سێمێل، دلڤین ره‌شید:

ئه‌گه‌رێن خه‌مۆكیێ‌ لده‌ف ئافره‌تێ‌ ڤه‌دگه‌رن بۆ وان گوهۆرینێن هورمۆنان ئه‌وێن لده‌ف دروست دبن، هه‌روه‌سا گوهورینێن ژیانێ‌ و دروستبونا بارودۆخێ‌ پری سترێس و ئالوزی و شێوازێ‌ ژیانێ‌ و فشارێن جفاكی كارتێكرنه‌كا راسته‌وخۆ ل سه‌ر ئافره‌تێ‌ هه‌یه‌.

به‌شار ئه‌حمه‌د بسپورێ‌ ده‌روونی بۆ رۆژناما ئه‌ڤرۆ دیاركر، خه‌مۆكی ئێكه‌ ژ نه‌خۆشیێن دیار یێن ده‌روونی، ئاریشه‌كا ده‌روونی یا به‌ربه‌لاڤه‌ كو كارتێكرنێن نه‌رێنی ل سه‌ر هه‌ست و هزر و ره‌فتارێن كه‌سێن توشبویی هه‌یه‌ و گۆت: (خه‌مۆكی وه‌ك حاله‌ته‌كێ‌ بێ‌ هه‌ست دهێته‌ پێناسه‌ كرن به‌رامبه‌ر هه‌ر روودانه‌كێ‌، ل پتریا ده‌می دێ‌ بینی كه‌سێ‌ خه‌مۆكی هه‌ی هه‌ست ب وان روودانان ناكه‌ت، یێن ل ده‌وروبه‌ر و ژینگه‌ها وی دا رووده‌ن).

بسپورێ‌ ده‌روونی گوتژی: (له‌ورا ئه‌م دبێژین خه‌مۆكی زێده‌تر دیارده‌كا ده‌روونیه‌، نه‌ك نه‌خۆشیه‌كا جه‌سته‌یی یه‌، به‌لێ‌ دڤێت وێ‌ چه‌ندێ‌ ژی بزانینن هنده‌ك نه‌خۆشیێن جودا ژی كارتێكرنا خوه‌ ل سه‌ر دروستبونا خه‌مۆكیێ‌ هه‌یه‌).

به‌شار ئه‌حمه‌د ئه‌گه‌رێن خه‌مۆكیا لده‌ف ئافره‌تێ‌ دزڤرینیت بۆ وان گوهۆرینێن د هورمۆنێن ئافره‌تێ‌ دا دروست دبن، گوهرینێن ژیانێ‌ و دروستبونا بارودۆخێ‌ پری سترێس و ئالوزی و شێوازێ‌ ژیانێ‌ و فشارێن جفاكی كارتێكرنه‌كا راسته‌وخۆ ل سه‌ر ئافره‌تێ‌ هه‌نه‌ و گۆت: (گه‌له‌ك جاران خه‌مۆكی دگه‌هیته‌ وی راده‌ی ئافره‌ت هزر د خوكوشتنێ‌ دا بكه‌ت، به‌لێ‌ حاله‌تێ‌ ده‌روونی یێ‌ هه‌ر ئافره‌ته‌كێ‌ ژ یا دی یێ‌ جودایه‌).

بسپورێ‌ ده‌روونی د به‌رده‌وامیا ئاخفتنێن خوه‌دا گۆت: (خه‌موكی ب خوه‌ ژی چه‌ند جوره‌ك هه‌نه‌ خه‌مۆكیا سڤك و یا مامناوه‌ند و یا گران، ل ڤێره‌ ئافره‌ت پتر ژ زه‌لامی تووشی حاله‌تێ‌ خه‌مۆكیێ‌ دبیت، ژبه‌ركو پێكهاتێن له‌شێ‌ ئافره‌تێ‌ د جوانه‌، ل گۆره‌ی ڤه‌كۆلینێن زانستی ئه‌و ئافره‌تێن ئێكه‌م جار زارۆك دبیت 85% پشتی زارۆك بونێ‌ خه‌مۆكی بۆ وان په‌یدا دبیت).

به‌شار ئه‌و چه‌نده‌ ژی دیار كر كو، خه‌مۆكیێ‌ ژی چه‌ندین نیشان هه‌نه‌ ژ وانا ژی هه‌ستێ‌ خه‌مگینی و گریا بێ‌ ئه‌گه‌ر و هه‌ستكرن ب ڤالاتیه‌كا  گیانی و بێ‌ ئومێد بوون ژ هه‌ر تشته‌كی د ژیانێ‌ دا، هه‌روه‌سا حه‌زا ئاخفتنێ‌ نامینیت و تێكه‌لیا ده‌وروبه‌رێن خوه‌ ناكه‌ت و به‌رده‌وام یێ‌ توره‌یه‌ ئه‌ڤ جوره‌ مرۆڤه‌ به‌رده‌وام هه‌ست ب ماندووبونێ‌ دكه‌ن و خه‌وه‌كا نه‌ جێگیر هه‌یه‌.

