌نگێن كه‌فتینه‌ د رێكا تیما مه‌ دا تایبه‌ت نه‌ گونجاندنا ده‌می ژبه‌ركو پرانیا یاریزانێن مه‌ به‌ری دو حه‌فتیان د هه‌ڤڕكیێن قاره‌مانیا باسكێت بۆلێ‌ دا بوون و شیابوون ناسناڤێ‌ ئیراقێ‌ ده‌ستڤه‌ بینن، لێ‌ هه‌موو یاریزانا و كادرێ‌ راهێنانێ‌ رژدیا خوه‌ دیاركرینه‌ كو ب هه‌موو شیانێن خوه‌ دێ‌ كاركه‌ن مفایی ژ ئه‌رد وجه‌ماوه‌رێ‌ خوه‌ وه‌ربگرن پێخه‌مه‌ت ناسناڤێ‌ دویێ‌ د ماوێ‌ دو حه‌فتیان دا ب ده‌ستڤه‌ بینن سه‌رباری ئه‌ركێ‌ وان ب سانه‌هی نابیت.

ئه‌ڤرۆ،

ل ئه‌ینیا بۆری هه‌ڤڕكیێن قاره‌مانیا ته‌پا مێزێ‌ ل سه‌ر ئاستێ‌ یانێن كوردستانێ‌ بۆ ژیێن جودا ل هۆلا گرتیا یانا دهۆك یا وه‌رزشی ب دووماهی هاتن ئه‌وا ژلایێ‌ ئێكه‌تیا ته‌پا مێزێ‌ یا هه‌رێمێ‌ بۆ كوڕان و كچان ب پشكداریا هه‌شت یانا هاتبوو كرن و ئه‌نجامێن یاریێن دووماهیێ‌ بڤی شێوه‌یی بوون.

ل سه‌ر ئاستێ‌ كچان بۆ پشكۆژان مریه‌م نینۆس ژ یانا ئه‌كاد رێزا ئێكێ‌، سارا بشار ژ یانا دهۆك رێزا دویێ‌، لامار مه‌جدی ژ ئه‌كاد رێزا سێیێ‌، بۆ تازه‌پێكه‌هشتیان ئانا دلاوه‌ر ژ ئاشتی رێزا ئێكێ‌ هات و هه‌ڤالا وێ‌ ئانا سه‌لام رێزا دویێ‌، رۆزان سۆران ژ ئه‌كاد، بۆ پێكه‌هشتیان بارین شاخۆان رێزا ئێكێ‌ و هه‌ڤالا وێ‌ شه‌ن به‌ختیار رێزا دویێ‌ هاتن، فاتما حاز ژ ئه‌كاد رێزا سێیێ‌.

ل سه‌ر ئاستێ‌ كوڕان بۆ گشت یانه‌یێن پشكدار، پشكۆژان، یانا ئاشتی رێزا ئێكێ‌، یانه‌یێن په‌یام و سلێمانی رێزێن دویێ‌ و سێیێ‌ هاتن، بۆ تازه‌پێگه‌هشتیان هه‌ولێر رێزا ئێكێ‌ و ئاشتی و دهۆك رێزێن دویێ‌ و سێیێ‌ ده‌ستڤه‌ ئینان، ل سه‌ر ئاستێ‌ پێگه‌هشتیان دهۆك رێزا ئێكێ‌، ده‌ربه‌ندیخان و ئاشتی رێزێن دویێ‌ و سێیێ‌ هاتن.

