ئه‌ڤرۆ، نه‌وزاد هلۆری:

رێڤه‌به‌ریا گشتی یا وه‌به‌رهێنانێ ل پارێزگه‌ها دهۆكێ دیار كر، پشتی وان ڤاڤارتن بۆ ناڤێن وان كه‌سان كرین، یێن فۆرم بۆ ده‌لیڤێن كاری و دامه‌زراندنێ پڕكرین، د نوكه‌ دا 145 كه‌س ژ وان هاتنه‌ راگه‌هاندن و 26 ژ وان ب گرێبه‌ست دێ هێنه‌ دامه‌زراندن.

قاسم عه‌بدولعه‌زیز، رێڤه‌به‌رێ یاسایی و كارگێڕی ل رێڤه‌به‌ریا گشتی یا وه‌به‌رهێنانێ ل پارێزگه‌ها دهۆكێ بۆ ئه‌ڤرۆ گوت: (ئه‌م وه‌كو رێڤه‌به‌ریا گشتی یا وه‌به‌رهێنانێ‌ ل دهۆكێ‌ ئاگه‌هداریا هه‌موو وان وه‌لاتیان دكه‌ین، یێن به‌ری نوكه‌ داخوازا دامه‌زراندنێ‌ ل رێڤه‌به‌ریا مه‌ كری و فۆرم ب رێكا ئۆنلاین پڕ كرین، پشتی ڤاڤارتن و هه‌لسه‌نگاندن بۆ هاتینه‌ كرن، 145 ژ وان كه‌سان ل دووڤ خالبه‌ندیێ‌ هاتینه‌ ده‌ستنیشانكرن و ل دویڤ بلندترین خال 26 ژ وان ب شێوه‌یێ‌ گرێبه‌ست دێ هێنه‌ دامه‌زراندن”.

زێده‌تر گوت: (ئه‌وێن ناڤێن وان هاتین پێدڤی یه‌ هه‌ر ژ ئه‌ڤرۆ 23/8/2022 هه‌تا 8/9/20200 هه‌موو به‌راهیك و به‌لگه‌نامه‌یێن خوه‌ ل گۆڕه‌ی فۆرما پڕكری ره‌سه‌ن و كۆپیا ره‌نگین د ناڤ فایله‌كێ دا ل ده‌مژمێر 11:00 هه‌تا 2:00 نیڤرۆ بینن و سه‌ره‌دانا لژنا تایبه‌ت ل رێڤه‌به‌ریا مه‌ بكه‌ن، ده‌مێن چاڤپێكه‌فتنێ ل رێكه‌فتی 11/9/2022 هه‌تا 15/9/2022 ل ده‌مژمێر 11:00 هه‌تا 2:00 دێ هێنه‌ ئه‌نجامدان، هه‌ر كه‌سه‌كێ د ده‌م و رێكه‌فتێن دیاركری دا سه‌ره‌دانا رێڤه‌به‌ریا مه‌ نه‌كه‌ت ماف نامینیت، دیسان هه‌ر كه‌سێ پێزانینێن فۆرمێ و به‌لگه‌نامه‌یێن وی یێن فه‌رمی وه‌كو ئێك نه‌بن، فورما وی دێ پووچ بیت و ماف نامینیت”.

دیاركر ژی كو هه‌ر كه‌سه‌كێ نه‌رازی بیت و خوه‌ ب خودان ماف بزانیت پێدڤیه‌ د ده‌م و رێكه‌فتێن دیاركری دا ب فه‌رمی نه‌رازیبوونا خوه‌ پێشكێشی رێڤه‌به‌ریا گشتی بكه‌ت و گۆت: “25 هزار و 502 كه‌سان پێشكێشی هه‌شت بسپۆریێن جودا كربوون و 145 كه‌س هاتینه‌ هه‌لبژارتن بۆ چاڤپێكه‌فتنێ كو دێ 26 ژ وان وه‌ك فه‌رمانبه‌رێن گرێبه‌ست هێنه‌ دامه‌زراندن”.