د ئاخفتنێن خوه‌ یێن دووماهیێ‌ دا گۆت: (پێدڤیه‌ كه‌سانێن خه‌مۆكی هه‌ی چاره‌سه‌ریێن دروست وه‌ربگرن ژ بۆ هندێ‌ بشێت ژیانه‌كا ساخله‌م بۆ خوه‌ دروست بكه‌ت و رێكێ‌ ل نه‌خوشیا خه‌مۆكیێ‌ بگرن، هه‌كه‌ نیشانێن نه‌خوشیا ده‌روونی هه‌بیت، پێدڤیه‌ سه‌ره‌دانا پزیشكێن ده‌روونی بكه‌ت، داكو بشێت چاره‌سه‌ریا خوه‌ وه‌ربگریت ل گوره‌ی رێنماێن بسپورێن ده‌روونی).

هه‌ولێر، قائید میرۆ
شاره‌زایه‌كێ هه‌ڤژینیا میسیار پڕۆژه‌یه‌ك بۆ قانوونی كرنا هه‌ڤژینیا میسیار پێشكه‌شی په‌رله‌مانێ كوردستانێ كریه‌ و دبێژیت، زۆربه‌یا وه‌لاتی و به‌رپرسێن هه‌رێما كوردستانێ ده‌مێ سه‌ره‌دانا ده‌رڤه‌ دكه‌ن هه‌ڤژینیا میسیار پێك دئینن هه‌روه‌سا ئاماژه‌كر، هه‌شت ملیۆن بێژنك ل عێراق و هه‌رێما كوردستانێ هه‌نه‌ و پێدڤیه‌ هه‌ڤژینیا هه‌بیت بۆ بێژنك و كچێن قه‌یره‌.
شێخ ئاریان به‌رزنجی، شاره‌زا ل زهه‌ڤژینیا میسیار بۆ رۆژناما ئه‌ڤرۆ دیاركر” هه‌ر جڤاكه‌كێ به‌ره‌ف پێشڤه‌بچیت و به‌ره‌ف ڤه‌كرنێ بچیت و ره‌وشا ئابوری گۆهۆرین بسه‌ردا هاتن و به‌ره‌ف باشتر بچیت، هه‌روه‌سا ژن تێدا زێده‌تر كارا ببیت و رێژا ته‌لاقێ به‌ره‌ف زێده‌بوونێ بچیت و هژمارا قه‌یره‌یان زێده‌ببیت و هه‌ڤسه‌نگی ناڤبه‌را ره‌گه‌زێ نێر و مێ نه‌ما، ئۆتۆماتیكیه‌ن زه‌واجا میسیار زێده‌ دبیت، واته‌ هه‌ڤژینیا میسیار بۆ سه‌رده‌مێ نوكه‌یێ جڤاكا هه‌رێما كوردستانێ پێدڤیه‌، ژلایێ ئاینی ژی جڤاتا بلندا فیقها ئیسلامی ل سالا 2006ێ بڕیاردایه‌ هه‌ڤژینیا میسیار ئاریشه‌ لسه‌ر نینه‌، به‌لێ هژماره‌كا زۆرا خه‌لكی ب شاشی ل هه‌ڤژینیا میسیار گه‌هشتینه‌، هه‌ر كه‌سه‌و بشێوه‌یه‌كی ل شێوازێ هه‌ڤژینیا میسیار گه‌هشتیه‌، به‌لێ ئه‌گه‌ر بهێت و بچینه‌ سه‌ر راستیا هه‌ڤژینیا میسیار چو ئاریشه‌ تێدا نینه‌، هه‌موو پیڤه‌رێن هه‌ڤژینیه‌كا ئاسایی تێدا هه‌نه‌ تنێ ژن دێ ده‌ستا ل هنده‌ك مافێن خوه‌ به‌رده‌ت و تشته‌كێ خراپ نینه‌ و ئه‌ز باوه‌رم دژایه‌تیا ئه‌ڤێ هه‌ڤژینیێ دژایه‌تیا مافێ مرۆڤیه‌، ژبه‌ر لێرپرسینێن قانوونی كه‌س ب ئاشكرا پرۆسا هه‌ڤژینیا میسیار پێك نائینیت، چونكه‌ دێ پێڕابوونێن قانوونی بۆ هه‌بن، ئه‌ڤه‌ژی بویه‌ ئه‌گه‌ر ئامار دیار نه‌بن هه‌تا نوكه‌ چه‌ند كه‌سان هه‌ڤژینیا میسیار ئه‌نجامدایه‌.