د داخویانیه‌كێ‌ دا ئێحسان حه‌سه‌ن زوبێر سه‌رۆكێ‌ ئێكه‌تیا ته‌پا مێزێ‌ یا كوردستانێ‌ بۆ رۆژناما ئه‌ڤرۆ گۆت: ب خۆشحالی ڤه‌ قاره‌مانیا هه‌رێمێ‌ ل سه‌ر ئاستێ‌ ژیێن بچووك ب شێوه‌كێ‌ رێكخستی و سه‌ركه‌فتیانه‌ ب ڕێڤه‌چوو، یا گرنگ دڤان هه‌ڤڕكیان دا دیاربوونا نڤشه‌كێ‌ نوو و به‌لگه‌ ژی رێزێن ئێكێ‌ ل سه‌ر پرانیا یانه‌یێن پشكدار به‌لاڤه‌بوون ئه‌ڤه‌ ژی دیار دكه‌ت كو ئاستێ‌ ته‌پا مێزێ‌ به‌ر پێشكه‌فتنێ‌ یه‌ و پاشه‌رۆژه‌كا گه‌ش به‌ر سینگێ‌ ڤێ‌ یاریێ‌ یه‌، بۆ داهاتی مه‌ كارێن باشتر ب پلانێن رێكخستی هه‌نه‌ كو ب پشته‌ڤانیا حوكمه‌تا هه‌رێما كوردستانێ‌ و لژنا ئۆلمپیا كوردستانێ‌ چه‌ند قاره‌مانیێن دی بهێنه‌ رێكخستن.

ئه‌ڤرۆ،

ستێرێ‌ نه‌رویجی و مانچسته‌ر ستی یا ئنگلێزی ئیرلینگ هالاند وه‌كو ئێك ژ یاریزانێن خودان شیان ل سه‌ر ئاستێ‌ جیهانێ‌ هاتیه‌ نیاسین كو شیایه‌ چه‌ندین نمرێن پیڤایی ل سه‌ر ئاستێ‌ ته‌پا پێی بشكێنت و هه‌تا نوكه‌ وه‌كو بچووكترین و له‌زترین یاریزان شیایه‌ 25 گۆلان د 20 یاریان دا تۆماربكه‌ت و چاڤه‌ڕێ‌َ به‌رده‌وامیا شكاندنێ‌ یه‌ و پله‌داریا نمرێن جیهانێ‌ كه‌ت.

ل دووڤ راپۆرتا رۆژناما the sun یا بریتانی دیاركر هالاندێ‌ یێ‌ 22 سالی شیانێن هه‌ین 10 نمرێن دی یێن نوو بشكێنیت و بڤی ره‌نگی.

ئێك: د خولا پرێمه‌رلیگ دا هالاند د شێت نمرا پیڤایی یا گۆلكه‌رێ‌ خولێ‌ بشكێنیت ئه‌وا ل سه‌ر ناڤێ‌ ئاندی كۆل و ئالان شێرار ئه‌وێن ل وه‌رزێ‌ 1993-1994 پێكڤه‌ 34 گۆل تۆماركرین، نوكه‌ هالاند 14 گۆل هه‌نه‌ و 20 یاری ماینه‌.

دو: یاریزانێ‌ مسری و لیڤه‌رپۆل محه‌مه‌د سه‌له‌ح خودانێ‌ زووترین گۆلان د ئێك وه‌رزدا یه‌ پشتی سیسته‌مێ‌ پرێمه‌رلیگ هاتیه‌ گۆهوڕین بۆ ئێك قۆناغ كو ل وه‌رزێ‌ 2017-2018ێ‌ شیابوو 32 گۆلان تۆماربكه‌ت، هالاندی شیایه‌14 گۆلان ژ نه‌ه یاریان تۆماربكه‌ت.

سێ‌: ئیرلینگ هالاند چاڤه‌ڕێ‌ یه‌ نمرا پیڤایی یا ستێرێ‌ ئه‌رجه‌نتینی و یانا پاریس سانجێرمان لیۆنێل مێسی بشكێنیت ئه‌وێ‌ شیایی 50 گۆلا د خولا ئسپانیا دا بینت د وه‌رزێ‌ 2011-2012دا ، ل سه‌ر ئاستێ‌ نوكه‌ یێ‌ هالاندی ئه‌وی شیانێن هه‌ین بشكێنیت.