ئامێدیێ، مه‌حمود نهێلی:

ده‌ڤــــه‌ردارێ ئامێدیێ دوهی 22/8/2022 سه‌رپه‌رشتیا كۆمبوونه‌كا تایبه‌ت ل دۆر یه‌كه‌یێن ئاكنجیبوونێ یێن كێم ده‌رامه‌تان ب به‌رهه‌ڤبوونا رێڤه‌به‌رێن ناوچه‌داری و سه‌رۆكێن باژێرڤانیان و رێڤه‌به‌رێن دام و ده‌زگه‌هێـــــن په‌یوه‌ندیدار كر و رێڤه‌به‌ریێن په‌یوه‌ندیدار هاتنه‌ راسپاردن، كو جهێ یه‌كه‌یێن ئاكنجیبوونێ یێن كێم ده‌رامه‌تان ل نێزیك جهێ خزمه‌تگوزاریان ده‌ستنیشان بكه‌ن.

وارشین سه‌لمان، ده‌ڤه‌ردارێ ئامێدیێ بۆ رۆژناما ئه‌ڤرۆ دیار كر، ب مه‌ره‌ما بجهئینانا بڕیارا حوكمه‌تا هه‌رێما كوردستانێ‌ بۆ چێكرنا یه‌كه‌یێن ئاكنجیبوونێ یێن كێم ده‌رامه‌تان ئه‌ڤ كۆمبوونه‌ هاتیه‌ ئه‌نجامدان و گۆت: “مه‌ به‌حس ل بــــڕیـــارا حكومه‌تا هه‌رێما كوردستانێ ل دۆر یه‌كه‌یێن ئاكنجیبوونێ یێن كێم ده‌رامه‌تان كر و رێڤه‌به‌ریێن په‌یوه‌ندیدار راسپاردن جهێ ئاڤاكرنا وان ل سه‌نته‌رێ ده‌ڤه‌رداریێ و سنوورێ ناوچه‌داریان ل نێزیك جهێ خزمه‌تگوزاری ده‌ستنیشان بكه‌ن”.

ئه‌ڤرۆ:

د. عه‌لی ته‌ته‌ر، پارێزگارێ دهۆكێ دوهی 22/8/2022 پێشوازی ل خانم ”ئامینا زێوه‌ی” ده‌یكا چار شه‌هیدان و خێزانا شه‌هیدی و خووشكا دو شه‌هیدان كر و د هه‌ڤدیتنه‌كێ دا پارێزگارێ دهۆكێ گوهداریا گۆتنێن ده‌یكا ئامینا كر و راگه‌هاند: ئه‌ڤ گۆتن و خوه‌راگریا ته‌ مۆرالێ دده‌ته‌ مه‌ هه‌میان.

ده‌یكا ئامینا زێوه‌ی سۆپاسیا پێشوازیا پارێزگارێ دهۆكێ كر و راگه‌هاند: ئازادی و ئارامیا ئه‌ڤرۆ یا كوردستانێ بۆ من ب هه‌می دنیایێ دئینیت، راسته‌ حه‌فت كه‌س ژ مالا من شه‌هید بووینه‌، لێ هوین هه‌می كور و كه‌سوكارێن منن.

هه‌ولێر، قائید میرۆ

ل هه‌رێما كوردستانێ چه‌ندین مولكێن وه‌قفێ هه‌نه‌ و ب مولك یان مالێ مزگه‌فتێ دهێته‌ نیاسین، به‌لێ ل هنده‌ك ده‌ڤه‌ران وه‌ك پێدڤی مولكێن ئه‌وقافێ ناهێنه‌ رێڤه‌برن و بڕیارده‌رێ لیژنا ئه‌وقاف و كارۆبارێن ئاینی ل په‌رله‌مانێ كوردستانێ ئاشكراكر، وه‌زاره‌تێ‌ ده‌ست ب رێكارێن قانوونی ل دژی وان كه‌سێن زێده‌گاڤی كریه‌ سه‌ر مولكێ ئه‌وقافێ كریه‌.