ئه‌ڤی شاره‌زایێ هه‌ڤژینیا میسیار گۆت” بێگومان هژماره‌كا زۆرا وه‌لاتیێن هه‌رێما كوردستانێ ل هه‌ردو ره‌گه‌زان چووینه‌ ناڤا هه‌ڤژینیا میسیار، به‌لێ هه‌تا نوكه‌ ده‌رڤه‌ی قانوونێ یه‌و گرێبه‌ستێن فه‌رمی بۆ نه‌هاتینه‌كرن، ئه‌گه‌ر ئه‌و دو هه‌ڤژین بچنه‌ دادگه‌هێ ژی بۆ گرێبه‌ستا قانوونی نابێژن جورێ هه‌ڤژینیێ میسیار ئه‌ڤه‌ژی بۆ خوه‌ پاراستنێ ل سزایێن قانوونی، بتایبه‌تی ژی زۆربه‌یا زه‌لامێن هه‌ڤژینیا میسیار پێك دئینن هه‌ڤژین هه‌نه‌، له‌وڕاژی دیار نینه‌ هه‌یڤانه‌ یان سالانه‌ چه‌ند گرێبه‌ست دهێنه‌ ئه‌نجامدان، به‌لێ ئه‌گه‌ر دچوارچوڤێ قانوونێ جهێ هه‌ڤژینیا میسیار بهێته‌ ڤه‌كرن دێ دیار بیت خه‌لك یێ به‌رهه‌ڤه‌ بۆ ئه‌نجامدانا ئه‌ڤی جورێ هه‌ڤژینیێ، ل سالا 2007 ێ من پڕۆژه‌یه‌ك پێشكه‌شی په‌رله‌مانێ كوردستانێ كریه‌، جاره‌كادی سالا 2019ێ من ئه‌و پڕۆژه‌ دوباره‌ بریه‌ په‌رله‌مانی هه‌موو په‌رله‌مانتار دبێژن ئه‌م دگه‌لداینه‌ و ب فه‌رمی ژی كه‌س نه‌شێت پشته‌ڤانیا پڕۆژێ هه‌ڤژینیا میسیار بكه‌ت ژبه‌ر لایه‌نێن سیاسی و جڤاكی.
شێخ ئاریان به‌رزنجی ئاماژه‌كر” ڤێ دوماهیێ رێژا ئه‌نجامدانا هه‌ڤژینیا میسیار زێده‌كریه‌، ئه‌گه‌رێ سه‌ره‌كی ژی بۆ هه‌بوونا رێژه‌یه‌كا زۆرا كچ و ژنان ڤه‌دگه‌ڕیت بۆ نموونه‌ ل عێراق و هه‌رێما كوردستانێ هه‌شت ملیۆن بێژنك هه‌نه‌ ئه‌ڤه‌ ژبلی كچێن قه‌یره‌ و ژنێن هاتینه‌ به‌ردان، ئه‌ڤه‌ هه‌موو ئه‌گه‌رن ئه‌و ژن و كچه‌ نه‌چارن هه‌ڤژینیا میسیار ئه‌نجامبده‌ن، بابه‌تێ هه‌ڤژینیا میسیار تنێ هاتیه‌ كورت كرن ل بابه‌تێن سێكسی، به‌رۆڤاژی سێكس و حه‌زێن زه‌لاما تنێ پشكه‌كن ل هه‌ڤژینیا میسیار، بتایبه‌تی زۆربه‌یا كچ و ژنێن دچنه‌ ناڤا هه‌ڤژینیا میسیار نابنه‌ خوه‌دی زارۆك، چونكه‌ ده‌مێ كچ گه‌هشته‌ 40 سالیێ زۆر زه‌حمه‌ته‌ زارۆك هه‌بن، راسته‌ خه‌لكه‌ك دبێژن هه‌ڤژینیا میسیار دگه‌ل جڤاكێ كوردی ناگونجیت، به‌رۆڤاژی بابه‌ت گونجان و نه‌گونجان نینه‌ ئه‌ڤه‌ بوویه‌ پێدڤی بۆ جڤاكێ كوردستانێ، سه‌دان سه‌نته‌رێن مه‌ساجێ و نادی كلاپ هه‌نه‌ ئه‌ڤه‌ژی دگه‌ل جڤاكی ناگونجن و هه‌نه‌ژی، زۆربه‌یێ زه‌لامێن هه‌رێما كوردستانێ ده‌مێ دچنه‌ ده‌رڤه‌ هه‌ڤژینیا میسیار ئه‌نجامدده‌ن و تنێ هژماره‌كا كێك نه‌بیت، هه‌تا به‌رپرسێن بلندژی تێدا هه‌نه‌.