چار: چو یاریزان نه‌ شیاینه‌ د خولا ئنگلته‌رایێ‌ دا خه‌لاتێ‌ پێلاڤا زێری بۆ یاریزانێ‌ گۆلكه‌ر هه‌موو یاریان دا ب شێوێ‌ رێژه‌یی، سه‌رباری هێرشبه‌رێ‌ تۆتنهام هاری كین شیایه‌ د 30 یاریان دا 29 گۆلان د وه‌رزێ‌ 2016-2017 دا تۆماربكه‌ت.

پێنچ: یاریزانێ‌ مان ستی تۆمی جۆنسۆن نمرا پیڤایی بۆ یانا خوه‌ ب تۆماركرنا گۆلان شكاندیه‌ كو چو یاریزانا نه‌ گه‌هشتینه‌ وێ‌ رێژێ‌ ئه‌وژی 38 گۆل بوون.

شه‌ش: ستێرێ‌ پۆرتۆگالی و یانه‌یا مان یۆنایتد كرێستیانۆ رۆنالدۆ هژماره‌كا مه‌زن یا گۆلان د چامپیۆنز لیگ دا ئیناینه‌ ئه‌وژی 17 گۆل، ژوانا 11 ل گه‌ل ریال مه‌درید بوون، هالاندی شیانێن هه‌ین ڤێ‌ نمرێ‌ بشكێنیت ئه‌وێ‌ هه‌تا نوكه‌ ژ سێ‌ یاریان سێ‌ گۆل تۆماركرینه‌.

حه‌فت: د ئێك هه‌یڤ دا ستێرێ‌ ئۆرۆگوایی لویس سۆارێز شیابوو ل گه‌ل لیڤه‌رپۆل 10 گۆلان تۆماربكه‌ت ل كانوونا ئێكێ‌ یا 2013ێ‌، هه‌رچه‌نده‌ هالاندی ل هه‌یڤا بوری شیابوو نه‌ه گۆلان بینت لێ‌ بۆ هه‌یڤێن بهێت شیانێن هه‌ین زێده‌تر گۆلان تۆماربكه‌ت.

هه‌شت: ستێرێ‌ لێسته‌ر ستی جێمی فاردی شیایه‌ د 11 یاریان ل دووڤ ئێك دا به‌رده‌وام گۆلان ل وه‌رزێ‌ 2015-2016ێ‌ تۆماربكه‌ت كو یانه‌یا وان شیابوو ناسناڤێ‌ پرێمه‌رلیگ ده‌ستڤه‌ ئینایی، هه‌رچه‌نده‌ د نوكه‌ هالاند د شه‌ش یاریێن دووڤ ئێك دا 14 گۆل تۆماركرینه‌ و ده‌لیڤه‌ به‌ر ده‌ست یا هه‌یی.

نه‌هـ: ستێرێ‌ به‌رێ‌ یێ‌ پلاكبێرن ئالان شێرار ل وه‌رزێ‌ 1995-1996 شیابوو هاتریكێ‌ د پێنچ هه‌لكه‌فتان ل گه‌ل تیما خوه‌ و ل ئێك وه‌رز د خولا نایابا ئنگلته‌رایێ‌ دا بینت، ئه‌ڤ نمره‌ دوور نینه‌ هالاند بشكێنیت ئه‌وێ‌ هه‌تا نوكه‌ سێ‌ هاتریك د ماوێ‌ نه‌هـ یاریان دا بینت.

ده‌هـ: ستێرێ‌ به‌رێ‌ یێ‌ ریال مه‌درید و مان یۆنایتد ڤان نێستلرۆی شیابوو دو نمرێن دیرۆكی د چامپیۆنزێ‌ دا بینت، یا ئێكێ‌ 30 گۆل د 34 یاریان دا، یا دویێ‌ 35 گۆل د 42 یاریان دا هالاند پێدڤی تنێ‌ شه‌ش گۆلان هه‌یه‌ هه‌تا بگه‌هیته‌ ڤێ‌ نمرێ‌،  پسیار ئه‌وه‌ ئه‌رێ‌ ستێرێ‌ نه‌رویجی دێ‌ شێت پله‌داریا نمرێن جیهانێ‌ كه‌ت!