وه‌یسی سه‌عید، بڕیارده‌رێ لیژنا ئه‌وقافێ بۆ رۆژناما ئه‌ڤرۆ دیار كر “ل هه‌رێما كوردستانێ چه‌ندین مولكێن وه‌قفێ هه‌نه‌ و ژلایێ وه‌زاره‌تا ئه‌وقاف و كارۆبارێن ئاینی دهێنه‌ رێڤه‌برن، نوكه‌ وه‌زاره‌ت مژوولی رێكخستنا مولكێن وه‌قفێ یه‌ ب شێوازه‌كی بهێنه‌ پاراستن و زێده‌گاڤیان بهێنه‌ پاراستن، پێنگاڤێن باش هاتینه‌ هاڤێتن بۆ پاراستن و رێكخستنا مولكێن ئه‌وقافێ و چاڤه‌ڕێ دكه‌ین وه‌زاره‌تا ئه‌وقافێ ب راپۆرته‌كێ په‌رله‌مانێ كوردستانێ ئاگه‌هدار بكه‌ت ل رێكخستنا مولكێن وه‌قفێ، هه‌موو مولكێن سه‌ر ب وه‌زاره‌تا ئه‌وقافێ دێ هێنه‌ تۆماركرن و ئه‌لكترۆنی كرن.

زێده‌تر گۆت: لیژنا ئه‌وقافێ دووڤچوون بۆ مولكێن وه‌قفێ كریه‌ و پشته‌ڤانیا هه‌ر پێنگاڤه‌كا وه‌زاره‌تێ دكه‌ت بۆ پاراستنا مولكێن وه‌قفێ، نابیت مولكێن وه‌قفێ بۆ خودانی بمینن، وه‌زاره‌تێ ده‌ست ب رێكارێن قانوونی كریه‌ هه‌مبه‌ری هه‌موو وان كه‌سێن زێده‌گاڤی كرینه‌ سه‌ر مولكێن ئه‌وقافێ.

وه‌یسی سه‌عید ئاماژه‌كر” پڕۆژه‌ قانوونا رێڤه‌برنا ئه‌وقافێ یا هژمار 64 یا سالا 1966ێ ئاراسته‌ی په‌رله‌مانێ كوردستانێ هاتیه‌كرن و خواندنا ئێكێ ژی بۆ هاتیه‌كرن، به‌لێ لیژنا ئه‌وقافێ ل په‌رله‌مانی داخواز ل وه‌زاره‌تا ئه‌وقاف و كارۆبارێن ئاینی كر ب شێوه‌یه‌كێ فه‌رمی بۆچوونا ئه‌نجوومه‌نی بلندێ فتوایێ وه‌ربگریت ل دۆر رێڤه‌برنا مولكێن ئه‌وقافێ و زێده‌كرنا پشكا داهاتێ ئه‌وقافێ ل ئه‌ڤی داهاتی كریا مولكێ ئه‌وقافێ دهێته‌ مه‌زاختن بۆ وه‌زاره‌تێ، هه‌تا نوكه‌ ب تنێ به‌هرا ئه‌وقافێ ل بكار ئینانا داهاتی مولكێ وه‌قفێ 10% بوویه‌، به‌لێ نوكه‌ داخوازكریه‌ پشكا ئه‌وقافێ بهێته‌ زێده‌كرن بۆ 30%ێ ئه‌وژی هه‌مبه‌ر سه‌رپه‌رشتی و رێڤه‌برنا ئه‌ڤان مولكێن وه‌قفێ، ئه‌نجوومه‌نێ بلند یێ فتوایێ رازیبوونا خوه‌ دیاركریه‌ بۆ ڤێ چه‌ندێ، به‌لێ ب مه‌رجه‌كی ئه‌وقاف یا پێگیربیت ب مه‌زاختنا ڤێ رێژێ بۆ سه‌خبێركرنا مزگه‌فت و حوجره‌ و قوتابخانێن شه‌رعی، راپۆرتا دویێ بۆ راستڤه‌كرنا قانوونا رێڤه‌برنا ئه‌وقافێ هاتیه‌كرن و پشتی رێكارێن قانوونی دێ خواندنێ بۆ دویێ بۆ هێته‌كرن و دگه‌ل خواندنا سیێ بهێته‌ په‌سه‌ندكرن.

هه‌ولێر، قائید میرۆ
د كۆنگره‌یه‌كێ رۆژنامه‌ڤانی دا وه‌زیرێ گه‌هاندنێ و سه‌رۆكێ ئێكه‌تیا زانایێن ئاینی هویرده‌كاریێن پڕۆژێ ئینته‌رنێتا پاكێجا خێزانی ئاشكراكرن و وه‌زیرێ گه‌هاندنێ دیاركر، هه‌ر كه‌سه‌ك یێ ئازاده‌ بۆ بكارئینانا ئه‌ڤان پاكێجێن خێزانی و گۆتژی، داخوازیێن زۆر هه‌نه‌ بۆ گرتنا پۆبجیێ، به‌لێ هێشتا بڕیارا دوماهیێ لسه‌ر پۆبجیێ نه‌هاتیه‌دان.
ئانۆ جه‌وهه‌ر، وه‌زیرێ ڤه‌گوهاستن و گه‌هاندنێ د كۆنگره‌یه‌كێ رۆژنامه‌ڤانی دا راگه‌یاند” ب رێنمایا سه‌رۆكێ حوكمه‌تا هه‌رێما كوردستانێ مه‌ پاكێجا خێزانی به‌رهه‌ڤكریه‌ و هه‌موو خێزانه‌ك یا سه‌ر پشكه‌ چ جوره‌ پاكێجه‌كێ هه‌لبژێریت، ئه‌ف مالپه‌ڕێن دبنه‌ ئه‌گه‌رێ تێكدانا شیرازا خێزانێ دێ دچوارچوڤێ ئه‌ڤان پاكێجان بهێنه‌ راگرتن وه‌كی مالپه‌ڕێن مامه‌له‌یێن ئه‌لكترۆنی و مالپه‌ڕێن سێكسی و یێن كڕین و فرۆتنا چه‌كی دكه‌ن، ئه‌ف پێنگاڤا حوكمه‌تێ چو په‌یوه‌ندی ب ئازادیا كه‌سی ڤه‌ نینه‌ و تنێ مه‌ره‌م ئه‌ڤه‌ خێزان بهێته‌ پاراستن و خه‌لك یێ ئازاده‌ بكار بینن، تنێ دیواره‌كێ ئه‌لكترۆنیه‌ و ده‌لیڤێ دده‌ته‌ سه‌میانێن زارۆكان، كو چاوا دێ شێن زارۆك و سنێله‌یێن خوه‌ لدۆر بكار ئینانا هنده‌ك مالپه‌ڕان بپارێزن، ئه‌ڤرۆ قومار ب ئونلاین دهێته‌كرن و كڕین و فرۆتنا چه‌كی دهێته‌كرن، هه‌روه‌سا توندۆتیژی دهێته‌كرن و چه‌ندین بابه‌تێن دی هه‌نه‌.
ئانو جه‌وهه‌ر گۆتژی” دێ به‌رده‌وام كار كه‌ین بۆڤێ چه‌ندێ پاكێجێن نو بهێنه‌ به‌رهه‌ڤكرن و گوره‌ی خواستا وه‌لاتیان دێ ڤه‌كرنا مالپه‌ڕێن ئینته‌رنێتێ بهێنه‌ سنورداركر، هه‌تا داخوازیه‌ك هه‌یه‌ بۆ گرتنا پۆبجیێ، به‌لێ ئه‌ڤا پۆبجیێ هێشتا نه‌بوویه‌ بڕیار و تنێ وه‌ك پێشنیار گه‌هشتیه‌ وه‌زاره‌تێ و نوكه‌ كار لسه‌ر دهێته‌كرن بۆڤێ چه‌ندێ بڕیارا دوماهیێ بهێته‌دان لدۆر قه‌ده‌غه‌كرنا پۆبجی، بكار ئینانا ئه‌ڤان پاكێجێن سنوردار ژلایێ مادی ڤه‌ چ پاره‌ ناهێته‌دان و تنێ كۆمپانیا د چوارچوڤێ ئه‌ڤان پاكێجان ئه‌و مالپه‌ڕێن دهێنه‌ قه‌ده‌غه‌كرن ناهێنه‌ ڤه‌كرن و هه‌موو تاكێن خێزانێ دشێن بكار بینن بێی كو كاریگه‌ریێن خراپ هه‌بن، ئه‌م یێ بزاڤان دكه‌ین دگه‌ل وه‌زاره‌تا نافخۆ سیمكارتێن نه‌ تۆماركری ژی بهێنه‌ راگرتن.
ژلایێ خۆڤه‌ژی عه‌بدولا سه‌عید، سه‌رۆكێ ئێكه‌تیا زانایێن ئاینی ل هه‌رێما كوردستانێ دیاركر” ئه‌ركێ پاراستنا ره‌وشتێ جڤاكی د ستویێ مامۆستایێن ئاینیه‌، له‌وڕاژی شاندێ ئێكه‌تیا زانایان سه‌ره‌دانا وه‌زاره‌تا ڤه‌گوهاستنێ كریه‌، ئه‌ڤه‌ژی وه‌كه‌ پشته‌ڤانیه‌ك بۆ وه‌زاره‌تا ڤه‌گوهاستنێ بۆ ئه‌ڤێ پلانا وه‌زاره‌تێ و پاراستنا بهایێن جڤاكێ مه‌، چونكه‌ زۆر كه‌س هه‌بوون ل كوردستانێ و ل ده‌رڤه‌ ب رێیا بكارئینانا مالپه‌ڕێن ئینته‌رنێتێ سفكاتی ب ئاینان دكر، ئه‌ڤێ چه‌ندێ ژی زۆر جاران كاریگه‌ری لسه‌ر بنه‌مایێ پێكڤه‌ژیانێ هه‌بو ل هه‌رێما كوردستانێ، هه‌روه‌سا ریكلامێن زۆر بۆ مادێن كحولیو هۆشبه‌ر دهاته‌كرن و پرۆپاگنده‌ بۆ كڕین و فرۆتنا چه‌كی دهاتنه‌ كرن، پشتی چه‌ندین ڤه‌كۆلینان دگه‌ل كه‌سێن بسپۆر گه‌هشتینه‌ ئه‌ڤێ باوه‌ریێ به‌رده‌وامبوونا ئه‌ڤان كه‌نال و مالپه‌ڕێن ئه‌لكترۆنی و سۆشیال میدیایێ دێ كاریگه‌ری لسه‌ر هزرا جڤاكی هه‌بیت.
عه‌بدولا سه‌عید ئاماژه‌كر” پاكێجا خێزانی ژلایێ بهایێ بكار ئینان و له‌زاتیێ دێ هه‌روه‌كی هێلێن ئاسایی بیت، به‌لێ پاكێج هه‌بن تایبه‌ت بۆ خێزانێ و بێگومان دێ كاریگه‌ری هه‌بیت لسه‌ر خێزانا هه‌رێما كوردستانێ، ژبه‌ركو دێ گوره‌ی ره‌وشت و تیتالێن جڤاكێ كوردستانێ رێك بهێته‌دان مالپه‌ڕ بهێنه‌ ڤه‌كرن، ب كورتی دێ ئینته‌رنێت بیته‌ خێزانی، مخابن به‌ری نوكه‌ ب ئه‌گه‌رێ ڤه‌كرن و بكارئینانا هنده‌ك مالپه‌ڕێن ئه‌لكترۆنی زیانێن مه‌زن گه‌هشتینه‌ وه‌لاتیێن هه‌رێما كوردستانێ، زانایێن ئاینی بكار ئینان و هنده‌ك مامه‌له‌ ب حه‌رام وه‌سف كرینه‌ و دگه‌ل شه‌ریعه‌تێ ئیسلامێ ناگونجن، چه‌ندین ئاریشه‌یێن كۆمه‌لایه‌تی په‌یدابووینه‌ و پاره‌یه‌كێ زۆرێ خه‌لكێ كوردستانێ ب رێیا هنده‌ك مالپه‌ڕان چوویه‌ و لیژنا بلندا فتوایێ ژی بكارئینانا وان حه‌رامه‌.